Markus 9
9
Yesus, urasin yuk ubuk yupu
(Lukas 9:28-36; Matius 17:1-13)
1Ayupu nyabukopura, Yesus arye ayupu ton nyabuk. “Na dipkoprop yupu nyapsine. Anggun mening dam atikmalum nang kan-kan arye, ton nang ara, Allah arye tukwak mutuku-mutuku nirya noutam, ninye weik lyeplirye, el mikip deice talipnamle talak min kum upmalye talak ara, kum dipnamake. Sik aninye ara, aupnamle ning eipnamake.” Yesus arye awekmek nang ati nyabuk.
2Ayupu nyabukopura, daulamika ani, naku barye sum akunum mabikopura, Yesus arye winilye nanguk dobuka, weik mutuku dup welebuk. Yesus ap, mutuku dup welebik nang sik si ara, ani. Peterus ap, Yakobus ap, Yohanes ap, Yesus ap, sikuk neika binmek. Sik amutuku dup welebikopura, sik adinmekbuk, Yesus el urasin yuk dayuk. 3Urasin yuk ubukce, el ongon cang baju, juga kurun ubukura, dirina weik ubuk. Ninye arye ongon cang baju, mek likicebuk, kurulamle atonun kum bukni, pia lekuk ubukura, dirina weik dayuk.
4Winibukba, sik awinilye nang tikmekak arye, minop talak ulamik nang ara, nabi Elia ap, Musa ap, tikmarikbuk, Yesus ap, sik neika tikikce, yupu talipmek. Sik ayupu talipmek talakuk, Peterus arye Yesus ati nyabuk. 5“Naio, nun aunmaba ara, pia teleb ati, nun winilye nang arye buru aik ton doptibiba, asukumuk ulamtibye. Ton aik ara, anti, ton aik ara, Musa biti, ton aik ara, nabi Elia biti doptibye,” Peterus arye nyabuk. 6(Peterus arye ayupu nyabuk ning, Yesus el urasin yuk winibuk ning ap, Musa ap, nabi Elia ap, yanmarake nyabuka, nirya eibikce, ilil ubukura, Peterus arye talye yupu nyaplobuk.)
7Sik amutuku dup unmeka ani, dua arye siktikmek mutuku nirya lipdongobukura, adua kan-kan Allah arye ayupu nyabuk. “Aunmalnye bira, na Mi Koprop uplibuk, elti, na kanye pia delinune. El yupu pia moubuka kekenamlulume,” nyabuk. 8Allah arye ayupu nyabukura, adiparyuk sik awinilye nang arye, siktikmekak dana-dana dipdeyik bukni, yuk nang ara, kum eibik. Sik winilye nang ap, Yesus ap, sikuk aunmek.
9Amutuku dup arye tamubuka koluka yanganmek talak ara, Yesus arye awinibuk ning nirya ‘Yuk nang ati laka nyalbicak’ tenen, yupu sekdobuk. “Nara, Ninye Mi Koprop Atonunye opniceura, dipnirye kam buknyopura, awinipmalba eipmalum ninga ara, laka nyalbinamlume bukni, wini talak ara, laka kum nyalbinululume,” nyabuk. 10Nyabuka ati, sik ananguk yupu talipdayikce nyabik, “Yesus arye, dipmanya ani, tamubuka kam buknamne nyabuk ning, deiyok, yata upnamle ati nyapmasil do?” nyabuka, sikuk yupu talilanmek.
11Aminyan talak ara, sik anang arye Yesus ati asipdeyik. “Allah arye, ‘Winamlulume, aning ton kum winamlulume,’ nyamukba, Musa arye sekeiyamsuk yupu peterena deiyok nang arye, ‘Nabi Elia minopce yanamlibuk, Allah arye ninye lyena ati, Mesias dopdeipnamlanye bira, aminyan koprop yanamle,’ nyanyak yupu, yata ati nyanyak do?” nyabuka asipdeyik. Asipdeyikbuk Yesus arye tamubuka nyabuk.
