Luka 19
19
Zakiu nøt vwv́ngshì ráì we
1Yesu nø Yeriko wamà sv̀ng gòng nø̀ dí mvnshìe. 2Weyv́ngø Zakiu wa tǿò we tiqpè vle. Àng nø kùyà gúnshú vjì í nø̀ mvgàm gø íe. 3Àng nø Yesu kagǿ í we sv̀ng yv́ng mvyǿ nìgø, góng tø̀ weí, vsv̀ng loksokrìí dvkøqò rvtnø̀ yv́ng mvlú:nò. 4Wervt àng nø vzv̀ng kaq Yesu dìlv́m dv́nshì dang sv̀ng kvlv̀ng nø̀, Àng sv̀ng yv́ng lúnlv́m rvt nv̀mgwè tiqtø̀ng taq rvlv̀ngá:mì.
5Yesu weyv́ng tuq ráì kvt, kang ngángshì dvjaqò nø̀, “Zakiuá, bò èlashì daq. Pawá wani dèni Ngà nø nà chø̀mø v́l rànge,” a:lòe. 6Wekvt àng tiqdvshaqí lashì daqì nø̀, Yesu sv̀ng shaqshaqwa vtoòe.
7Welòng sv̀ng yv̀ng bǿà rì shvngbe nø, “Mvrà vl vsv̀ng tiqpè chø̀m taq Àng lvyøpmá:mìni!” wa vbønshie. #Luk. 15:2
8Zakiu rip lú:ngì nø̀ Kàngpè sv̀ng, “Eyà:ngò, Kàngpèá, ngà vdáng rì tiqka dvshà rì kaq ngàí zílv́m íe. Vrá, ngàí kagǿ sv̀ng pà tiqpv̀n vmupmv́m bǿngànø̀ng nø, vbì dvtv̀ng vtv́ngalv́m íe,” a:lòe. #Bng. 22:1-9; Dcr. 5:6-7
9Yesuí àng sv̀ng, “Chutchv́ng lòng nø dèni yachø̀m taq tuq daqì. Kadø íe wani àng gø Abraham pvlí pvlaq tiqpè ni íe. 10Pàwá wani Vsv̀ng Àngcèpè nø vmv́ngá:mì we vsv̀ng kaq lá nø̀ chutchv́nglv́m dì daqì,” a:lòe. #Ezk. 34:16; Yoh. 3:17
Gv̀msùng tvleò we kàshvbóng
Mat. 25:14-30
11Àngmaqí yadv́ng pv̀n tá ma:nò dvgvp, Yesuí kàshvbóng vrá tiqlòng shø̀:nòe. Pàwá wani Yesu nø Yerusalem sv̀ng tvp níshì ráì nø̀ Gvray móngdàn cancan ni bunglv́m dv́nshì pà íe wa bashàrìí dvda:mò rvt íe. #Luk. 24:21; Dzr. 1:6
12À:ngí, “Go ring vsv̀ng tiqpè nø, koqkv́m vya vtoshì dá:ngí, vrá vtv́nglv́m rvt vrúm móng sv̀ng die. 13Wervt àng shini mvbúng ke, dvzømshúrì kèní tiqcégǿ goò dá:ngí, gv̀msùng ta joy tvleò nø̀, ‘Ngà tok rang høq, yalù:ngí wulaq èwà dánø̀ng,’ a:lòe.
14Íwe àng bashàrì nø àng sv̀ng shvngoshì rvtnø̀, àng mèpvngpvng gvsà tiqmvdò dvzá:rò nø̀, ‘Nøngmaq mvdv̀m yapè koqkv́m wáshìlv́m lòng mvshù:ngì,’ wa vl dvzá:ròe. #Yoh. 1:11
15Wepèí koqkv́m vya vto lún bǿà dá:ngí vtv́ng ráì. Wekvt àngmaqí wulaq wàò yv́ngkèní kadv́ngte mvzv́n lúna:pmà we sv̀ng shálv́m dvpvt, à:ngí gv̀msùng tvlea:pmà we dvzømshúrì sv̀ng goòe.
16Nv̀mlatpè dì ráì nø̀, ‘Kàngpèá, nà gv̀msùng tiqjoy kèní, tiqcéjoy mvzv́n lún bǿngà,’ a:lòe.
