KEJADIAN 39
39
Yusuf ru Kenah Potifar
1Bile Yusuf bien nu lengrik Mesir ya pedagang-pedagang mai Ismael ajeh, kek bijual nu Potifar numom pegawei raja Mesir. Potifar ajeh ketue pengawal istane.
2Tapi Yahweh Kitulog Yusuf lei kek selalo bejaye ku kateh ikerjak. Kek kigei ku deg Potifar mai Mesir ajeh. 3Ituan Potifar kineng Yahweh Kitulog Yusuf ru Yahweh juga Kiog kek behasel ku kateh dikdij ma de kibeh. 4Jadi, Potifar kigemar ha Yusuf ru kilantek kek sebegei ipenguros. Lalu Potifar kiog tugas nu Yusuf supaye kiuros ha hal iperingak ru dikdij iharta. 5Sejak Yusuf kijadi penguros, Yahweh Kiberkat peringak mai Mesir ajeh ru dikdij ma de mong ku kek, ku ipadeg hodpen ku iselai. Yahweh Kibeh begei ajeh kerana Yusuf. 6Jadi, ma taleh de mong ku Potifar, kek kipecaya nu Yusuf. Kerana Yusuf, Potifar walah pek kirisau ha hal ideg, kecuali icaknak.
Yusuf ajeh kemmek ru iberog pen tegap. 7Memerip iluniu ju kenjeh, kenah Potifar mula kihod ha Yusuf. Lalu kek kipakat keral ajeh, “Beiloh besama ru eng.”
8Yusuf kinyek ru kiurok, “Maap, jen. Tuan Potifar ya kipecaya dikdij ihak nu eng. Kek pek kirisau ma-ma nij ihal ku deg adeh. 9Bokhentok pen de lebeh entoi daripade eng ku deg adeh. Tapi had enjen taleh de pek kipecaya nu eng, kerana enjen ikenah. Pek mungken ngha-beh bahneh jehat ajeh ru ngha-bedosa nu Jenang.” 10Hamapen jap-jap arik kenah Potifar kipujok Yusuf, tapi Yusuf lekat pek kaha-besama ru kipernyak idiri ju kerdor ajeh.
11Mong nuarik, Yusuf kimuj nu kateh deg kaha-beh itugas. Ku mase ajeh, pek mong numom pen mai kerakjak ku pajeh. 12Kenah Potifar kitarek jubah Yusuf ru kiurok, “Beiloh harbesama.” Yusuf kiloj lei dapat kitelas lalu kijar nu luar tapi ijubah lekat ku teg kerdor ajeh.
13Bile kenah Potifar kibakek Yusuf ya kiwes ijubah ru kijar, 14kek kicereg ipekerjak ru kiurok, “Nengloh! Sengoi Ibrani de bien ya gengsir eng nu madeh kihina ha hik. Kek kimuj nu bilek eng kaha-besama ru eng tapi ngwig. 15Bile kek kicerngai weknig eng, kek kijar nu luar tapi kiwes ijubah.”
16Kenah Potifar kidek jubah Yusuf ajeh lei igengsir kijog. 17Bile igengsir ya kijog, kek deras kipasal hal ajeh nu igengsir. Kek kiurok, “Hambe mai Ibrani de haen nu madeh kimuj nu bilek kaha-hina eng. 18Bile ngwig, kijar nu luar tapi kiwes ijubah.”
19Bile Potifar kicerngai tentang hal ajeh, kek ihad kiberiknos. 20Kek kior Yusuf bicap ru bipermuj nu kateh jel, tempat sengoi tahanan raja bikurog. Ku pajehloh Yusuf kigei.
21Tapi Yahweh Kibeserta ru Yusuf ku kateh jel ajeh ru Kiperneng Ihaknok nu kek lei ketue jel kigemar ha kek. 22Ketue jel ajeh kipecaya sengoi tahanan de kilek nu Yusuf. Kek juga kiog dikdij itugas ku kateh jel nu Yusuf. 23Kek pek kijaga nij dikdij hal de ya kipecaya nu Yusuf kerana Yahweh Kibeserta ru Yusuf lei kek kibejaye kateh dikdij ikerenjak.
S'ha seleccionat:
KEJADIAN 39: AEH
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.