Lukas 1
1
Asurat deiya kouna ati, laka nyabuk yupu
1Allah arye, ‘Aminyan talak winipnamuk ning ani,’ nyamuk ning ara, wini talak nun kan-kan Allah arye, pil weik dolamuka ani, sirya dakuk ning ara, sik ninye weik elilamikce, aning nirya laka nyana ati, yupu sekdeibikura, laka nyanyake. 2Aning nirya elilamik ning ara, Yesus ara, el pil winiryuk deiya koubuk talak arye, sik asing elilamik nang ap, tonda, el ap, melibuka Allah yupu pil dopra balamik nang ap arye, laka nyalilamsik touk anang arye sekdeibik. 3Aning ati ara, na babye, ‘Yesus el pil deiyok koubuk talak arye, lilibuka biksirye, deiyok koubuk talak arye, dipdongobukce, sirya dakuk tam nirya, Yesus arye petelamukce, winilamuk touk, aning nirya sekdeipnamne’ tenen, sekuka deipse.
4Teofilus na ka kopropa, anda pia telebe. Ayupu sekuka deipmasa ara, an peterepkik ning nirya, ‘Dipkoprop ulamuk’ tenen, kel biknalum ati, sekdeipse. Ati ayupu nyapnukine.
Yohanes Pembaptis ara, ninye mek dongonanye deipnamuka ati, nyapdeibuk yupu
5Yudea mutuku tam nirya weik ninye deiyoknye Raja Herodes talibuka ulamuk talak noutamak arye, Allah arena ati, deiyoknye el si ara Zakaria ulamuk. Zakaria ara, Allah arena deiyok nang#1:5 Allah el si erena ati arena deiyok nang ara, Allah el si eren aik pum pil dolamik. Sik deiyoknye lak len yupu, nomor 14 dipdelulume. bukni, el ap pil dolamik nang yala sik si ara, Abia, Zakaria el kil Elisabet ara, sik apu kopropa Harun yala nang arye deiamik. 6Zakaria ap, el kil Elisabet ap, Allah yupu nyalilye atouk ubuka diksukumuk ulamrikce, Allah arye, “Wininamlulume, aning kum wininamlulume,” nyapdeiamuk yupu, moubuka talyamrikce, dolbalamrik. Ayupu nyalul touk ning nirya atonun, sirya dakuka pil dolamdik, malye una deice tenebuk ning ababye, kum winilamrik ara, Allah arye sikti, kanye deiamuk. 7Diksukumuk ulamrikura, Elisabet ara, you kil ulamuka ati ara, sik mapu ton kum delilamrik, you uk ulamdika ani, akunum wisi danamrik mapu, kum deipmanto uamrik.
8Tonok talak ara, Allah arena ap, morona ap ati, ‘Pil donamak’ tenen, Zakaria el wipdeibikura, Zakaria ara, el Allah si erena aik#1:8 Allah si erena aik ati, laka nyana yupu ara, laka nyana yupu nomor 15 dindelelume. pum pil donmok. 9Sik Allah arena ati, pil dolamik nang winilamik touk, tonok sum ara, Zakaria arye Allah arena aik pum binuka weklirye, ‘Uku sekuka, nintong teleb ning uku dongonamle’ tenen, Allah arye nyapdeiamukba, sik anang arye, Zakaria wipdeibikura, Zakaria arye, Allah si erena aik pum wekukce, pil donmok.
10Pil donmoka ani, nintong teleb ning uku dongopnuyuk talak ara, ninye weik anyaik dam bulubuka Allah moronmek. 11Moronmekura, Zakaria arye anyaik pum pil donmokbuk, nintong teleb ning uku dongopnuyuk talak sirik tam, Allah el nyapdeipne ning pil dolbananye ap, Allah ati yupu lak lelbananye ap, malaikat tonoknye talye karin arye kutukuka tikilyayuk. 12Malaikat tikilyayukura, Zakaria eibukce, lukdanuka kanye walwal ubuk akarye, ilil weik ubuk. 13Ilil weik ubuk ati, amalaikat arye Zakaria ati ayupu nyabuk.
“An ilil una meme. An arye, Allah ati morominye ning ara, Allah arye akunum kekepkuke. An kil Elisabet arye sal mi deipnamle. Akunum deiplyeura, el si ara Yohanes nyapnamlyame. 14Allah el kanye ara, ‘Ami ara weik mambul,’ tenelule. Ati ara, ami ulya deice arye, kanye weik deipmince, kil-kil upkilibuk unamlame. Tonda, an kil arye ami deiplyopura, ninye weika arye ami ati, kanye pia deipnamake.
