Luka 17
17
Mvrà chutnalv́m nv̀ng kv́mnøt v́l rà we
Mat. 18:6-7; 18:21-22
1Yesuí Àng coqcv́nrì sv̀ng, “Vléshì dvzv́r we dvløt ra pv̀nrì nø jø̀ngjǿng tuq rae. Ínìgø, vléshìlv́m dvbu:ngò gǿ nø mvhøt longe. 2Cv̀mrécè yarì taqkèní tiqgǿ sv̀ng vléshì dvzá:rò gǿ sv̀ng nø, àng lóngjvng taq loklvng tiqchv̀ng dvchu:ngò sórí, nvmukdvra sv̀ng gu:rò lòng nø wegǿ dvpvt té shvlae. 3Nàmaq nàyáshìnø̀ng!
Nvnvm nvcha:ngí nàlévt nìnø, àng sv̀ng ènga:nò. Àng vwv́ngshì ra nìnø, àng mvrà èchutnaò. #Mat. 18:15 4Tiqni taq shvngøtkvt nàlévt nø̀ shvngøtkvt di ra weí nà sv̀ng, ‘Ngà nøt vwv́ngshø̀nge,’ la wa ra nìnø, àng sv̀ng èchutnaò,” a:lòe.
5Wekvt dvzv́rrìí Kàngpè sv̀ng, “Nøngmaq sv̀ng kv́mnøt shèluqashà,” wa røtshìe.
6Kàngpèí, “Nàmaq kv́mnøt nø mvngashí tiqchv̀ngcè gvp la èv̀lnø̀ng nìnø, bvløngyì shǿng yatø̀ng sv̀ng, ‘Yayv́ng kèní àngrø nv̀ng èpúlshì nø̀, nvmukdvra taq èyovm,’ èvlnø̀ng nìgø, àng nø nàmaq kà ta longe. #Mat. 17:20; 21:21
Vshuqí àngkàngpè sv̀ng dvzø:mò we
7Nàmaq dvhø̀ taq vshuq vdá we tiqgǿ vle laq wa. Vshuqpè nø rvmá màò yv́ngkèní, mø̀íni vyv̀ng roqò yv́ngkèní lo ra ke, ‘Bo èdi ra, v́mpà v́mlv́m èrung ra,’ èv̀lnø̀ng we kagǿ vle? 8Lè nø àng sv̀ng, ‘Gwálv́m tèleshì. Ngà dvpvt dørø̀m v́mpà dègø̀a:tnò. V́m aq dv́ngshø̀ng høq dèzømà. Wedá:ngí wa nà nø v́m aq lúnshìe,’ wa a:lò we mø̀í má? 9Vshuqpèí nø àng sv̀ng dvzá:rò dø wàò nìgø, àngkàngpè nø vshuqpè sv̀ng oqà mvwa. 10Welòng dø nàmaq gø, nàmaq sv̀ng dèzv́rvtnø̀ng rì shvngbe wá èdv́ng bǿnø̀ng dvgvp, ‘Nøngmaq nø màpǿì we vshuq íshàe. Nøngmaqí wá rà dv́ngte wa wà bǿshà,’ èwànø̀ng,” a:lòe.
Mvngga:ngí za vsv̀ng tiqcépè dvba:nò we
11Yesu nø Yerusalem sv̀ng di ke, Samari nv̀ng Galili dvrøt dangdang léshìe. #Luk. 9:51; 13:22 12Mvrìng tiqmvrìng sv̀ng Àng gònglv́m wa ke, mvngga:ngí za we tiqcépèí Àng sv̀ng vhǿma:tnà. Àngmaq nø vsar yv́ngø rip sórí, #Lew. 13:45-46 13“Kàngpè Yesué, nøngmaq sv̀ng dvshá èzashàé,” wa vkiqe.
14Yesuí àngmaq sv̀ng yv̀ng bǿà kvt, “Èdìnø̀ng nø̀ shvrúngshúrì sv̀ng nàmaq góng dètánshìv́mnø̀ng,” a:lòe. Àngmaq dí mvnshì ke, mvnggvng vna shèrá:mì. #Lew. 14:2-3; Luk. 5:14
15Àngmaq taqkèní tiqgǿ nø, àng baná:mì we yv́ngshì bǿì kvt, vkiq nø̀ Gvray dvgùng shvri:ngò sórí vtv́ng ráì. 16Wekvt Yesu hí shvnvngø kǿng kupshì nø̀ oqà wae. Wepè nø Samari vsv̀ng íe.
17Yesuí, “Èshèrv́mshà we nø tiqcépè mèínø̀ng má? Wá dvgø̀pè nø kayv́ng íá:mì? 18Wv́ngzà yapè wa mø̀ínì, Gvray dvgùng shvringlv́m vtv́ng ráì vsv̀ng tiqgǿ gø màvl má?” wae. 19Wekvt Yesuí wepè sv̀ng, “Ebúng nø̀ èlovm. Nà kv́mnø:tní dèban bǿì,”#17:19 Mø̀íni, “èchv́ng bǿì.” a:lòe.