17Àngkàngpèí, ‘Shèla we dvzømshúpèá, vdu dø èwà bǿà. Nà nø gvzà cv̀m we bv̀nlì taq kv́mv́m nàrvm rvtnø̀, tiqcéwamà øp dvzv́re,’ a:lòe.
18Vnípè wapè di ráì nø̀, ‘Kàngpèá, nà gv̀msùng tiqjoy kèní pungwà joy mvzv́n lún bǿngà,’ a:lòe.
19Àngkàngpèí, ‘Nà sv̀ng gø pungwàwamà øp dvzv́re,’ a:lòe.
20Vrá tiqpè dì ráì nø̀, ‘Ná, Kàngpèá! Nà gv̀msùng nø paqzitní mvchekngò nø̀ gv̀l yv̀ngà. 21Nà nø nøt yvk pè èí rvt, nà sv̀ng svrenge. Nà nø nàò mø̀í rì kèní èlushì nø̀ nàí mèwø:nò yv́ngkèní dèkømvm pè èíe,’ a:lòe.
22Àngkàngpèí, ‘Vshuq mvgv́m nàé! Nà kà kèní ni nà sv̀ng ngàí kàngélv́m íe. Ngà nø nøt yvk pè ǿngà we, ngàò mø̀í rì kèní longshø̀ng we, màwønshaq rì kèní dvkømvm we sv̀ng nàí èsháò nìnø, 23ngà vtv́ng dak kvt vráng nv̀ng vmyit tvpwa vtvngshì lúnlv́m rvt, ngà gv̀msùng nø pàwá gv̀msùngdøm taq mègà:lò má?’ a:lòe.
24Wekvt àngkàngpèí shvnvng rip rì sv̀ng, ‘Àng yv́ngkèní gv̀msùng tiqjoy lòng èlùnø̀ng nø̀, gv̀msùng tiqcé joy v́laò pè sv̀ng èzínø̀ng,’ a:lòe.
25Íwe àngmaqí, ‘Kàngpèá, àng nø tiqcé joy v́laòe lè!’ a:lòe.
26Àngkàngpèí, ‘Ngàí vla:tnìni, v́laò gǿ sv̀ng nø rvma daqòe. Màv́laò gǿ kèní nø, v́laò hvncè gø vtv̀ng bǿòe. #Luk. 8:18; 16:10; Mat. 13:12 27Àngmaq mvdv̀mø ngà koqkv́m wáshìlv́m mvshóngshì we ngàò ngv̀nshà werì sv̀ng èshølvtnø̀ng nø̀, ngà mv́rdv̀ngø èshvtnø̀ng,’ wa vtá:nòe,” a:lòe.
Yerusalem sv̀ng dvgùng vl dø Yesu gòng we
Mat. 21:1-9; Mak. 11:1-10; Yoh. 12:12-16
28À:ngí yadv́ng pv̀n shǿn dv́ng bǿà mèpvng Yesu nø coqcv́nrì vzv̀ng lap kèní di nø̀ Yerusalem sv̀ng ngangá:mì. 29Àng nø Zanlún Pung lv̀ngpvng tám Betpagi nv̀ng Betani mvrìngní shvnvng tuq ráì dvgvp, coqcv́n vnípè sv̀ng, 30“Vzv̀ng kaq mvrìng sv̀ng èdìv́mshì nø̀, ègòngv́mshì weó kagǿ gø mvzúnshì dvr we lòzècè tiqgo weyv́ng vdǿn da we èyv̀ng bǿshòe. Èpǿnshò nø̀ èshølvtshò. 31Tiqgǿgǿí, ‘Pàwálv́m èpǿnshòe?’ wa èrøtnvtshì nìnø, ‘Kàngpè zǿmdv̀nge,’ èvlshò,” a:lò nø̀ dvzá:ròe.
32Wekvt àngní dìá:mì nìnø, Yesuí vl dá:rà døni yv̀ng bǿà. 33Àngníí lòzècè go pǿ:nò dvgvp, “Pàwálv́m lòzècè go èpǿnshòe má?” wa àngkàngrìí rø:tnòe.
