Philémon 1
1
Mikudéga na kômbô
1Oô te me Paul, nandé gô eba atsôgôô gô mabégô metso maJésus‐Christ. Wa na muana aTétee n’asô n’anyô agô mbumu éaNzambé, Timothée tôgôtendéa.
Tôgôtendéa Philémon, ôndéké na vitoo n’asô gô éyanzee édué. 2Gésangô gegé te na gôndé asi mbumu éaNzambé awanya kuka yetso gô eboo. Te na gôndé kadine éasô n’anyô agô mbumu éaNzambé, Appia, na gôndé Archippe andé gôégenya ébadi évo n’asô. 3Nanyôngéô mbe Tétasô n’anyô Nzambé, na Kumu asô n’anyô Jésus‐Christ anôétsa mate medi na gétabé sedi.
Kumane émakumédu Philémon
4Philémon, éwe te muana aTétee n’ami agô mbumu éaNzambé. Kuku yetso vavovo me na Nzambé, tseeba ékuméda Nzambé gôndé éwe. 5Me namookô kumane ékumédu éwe. Namookô gandé éwe môtémoo wetso gôndé Kumu Jésus gémôtsumé paga. Namookô gandé éwe na vitoo na asi mbumu éaNzambé muetso. 6Me naduka Nzambé mbe évambee éndé wa n’anyô gôsatôtsuma Nzambé paga, éngatômenyeda pepe ôkitie ôndéké n’asô n’anyô. Okitie ône te gô tôndé monyovo na Christ, ône amasevou na Nzambé. 7Ah muana aTétee n’ami, étondo éndé n’ewe ékasôgéda me na gényônga. Na ôndé dôta gôésuméda mitéma miasi mbumu éaNzambé.
Paul amasungéa Onésime va mbene aPhilémon
8Gô ényangee émeetsô me na Christ, noongôa égôtôma ti tômaga mbe: Indaka nani. Buéyé gandé me n’enyangee, tsagôtôma. 9Nagôvooto te vootogo mbe: Ongeenda ébégôe te gô étondoe éndé n’ewe. Te me Paul navovoni, me te pene éoo. Na va ngongone vane, me te ône andé gô eba atsôgôô gô ina aJésus‐Christ. 10Me nagôgondo gô ébégôe ésungéa me Onésime. Angô te muanami gô ina aChrist. Me naka tétedi agô mbumu éaNzambé gômatévéda me angô nzéane gôéwesea na gôndé Nzambé gôévamba n’edi, tôndé gô eba atsôgôô. 11Va mbeego angô asibaké na tsoongo gôndé éwe, géé deo noo aka na tsoongo gôndé wa n’oo muetso abaé.
12Angô te gandé géeme gévo sagô ôtôe wami. Nagôkudégéa angô. 13Namanyôngéô émôkenea n’ami gô eba atsôgôô ôdigaa me gôébégô éaTsangô Eamôsôba. Namanyôngéô mbe ayanzéa me gô gévénga soo. 14Ivô tsinyôngéô évanga nane, éwe ta madeo ôsisinga ébégôe. Me tsanyôngéô égôtindéga mbe aabéaka. Nanyôngéô mbe ôaabéa ganyôngéô ômuene.
15Mavooe Onésime amanôtôga gôndé éwe pesu andéô te mbe ônganikéa émôdiia môbô na môbô. 16Menya mbe angô deo noo andé te môvéga, ivô angô asadigaa n’ewe g’ôvéga ôtévo. Gôndé na éene ébégô éôtéa ôvégee. Angô te muana aTétee n’oo, nôndé na vitoo gôndé Christ. Gôndé me, angô te muanami amôtéma. Géé gôndé éwe, ôngootéa émônyôngéô pepe. Evambee éanyô te gô éyanzee éatsengene na te gô ina aKumu Jésus.
17Okô mbe wa n’oo tôndé n’evamba, tambô kenea Onesime ti eembe te me. 18Okô agôbévédi ébégô, buéyé mbe agôsombeyi môtete, eetso éne, ôbono te me. 19Me nagôtendéa ébégô édué na misavimie miamemuene mbe: Paul nangagôvanéa. (Me tsangagôbangôéda mbe ôndé na môtete na me Môtetee te monyoe woo.) 20Endé te nane, muana aTétee n’ami agô mbumu éaNzambé. Me nagôduka ébégôe éne gô étondo éaKumu Jésus. Kasôgéda môtémami gatôénda gô mbumu éaNzambé.
21Vandé me gôégôtendéa gésangô gegé tsabômu mbe éwe ôngasinga éne égôduka me. Namemya mbe ôsangakôdéa n’ene étévo. 22Na dôta, me nangôône. Kônzéa me muakô. Me namenya mbe Nzambé andé gôéaabéa môdukée wanyô mbe nanika na gôndé anye.
Kômbôye yamôyusumédu
23Epaphras andé n’ami gô eba atsôgôô gôyanzéa we Jésus‐Christ. Agôkômbôa. 24Avo dôta agôkômbôani te Marc na Aristarque na Démas na Luc, ane andé éyanzevo n’ami.
25Te mbe mate maKumu asô n’anyô Jésus‐Christ mabaké gô môtémoo.
S'ha seleccionat:
Philémon 1: TSV
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Alliance Biblique du Gabon (Bible Society in Gabon) 1983