DANIEL 10
10
Tigris Tivapi Ah Daniel Ih Hmuhmi
1Sairas in Persia siangpahrang a ṭuan kum thumnak ah Belteshazzar ti khalih kawhmi Daniel ih hnenah thu pakhat langter a si. Cuih thu cu thudik a si, asinain theih a har ngaingai. A hnenah langnak in simfiang a si.
2Culai ah zarh thum sung lungngai in ka rak um. 3Zarh thum a kim hlan cu rawlthaw zianghman ka ei lo, sa khal ka ei lo; sabitti ka in lo ih ka sam khal ka hriat lo.
4Cuih kum thla khatnak thla, ni kul hluanli ni ah tiva tumzet ṭigris Tivapi kapah ka ding. 5Khua ka hun cuan ih minung bangtuk pakhat, puan hmangfeem hnipuan a hruk ih sui ṭha bik taikhap a khaptu ka hmu. 6A taksa ruangpi cu lungvar bangin a tleu. A mithmai cu nimthlakau vekin a vaang ih a mit tla cu meisa hlio vekin a hlio. A baan le a ke pawl cu hnawtfaimi dar vekin a tleu zukzo ih a aw cu miburpi au thawm bangtuk a si.
7Cuih langnak a hmutu cu keimah lawng ka si. Ka kiangih a ummi pawl cun zianghman an hmu lo, asinain an ṭih ngaingai ih an tlan, cule an relh. 8Keimah lawng ka taang ih cuih mangbangza langnak cu ka zoh rero. Ka tha a cem ṭheh, ka mithmai tla a dangzet ih zohman in in thei thiam zik lo. 9A aw ka theih tikah leilungah ka tlu ih zianghman thei loin ka bokkhup. 10Cule kut pakhat in i kai ih ka kut le ka khuk in i vak ter. Ka khur rero lai.
11Vancungmi cun, “Daniel, Pathian ih duhdawtmi na si. Ding awla ka lo sim dingmi hi ṭhatein ngai aw. Na hnenih thlah mi ka si,” tiah i ti. Cutiih a sim vete in ka hung ding. Asinain ka khur rero thotho.
12Cule anih in, “Daniel, ṭih hlah. Theihthiamnak nei dingah tangdor dingih na ruahcat ni ihsin na thlacam Pathian in a thei. Na thlacamnak lo let dingah ka ra zo. 13Persia ram kilvengtu bawi vancungmi in ni kul hluankhat sung i kham. Cule vancungmi lakih a tum bik pakhat Mikhael in i ra bawm, ziangahtile Persia ramah cun keimah lawng taantami ka si. 14Hmailam ah na minung pawl parah ziang a thleng ding ti lo theihter dingah ka ra zo a si. Hi langnak cu hmailam thu a si,” a ti.
15Cutiih a ṭong tikah cun leilung lawng ka zoh, zianghman ṭong thei loin ka um. 16Cule minung vek a si mi vancungmi cun a kut a run dawh ih ka hmur i tham. A hnenah cun, “Bawipa, hi langnak hin ka tha i cemter ṭheh ih khur loin ka um thei lo. 17A bawipa hmaiih a dingtu sal vek ka si. Na hnenah ziangtinso ka ṭong thei ding? Thazaang zianghman ka nei lo, thaw thawt ding khal ka nei lo,” tiah ka ti.
18I run tham sal ih cak deuh in ka thei aw. 19Anih cun ka hnenah, “Pathian in a lo duhdaw a si. Curuangah zianghman phang hlah, zianghman in lo ṭihter hlah seh,” a ti.
Cutiih i ti tikah cun ka cak deuhdeuh in ka thei aw ih a hnenah, “Bawipa, i sim dingmi cu i sim aw. I cakter deuh zo,” tiah ka ti. 20-21Anih in, “Ziangruangah na hnenah ka ra, ti hi na thei maw? Thutak Cabu sungih an nganmi na hnenih phuang dingah ka ra. Atu-ah Persia ram kilvengtu bawi vancungmi do dingah ka kirsal ding. Cuih hnuah Grik ram kilvengtu bawi vancungmi a lang ding. Israel ram kilvengtu bawi vancungmi Mikhael siarlo i bawmtu zohman an um lo.
S'ha seleccionat:
DANIEL 10: FCL
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Falam Bible Revision © Bible Society of Myanmar, 2002.