12-13“Sikce, ‘Elia minopce yanamlirye, aning-aning nirya lipsisikuka kintinibuka delinamle,’ nyanyaka ara, dib nyanyake. Na dipkoprop nyapsine. Wini talak ara, Elia ulamuka atonunye Yohanes Pembaptis akunum yayuke. Allah yupu laka nyalamik nang arye, ‘Allah yupu deice sekamik touk, ninye arye anye biti, winiptibye’ tenen, patalamuk ning, akunum winibik.#9:12-13a ‘Winiptibye’ tenen, patalamuk ning ara, Herodes birye Yohanes el ngang ya seklobuk ning ati nyabuk. Aning touk, ‘Ninye Mi Koprop Atonunye ikin ning#9:12-13b ikin ning – Adomon yupu nyabuk ning ara, yu nang arye Yesus wanwanun yo deice opnamik ning ati, nyabuk. el nong deice deibikibuk donmalebuk, bataknamake,’ nyabuka sekamik ning, deiyok tenipmalum do?” Yesus arye nyabuk.
Yesus arye, isa talyamuk mi kwetebuk yupu
(Matius 17:14-19, 22-23; Lukas 9:37-45)
14Sik welepmek mutuku deice arye kolukuka yanganmekce, ayupu talipnin yanganmeka ani, batakuka binmek nang unmekak yayik. Yayikopura, toupne arye utam (9) batakuka binmek nang ap, Musa sekamuk yupu peterena deiyok nang ap, sik dam weika arye bulubuka wekmek nang ap, yupu kan-kan nyanmekce, yu yupu nyaldanmekba eibik. 15Sikuk mankau kanye bopmekce, sikuk nyaldanmeka ati, Yesus yayukak eibikce ara, lukdayik. Lukdayikce asok tililing abukura, bik-bik abuka Yesus damakuk yayikce, “Telebe,” nyabik. 16Yayikbuk, Yesus arye anang nirya ati nyabuk. “Ayupu, yata ning deiyok ati nyalanmalum do?” nyabuka asipdeyuk.
17Asipdeyukura, atikmek nang kan-kan tonoknye birye tamubuka ayupu nyabuk. “Naie, na mi, isa talyamuka deice arye, el yupu nirya kum dayuk ati, an yupu kekebuka dobolbanyak nang dam boyanmane. 18Na mi isa talilye talak nirya, isa mikip arye dobuka, tuku deice bataklibuk, si kamula bulule. Tonda, si lingdarap alule, el nong nirya meiyal sena atouk ulule. Winilya ati, an mapu arye, ‘Aisa yakuka yaknamak’ tenen, moropman bukni, sikce aisa kum yakdonokmanto upmake.” Ami el li birye Yesus ati nyabuk.
19Nyabukura, Yesus ayupu kekebukce, atikmek nang nirya ati lik ubukura, ayupu nyabuk. “Atalak umunye nang ara, diba kum tenen, ululum nang ati, yata wiribuka talak arye apia unamne do? Tonda, ‘Teleb unamak do?’ tenen, batakna kumce yata wiribuka talak arye pia dinauk wininamsin do? Ati, ami, na dam boyalulume,” nyabuk. 20Yesus arye nyabuka ati, anang arye ami dobuka, Yesus dam boyayik. Boyayikopura, ami talyamuk isa arye Yesus eibukopura, ami dobuka tuku deice siplobukba, aisa mikip deice arye weik arye yok sirim talibuk. Sirim talibukura, tuku deice lokuka pubukce, tuku deice bongoltonmokba, si maka barukunmok.
21Ami wininmok bukni, Yesus arye ami, el li biti asipdeyuk. “Isa talyamukbuk awininmalto ning, yata wiribuk talak arye weik winilamuk do?” nyabuka asipdeyuk. 22Asipdeyukura, ami el li birye tamubuka nyabuk. “El mitik talak arye isa talyamukce uku pum bisik ap, mekwen pum bisik ap, ‘Opnamne’ tenen, dongolelamuke. Winilamuk bukni, na mi kwetepnutum do? Kweteptumura, bico tenepsutumce melipsutume,” nyabuk.
23Nyabukopura, Yesus arye tamubuka nyabuk. “Ance, ‘Kwetepnutum do,’ nyapmalama ara, yata ati do? Allah diba tenenyak nang ati, Allah arye aning-aning nirya pil dolule. Elda Allah ati, el kum winipmanto ning, kum ulule. Aning nirya babye, talye luba kibuka pil dolule,” nyabuk. 24Nyabukura, ami el li birye tamubuka adiparyuk nyabuk. “Diba tenepmakin bukni, na diba tenena kumce, teniltona tuba unilye ning ara, melipnunilame,” nyabuk.