15Deiyok ara ami neplyopura, mambul pil dolamlye ati, Allah arye anye biti kanye pia delinamle. Ami neplyopura, anggur mek kanye wangalamak mek ap, yuk talye kanye wangalamak mek ap, pia kum dinamle. Tonda, el winiryuk deiplye talak anirye, do unamle talak nirya ara, Allah El Dib Kanye ami el talima wekuka, langdiplirye, pia puto weik areplyopura Allah El Dib Kanye arye anye pia talinamle. 16Israel ninye weik Allah batakuka yuk tam bisik biyikbuk, ami arye neplyopura elce aninye weike dobuka sik ni Allah el tam tamubuka delilyanamle.
17Minop arye, Allah yupu lak nyalamuknye, nabi#1:17 Nabi Allah el yupu laka nyan nang ara, Allah arye, ‘Na yupu ara, ninye kekepnamak’ tenen, elce wibuka deiyamuk nang ati, el yupu laka nyabukopura, anang arye, yuk ninye nirya ati, laka nyalbalamik. Anang ara, ‘nabi nang’ nyanyabe. Nabi nang, sik laka nyan yupu nomor 25 dipdelulume. Elia, Allah El Dib Kanye mikip deice arye, Allah yupu peterelamuk touk, ami neplyopura el babye, atouk wininamle. Yesus ara, aminyan yanamla ati, ami arye minop menekuka kintinilinamle. El ulya deice arye, sik Israel nang arye, sik mapu nirya ati, bico tenebuka kanye deibuka unamake. Tonda, sik Allah yupu yanibuka malye ulamice nang ara, ami el winilamlya deice arye, sik malye wininyak ning batakikirye ila tamubuka, Allah diba tenebuka, diksukum unyak nang weik kel arye unyak touk, Allah el tamuk kipropnamake. Awininamla nirya ara, Yesus arye talinamle ninye kintinilina ati wininamle.” Amalaikat arye ayupu nirya Zakaria ati nyabuk.
18Nyabukopura, Zakaria kekebukce amalaikat ati tamubuka nyabuk. “Anyapmanilama ara, yata ning winiptua deice arye, ‘Aning nirya ara, dipkorop winipnamle,’ teneptinye do? Ara, na babye, na kil babye, wisi pia akunum danuma ati, nyapne,” Zakaria arye nyabuk.
19Nyabukura, amalaikat arye tamubuka nyabuk. “Nara, talinye kume. Na si ara, Gabriel unune. Nara, Allah damak unirye, Allah elce dopkwetepmanilura, laka teleb yupu nyalyanmakine. 20Anyapmakin ning nirya ara, Allah arye tenyamuk talakuk dipkorop winipnamle bukni, ance diba kum tenepmanilama ati, atalak arye dipdongobuka, ami min kum deiamlye talak nirya ara, yupu kum danamkilyebuk unamlame.” Amalaikat Gabriel arye, Zakaria ati nyabuk.
21Ayupu tuba talinmarik talak nirya ara, Allah arena ati, aik dam bulubuka wekmek nang arye, ‘Zakaria aik pum pia unmal ning ara, yata wininmal do?’ tenen, teniltonmek. 22Sik teniltonmek karen ara, Zakaria aik pum arye kutukuka, buru tam tikilbiyukura, yupu ton pia kum nyapmanto ubuk. Yupu kum nyapmanto ubukce, ‘Na yupu nyapnun’ tenen, taruk kununmok. Taruk kununmoka ati, anang nirya arye, ‘E lengdar mapmakirye, lengdar deice elilamak ning atonun, Allah arena aik pum arye eipmala ati, unmala’ tenen, kel bikik.
23Zakaria el Allah arena ati pil dona ap, morona ap talak akunum sirya dakukopura, el ap, el kil Elisabet ap arye sik mutuku kopropa tamubuka birik. 24Birikura, daulamrika ani, Elisabet mi bobukce, el yuk aik pumuk wala pamubarye ulamuk. El yuk mutuku kum balamuk, tonda yuk kilapu arye uruna ati el aik kum yangalamik. Elisabet el yuk pia ulamuk. 25Aulamuk talak ara, ayupu nyalamuk. “Na ni Allah arye amambul pil akunum dopmanilak mi bopse. Allah arye nati, bico tenepnukce kanye deipnuk deice arye, mi akunum bopse. Tonda, yuk ninye nirya arye, ‘Anda you kile,’ nyalamnikba, alye ulamnuka ara, Allah arye akunum kum danipnuke,” Elisabet arye nyalamuk.
