Yunus 1
1
Allah arye Yunus biti, nyapdeiamuk yupu yanibuka ati, nyabuk yupu
1Tonok sum ton, Allah el si Yahweh#1:1 Yahweh – Allah el si koproba ara, ‘Yahweh’ ulule. Allah arye Musa ati, ayupu lakak arye nyabuk (Keluaran 3:14). Ibrani yupu deice arye ahuruf ‘YHWH’ aninguk sekenyake. Ibrani yupu nyanyak ninye arye, ‘Allah el si koproba lakak kum nyaptibye’ tenen, ilil ulule. Ilil ulula ati ara, sikce huruf ‘YHWH’ aninguk sekenyake. Bukni, Allah arye Musa ati, “Kume na si koprop ara, ‘Yahweh’ unune. Asi Yahweh bikmunce, asi uk erebuka, nati kinamnululume,” nyabuk. Ibrani kili sal arye huruf YHWH sekenyak bukni, ‘Ahuruf uk sekipyopura, ayupu nyana ara, walwal upsilyak’ tenen, nunce ‘Yahweh’ sekenyabe. Indonesia Alkitab noutam ara, Allah el si Yahweh kum sekenyake. Sikda, ‘TUHAN’ sekenyake. Bukni, Indonesia Alkitab noutamak nirya, ‘TUHAN’ eipmunyopura, ‘Ara Allah el si Yahweh sekenyak sukum,’ tenenamlulume. Allah el si Yahweh nyana ara, pia telebuke. Tonda, laka nyana yupu nomor 49 dipdelulume. arye, ninye si Amitai birye deiamuknye, Yunus biti nyabuk. 2“Weik asik mutuku si, Niniwe binulyame. Niniwe mutuku unyak ninye nirya ara, pia malye-malyeuk winiceba, na elinunce bikinune. Malye wininyakba elinune ati, anda amutuku bimince, nyapnamlame. ‘Anggunda, malye ning tuba-tuba winilamunyeba, Allah arye wenepnamsile,’ nyabuka, laka nyalbinamlyame.” Allah arye, Yunus biti nyabuk.
3Nyabuk bukni, Yunus bira, Allah el si Yahweh arye nyapmok yupu batakuka, ‘Allah dinmanil sukum ara, kum unune. Tarsis mutuku uk binune,’ tenebuka, yuk bisik banmok. Bisik banmoka ani, laut kup-kup mutuku si, Yopa mutuku biyukce, ‘Laut mekwen deice bana ati, kintinyamik mek lia yo weknirye, Tarsis mutuku binun’ tenen, el bana ati, yo bok akunum dekukopura, Yunusda laut mekwen deice bana ati, el si kapal, amek liya yo aik welebuka bukuk. Bukukopura, amek liya yo deice, el ap yuk nang ap, laut mekwen deice biyik. Yunus bira, Allah arye nyapmok yupu kum kekebukce, ‘Allah dam ara, kum unamne,’ tenebukce, ‘Tarsis mutuku binuka unamne’ tenen, biyuk.
4Banmeka ani, Yunus bira, amek liya yo, el si kapal laut noutamakuk bukni, amu tam aik wekuka mapmok. Mapmok talak ara, Allah el si Yahweh arye, mikip weik mok piriripna dopkwetebukba, mek deibukce kuruninikuka, longteng-longteng abukce, amek liya yo, el si ara kapal laut, dangubuka opmanto unmok.
5Winibukba, laut mekwen deice mek lia yo bobanmek nang ap, amek liya yo talibuka, pil donmek nang nirya ap, ilil weik ubukba, ilil kanye bobuka ngalukunmek.
Malye yupu nyanmikce, sikce ninye urasin atonun kipdeipna arye, si erelamik ning ati, ‘Yanuka melipsilyame,’ nyabuka, yuk-yuk si erelamik touk, isa mer si nyabuka morobik. Amok piriripna weik, kanye imun ning unmok ning ati, ‘Nun mek liya ikin arye, mek pum tam weksilyak’ tenen, ati ara, ‘Nun mek liya yo kanam uptue’ tenen, sik lipmek ning nirya yokuka, laut mekwen pum tam dopkwetebik. Winibuka babye, mek liya yo mekwen tuba wekmanto unmok. Sik apil donmek talak ara, Yunus bira, amek liya yo pum tam wekmokakuk, tuba mapmok.
6Mek liya yo, laut mekwen akunum noutam wekmanto unmokopura, mekwen deice mek lia yo bobana deiyoknye birye, Yunus mapmokak biyuk. Asukum biyukce, nyabuk. “Mok piriripna arye, nun pirinmasil ning ara, kel bikmalamcuk, mapmalam ning ara, yata ati do? Wini talak aniryuk buklyame! Bukmince, an si erelyam Allah ati, moropminba, eipsilirye, ‘Na mapu oplyak’ tenen, bico tenepsuturye, melipsutuba, kum dipnuyap do, lyepnamsil do? Nun walwal bukni, utenenmaba ning ati, ance elti, adiparyuk moropnulyame,” nyabuk.
