Be Mochi 21
21
Abu Bulu è ken a Urishelima ángá
1Atan a jè kwa ara ju ngge be echikǝ̀n mo ya aduwa a Afisa ángá, jè kwa ngga a mbǝ ken tén chá ebin etù a Koso. Zǝn ngga re mo nó, jè ken a Rode, jè ti a zǝn ken a Patara. 2Jè ben ngga a mbǝ akan, è nyaken chá sǝnsen mo Fonikiya, a jè kwa a tswa mo nó ángá, jè kwa ara enyam. 3A jè di chàkǝn Sayifuru ángá, jè twakwa ye ken chashin mo je, cha buhwyá. Ngga hon è ti je ken chá Siriya. Jè ken ndnya a Taya adia ba kpu be etkon éè no a tswa ngga hon ángá, a shwa a sen a zǝn. 4Adia jè tkunda vǝ be ya ekǝ̀n-etsǝ́m ya è no a zǝn ángá, jè no ngge be mo tsǝnò chwen a fà. Adi efka mo Engǝ́ mo Ehwya, bè no bgó Bulu anga jan ge e ken ye a Urishelima ra. 5Tea engga atan a ja nya, è bwa ara ángá, jè vǝ kèn mo je. Binbin mo be ya ekǝ̀n-etsǝ́m, ngge be gwa be ngge be mbǝgya mo be, è gwa je, nè du je vǝ́ a je mo eten efifi hon. Ekǝnggwa jè nggwa be ekpanvǝ mo je a chu akwabǝ a tón sǝn hon, jè bgó ebgo. 6A je dwa ara so kèn ángá, jè kwa ngga a mbǝ hon, a be bè twabǝ nya ḿ mo be a mu be.
7Atan a jè bwe gu ara mò a ja bwe a Taya ángá, je ti kèn kengga a Tolemayi, zǝn a je bi be ya ekǝ̀n-etsǝ́m fwa, jè no ngge be a zǝn mo tsǝ akan. 8Zǝn ngga re, jè vǝ kèn bwa a Kesariya bwa kwa echan a mbwe, Eduedgon Filibu, éè no a engga mo be chwen a fà hon, ya a bè swa be, be e kwa be nwenjwa mode a Urishelima ángá. 9Gè no ngge mbǝgya ndegwa ndwe ya è chà nya be don ra, bè no be ya è fijan be nobǝ fwa anga.
10Atan a je no ara a zǝn mo be tsǝnò embo ángá, efojan akan, bè fǝ́ ye anga Agabu, è vǝ chá sǝnsen mo Yahudiya shwa. 11Gè bwa a zǝn je nè ti kanda mo Bulu, ti tefǝn be bu ngge be fù mbwe, nè jan, “Engǝ́ mo Ehwya jan, ‘Ena abu be ya a Yahuda è no a Urishelima a tè yagwamo kanda ena na ti ye a du a bu mo be ya fwa be ya a Esǝrela ra ángá.’ ”
12Atan a je fo enò ángá, a je tangge be nobǝ ya è no a zǝn ángá, jè bgó Bulu jan ge e vǝ ye a Urishelima ra. 13Ekǝnggwa Bulu è janfwe je jan, “Ano a nye bwe anga, nye no kpedwa tsen m tsuruku anga? Adia m notsa ara, fwa ye adi etem tete ra, tea me e fǝ fǝ a Urishelima gaten, a chu ti mo Yeso Etsodwe.” 14Adia jè jangga ti je ye ra ángá, jè gwa ara fwa hon, jè jan kpwà, “Ge e bwe abu Etsodwe dgyan anga.”
15Chashin mo mò ena, jè té fuchin, jè kwa ara kèn mo je evǝ́m chá Urishelima. 16Be ya ekǝ̀n-etsǝ́m ya ehwyà ya è vǝ a Kesariya ba je bwa ángá, è kpu je ken a mu Manason, zǝn a ja no ángá. Manason hon è no ya a Sayifuru ngge gè no akan a engga mo be ya è kwafya tsǝ́ekǝ̀n a chu Ehwya ángá.
Bulu è bwangga a Urishelima
17A jè bwangga a Urishelima ángá, be ya ekǝ̀n-etsǝ́m è cha je ngge vǝtsen. 18Zǝn ngga re mo nó, Bulu è ken ngge je evǝa je e ken e di Yakubo. Jè ben be echikǝ̀n hon binbin a zǝn. 19Atan a Bulu è bi fwa ara be fwa ángá, gè jan gu be mò a Ehwya è bwe a tswa engga mo be ya e fwa be ya a Yahuda ra adi efka mo edgon a gè du ángá.
