HOSEA 4
4
Bawipa In Israel A Mawhthluk
1 Bawipa in hi ram sungih a ummi pawl parah mawhthluknak a nei a si. Maw Israel, a simmi hi ngai hnik: “Hiram sungah hin duhdawtnak a um lo ih rintlak sinak khal a um lo. Minung pawl in an Pathian ah in ruat lo. 2Mi an camsiat, thuphan an per, mi an that, ruk an ru, nupi le pasal pawl in midang an ngai san. Thisen luannak a karh vivo ih mi thahnak pakhat hnu pakhat a um. 3Curuangah hi ram cu a caar ding ih ram sungih nunnak a neimi hmuahhmuah an cau ṭheh ding. Ramsa le vate hmuahhmuah le nga hman an thi ṭheh ding,” a ti.
Bawipa In Puithiam Pawl A Mawhthluk
4 Bawipa in, “Zohman in misenpi pawl mawhthluk hlah hai seh; a kawk khal kawk hlah hai seh. Ka mawhthluk mi cu nanmah puithiam pawl nan si. 5A sun a zan in sualnak poimawh nan tuah; nannih hnakin profet pawl an ṭha cuang fawn lo. Nan nu Israel hi ka siatsuah ding. 6Ka minung pawl in keimah in theih duh lo ruangah an cem thla ding. Nannih puithiam pawl khal in in thei duh lo ih ka thuzirhmi pawl nan hlon. Curuangah nannih cu ka lo hnong ih nan fapa pawl khal ka puithiam an si thei nawn lo ding.
7“Puithiam nan tam deuhdeuh ih ka parah nan sual deuhdeuh. Upat tlak nan sinak cu nan mualphonak ah ka tuah ding. 8Ka minung pawl ih sualnak thawngin milian ah nan cang; curuangah tam sinsin in sualter nan duh. 9Misenpi vek thotho in cawhkuannak nan tuar ve ding. Thil ṭha lo nan tuah ruangah ka lo hrem ding ih ka lo cawh ding. 10Raithawinak pekmi sungin nan covo cu nan ei ding naón nan ril a rawng thotho ding. Hlawhhlang nan ṭuan ih punzainak khawzing nan bia rero ding naón faate nan nei cuang lo ding, ziangahtile khawzing dang thlun duh ah ka hnen ihsin nan pial a si,” tiah a ti.
Bawipa In Khuavang Biaknak A Duh Lo
11 Bawipa in, “Zu thar in siseh zu hlun in siseh ka minung pawl ih thinlung a hloter ṭheh. 12Thingtan hnenah tin an leeng, funghreu in an duhmi a rak sim. Curuangah kei cu in tlansan. Hlawhhlang ih a cangmi nunau vekin annih cu khawzing dang hnenah an pe aw. 13Tlangzim hmunthiang ah thawinak an tuah ih tlangpar thingpi sang sasua kiing daihnem ṭha hnuai ah rimhmui an ur.
“Curuangah nan fanu pawl cu hlawhhlang ah an cang ih nan fapa ih nupi pawl cu mipa dang thawn an sual. 14Asinain hi ruangah ka hrem hai lo ding; ziangahtile nanmah hman biakinn hlawhhlang#Biakinn hlawhhlang timi hi Kanaan ramsung minung pawl in an khawzing biaknak inn ah hlawhhlang hna an ṭuan ṭheunak a sim duhmi a si. pawl hnenah nan feh ih anmah thawn hmunkhat ah thawinak nan pek. Thufim ih a um vekin, ‘Ruahnak nei lo miphun cu an siat ding.’
15“Nannih Israel mi pawl cu ka hrangah hlawhhlang ah nan cang zo naón Judah mi cu cuvekin si hram hlah hai seh. Gilgal a si lole Bethaven#Bethaven ih tican cu sualnak inn a si lole milem biaknak inn tinak a si. ah i bia hlah hai seh. Cutawk hmunah a nungmi Bawipa ih hmin in thukamnak tla tuah hlah hai seh. 16Israel mi pawl cu laak lungruh bangin an lung a ruh a si. Ziangtin so tuufaate bangin tlimno lakah ka cawm thei ding? 17Israel mi pawl cu milem in a ham ṭheh a si. An duhnakah feh hai seh. 18Zu tampi an in hnuah hlawhhlang an ṭuannak ah nuam an ti zet ih hmin ṭhatnak hnakin thangsiatnak an duh sawn. 19Phusiing ih semhlomi vekin ṭhekdarh ṭheh an si ding ih an khuavang biaknak cu an zahpi ding.
S'ha seleccionat:
HOSEA 4: FCL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Falam Bible Revision © Bible Society of Myanmar, 2002.