१ कोरीन्थी 9
9
1ङापाय् ऐन् फेओ मान्ता लेःआः ङ माःर। ङीकोः प्रभु येसु ख्रीस्लेः च्यवःती ङापाय् ओउःकोः छ्युङ्ह्ती ल्होक्ओ मान्ता लेःआः ङ। ल्होक्आक्तीको नीङ्कःताङ् आल्ती येसुकोः पेओ कुरा तोआक्तीको नीङ्इलेःतेः ङ्हाम्तेःआकानी। 2ङापाय् प्रभु ख्रीस्इलेः छ्युङ्ह्ती ल्होक्ओ मान्ता एत यात्नीस् मान्ताइ ताःनीली यादो। ओउःमयःखेइ एत ताःनीतो नीङ्खेइ ङाकायःपाय् “प्रभुइ ल्होक्ओ मान्ता लेःआः” त चीःतेःनानी माःर दोह् हायःती दाय्ह्सा प्रभुइ ङाकायः नीङ्कःहाङः ल्होक्आक्तीको नीङ्इ ङ्हाम्तेःआकानी। ओउःत झ्यान्ते ङापाय् “ख्रीस्इ ल्होक्ओ मान्ता” त चीःसा खाय्ओ लेःआः। 3ङाकायः गाल्तुम्ती नोःओलम्कः ङा एतलेः त्याङ्नाङः 4ङाकोः काम् जाङ्ह्झ्याङ्कायः जेःगा तुङ्गा दोःसा त्याक्लेःनाः माःर। 5ङाइ अरु ख्रीस्इ छ्युङ्ह्ती ल्होक्ओमयःलो लेखा ङ्हाम्ओ मोमःचोः वानःसा दोःनाङः माःर। प्रभु येसुकोः हौचोङ्इमा पत्रुस्इमा ओउःत हायःनानी बा। 6ङामा बर्नाबास्मा नीची नीस्चाक् झुङ्आले काम् जाङ्ह्ती लयः झेलाङ् झेसा खेःङचतोया। 7खेःल सीपाहीलम्इमा लःलयःकायः झेसा गलमा परइली ओउःमयःकायः ज्याला दोःलेःनै। फेरी राङ् सुक्ओ मान्तामा ओउः राङ्सै दोःओ सायःपाय् जेःसा दोःनाः स्याः नाःओ मान्तामा लयःकोः स्याःकोः दुत् तुङ्सा दोःलेःनाः माःर। 8इ ङाइ तोओ कुरापाय् मान्ताइ तोओ ह खेःल परमेस्वर्कोः ऐन्हाङःमा तोओलेः मुनाः। 9“गहुङ् लैती वाह्ओ स्याःकायः मौला ल्हुप्लाम्” त मोसाकोः ऐन्हाङः लेखती मुनाः। इ कुरापाय् स्याःकोः कुरा ह खेःल 10ङीकायः लेखओ लेःआः बा। ओहाङःसैको ओउः राङ् याव्ओ मान्ताइमा “लोने आम्ह् दोःलेःनाङः” त आसती म्हर्ती राङ् याव्पानी। फेरी ओउः सायः राःओ मान्ताइमा “लौ ङा द्याह् आम्ह् दोःआलाङः बा” त म्हर्ती आसती राःपानी। 11ङीइपाय् नीङ्कःहाङः परमेस्वर्कोः कुरा वार्आलाङःसु ओउःत झ्यान्ते ङीइ काम् जाङ्ह्झ्याङ्कायः नीङ्कःसै थोक्लम् त्याक्सा स्याव्नाः माःर। 12अरुलम्इ नीङ्कःसै त्याक्सा दोःनै ओउःत खेःओ ङीइ त्याक्सा न्हाङ्तोलेः स्याव्नाः। स्याव्सापाय् स्याव्लेःनाः ख्रीस्कोः पेओ कुरा थोल्ह्ती तोसाकायः ङीइ लीह्सीःओ गोरःती ङीकोः काम् जाङ्ह्झ्याङ्कोः त्याक्धाङ्उसुलु। 13परमेस्वर्कोः मन्दीर्हाङः काम् जाङ्ह्ओलम् मन्दीर्हाङः ल्हाओ चीस् त्याक्ती जेःनानी। फेरी ओहाङःकोः बेदीहाङः काम् जाङ्ह्ओलम्इमा बेदीहाङः गम्ओ जेःगाकोः जेःनाःनी एत नीङ्इ चीःतेःनानी माःर। 14एतलेः “परमेस्वर्कोः समचार् थोल्ह्ती तोओलम्इ ओउः काम् जाङ्ह्झ्याङ्कोः जेःसा दोःपै” त प्रभुइमा तोआकान्। 15ओउःतलेः तोओ लेःआः ङाइ काम् जाङ्ह्झ्याङ्कोः दोह्मा त्याक्माङल “प्रभुइ तोओ काम् जाङ्ह्झ्याङ्कोः ङाकायः नीङ्इ बयःसा खेःतो” त दाय्ह्ती तोसाकायः लेखमाङल दोह् हायःती दाय्ह्सा एत हायःओसै ङा “सीसालेः पेआनाः” त म्हर्नाङः। फेरी “जाङ्ह्झ्याङ्कोः दोःसाकायः ङाइ प्रभुकोः काम्पाय् गलमा जाङ्ह्ङल” त ङाःती तोलेःनाङः “ओउःपाय् आह्रे तोओ लेःआः” त सुइमा तोसा खाय्नीली। 