Yesus deipnamuka ati, laka nyabuk yupu
26Elisabet mi bomuka ani, naku barye wala akunum ubuka talak ara, Allah el im deice pil dona ap, el yupu laka nyananye ap ati, el si Gabriel dopkwetebukura, Yudea tam mutuku bukni, Galilea tam noutam asik dolamik asik si ara, Nasaret mutuku laka nyalbiyuk.
27Ara, Yahudi yala nang, sik apu kopropa Sisinye, Raja Daud arye deibukura, dadeipdanin balamika ani, Daud yala nang arye deibiknye Yusuf ara, elce dopnamne nyalamuk kil, el dam nyalbiyuk. Akil ara, ninye dona kum pia wel kil ulamuk. El si ara, Maria.
28Amalaikat Gabriel arye, Maria dam biyukce ayupu nyabuk.
“Na ka kilo telebe. Allah arye anti kanye deipkukce, pia mambul pil dopnamkile. Allah ara an ap urumunce pia melinamkile,” nyabuk. 29Malaikat arye nyabukura, Maria kekebukce, ‘Yata wiripnamnila ati nyapmanil do?’ tenen, teninmokce ilil weik ubuk. 30Ilil ubuk bukni, Gabriel arye Maria ati nyabuk. “Kume an ilil kanye bona meme. Allah arye anti bico tenebuka, kanye akunum deiamkuke. 31Allah melipkilya deice arye sal mi bominya ani, aminyan talak ami deipminyopura, el si ara, Yesus nyapnamlyame.
32Ami ara aning-aning nirya deice tam ululnye, Allah im deice ulirye, aning-aning nirya talilulnye bira, el mi kopropa unamle. Ami ara weik mambulnye anya arye, eibikirye, ‘Ara Allah el mi kopropa ulule,’ nyanamake. Ami ara el apu kopropa Daud,#1:32 Yesus el apu Daud nyalamik ning ara, deiyok ani. Maria ap, Yusuf ap ara, sik bitinye arye neika mapmarika ani, Yesus kum deiprik bukni, Allah El Dib Kanye mikip deice melibukba, Maria arye mi bomuka ani, Yesus deibuk. Maria babye, Yusuf babye, Daud yala nang arye deiyamika ati, (Matius 1:16), Yesus ara, Daud yala nang arye deibik nyaptibye. Israel ninye nirya talibuka weik ninye deiyoknye ulamuk touk, el babye, Allah mikip areplibuk, Israel ninye nirya talibuka, weik ninye deiyoknye unamle. 33Wini talibuka unamle talak ara, Israel ninye ara, sik apu kopropa Yakup arye deiamukura, dadeipdanin banyak ninye nirya, pia talibuka unamle. Pia kum bataknamle. Elce talinamle ning ara pia talibuka unamla anya arye min kum winipmanto unamle,” Gabriel arye nyabuk.
34Nyabukura, Maria arye tamubuka asipdeyuk. “Anyapmanilam ning nirya ara, na ninye kum dopse ati yata upnutu do?” nyabuka asipdeyuk. 35Asipdeyukba, malaikat arye tamubuka Maria ati nyabuk. “Allah El Dib Kanye an nong deice deipkilirye, Allah el mikip ara, kanya atonun an nong deice unamkile. Winipnamkila deice arye, mi bominya ani, aminyan talak, malye winin ning tonoknye babye, pia kum wininamle mi deipnamlama ati, ninye nirya arye, ‘Ami ara, Allah el Mi Koprop,’ tenebuka nyanamake.
36Tonda, an yala kil Elisabet, pia wisi akunum deibuk bukni, el babye, sal mi deipnamle. Elisabet ati, you kil nyalamikbuk, winira mi bobukce wala naku barye akunum upmale. 37Aning nirya ara winipnamla ara talye ati kume. Deiyok ara, ani. Aning-aning nirya, Allah ara ikin kum uptue. Allah elda aning nirya kanamuk ulule.” Gabriel arye nyabuk.