20Atan a bè fo enò ángá, be tàn Ehwya. Kǝnggwa bè jan ye jan, “Nwenjwa, o yi ara jan be ya a Yahuda echo embo tsǝ́ ara ekǝ̀n a chu Ehwya, ngge binbin mo be a be ya e chifǝ anga adi ebam mo edon mo Mosa ángá. 21Bè jantu ara be jan, ò tú binbin mo be ya a Yahuda ya e dwano a tswa mo be ya e fwa be ya a Yahuda ra, jan be e ba be edon mo Mosa ra. O jan be e tsen be mbǝgyashan mo be tkyà ra ngge be e no be zǝno abu be ebǝ ata è tú be ángá ra. 22Asuswana mò a ja bwe ángá a ano? Ba yi a tén eyim jan o bwa ara. 23Enona, bwe mò a je jan o anga: Je no ngge be ndedon ndwe ana, ya e fan ara efan a chafya mo Ehwya, 24kpu be nya, a bo ngge be, nye e bwe moefì nwone a bwe binbin mo nye a no enachacha, we kpwa tse evǝa be e hwi be chu. Kǝnggwa egwa egwa a yi jan, fwa ebi akan fwa didi ye a chu mò a be jan be a chu o ángá ra. Ba yi jan o no zǝno anga abu edon jan ángá. 25Tea adi ḿ mo be ya e fwa be ya a Esǝrela ra ángá ya e tsǝ́ ara ekǝ̀n na, jè ba no ara be adi afketa chí a chu mò, a jè pafu ángá jan ne, be e kwaju ngge be mode a be ti tkonno ara be sen, be e kǝ́n be gwe e no ngge ngǝ ángá ra, ngge gwemo a be fǝ̀ngu efǝngum ángá, ngge edwa ekacha.”
26Zǝn ngga re, Bulu è kpu be ndedon ndwe hon nè ken nacha chu ye ngge be. Kǝnggwa gè ken a Àtá mo Ehwya nè jantu be nobǝ nò a moefì mo ju enacham mo be hon a kǝn-etkyen, ngge nò a ba no mò etinom a chu egwa egwa mo be ángá.
Bè fu Bulu a Àtá mo Ehwya
27Atan a tsǝ chwen a fà hon tén ara ga kǝ̀n ángá, be ya a Yahuda ya ehwyà chá efa mo Eshiya è di ara Bulu a Àtá mo Ehwya, nè tú be nobǝ binbin etsǝn, jan be e fu ye. 28Bè no tandwa anga jan, “Be ya a Esǝrela, nye bwejwa je! Ena a nobǝ e tú bwi be nobǝ egwa egwa ngge chagwa chagwa mò esera anga a chu be nobǝ mo je, edon mo je ngge a chu zǝn ena ángá. Kpwà ye ena tete ra, gè kpu be ya a Girka kwashi ara a tswa Àtá mo Ehwya n bwe zǝn echanwenwen ena nga ara didi.” 29(Be jan enò adia be di ara Tarofimo ya a Afisa ngge Bulu tsǝnò akan e twafǝ̀ ángá a tswa eten hon, nè ka anga jan Bulu nè ti ye kwashi ara a Àtá mo Ehwya hon.)
30Tswa eten hon binbin è mbo ngge tsuruku enyim etkyen, bè tse bwa fǝn gu a zǝn akan. Bè fu Bulu nè vǝ ye vǝ́ a je mo Àtá mo Ehwya hon kè akan nè fǝpe ara be tafǝmo. 31Atan a bè tkyan anga be e gu ye ángá, fwa hon e kengga ara a zǝn ekpondgyen mo be yakàn mo Roma jan ne binbin mo Urishelima hon ne no a tswa etkekàn. 32Kè akan, ekpondgyen hon kpu be yakàn ngge be chu mo yakàn ya ehwyà nè tseshi a zǝn a be nobǝ éè fǝnno ángá. Atan a be ya etkekàn hon e di ekpondgyen mo be yakàn ngge be yakàn mbwe ángá, bè gwa ara Bulu mò ebum.
33Kǝnggwa gè du be yakàn mbwe jan be e fu ye nè jan be e tè ye ngge be awya fà. Gè ká be eka mo ende a Bulu hon no ángá ngge mò a gè bwe ángá. 34Be ya ehwyà a tswa be nobǝ embo hon, jan mò akan, ya ehwyà jan mò efki. Atan a ekpondgyen è hon di jan ge ben ye ebi ra adia be nobǝ e no tàn wi dwa ángá, gè jan be e ti Bulu e ken a echieno mo be yakàn. 35Atan a Bulu è bwangga ara a zǝn etonvǝ́ mo ekwashim a tswa mo echieno hon ángá, gè no ara jan be yakàn hon be e kan ye etkyen adia be nobǝ embo hon è no chifǝ anga be e gu ye. 36Be nobǝ embo hon ya è ba be anga è no tandwa anga jan, “Nye gu ye.”
Bulu è jan fwa ngge be nobǝ embo hon
37Abu be yakàn hon è nda anga be e ti Bulu e kwa e shi a echieno mo be ángá, gè jan ekpondgyen mo yakàn hon jan, “O cha ara dwa me e jan o fwa akan?” Ekpondgyen hon è janfwe ye, “O foyi hwi Girka?” 38“O fwa mbo ya a Masa nwene è tke etkekàn akan adi be je e twafǝ̀, nè du be nobǝ echo ndwe ekpe tse ken a tswavǝ́n anga ra?”
39Bulu janfwe ye, “A me ma ya a Yahuda, eten mam a Tasu a sǝnsen mo Kilikiya. Ma nobǝ a tswa eten efifi e no ngge egǝ̀n àywá ángá. M dònvǝ gwa m me e jan fwa ngge be nobǝ hon.”
40Atan a ekpondgyen mo yakàn hon è no ara ye efwa ángá, Bulu è nyi etkyen nè ywa a chu embe mo zǝn fu echam, nè kpu re bu mbwe etkyen evǝa be nobǝ be e buton e fo ye. Atan a be nobǝ è kpo gushi nya ángá, gè jan be fwa adi hwi Aramaya.
S'ha seleccionat:
Be Mochi 21: ICH
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2024 Luke Initiative for Scripture Translation