16परमेस्वर्कोः पेओ समचार् थोल्ह्ती तोओ काम् जाङ्ह्साकायः ङा लयःकोः नेह्रो ओर्ताक्सा खाय्ङल दोह् हायःती दाय्ह्सा ओउः काम्पाय् परमेस्वर्इलेः बयःआताङः। ओउःत झ्यान्ते ङाइ जाङ्ह्सालेः खेःनाङः बा जाङ्ह्ङल त खेःया ङा जुगाङ् पेमालो स्याव्आनाङः। 17ओउः काम्पाय् ङाइ लयः झाक्ती जाङ्ह्ओ त खेःया ङा ज्याला त्याक्सा स्याव्ओ खेःतो ओउःपाय् खेःल परमेस्वर्इलेः बयःओआः त झ्यान्ते ओउः काम् जाङ्ह्नाङः बा। 18ओउःत झ्यान्ते ङाकोः काम् जाङ्ह्झ्याङ्कोः दोह्लो दाय्ह्सा ङाइ दोःसा खेःओ पैसा त्याक्माःतलेः ख्रीस्कोः पेओ समचार् थोल्ह्ती सोह्कायः तोसा खाय्नाङः ओउःलेः ङाकोः जाङ्ह्झ्याङ्कोःआः।
19मान्ताकःहाङः ङाकोः मालीक्पाय् नाःबाय्ल ख्रीस्कोः कुरा ङ्हाम्ताक्साकायः ङाइ सबैकोः नोकरीलेः स्याव्नाङः। 20यहुदीलम्कःहाङः मुतोक्हाङः ओउःमयःकायः ङ्हाम्ताक्साकायः ङापाय् यहुदीलो लेखा स्याव्मानाङः। ङापाय् ऐन् जवओ मान्तापाय् खेःङल मोसाकोः ऐन् जवती जाङ्ह्ओलम्कःताङ् मुतोक्हाङः ओउःमयःकायः ङ्हाम्ताक्साकायः ङाइ ओउःमयःलो लेखा जाङ्ह्मानाङः। 21ओउः ऐन् चीःमालोलम्कःताङ् मुतोक्हाङः ओउःमयःकायः ङ्हाम्ताक्साकायः ङा ऐन् चीःमालो मान्तालो लेखालेः स्याव्नाङः। स्याव्सापाय् स्याव्नाङः परमेस्वर्कायः ङाइ ख्रीस्कोः ऐन् जाङ्ह्नाङः। 22फेरी ओउः ग्रमःत ङ्हाम्धाङ्मालोलम् पेतो ङ्हाम्ताक्साकायः ङा ग्रमःत ङ्हाम्धाङ्मालो मान्तालो लेखा स्याव्नाङः। माः रैस यात्नीस्चाक् दल्ताक्साकायः ङा सबैकायः दोह् खेःयामा स्याव्सामा ग्यालेःनाङः दोह् खेःयामा जाङ्ह्सामा ग्यालेःनाङः। 23इत हायःओ ङाइ परमेस्वर्कोः पेओ समचार् थोल्ह्ती तोसाकायः जाङ्ह्लेःनाङः ओहाङःसैको ङामा अरुकुस् पेतो स्याव्सा दोःनाङः। 24तन्ती खेलओ मान्तालम्पाय् सबै तन्नै यात्चाक् ह जीतनाः ओउःकायःपाय् रोकोः माला बयःओ लेःआः एत नीङ्इ चीःतेःनानी। ओउःत खेःओ नीङ्पाय् तन्ती खेलओ मान्तालम्लो लेखालेः परमेस्वर्कोः काम् पेतो त्युस्तीलेः जाङ्ह्ती ओउःइ बयःओ काम् जाङ्ह्झ्याङ्कोः त्याक्सा बोङःनु। 25सुसुखे जीतसा बोङःनानी ओउःपाय् गलमा लीङ्हाय्मामाःत यातैज्योः ल्हुङ् स्याव्ती वाह्नै। एतलेः वाह्लेःनै ओउः तन्ती खेलओ मान्तालम्खे झ्योम्ह्ती वाय्सा रोकोः माला ह दोःनै ङीखे गलमा द्योक्मालो जीङः दोःनाःतय्ही। 26-27ओउःत खेःओ परमेस्वर्कःसै दोःसाकायः ङा पेतो लीङ्हाय्मामाःत वाह्ती लयःकोः ल्हुङ्कोः पेमालो कुरा जाङ्ह्ङल। जाङ्ह्नाङः त खेःया ङाइ परमेस्वर्कोः पेओ समचार् अरुखेकायः थोल्ह्ती तोतोक्हाङः ङाखे वाय्तो स्याव्चाङः यादो।
S'ha seleccionat:
१ कोरीन्थी 9: CDM93
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 1993 Wycliffe Bible Translators Inc., All Rights Reserved.