34Àngníí, “Kàngpè zǿmdv̀nge,” wa vtá:nòe.
35Wekvt Yesu yv́ngsv̀ng lòzècè go shøla:tnà. Àngníò mvdv̀m bèlaqrì wego taq pvluò nø̀, Yesu sv̀ng zúnshì dvzá:ròe. 36Àng zúnshì nø̀ dí mvnshì dvgvp, bashàrìí àngmaqò mvdv̀m bèlaqrì tvrà yv̀nggùng pvluòe.#19:36 mvdv̀m bèlaqrì tvrà yv̀nggùng pvluòe Yalòng nø koqkv́m di daq ke, vtoò we Yuda vtóng íe. #2Kk. 9:13 37-38Àng nø Yerusalem sv̀ng tuq yùl ráì nø̀ Zanlún Pung kèní shungshì dang høqa:tnà ke, Àng coqcv́n loksok mvdò nø àngmaqí yv̀ng bǿà we jórnònggùn bv̀nlìrì shvngbe rvt dvbù nø:tní, “Kàngpè bø̀ng taqkèní dì daqì we Koqkv́mpè nø ìshøt vle. Muqlàng taqlapmø mòngzø̀l lòng laq vl, vháng vtvng yv́ng ngø̀rdvgùng laq vl!” wa Gvray kaq shaqmèí shvringòe. #Shz. 118:26
39Wekvt vsv̀ng loksok dvhø̀ kèní Parisirì tiqmaqí, “Svrapèá, Nà coqcv́nrì dø màwá lavl dø ènga:nò!” a:lòe.
40À:ngí, “Ngàí vla:tnìni, àngmaq dø màwá la vl nìnø, lóng yarì vkiq longe,” wa vtá:nòe.
Yerusalem dvpvt Yesu ngø we
41Yesu nø Yerusalem sv̀ng tuqlvm wáshì dvgvp, wamà sv̀ng yà:ngò sórí Àng ngǿ lú:ngì nø̀, 42“Wamà naé, dèni nà yv́ng mòngzø̀l lòng dvtuqa:tnà pè sv̀ng nàí gø èsháò nìnø shvla we! Íwe akvt nø nà ne kèní vmáshaq íá:mì. #Mat. 13:13-15; Yoh. 12:38-41 43Nà ngv̀nshàrìí nà gùrhøm waqhv́m vra:ngò nø̀ èwang weí shègørvt we àngni tuq rae. 44Nà sv̀ng ècat nø̀ nà vdòng taq vl we nvcèrì sv̀ng shvt bǿòe. Gvrayí ètìn daqì we rvtø̀ sv̀ng nàí mèmèshá:lò rvtnø̀, vrvngshaq lóngrì màrǿlshaq tiqchv̀ng gø mvngv̀m ráò,” wae.#Luk. 21:6
Noqngø̀m Tø̀ngnø dvshè:rò we
Mat. 21:12-17; Mak. 11:15-18; Yoh. 2:13-17
45Wemèpvng Yesu nø Noqngø̀m Tø̀ngnø wáng sv̀ng gòngá:mì nø̀, weyv́ng dvrè nvmshì rì sv̀ng lúng pà:ngòe. 46À:ngí àngmaq sv̀ng, “‘Ngà chø̀m nø júrøt chø̀m í longe,’ wa Shànshér Kàru taq vru yà:ngà. Íwe, nàmaqí nø ‘tølv́mshúrì dvkøqshìrà’ lè í dèzv́r bǿshà,” a:lòe.#Esa. 56:7; Yer. 7:11
47Ni vrv̀m Yesuí Noqngø̀m Tø̀ngnø wáng taq shvngø:tnòe. Íwe shvrúngshú vjìrì, dvrá svrarì nv̀ng bashàrì kèní shølshúrìí nø Àng sv̀ng shvtlv́m tvrà láòe. #Luk. 21:37; 22:53; Yoh. 18:20 48Ínìgø lá mvlúnò, pàwá wani bashàrì shvngbe nø Yesu kà sv̀ng nøt lúmlúm tashì rvt íe.
S'ha seleccionat:
Luka 19: GSM
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 Rvcv́ngcè Kàru Gomidi Kristu Shvngø̀mré. All Rights Reserved.