Jude 1
1
Mikudéga na kômbô
1O te me Jude, môyanzi aJésus‐Christ. Me te muanayaa aJacques.
Natendéa anye nômaabéa gômabambéô anye na Nzambé na nôdigaa évambevo n’edi anye nôkeneo na Jésus‐Christ.
2Nanyôngéô mbe nôsingéô n’edi kokoo, na mbe anôsuméda mitémamie na mbe nôdigaa gô étondo éedi. Eetso gégômbéô.
Eekédi adiboe apata mbe Nzambé asaba
(Bono na 2 Pierre 2:1–17)
3Omami amôtéma namanyôngéô énôtendéa ébégôe éagéobogeoge gématôobou, wa n’anyô muetso. Ivô n’atsatsee nookô pepe tsôvé gôénôkasôgéda mitémamie na gésangô gegé mbe: Genyani ébadie gôéebakanéda mabégô mapie mameetsa Nzambé gôndé ane amamôétsa mitémamie gémôtsumé paga. Nzambé amatôétsa mane medi mapie kukepo na koo. 4Endé te nane. Avo oma eenza mane maNzambé amakudungana anguene va gatse anye. Akoa meekédume mangeba yaNzambé gôémabunza maka wene mônongo. Abuta éétsô mitayi gô metso mabévani meendahngô. Akina Jésus‐Christ, ône andé Kumu asô n’anyô na môékédi asô n’anyô asaba na gégoni. Môtsundue waô ômeevédu na mbeego gô Matendeo MaNzambé.
5Anye nôsabômu mabégô mema. Eébéyée nane, nanôbangôéda gamayanza Kumu gôéoboo ana aIsraël g’ôvéga ômadigaahngô gô Egypte. Va mbenene vane amayôha ana aIsraël muetso amakina émôgobedani. 6Bangôani dôta gameenda asi g’ôba ayanzi aNzambé. Avo asinyôngéô ényangee égege émeetsô angô. Amanôtôga gô gédigaage saô. Nzambé akenea angô gô tungu éevitsi éabangata édagani. Andé wangô katôgô môbô na môbô. Eenea nyaa ôvôni ôngatsundédu angô na Nzambé. 7Bangôani dôta Sodome na Gomorrhe na mivo misenge mimabambana na miangô. Asi misengemie mine ameenda mônongovo gameenda asi g’ôba abévani ane. Ahmaahdeekeda anguene gôéyanza gésasô saminongo mietso na gôégésangana n’oma gô minongo misivangé Nzambé. Omee ane amasosédu na soto gésimékéni. Ene émabuéa gôndé ahngô te géevédéô sasô n’anyô deo noo.
8Endé te nane na amôgôôe ane ahkudungana va gatse anyô deo noo ayanza mônongovo gameenda akaô va mbeego. Ahngô eena mabégône gô ndoti na mangô makeda angô gôébévéda yôtôye yaanguene. Eenza éanyangee éaNzambé. Adeta ane andé n’ondômba ag’ôba. 9Buéyé Michel, pene asi g’ôba muetso asiindé nane. Vamasaganédangô na yabédé gôédiia ôtô aMoïse, Michel asitsundédé yabédé gôémôenza. Ivô Michel amasuméa vovogo na yabédé mbe: Kaka me, amuene Kumu Nzambé angagôsiséda. 10Ivô amôgôôe adeo noo ane, abuanya metso masanigôgéô ahngô te buanyaga. Agono na nyama yagô pindi dinda minongomie miaô mimeekaganô n’ahngô. Na miangô mikeda ahngô na gôébungana. 11Odoku aNzambé ôndéké gôndé ahngô. Amani ésevoa nzéane émakea Caïn. Gameenda Balaam dôta g’ônzôô okitii, ameedeekeda anguene mane mapengana na matasa maNzambé. Agono dôta na Coré. Na angawa gô gékékôéô saô gamawa Coré. 12Vadigaahngô n’anyô gôéaa môambô ôaa asi mbumu éaNzambé andé gôéenza môambôe wanyô na mônongoe waô agéyuka gébévani. Aseena tsoyi gô mônongoe waô. Aaka gô môambô n’onzôô ôvôni. Ahndé ga dibôngé ditsuaô n’opunga, disanyogeda mbuua. Ahgono na éétété éamiônda ésabôtani. Buéyé gô ndéône ébôta miônda, éndé te yabi ditévo. Andé ga éétété émayuuni. Mitamba miaô misaba gô toto. Eététée éwa. 13Agono na miyôkiyôki miobagaa miagô mubu. Mabégôme maô mabévani matsoyi, te égudé étubédahngô. Akénga ga minangamie miveea mimadimbanéô tunguye yaô. Nzambé asabômu gétunguge saô sevitsi éabangata. Akenea ahngô mbe angahkudéga wangô môbô na môbô.