38Malaikat arye Maria ati, ayupu nyabukopura, Maria arye tamubuka nyabuk. “Nara, Allah arye, ‘Winiplyame,’ nyanilye ning ara, ‘Teleb’ tenen, kanye deibuka ununa ati, ‘Anyapmanilam touk upnamnile,’ tenepne.” Maria arye nyabuk. Nyabukura, amalaikat arye, Maria asukumuk batakuka biyuk.
Maria arye uruna ati, Elisabet dam biyuk yupu
39Atalak aryuk, Maria kintinibukura, minopce Yudea noutam weik asik dolamik, mutuku dup awamukce welina ap, koulukuna ap, kipdanin binamuk mutuku biyuk. 40Biyukce, tonok asik domikak biyukura, Zakaria el aik pum wekukce, Elisabet ap eipdarikopura, “Telebe,” nyabuka kibuk. 41Maria arye “Telebe,” nyabukura, Elisabet kekebuk akarye adiparyuk, el mi mun pum tam arye lulukukura, Allah El Dib Kanye arye, Elisabet el kanya talima noutamak yanuka wekukce, langdibuk. 42Langdibukopura, Elisabet weik yupu arye nyabuk.
Se, yuk kilapu nirya ara, Allah arye sikti, kanye deililul bukni, an Maria uk ara fia, weik arye melikulule. Tonda, anda sal mi deipnalama babye, Allah arye akunum wibkukce kanye deipkuke. 43Se, nara yata kil tenepmanilamce, nun ni Allah Israel ninye lyena deiyoknye el lin, na dam ara, yata ati yanmalam do?
44Ance ‘Telebe,’ nyapmanilam ak, kekepmakince adiparyuk mi bopsa ara, ami el kanye deipmalce lulukmale. 45Allah arye, ‘Winipnamkine,’ nyapdeiamkuk yupu ara, ‘Dipkoprop winipnamnile,’ tenebuka akunum diba tenepluma ati, Allah melipkilyeura, kanye deibuka telebuk unalame. Anda weik mambul kile. Elisabet arye Maria ati nyabuk.
Maria arye, ‘Teleb,’ nyabuk yupu
46Maria arye ayupu nyabuk.
Na kanye talima nirya tenepmance, na ni Allah el si erenamane. 47Tonda, na kanye talima arye, na Lyena Deiyoknye#1:47 Lyena Deiyoknye Alkitab noutamak ara, Lyena Deiyoknye sekenyaka ara, ton talak Allah tenen ati sekenyake. Ton talak ara, Yesus tenen ati sekenyake bukni, deiyok ara, Yesus el ining arye kilipsuka deice arye Allah arye lyesulule. Lukas arye Allah ati sekuk. Tonda, laka nyana yupu nomor 17 dipdelelume. Allah arye lyepmanila ati, na kanye pia deipne. 48Na ni Allah, el amuak mitik kil unun ati, elce nati bico tenepnukura, kanye deipnukce, weik mambul pil dopnukba, sal mi deipnamna ati, elti, kanye deibuka ara, el si erenamne. Atalak dipdongobuka dotalak unamak ninye babye, nati ‘Elda weik mambul kil,’ nyanamniake.
49Nyanamniaka ara, talye ati kume.
Ara, na mitik kil ununbuk, Allah im deice pia weik mikipnye birye, mambul pil dopnuka ati, ayupu nyanamniake. Allah elda, talye tukwak ninye atonunye kume. Elda, pia diksukumnye anya arye, el si ara pia telebe. 50Yata ninye do nirya, atalak babye, yuk dotalak babye, Allah elti, ilil uplirye, amutamukirye, ‘El ara, weik mambul’ tenen, el siuk erebuka unyak ninye nirya ara, Allah arye aninye ati luba kina kumce, pia bico tenebuka melilule. Ara, atalak unyak ninye babye, sik arye mapu deibikirye, dadeipdanin, balamice ani, ninye yupa weik upninbanamak kili sal bapye, melilule.
51Allah el taruk mikip deice arye, weik mambul pil dolamuk. Tonda, sik kanye tenena deice arye, ‘Nun weik nang unyabe,’ tenebuka, kwalilamik ninye nirya ara, akunum kum danililamukce ara, bisibuka yanilule. 52Sik weik ninye deiyok nang erepdeipnarye, ulamik dobuka el amuak deililamukura, el amuak ulamik nang ara dobuka ereldelilamukce, teleb akuk deililamuk.
