Be Mochi 19
19
Bulu a Afisa
1Atan a Apolo è chà no a Korinti ángá, Bulu è kwa ken chá be efa mo zǝn hon nè kengga a Afisa. Ge ben be ya ekǝ̀n-etsǝ́m ya ehwyà a zǝn, 2nè ká be eka jan, “Nyè cha ara Engǝ́ mo Ehwya atan a nye tsǝ́ekǝ̀n anga?” Be janfwe ye, “É yé, je chà fo didi je jan Engǝ́ mo Ehwya no ra.”
3Enona, Bulu ká be eka jan, “Yishwa Batisǝma a bè bwe nye ángá, è no engǝ?”
Bè janfwe ye jan, “Batisǝma yishwa a Yohana è bwe anga.”
4Bulu è jan, “Yohana è bwe be nobǝ batisǝma mo etwa etwam, nè jan be nobǝ anga jan be e tsǝ́ekǝ̀n a chu Yeso, ende e nyabwa chashin mbwe ángá.” 5Atan a be fo enò ángá, be bwe be batisǝma a di ti mo Yeso, Etsodwe. 6Atan a Bulu è tu be bu a chu ángá, Engǝ́ mo Ehwya è shwa be a ju, bè kwa ara fwa ejanm adi be hwikpen nè no fijan be fwa a bè fo a zǝn Ehwya anga. 7Be nobǝ hon è no be ndedon, gwi chu fà.
8Bulu è ti fka ta nè no jan be fwa anga ngge ekǝ̀n-ebonm a àtá chuefǝnm. Gè no twa efyan anga, nè tkyan ge e tsa be, be e chadwa a chu fwa a gè jan be anga a chu zǝnotì mo Ehwya ángá. 9Tea be ya ehwyà a engga mo be è cha chu nè chadwa tsǝ́ be ekǝ̀n ra, nè janpin Efwa hon a chafya mo be nobǝ. Gè nyagwa be nè kpu be ya e tsǝ́ ara ekǝ̀n ángá nya ngge ge, nè no tú be mò anga nogwa nogwa a àtá moetum, mo Tirano. 10Moetum hon è ken kpwà enò kengga mo je fà, enona, binbin mo ya è no cha efa mo Eshiya, be ya a Yahuda ngge be ya a Girka, è fo fwa mo Etsodwe.
Mbǝgya ndedon chwen a fà mo Siva
11Ehwya è bwe be moeditanm ezǝzǝju àywá a be nobǝ è chà didi be ra chá bu mo Bulu, 12è kengga èé be mokponfin eno e ra mokàn mochi mbwe, ano bè ti ken yi be ya modwa a ju, be modwa hon tswa tén etswam tangge be ya be engǝ́ esera è no a ju be ángá, be engǝ́ hon è twagwa be.
13Tea be ya a Yahuda ya ehwyà ya è tkukwa zǝn ken anga, nè no nyonvǝ́ be engǝ́ esera ángá, è tkyan be e bwe mochi ngge ti mo Yeso Etsodwe, evǝa be e ti e nyo e vǝ́ be engǝ́ esera èé be. Bè jan, “Adi ti mo Yeso a Bulu du bwi edgon a chu ye ángá, m kpon nye dgyén, nye gwa a je.” 14Atan enò, Ekǝ́n echa akan mo ya a Yahuda a bè fǝ́ anga Siva, è no ge mbǝgya ndedon chwen a fà, bè bwe yishwa mò hon ena anga èé be. 15Tea nò kè akan, engǝ́ esera hon è janfwe be, “M yi Yeso, m yi fwa a chu Bulu, tea a nye wá! Nya be ara?” 16Ekǝnggwa nobǝ hon a engǝ́ esera è no ye a ju ángá, è fǝ etkyen nè ngga be a ju adi mo ebum nè twafǝ̀ ara echafǝju mo be binbin, nè bu be mofǝ̀, egwa egwa mo be è tsegwa mu hon ebyan ngge kpan a ju ye.
17Binbin mo be ya a Yahuda ngge be ya a Girka ya è dwano a eten a Afisa è fo gu fwa ena ángá, è tsen etsentsen àywá nè tigǝ̀n ti mo Yeso Etsodwe. 18Embo mo be ya è tsǝ́ ara ekǝ̀n ángá, è bwa janvǝ mo be a chu be ebgen mo be a bè bwe ángá chafya mo be nobǝ. 19Embo mo be ya è bwe emotete anga è kpu gu be afketa mo be kpu tkòn gu a fǝ̀, a chafya mo be nobǝ. Atan a bè ka fǝn gu tse mo be afketa a bè kpu tkòn ángá, fwentse hon e kengga tse mochi mo nobǝ akan mo be tsǝ́nò echo gwi chwen (50,000). 20A chu mò ena, fwa mo Etsodwe è no bushan anga nè no ngge echakpo àywá a engga mo be nobǝ.
21Chashin a be mò ena è bwe gu ara ángá, Bulu è ka a tsuruku mbwe jan, ge tkukwa a gu be efa mo Makidoniya ngge Akaya sangǝ́ ge chà a ken a Urishelima. Gè jan, “Atan a m ken ara a zǝn ángá, ge no m kenm me e ken a Roma.” 22Enona, gè tson be ebwejwa mbwe fà, Timoti ngge Erastu, ken a Makidoniya tea gè beti bishi a efa mo Eshiya mo be tsǝnò fa.