Gvray móngdàn tuq daq we
Mat. 24:26-28,37-39,41
20Tiqkvt nø Parisirìí Yesu sv̀ng, “Gvray móngdàn nø kadvgvp tuq daqe má?” wa røtna:tnà.
Yesuí, “Gvray móngdàn nø neí yv́ngshì dø tuq daq we mø̀í. 21Vsà:ngí, ‘Eyv̀ngnø̀ng, yayv́ng íe,’ mø̀íni, ‘Kuyv́ng íe,’ wa nø̀ mvshø̀na:tnò. Pàwá wani Gvray móngdàn nø nàmaq dvhø̀ø vle,” wa vtá:nòe.
22Wekvt, coqcv́nrì sv̀ng À:ngí, “Nàmaq nø Vsv̀ng Àngcèpè àngnirì kèní tiqni sv̀ng yv̀nglv́m mèrøtnø̀ng nìgø, mèyv̀ng lóngnø̀ng we àngni tuq rae. 23Wedvgvp vsa:ngí nàmaq sv̀ng, ‘Eyv̀ngnø̀ng, kuyv́ng íe’ mø̀íni ‘Yayv́ng íe,’ wa ra nìgø, mèbúngnø̀ngni, àngmaq mèpvng gø mècv̀nnø̀ngni. #Luk. 21:8 24Kadø íe wani muqcøn còngmè nø muqlàng tiqtong kèní dvgá tiqtong høq vlapshì nø̀ gávm dø, Vsv̀ng Àngcèpè nø di daq we àngni taq welòng dø í daqe. 25Íwe, Vsv̀ng Àngcèpè nø dvshà mvhøtlv́m mvme pv̀n nv̀ng yamvrilcèrìí ngál we vzv̀ng vhǿm rae. #Luk. 9:22
26Nowa àngnila taq í yà:ngì dø, Vsv̀ng Àngcèpè àngnila taq gø wedø í daqe. #Nnp. 7:7-23; Mat. 24:37-39 27Nowa nø shø̀chø̀mdø̀ng sv̀ng gòngá:mì ni høq, vsv̀ngrì nø vm aq nø̀, zvmì lushì, zvmì shvrúngvm nø̀ vle. Wekvt tìnv̀m zø̀r lú:ngì weí àngmaq shvngbe sv̀ng shvmv́ng yà:ngà.
28Welòng døni, Lot àngnirì taq gø, vsv̀ngrì nø vm aq nø̀, wvnshì, nvmshì nø̀, kvtnvm nø̀ chø̀m washì nø̀ vle. #Nnp. 18:20; 19:23-25 29Íwe Sodom wamà kèní Lot búngá:mì ni taq, muqlàng kèní svmi nv̀ng gàn zaq daqì weí àngmaq shvngbe shvmv́ng yà:ngà. 30Vsv̀ng Àngcèpè sv̀ng dvtan daqò we àngni taq gø welòng dø í longe.
31Weni taq chø̀m rv́gùng taq vl gǿ nø, chø̀m vdòngø v́laò we àng dvrèrì lushìlv́m laq mvlashì. Rvmá taq vl gǿ gø laq mvlo.#Nnp. 19:26; Mat. 24:17-18 32Lot chø̀mmè sv̀ng dvdvm nàshatnø̀ng. #17:32 Nnp. 19:26 33Vdè gø̀nshaq sv̀ng chv́ngshì mvyǿ we kagǿ gø, dvciqlvpat gø̀nshaq vmvngvme. Íwe vdè gø̀nshaq vmvng we kagǿ gø dvciqlvpat gø̀nshaq lún lú:ngòe. #Luk. 9:24 34Ngàí vla:tnìni, weyaq taq yøprà tiqlòng yv́ng vsv̀ng vnígǿ yøpme. Íwe, tiqgǿ sv̀ng lù bǿò nø̀ tiqgǿ sv̀ng làng ráòe. 35Svmaré vnímè nø tiqdø loklvng jøkngvm nø̀ vle. Íwe, tiqmè sv̀ng lù bǿò nø̀ tiqmè sv̀ng làng ráòe. 36[Rvmá taq lvngàré vnípè vl dvgvp, tiqpè sv̀ng lù bǿò nø̀ tiqpè sv̀ng làng ráòe],” #17:36 Kàru ànglí tiqmaq taq yaciq màbá a:lòe.
37Wekvt coqcv́nrìí, “Kàngpèá, yadv́ngte nø kayv́ngø í longe?” wa rø:tnòe.
À:ngí, “Vnàng vl yv́ng, làngdàrì gø weyv́ng dvkǿmshì rae,” wa vtá:nòe.
S'ha seleccionat:
Luka 17: GSM
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2025 Rvcv́ngcè Kàru Gomidi Kristu Shvngø̀mré. All Rights Reserved.