7Nyabukura, amek liya yo talina deiyoknye ap, Yunus ap, im alip aik akunum weleprikopura, mek lia yo talibuka pil don nang arye, sik mining nanguk nyapdayik. “Weik teleb ning ara, lak bikilin ning, tonda win ning, el si undi, aning deice arye winipdeibibibuk, ‘Yatanye deice bol piplyopura, nun imun upmasil ning ara, anye akunuma. Anye birye, malye upmalba, winimasila ati, deiyok ara elce,’ tenebibirye, kel biknuyabe,” nyapdayik. Nyabikce, undi winipderikbuk, bikilin ning ara, Yunus binyak lak kibuke.
8Winibukba, sikce Yunus biti, asipdeyik. “Dip do? Aning ara, ance malye upmalamba, nun pirinmasil do? Anda, dan mutuku arye, yanmalam do? Anda, dan mutukunye do? Tonda, anda yata pil donanye do? Anda, yata yalanye do?” nyabuka asipdeyik. 9Nyabuka asibikba, Yunus birye nyabuk. “Nara Ibraninye yalanye unune. Laut mekwen ap, im deice ap, tukwak ap, kwepdeibuknye, Allah el si Yahweh ara, im deice ululba, el siuk erenune,” nyabuk.
10Nyabukura, sik ilil weik ubukba, sikce, “Se, weik malye winipmalam ning ara, yata ati do?” Anyabik ning deiyok ara, ani. Ara, asum ara, Yunus birye, ‘Allah el si Yahweh arye, nyapdeipmok yupu batakuka, el dam arye kwarabuka ayanmane,’ nyabuka, akunum laka nyapmoka ati, ayupu nyabik.
11Ayupu nyanmek talak ara, mok piriripna ap, mek langdibuka longteng-longteng anmok ning ap, pia mikip weik tonap ubukba, sikce Yunus ati asipdeyik. “Nunce anti, yata wiripkitibya deice arye, weik mok piriripna tunim aptu do?” nyabuka asipdeyik. 12Nyabikopura, Yunus birye tamubuka nyabuk. “Kume, na dobuka, laut mekwen pum tam donoknululume. Winipnumunyopura, weik mok piriripna, awininmal ning nirya ara, tunim apnule. Wini talak ara, na akunum kel bikne. Apirinmasil ning deiyok ara, na deice arye, anggun talye nang pirinmasile,” nyabuk.
13Anyabuk bukni, sik amek liya yo talibuka pil don nang arye, ‘Mikip arye kup-kup tam bitibye’ tenen, mek liya yo buknin banmikbuk, kup-kup tam binmanto kum ubik. Mek lontik-lontik anmok ning ara, asum mitik weik winipmok bukni, atalak ara, mok piriripna weik arye unmokba, mek deibuka, weik arye tonap tamubuka, deip-deip welebuka ati, kup-kup tam binmanto kum ubik.
14Winibukopura, sikce Allah, el si Yahweh ati, morobikce nyabik. “Se, na ni Allah, an si Yahweh ati moropkiyabe. Anye opnuyaba ati ara, ‘Dipkoprop nun wenebuka kum opnamsilam’ tenen, moropkiyabe. Allah ance tenepmalamce, pirinmasilam ning ara, an Allah Yahweh arye tenepmalam touk, akunum winipmasilame. Ati ara, anye malye ulul do, teleb ulul do, nun walwal anya arye, anye opnuyaba ati ara, ‘El ining ara, nun taruk deice kum upsiliba, ance kum wenepnamsilam’ tenen, moropkiyabe,” nyabik.
15Nyabikce, Yunus tomobuka, weik mekwen noutamak donokik. Donokikopura, mok piriripna donmoka ap, mek lontik-lontik anmok ning ap, aning nirya kum dayuk. 16Mok piriripna kum dayukopura, amekwen deice mek lia yo, el si ara, kapal laut deice bukuka balamik nang nirya, Allah el si Yahweh ati, ili ubuk. Ilil ubukce, el si erena ati, kam ning obuka, elti arebik. Winibikce, Allah el si Yahweh ati, “Kume, lyepsiminyopura, an si erena ati, asum-asum nirya winibuka-winibuka unamabe,” nyabuka, nyalin yupu nyapdeibik.
17Sik anang ara, Yunus dobuka, laut mekwen pum bisik donokikce, ayupu nyabik bukni, ouku weik daupmoka ani, Allah el si Yahweh arye, weik mek pum bal, weik ikan Yunus dam arebukba, amek pum bal ikan arye, Yunus dibuka, amkorokwetebuk. Winibukba, Yunus weik ikan mun pum tam wekukba, ara like winilye mabuk.
S'ha seleccionat:
Yunus 1: EIPA
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved.