२ कोरीन्थी 6
6
1ङी परमेस्वर्कुस् काम् जाङ्ह्ओलम्इ दोह्त तोनेःनाङ्स दाय्ह्सा “लौ परमेस्वर्इ योनःतीलेः बयःओ दल्ताक्सा काम् नीङ्इ त्याक्तेःआकानी द्याह् ओउःइ बयःओपाय् वाय्लाम्” त तेती तोनेःनाङ्स 2“लौ क्रोःओ दीन्हाङः नीङ्इ तोओपाय् सायःनेःआलाङ्स ओउः दल्ताक्सा खेःओ दीन्हाङः ङाइ लव्ह्ती बयःनेःआलाङ्स” त दाय्ह्ती परमेस्वर् दाय्ह्आ। लौ परमेस्वर्इ योनःती बयःओ दल्ताक्ओ त्याक्सा दीन् इलेःआः बा।
3ङीकोः काम्कायः अरुइ पेमालो त योताक्माःसाकायः ङीइ अरुकायः ब्रःताक्सा कुरा जाङ्ह्ङुसुलु। 4गल खेःयाकायःमा “ङीपाय् परमेस्वर्कोः काम् जाङ्ह्ओ मान्ता लेःआः ङी” त छ्यानःसाकायः ङीइ आन दुख च्यवःती लीह्सीःओलम् गोरःआलाङःसु। 5नाःतो बेलाहाङः अरुइ ङीकायः घान्ताङीतो पानःताङीतो हुम्ओलम्इ न्हेङःताङीतो। नाःतो बेलाहाङः ङीइ एनःमामाःत जेःमामाःत हारीनःतीलेः ह्र्युङ्तो काम् जाङ्ह्आलाङःसु। 6ओहाङःसैको ङी छय्ङ्तो जाङ्ह्तीमा व्हाय्तो जाङ्ह्तीमा वाह्नाङी। अरुकायः रीस् वाङ्माःत काङ्तीलेः योनाङःसु। परमेस्वर्कोः छय्ङ्तो ग्वालामः दोःती ङीइ सबैकायः दोङ् पेतोलेः राप्नाङःसु। 7परमेस्वर्कोः ग्वम् दोःती ङीइ ओउःकोः दोङ् कुरालेः तोनाङःसु परमेस्वर्कोः मीक्हाङः ङी पेतो स्याव्आक्तीको ओउःकोः काम् नीङ्तोलेः जाङ्ह्नाङःसु सुइमा ङीकायः क्लीमःसा खाय्ताङीली। 8ङीकायःपाय् यात्नीस्चाक्खेइ पेतो तोती ङीकायः ताङ्ह्ताक्आताङी अरुखेइ पेमालो तोती ङीकायः मीताक्आताङी। ङीइपाय् दोङ् कुरालेः तोनाङःसुतो अरुखे “माःओ कुरा लेःआः” त दाय्ह्नै। 9ङीकायःपाय् सबैइ तय्ह्ताङीतो यात्नीस्चाक्इ “इपाय् सुलो” त दाय्ह्ती ङीकायः तय्ह्सा ग्याइली। बेला बेलाहाङः सीखेःङीतो लौ सेलःलेः मुधाङ्नाङी। अरुइ ङीकायः थोःती घान्ती झ्यान्ते ङी न्युम्ह्ताक्तोलेः स्याव्ताक्ताङीतो बुरु सात्ताङीली। 10लीह्सीःओ बेलाहाङःलम्मा गलकायःमा चोङाय्तीलेः मुनाङी। ङीपाय् ह्र्यात् मान्तालो लेखा खेःङीतो बुरु नाःतो मान्ताकायः बयःसा खाय्नाङःसु। ङीकोःपाय् दोह्मा नाःल सबैलेः ङीकोः मुलेःनाः। 11लौ नीङ् कोरीन्थहाङः मुओलम् नाङ्कायः दोङ्ह्ती नोःती ङीइ लयःकोः ल्हुङ् फुस्तीलेः छ्यानःनेःआलाङ्स। 12ङीखेइ नीङ्कायः ल्हुङ् फुस्ती नोःसा ग्यानाङी नीङ्खेइ ङीकायः फुस्ती नोःसा ग्यातेःइली। 13“लौ द्याह्पाय् ङीलो लेखा फुस्ती नोःताङी दा” त दाय्ह्ती नीङ्कायः ङीकोः हौलम् चोःलम्लो लेखा तोनेःनाङ्स।
14ङ्हाम्मालो मान्तालम्कुस्इ ब्रेङःकाय्ती काम् जाङ्ह्लाम्। पेओपाय् पेमालोकुस् गत हायःती ब्रेङःकाय्सा खाय्नौ र। थोङ्ओपाय् च्याक्ओकुस् गत हायःती ब्राङ्काय्चाःच र। 15ख्रीस्पाय् सैतान्कुस् गलमा ब्राङ्काय्ती वाह्चल ओउःतलेः ङ्हाम्ओ मान्तापाय् ङ्हाम्मालो मान्ताकुस् ब्राङ्ती वाह्चल। 16परमेस्वर्कोः मन्दीर्हाङः मुर्तीलम् मुसा दोःइली। ङीपाय् ओउः दोङ् जीङः नाःओ परमेस्वर्कोः मन्दीर् लेःआः तय्ही। “ङापाय् लयःकोः मान्तालम्कुस् याक्मानाङः ओउःमयःकुस् वाह्मानाङः। ओउःमयःकोः परमेस्वर् ङालेः स्याव्नाङः ओउःमयः ङाकोः मान्तालेः स्याव्नै” त दाय्ह्ती परमेस्वर् दाय्ह्आ। 17ओउःत झ्यान्ते “ओउः पेमालोलम्कायः जुगाङ् फेनु ओउःकुस् मुलाम्। रेव्तो काम्लम् जाङ्ह्ओमा फेनु ओहाङःसैको नीङ्कायः म्रोती रोम्नेःनाङ्स” त दाय्ह्तीमा परमेस्वर् दाय्ह्आ। 18“ङापाय् नाङ्कोः आपालेः स्याव्नाङः नीङ्पाय् ङाकोः चोःलम् चोःद्याङ्लम् स्याव्तेःनै” त दाय्ह्तीमा ओउः ग्वम् नाःओ परमेस्वर् दाय्ह्आ।
S'ha seleccionat:
२ कोरीन्थी 6: CDM93
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 1993 Wycliffe Bible Translators Inc., All Rights Reserved.