53Tonda, sik aning-aning nirya patalamuk ninye ara, Allah arye sik patapne ning weika arye aribnabuk dololamikura, boulamuk. Winilamukura, sik bona weik talin nang ara, arena kumce talye nonguk dolkwetelamuk. 54Tonda, el mapu atonun Israel ninye ati, kum lubakilul anya arye, nunda pia malye wininyap bukni, minpola wenena kum usulul bukni, bico tenebuka pia melinauk usulule. 55Ara, Allah arye nun apu yapu ati, ‘Wininamsine,’ nyalilamuk touk, akunum winipsile. Ara nun apu#1:55 Yahudi yala nang, sik apu yapu ati, laka nyana yupu nomor 20 dirume. Abraham ap, Abraham arye deibukura, dadeipdanin, balamika ani, wini talak delikce nang nirya ap ati, pia bico tenebuka melinauk ulule.
Ayupu nirya ara, Maria arye nyabuk. 56Maria ap, Elisabet ap neika ulamdika ani, wala winilye akunum maprikopura, Maria ara el mutuku kopropa Nasaret tamubuka biyuk.
Yohanes mek dongonanye ati, deibuk yupu
57Elisabet mi bomuka ulamuka ani, el mi deipnamuk wala akunum ubukopura, sal mi deibuk. 58Atalak ara, el mening dam ulamik ninye ap, el yala ninye ap, “Allah bico tenebuka melyamuka deice arye, sal mi akunum deiple,” nyabikura, kekebikce, sik aninye ap kanye deibik. 59Sik niryada ulamika ani, pin barye sum akunum ubukopura, ‘Ami ara Allah el mi unamle’ tenen, Allah arye nyapdeiamukura, Musa sekamuk touk, ‘El den bam bol mouse ning#1:59 den bam bol mouse ning sengna – Ayupu deiyok kel bikna ati, laka nyana yupu nomor 19 dirume. seknuyap’ tenen, yanmek. Winibikce, el li siuk “Zakaria nyapnuyabe,” nyapdayikce, ami el li si sibikura, el lin birye nyabuk.
60“Kumde, ami el si ara, Yohanes nyapnamabe,” nyabuk. 61Nyabukura, aninye nirya arye tamubuka Elisabet ati nyabik. “Ka kilo, an tam ninye nirya ara, asi ton kum si sinyake,” nyabik. 62Nyabikce, ami el li Zakaria ati, ami ara elce, ‘An mi ara, el si ati, yata si dopdeipnamsilam do?’ tenen, taruk pukdeibikce asipdeyik.
63Asipdeyikura, Zakaria arye tamubuka taruk pukukce, ‘Mitik yok lakase ara, sekne ning arepnuniyak’ tenen, morobuk. Morobuk ati, arebikura, Zakaria arye, ‘Ami el si ara, Yohanes,’ nyabuka sekdeibuk. Winibukura, abulubuka wekmek nang nirya arye, ‘Se,’ nyabuka ngalukunmek. 64Zakaria arye, ami si akunum sekukdeibukopura, adiparyuk Allah arye el sitang teleb kipdeibukce, yupu aribukura, atalak yupu deiya koubuka nyanmokce, Allah si erenmok. 65Winibukopura, Yudea mutuku noutam sik anoutamak ulamik ninye nirya, awinipmok ning ati, ‘Se, aning ara mambul weik ning’ tenen, malye nyanmekce yupu talilamik.
66Yupu nyalamik ati yupu kekelamik nang nirya arye, tenilamikce, pia asildalamik. Elisabet ara Allah el mikip deice arye meilyamukura, Yohanes deibuke. Deibukura, Allah arye ami meilyamukba, pia telepuk ulamuka ati, sik eiyamik nang nirya ara, asildalamikce ayupu nyalamik. “Ami deibuk talak winibuk ning nirya ara, weik mambule ati, ami ara neplirye, yatatonunye upnamle do?” Nyalamik.
Yohanes el li Zakaria arye, nyabuk yupu
67Allah El Dib Kanye arye, Yohanes el li Zakaria kanye talima wekuka langdibukopura, aminyan winipnamuk ning ati ayupu laka nyabuk.
68Zakaria arye aminyan talak upnamle ning ati, ayupu nyabuk.