Etkekàn a Afisa
23Atan enò etkekàn è nyi etkyen a Afisa a chu Efwa hon. 24Ekendwa akan a bè fǝ́ anga Demitiriyu, è ti azufa ti dwa bwi mo musen mo ehwyá ndegwa mo be, a bè fǝ́ anga Atemi ángá. Mochi ena è vǝ tse bwa ye anga àywá, a ge ngge be ya è no ngge yishwa mobwebwe ena a zǝn ángá. 25Kǝnggwa gè fǝ́ fǝn gu be ya è bwe yishwa mobwebwe mbwe anga dwa, nè jan be jan. “Be ndedon, nye yi jan je ben tse anga àywá adi efka mo be mobwebwe mo je ena. 26Nye di, nye fo abu Bulu ena tsa twanga ara tsuruku mo be nobǝ embo, fwa ye a Afisa tete ra, tea gè ba gu be efa mo Eshiya n no jan be anga jan be ehwyá a be kpwabu mo nobǝ bwe a be ángá, fwa didi be be ehwyá ra. 27Fwa bwa ara! Fwa ye jan be nobǝ jan a pin ti esese mo mobwebwe mo je ena tete ra, tea ba ti musen mo Atemi, ehwyá mo je ndegwa ena, ne fwa mo nó mò akan ra. Enò gaten, Atemi ehwyá ndegwa hon, a be nobǝ a tswa efa mo Eshiya ngge binbin mo zǝnchaje fen ye anga a ben ye egǝ̀n mbwe efwe ra.”
28Atan a bè fo fwa ena ángá, bè fku tsuruku àywá nè kwa ara dwa etànm no jan anga jan, “Edgwa no ḿ mbo! A bo Atemi mo be ya a Afisa.” 29Tswa eten efifi hon è mbo ngge dwa etànm, kǝnggwa, be nobǝ hon binbin è no tse ken anga a afyan mo eten efifi nè vǝ be Gayu ngge Aristaku, be ya a Makidoniya éè no be ya emmeken mo Bulu ángá gwa a je. 30Atan a Bulu è dgyan anga ge e kwa e shi a tswa be nobǝ embo hon èé ge ángá, be ya ekǝ̀n-etsǝ́m è cha be ye dwa ra. 31Èé be chutì ya ehwyà a efa hon ya è no be shushwa ye ángá, tson chí bwa jan ne ge e ken e didi a afyan hon ra.
32Binbin mo be nobǝ hon è no kashwà wi fwa anga, ya ehwyà mo be e no jan fwa akan anga, ya ehwyà è no jan efki anga. Atsǝn mo be è yi be mò e bwe bè fǝnno a zǝn anga ra. 33Be ya a Yahuda è tsǝ Alezanda ken chafya mo be nobǝ embo hon evǝa ge e jan be nobǝ fwa. Be ya ehwyà mo be nobǝ embo hon è tàn ye dwa a chu. Gè ti bu mbwe etkyen evǝa be e buton e fo ye. 34Tea atan a bè yi ara jan a ge ga ya a Yahuda ángá, binbin mo be ti awa fà nè no tangǝ́shi dwa anga abibi jan, “Edgwa no ḿ mbo! A bo Atemi mo be ya a Afisa.”
35Atan a ebamo mo eten efifi hon è du be nobǝ hon kpo ara nya ángá, gè jan, “Be ndedon ya a Afisa, nobǝ akan no m̀ mbwe a tswa zǝnchaje ena nwene e yi ye jan, a Afisa ne fu àtá ngge ten echanwenwen mo ehwyá ndegwa Atemi, nwone é twashwa chá kpe ángá, no a kpwabu mbwe ra? 36No enona, adia nobǝ akan twa a ti ye efyan mo fwa ebi ena ra ángá, ge no esese nye e kpo nya, nye e bwe nye mò a tswa emme ra. 37Nye kpu be nobǝ ena bwa ara ana, bi adia be chà bufki be àtá mo ehwyá mo je eno e ra be janpin be ehwyá mo je ndegwa ra. 38Tea ano Demitiriyu ngge ya a mobwebwe mo be no akan ángá, no ngge fwa a chu ende akan, be àtá kǝ́n ekpènm no efkigwagwa ngge be ekpenkǝ́n no a tswa mo nó. Be e ken e dwakǝ́n mo be. 39Ano mò akan efki chà no, a nye nda anga be e jan e tswa nó, ge no kenm be e ti no e ken a tswa chuefǝnm mo be nobǝ a eten hon evǝa be e kpèn e tswa nó. 40Ano je ma bwe yi je ra, ba kpèn je kǝ́n jan je du be nobǝ tke etkekàn a chu mò a je bwe nòmo na, abu je fwa je ngge fwa a ja jan a chu etkekàn ena ra na.” 41Atan a gè jan fwa ara enò ángá, ge jan be nobǝ embo hon be e nya a mu be.
S'ha seleccionat:
Be Mochi 19: ICH
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2024 Luke Initiative for Scripture Translation