Be Mochi 16
16
Timoti è ba be Bulu ngge Sila
1Bulu ken a Dabe ngge Listra gaten, zǝn a be ben ezon-ndedon akan a bè fǝ́ ye anga Timoti. Ayi ye è no ya a Yahuda, gè tsǝ́ekǝ̀n no a chu Etsodwe, tea ate ye è no ya a Girka. 2Be ya ekǝ̀n-etsǝ́m a Listra ngge Ekoniya embo, è jan fwa esese anga a chu ye. 3Bulu è dgyan anga Timoti ge e ken ngge be adi kèn hon, enona, ge du be tsen ye tkyà adia be ya a Yahuda ya è no a zǝn ángá, è yi ara jan ate ye è no ya a Girka ángá. 4Abu bè no kwa ken be eten ngge eten anga, bè jan be ya ekǝ̀n-etsǝ́m pyoro a be etsonchi ngge be echikǝ̀n è pa a Urishelima ángá, ngge be e tse nó. 5Enona, be ya è tsǝ́ekǝ̀n a chu Ehwya, è ben ekǝ̀n ejanbonm a chu chaebi ngge efim mo be è no tubi anga nogwa nogwa.
Enggwà è kan Bulu a fǝzǝn a chu nobǝ akan ya a Makidoniya
6Chashin, Bulu ngge Sila è ken chá efa mo Firijiya ngge efa mo ya a Galati adia atan enò, Engǝ́ mo Ehwya è jangga ara be Fwa Esese ejanm a efa mo Eshiya. 7Atan a bè bwangga zǝn a sǝnsen mo Misiya kpwà no ángá, bè dgyan anga be e kwa e shi a tswa sǝnsen mo Bitaniya tea Engǝ́ mo Yeso è cha ye be dwa ra. 8Enona, bè ken chá Misiya, nè ken shi a Torowa. 9Etsǝ nò eni, enggwà è kan Bulu a fǝzǝn, gè di nobǝ akan ya a Makidoniya è ywano nè no bgó ye anga jan, “Penyi bwa a sǝnsen mo Makidoniya we bwe e jwa je.” 10Abu Bulu è di ara nó adi enggwà è kan ye a fǝzǝn ángá, jè té fuchin kè akan mo ekenm a Makidoniya adia jè ti ara ye jan a Ehwya fǝ́ je dwa jan je e ti Fwa Esese hon e ken be.
Lediya è tsǝ́ekǝ̀n a chu Yeso
11Jè kwa ngga a Torowa shi tén chá ebin etù mo Samotira, ekǝnggwa zǝn ngga re mo nó, jè ken a Niyapoli. 12Jè ti a zǝn ken a Filibi nwone è no a bu mo gomnati mo ya a Roma nè no eten efifi a sǝnsen mo Makidoniya ángá. Jè ti be tsǝnò embo a tswa eten a zǝn.
13Nò nya Etkem, jè vǝ́ a je mo eten efifi hon, ken shi a tón sǝn, zǝn a jè ka anga jan ja ben zǝn a ja bgó ebgo ángá. Jè chu shi a sen, jè kwa ara be ndegwa ya è fǝnno a zǝn ángá fwa mo Ehwya ejanm. 14Akan a engga mo be ya éè fo je anga, bè fǝ́ ye anga Lediya, ya eten a Tiyatira. Gè no ende éè jwade adanmo ejubebe mo tse anga, nè no ende éè tsen Ehwya anga. Etsodwe è fki tsuruku mbwe, gè chadwa a chu Fwa Esese a Bulu è jan anga. 15A bè bwe ara ye batisǝma abibi ngge be ya mbwe ye ángá, gè bgó je jan je e ken e kwa echan a mbwe ye. Gè jan, “Ano nye cha ara dwa jan ma ya ekǝ̀n-etsǝ́m ebi a chu Etsodwe, nye e bwa e kwa a mbwe m.” Gè chungǝ́shi, nè devǝ́ a chu jè.
Be twa Bulu ngge Sila a àtá ehwyatu
16Nò kè akan, abu jè nyashi a zǝn ebgo ebgom ángá, nwen ndegwa fí akan è no ngge engǝ̀ mo fwa efijanm mo mò a bwe nòya ángá, è ben je. Gè vǝ tse àywá bwa be yagwamo mu mbwe anga adi fwa efijanm mo mò a bwe nòya ángá. 17Gè ba Bulu ngge je, nè no tandwa anga jan, “Be ya ena a be fí mo Ehwya e Gǝ̀n ti ara ángá, ya e jan nye anga abu nya ben ega ángá.” 18Gè ti be tsǝnò embo, nè no bwe anga enò. Ekǝn-etkyen, a Bulu è fku ara tsuruku ngge ge ángá, gè jan engǝ́ esera hon éè no a ju ndegwa hon ángá, jan, “Adi ti mo Yeso Kristi, m kpon o dgyén, we gwa a je a ju ye.” Engǝ́ hon gwa a je a ju ye, atan enò.