14Hénoch te muana aAdam. Bandôa n’Adam ngu na ndéô éaHénoch vamabaka mbumu tsambué. Hénoch amavovo va mbeego gôépandôéda mônongo ôbévani ôngaba n’eekédi adiboe. Angô mbe: Oôkôni édué. Kumu Nzambé angaviga n’asi g’ôba ayanzi edi gô nzima na nzima yamitônisa miagétangégé. 15Angaviga gôétsundéda oma muetso. Angaviga gôésiséda muetso eenza angô gô mayanza maô mabévani mamakékôéa ahngô Nzambé na gô mavovia maô madiboe mamavovo eenzie gôébuanya Nzambé. 16Amôgôôe ane agiangana kuka yetso na asanyôngéô buéyé n’ene éamôsôba. Adigaa te gô manyima maô mabévani. Ahnyemôga anguene. Andé n’enyepa éamiônya gôévooto oma buta mbe anguene ahdiia sôma.
Jude eevéda na oongô ndongi
17Anye wee yami, bangôani éne émeevéda ane amatômuku na Kumu asô n’anyô Jésus‐Christ. 18Ameevéda anye mbe: Gô pitsiye yamôyusumédu oma anganôdeta na angadigaa gô manyima mabévani mamitéma miaô mikékôa Nzambé. 19Te ahngô ahtatôa oma. Mitéma miaô mindé gô tsina otômu ayôtô yaô, kaka gô tsina otômu aGédidi SaNzambé. 20Géé anye omami amôtéma weseani gô nzéa ématsimamani éaJésus étôkeani édué éamabégô mapie mameetsa we mitémamie. Gédidi SaNzambé te môwedine wanyô gôévovo na Nzambé. 21Nômbiaagana n’etondo éaNzambé. Sipani gô éangô, nôndé gôéenea monyo ôsakôdéakani, ône ôngeetsô wa n’anyô na Kumu asô n’anyô Jésus‐Christ gô ngeba yedi.
22Eenani ngeba gôndé ane agétsumaka paga. 23Ooboni ahngô ti eembe nôwati ahngô gô soto. Eenani ngeba na gôndé avo te mônongovo. Ngebaye dine digésangana na gomo. Ivô kinani ti v’ekôdéô éakinanga ti na mikandamie miaô mindé na matodi mamane mabévani mayanzahngô gô manyima mamitéma miaô.
Kumédani Nzambé
24Kumédani Nzambé, ône andé na ngudi gôénôsipéda gô ékôbee éetso. Andé na ngudi gôénôtsigéda vandé amuene, ti eembe nôsaba n’oési. Anganôtsigéda na gényônga gémootéani gôéengéa na g’ôndômbee wedi wetso. 25Amuene te Nzambé asaba na gégoni. Ooboo wa n’anyô gô ngudi yaKumu asô n’anyô Jésus‐Christ. Ondômbee wetso na ôkumakee wetso na ngudiye, n’enyangee émabaka n’edi na mbeego, na éndéké n’edi deo noo na éngaba n’edi môbô na môbô gékôdéé. Amen.
S'ha seleccionat:
Jude 1: TSV
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Alliance Biblique du Gabon (Bible Society in Gabon) 1983