Nun ni Allah ara telebnye ulule. Nun Israel ninye pia kalikuka melisulul Allah ati el si erebuka kipne. Ara, Israel ninye el mapu nun lyena ati, akunum yanuka kintinipmasila ati, el si erebuka kipne. 69-70Allah arye nun apu kopropa Abraham ati, “Winipnamne,” nyapra deiamukura, el yupu nyabuka laka nyalamik nang, nabi nang arye, sekeiyamsik touk, Allah el pil dolamuknye Daud arye deibuka, dadeipdanin, yangalamica ani, deipnamlanye bira, nun lyena ati, Lyena Deiyoknye weik mikipnye akunum erepdeipmasile. 71Elce lyepnamsila ara, ‘Nun lik’ tenen, tapu kouna ap, ona ap usinyak nang arye, talisinyak noutamak ara, Allah arye loplopnamsile. 72Tonda, Allah arye nun deiyamsik deiyok nang ati, bico tenebukce, kanye talima areamuka anya arye, aning batakna kumce, lyepsirye arye telebuk keipnamsile. ‘Israel ninye na ninye,’ tenenunce, “Winipnamsine,” nyapdeiamsukce, apia dilamuka ani, akunum kintinipmasile.
73Allah arye nun apu kopropa Abraham ati, “Winipnamsine,” nyalamuk yupu ara, ani.
74-75“Ara, ‘Sikda nun lik’ tenen, ona ap, tapu kouna ap winisikirye, talipsik nang ati, na Allah arye loplopnamsine. Loplopsinyeura, ilil kum arye, na piluk pia donamlume. Ara, sik yuk ninye arye talye kanye bobuka winilamakto kum bukni, malye winina pia kumce, diksukum upmunce, anggun unamlum talak nirya ara, narye anggunti, ‘Wininamlulume aning ara kum wininamlulume,’ nyabuka areamsise yupu, ‘Moubuka talimunce, na piluk pia donamlume’ tenen, na mikip arilnamsine.” Allah arye nyalamuk.
“Allah arye nun apu kopropa Abraham ati nyapdeiamuk touk, akunum winipmasila ati, nyapsine.” Zakaria arye nyabuk.
76Zakaria arye ayupu nyabukopura, el mi Yohanes deipmoka ati, ayupu nyabuk.
Na mi Yohanes ara, nun Lyena Deiyoknye ati, el yanamle bisik menekuka kintinilinalama ati, yuk nang arye, ‘Allah aning-aning nirya alip tam ulirye, weik mikip ulinye bira ara, el yupu laka nyalulnye nabi bira, Yohanes el ulule,’ nyanamkiake. 77El bisik kintininalam ara, Yohanes ance, ‘Allah el mapu sik lyen ning kel biknamak’ tenen, laka nyanamlyame. Ara, ninye nirya, sik malye unyak ning ap, malye tenenyak ning ap ati, Allah arye namin kiplirye, kum danipnamle deice arye lyepnamle yupu ara, laka nyanamlyame.
78Nun ni Allah arye ninye nirya ati, minpola wenebuka kum osulul bukni, kanye talima areplyeura, bico tenebuka melisululnye anya arye, nun malye ning nirya kum kipsilirye, lyepnamsile. Berentam talak keting deiplirye, kuna ak dirina ulamle atonun nun ni Allah arye nun lyenanye, im deice arye dopkweteplibuk, nun dam yanamsile. 79Nun kuna ap, dipna ap noutamak unyap ninye dam yalyeura, dirina kipdeipsilirye, lyepnamsile. Nun Lyenanye dirina kipsilirye, nun ap, Allah ap, ‘Teleb kibuka neika unamak’ tenen, bisik peterenamsile. Na mi Yohanes an wininamlam ning ap, nun Lyenanye elce winipnamle ning ap ati, nyapne. Zakaria arye nyabuk.
80Yohanes el nong nepnin balamuk talak ara, el kanye talima mikip weik arye wisipnin balamuk. Akunum nepnin balamuk talak ara, ninye ap, mek ap, pia kumak dabinuka ulamuka ani, Allah arye ‘Wininamle,’ tenyamuk pil, el pil lakak deiyok koubuk talakuk, yuk Israel ninye ulamikak biyukba, Israel kili sal nirya elilamikce, er ti kil bikamik.
S'ha seleccionat:
Lukas 1: EIPA
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.