25Ami winipmok ning ap, el li ap, Yesus ap, yupu talipmarik ati, ‘Yesus arye yata wiripnul do?’ tenen, aunmek nang nirya arye dilyayik. Sik tuba-tuba dilyanganmek talak ara, Yesus eibukce ami talyamuk isa ati nyabuk. “Anda amul kunukna ap, yupu luba una ap, winilyam isa ara, ami talima ak talipluma batakmince, kubuka bilyame. Baminye ning, ila tamubuka, ami talima pum bisik tonap, kum weknamlyame,” nyabuk.
26Yesus arye nyabukura, ami talyamuk isa ara, weik arye ngalukukce, ami sirim talibukce, ami talimak arye kubuka biyuk. Biyukbuk, ami ara, dipmakce nang atouk upmokbuk, awekmek nang kan-kan arye, pia weik tonun, ‘Ami akunum dipmale’ tenebik. 27Utenebik bukni, Yesus arye, ami taruk talibuka tikdeibukopura, el yuk tikuk. 28Yesus ap, el mapu 12 nang ap, aik pum wekik talak ara, el mapu arye asipdeyik. “Ami talyamuk isa ara, nunce kum yakdonokmanto upmaba ara, deiyok yata arye do?” nyabuka asipdeyik. 29Asipdeyikbuk, Yesus tamubuka nyabuk. “Aisa yala, Allah morona deice aryuk yakuka dopkweteptume,” nyabuk.
30Yesus ap, el mapu ap, amutuku batakuka, Galilea tam noutamak banmek. Sik amutuku banmek talak ara, Yesus arye el mapu 12 nang deiyok ning peterenmoka ati, ‘Yuk nang ap, dobolyasicak’ tenen, ‘Yuk nang ara, kume, nunuk bitibye,’ tenelamuk. 31Ton anoutam talak arye ayupu nyabuk. “Ninye Mi Koprop Atonunye bira, tonoknye birye, ‘Opnamak’ tenen, dukudobuka yalyeura, dobuka opnamake. Obikceura, dipmalya ani, like winilye mapmalya, kam buknamle.” Yesus arye el mapu ati laka nyanmok. 32Laka nyanmok bukni, sikce, ‘Deiyok ani’ tenen, moubuka kum kel kilamik. Kum kel kilamik ati, ilil ubukura, ‘Deiyok dan do?’ tenen, kum asipdeyik.
Yesus el mapu arye, ‘Nun kan-kan arye, yatanye weiknye unamsil do?’ nyabuka, nyapdayik yupu
(Matius 18:1-5; Lukas 9:46-48)
33Mutuku deice binmeka, tamubuka Kapernaum mutuku yanganmek talak ara, Yesus el mapu sikuk yupu talipmekce, yupu nyaldanmek. Nyapdanin yanganmeka ani, Kapernaum mutuku yayikopura, Yesus ap, aik pum wekikopura, Yesus arye el mapu ati asipdeyuk. “Bisik noutamak yanganmap talak ara, yata yupu talipmalumce nyaldanmalum do?” nyabuka asipdeyuk. 34Yesus arye asipdeyuk bukni, sikda bisik yanganmek talak ara, sik kan-kan arye, ‘Yatanye tiklirye, nun deiyoknye unamsil do?’ tenen, yupu kan-kan nyaldanmekce yupu talipmeka ati, alye ubukura, tunim abik.
35Tunim abikura, Yesus bukukce, el mapu 12 nang ati, “Yalulume,” nyabuka yukubuk ati, yayikopura, ayupu nyabuk.
“Yatanye do, yata kil do, ‘Na weiknye upnamne,’ tenenyak nang ara, ninye amu tam unyakce, yuk ninye nirya ati, bico tenebuka melinauk unamake,” nyabuk. 36Yesus nyabukce, sik bukmekak kan-kan arye, mitik mi tonok dobuka, tikeibukura, iribuka bobukce ayupu nyabuk. 37“Yatanye do, yata kil do, amitik mi atonun ninye ati, bico tenebikirye, na si deice arye, telebe nyabuka melilamikcopura, nati melinamniyake. Nati, melinamniyak nang, natibuk kume. Nati, melipnikcopura, na dopdeipnuknye Allah ap, ati melinamake,” Yesus arye nyabuk.