19Tea atan a be yagwamo mu mbwe è di jan efwa mo tse ebenm mo be nè twape ara ángá, bè fu Bulu ngge Sila nè vǝ be ken a afyan, chafya mo be ya emwentì. 20Bè kpu be bwa chafya mo be ya a kpèn be kǝ́n ángá, nè jan, “Be ya ena a be ya a Yahuda, be chitkon gu ara tswa eten efifi mo je n du be nobǝ no tandwa anga. 21Be tú be nobǝ moefì nwone a edon mo je, a je ya a Roma cha ye dwa mo nó ra, n gwa ye je je e bwe ángá ra.”
22Be nobǝ embo èé be, è no tandwa jan fwa esera anga a chu Bulu ngge Sila. Be ekpenkǝ́n è du be bè kpenvǝ́ be mokàn a ju, nè bu be mò ngge tuetsǝ́n. 23Atan a bè bu fwa ara be mofǝ̀ ángá, bè kpu be ken a àtá ehwyatu. Bè twa edgonzǝn hon echa jan ne, ne edgon seshi be afwa be tse a ga. 24A gè cha ara edon a be twa ye ángá, edgonzǝn hon è kpu be du shi chá tswa mo àtá ehwyatu hon nè hwya be ehwyatu a kpwafu.
25A tswa-tsǝ, Bulu ngge Sila è no bgó ebgo nè no twa bón chwano Ehwya anga, be ya bè fu nggwano a tswa mo àtá ehwyatu anga, è no fo be anga. 26Kè akan, sǝnsen è chìju ngge echakpo, nè du fù mo àtá ehwyatu hon chìju. Binbin mo be tafǝmo mo àtá hon è fkigwa, be awya mo tse a bè kpu hwyafu be kpwafu no ángá è fken nggwashi gu a sen. 27Atan a chu mo be edgonzǝn mo àtá ehwyatu hon è zǝbwa adi dan nè di jan be tafǝmo mo àtá ehwyatu hon binbin è no efkigwagwa ángá, gè vǝ hwen efǝ mbwe adi fya mo nó, nè nda anga ge e gu chu ye adia gè ka anga jan be ya è no a tswa àtá ehwyatu hon ángá nè tsega gu ara. 28Tea Bulu è tandwa ngge echakpo jan, “Kpo nya. We dì mbo ju o ra, je no gu ana.”
29Edgonzǝn mo àtá ehwyatu hon è tson be e kpu be petila è bwa ye, nè tseshi a zǝn a Bulu ngge Sila nè kposhi a chafya mo be, emme è no bu be anga a ju a tswa etsentsen. 30Kǝnggwa gè kpu be gwa a je nè ká eka jan, “Be yagwamo mu, mo e no ra kenm me e bwe evǝa me e ben ega ángá a ano?”
31Bè janfwe ye, “Tsǝ́-ekǝ̀n a chu Yeso Etsodwe, a bo ngge be ya mbwe o, nya ben ega.” 32Kǝnggwa bè jan ye ngge binbin mo be ya è no a mu ye anga Fwa Esese. 33Etsǝ atan enò gè na gu be kpan è no a ju be ángá. Kǝnggwa a ge ngge be ya mbwe ye, bè bwe be batisǝma. 34Gè kpu be ken a mbwe ye nè no be mode, a ge ngge be ya mbwe ye è fo etkwa àywá, adia gè tsǝ́ ara ekǝ̀n a chu Ehwya ángá.
35Zǝn ngga re mo nó, be ekpenkǝ́n è tson be ya mochi mo be, be e ken e jan edgonzǝn mo àtá ehwyatu hon jan, “Gwa be ya eni be e nya.” 36Enona, edgonzǝn hon è ken jan Bulu jan, “Be ekpenkǝ́n tson bwa ara jan je e gwa o ngge Sila nye e nya. Enona, nye e nya m̀ mo nye a tswa adgye.”
37Tea Bulu è jan be jan, “Bè bu ara je mò a chafya mo be nobǝ, fwa ye ngge eka ekam a chu be mò a jè bwe sangǝ́ ra, nè kpu je nggwa a àtá ehwyatu bi adia ja ya a Roma ángá. Asuswana be nda anga be e gwa je je e nya engǝ̀tonton? É yé, be e bwa e chu be, evǝa be e du je e vǝ́ a je.”
38Atan a be ya, a bè tson be è twabǝ ken jan be ekpenkǝ́n fwa hon, ngge abu bè fo jan Bulu ngge Sila a be ya a Roma ángá, bè tsen etsentsen. 39Enona, bè bwa bgó Bulu ngge Sila a àtá ehwyatu hon. Ekǝnggwa bè kpu be vǝ́ a je nè bgó be jan be e gwa eten efifi hon. 40Atan a Bulu ngge Sila è gwa àtá ehwyatu hon ángá, bè twabǝ ken a mbwe Lediya. A zǝn a bè ben be ya ekǝ̀n-etsǝ́m nè janbon be ekǝ̀n. Kǝnggwa bè gwa eten efifi hon.
S'ha seleccionat:
Be Mochi 16: ICH
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2024 Luke Initiative for Scripture Translation