Yesus, el yupu nyabibibuk, kum yanisinyak ninye ati, nyabuk yupu
(Lukas 9:49-50)
38Yesus arye nyabukura, Yohanes arye tamubuka nyabuk. “Naio, tonoknye elce ninye talilamuk isa, an si deice arye yakanmokbuk, eibupurye, anye bira nun ap, kum banyapnye ati, ‘Anda bataklyame,’ nyapmapu,” Yohanes arye nyabuk. 39Nyabukura, Yesus arye tamubuka nyabuk. “Ato nang ati, yupu kum sekenamlulume. Yata ninye do nirya, na si deice arye ninye winipman kum pil dobicopura, adiparyuk na deice malye yupu nyabuka kum deipnitinge. 40Nun yupu kum yanisinyak nang ara, nun kayapu, nun tam nang atonun unyake. 41Na dipkoprop yupu nyapsine. Yata nang do nirya, ‘Sikda Yesus el mapu unyaka ati, Yesus si deice arye mek kwebuka arepnuyabe,’ tenebikirye, arepmakeopura, Allah arye Aninye ati, arepnamne tenelye ning ara, kume kum danamle. Dipkoprop Allah arye dekna ning areplibuk, nirya dopdopnamake.” Yesus arye nyabuk.
Nunce, malye ubibyopura, yuk nang eipsikce deice arye, malye unyaka ati, nyabuk yupu
42Yesus arye, ayupu ton nyabuk.
Yata nang do nirya, malye ulamikce nang deice arye, atikmal mi atonun ninye ton eibikirye, ‘Sik unyak touk na babye, ton winipnun’ tenen, malye ubicopura, kanam ning, ani. Ara, minpola malye wamlye deiyoknye bira, weik keil dobuka, el kum kirikuka, laut mekwen noutam dongoptinge. 43Anggun taruk arye malye winipmunyopura, amalye upmamunye taruk, sekloplulume. Teleb ning ara, tonok taruk aryuk pil dobuka unmamunyebuk, Allah arye ninye weik lyeplirye, talipnamlak wekenamlulume. Ara, kaname. Taruk bitinye arye tuba malye winipmunyopura, Allah arye uku pia dilyak dopkwetepnamsil, pia mambule. 44Uku din mutuku unamak ninye, sik nong dinamle uku ara, pia kum bataknamale, dinauk upnamle. Tonda, auku pia kum tangapnamle ati, pia dinamle.
45Anggun yan yanibuka bimunce, malye winipmunyopura, amalye upmamunye yan, sekloplulume. Teleb ning ara, tonok yan arye bamunce, pil donmamunyopura, Allah arye ninye weik lyeplirye, talipnamlak, wekenamlulume ara, kaname. Yan bitinye arye bamunce, malye tuba winipmunyopura, Allah arye uku pia dilyak dopkwetepnamsil ara, pia mambule. 46Sik nong dinamle uku ara, pia kum dipnamake, dinauk unamake. Tonda, auku ara, pia kum bataknamla ati, pia dinamle.
47Tonda, anggun asing eipmunce, malye winipmunyopura, dana tam asing duk lukuka bataklulume. Teleb ning ara, tonok asing aryuk Allah arye ninye weik lyeplirye, talipnamlak, im deice benamlume. Ara, kaname. Asing bitinye dimunce, tuba malye winipmunyopura, Allah arye uku din mutuku dopkwetepnamsil ara, pia mambule. 48Allah yupu laka nyalamuknye Yesaya arye sekamuk touk, uku din mutuku, ku pia weik tuba-tuba niniklamlirye, sik nong pia dinamle. Tonda, uku pia weik dinamle, sik uk pia weik tuba-tuba dinamle, kum bataknamle.
49‘Tukwak ning yala nirya lyuplyak’ tenen, garam ua dokuka deililamak touk, na mapu ati, ‘Malye wininamak do, teleb wininamak do?’ tenen, pirilen ning arenamsine. Uku arye namin ning diplirye, kat ning bataknamle touk, na mapu malye tuba unyak ning ‘Kum upnamle’ tenen, wenena ap, ikin ning ap, deice arye winipnamsine. 50Garam ua, teleb ning bukni, to teleb nyalamle ning kum uplirye, mitang nyaplyopura, yata wiribtumce tamubuka ua teleb ning keipdeiptum do? Aning, kum winipmanto atia.
Aning atouk, na nong ap, na yupu ap, diba tenebuka talipmunce, nauk dobolyanganamnululume. Ninye arye, ‘Mula ning teleb upnamle’ tenen, garam ua dongolamak touk, anggun teleb wininamlum ning, ani. Yatanye birye, ‘Na weiknye upnamne do?’ tenen, nyaldana kumce, na ap, na yupu ap, talipmunce, kanye tonokuk bobuka neika unamlulume. Aning ara, telebe uka. Yesus arye nyabuk.
S'ha seleccionat:
Markus 9: EIPA
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.