တမန်တော် 25

ဖေတ္တုမင်းရှေ့တော်၌ ပေါလုစစ်ဆေးခံခြင်း

1ဖေတ္တုမင်းသည် ထိုပြည်နယ်သို့ရောက်၍ သုံးရက်ကြာသောအခါ ဆီဇာရီးယားမြို့မှ ဂျေရုဆလင်မြို့သို့သွားလေ၏။ 2ထိုအခါယဇ်ပုရောဟိတ်ခေါင်းဆောင်များနှင့် ဂျူးခေါင်းဆောင်များသည် ဖေတ္တုမင်းထံ၌ ပေါလုအား တရားစွဲဆိုကြ၏။ 3ထိုသူတို့က မိမိတို့အားကျေးဇူးပြုသည့်အနေဖြင့် ပေါလုကို ဂျေရုဆလင်မြို့သို့ဆင့်ခေါ်ရန် တောင်းဆိုကြ၏။ ဤသို့တောင်းဆိုရခြင်းမှာ ထိုသူတို့သည် ပေါလုကိုလမ်းတွင် ချောင်းမြောင်း၍ လုပ်ကြံသတ်ဖြတ်ရန် ဖြစ်၏။ 4ထိုအခါ ဖေတ္တုမင်းက “ပေါလုသည် ဆီဇာရီးယားမြို့တွင် ထိန်းသိမ်းခံထားရ၏။ ငါသည်လည်း ထိုမြို့သို့ မကြာမီပြန်သွားမည်။ 5သင်တို့ထဲမှ တာဝန်ရှိသူများသည် ငါနှင့်အတူလိုက်၍ ပေါလု၌အပြစ်တစ်စုံတစ်ရာရှိလျှင် သူ့ကိုစွဲချက်တင်ကြပါစေ” ဟု ဆိုလေ၏။

6ဖေတ္တုမင်းသည် သူတို့ထံ၌ ရှစ်ရက်၊ သို့မဟုတ် ဆယ်ရက်ထက်မပိုဘဲ နေပြီးနောက် ဆီဇာရီးယားမြို့သို့ ပြန်လေ၏။ နောက်တစ်နေ့တွင် တရားခွင်၌ထိုင်လျက် ပေါလုကိုခေါ်ဆောင်လာရန် အမိန့်ပေးလေ၏။ 7ပေါလုရောက်လာသောအခါ ဂျေရုဆလင်မြို့မှ ဆင်းလာသောဂျူးတို့သည် သူ့ကိုဝိုင်း၍ ကြီးလေးသောစွဲချက်များဖြင့် စွပ်စွဲကြ၏။ သို့သော် သက်သေကိုမူ မပြနိုင်ကြပေ။

8ပေါလုကလည်း “အကျွန်ုပ်သည် ဂျူးပညတ်ကျမ်းကိုဖြစ်စေ၊ ဗိမာန်တော်ကိုဖြစ်စေ၊ ဆီဇာဘုရင်ကိုဖြစ်စေ ဆန့်ကျင်သည့်အပြစ်တစ်စုံတစ်ရာမျှ မပြုခဲ့ပါ” ဟု ချေပပြောဆိုလေ၏။

9ထိုအခါ ဖေတ္တုမင်းသည် ဂျူးတို့ကို ကျေးဇူးပြုလိုသဖြင့် ပေါလုအား “သင်သည် ဂျေရုဆလင်မြို့သို့ တက်သွား၍ ထိုမြို့၌ ငါ့ရှေ့တွင် ဤစွပ်စွဲချက်များနှင့်ပတ်သက်၍ စစ်ဆေးခံလိုသလော” ဟု မေးလေ၏။

10သို့သော်ပေါလုက “အကျွန်ုပ်သည် ဆီဇာဘုရင်၏တရားခွင်တွင် အယူခံဝင်ထားသဖြင့် ဤနေရာ၌သာ စစ်ဆေးခံသင့်ပါ၏။ အရှင်ကောင်းစွာသိသည့်အတိုင်း ဂျူးလူမျိုးတို့ကို အကျွန်ုပ်မပြစ်မှားခဲ့ပါ။ 11အကယ်၍ အကျွန်ုပ်သည် ပြစ်မှားပြီး သေဒဏ်ခံထိုက်သောပြစ်မှုတစ်စုံတစ်ခုကျူးလွန်ခဲ့ပါက သေဒဏ်ပေးခံရမည်ကို မငြင်းဆိုပါ။ သို့ရာတွင် အကျွန်ုပ်အပေါ် ဤသူတို့စွပ်စွဲသောအရာများ တစ်စုံတစ်ခုမျှ မဟုတ်မှန်လျှင် မည်သူမျှအကျွန်ုပ်အား သူတို့လက်သို့ အပ်ခွင့်မရှိပါ။ ဆီဇာဘုရင်ထံ၌ အကျွန်ုပ်အယူခံဝင်ပါ၏” ဟု ဖြေကြား၏။

12ဖေတ္တုမင်းသည် မိမိ၏အတိုင်ပင်ခံများနှင့် ဆွေးနွေးတိုင်ပင်ပြီးလျှင် “သင်သည် ဆီဇာဘုရင်ထံ၌အယူခံဝင်သဖြင့် သူ့ထံသို့သွားရမည်” ဟု ဆိုလေ၏။

13ထို့နောက် ရက်အနည်းငယ်ကြာသောအခါ အဂြိပ္ပမင်းကြီးနှင့် ဗေရနိတ်တို့သည် ဖေတ္တုမင်းကို ကြိုဆိုနှုတ်ဆက်ရန် ဆီဇာရီးယားမြို့သို့ရောက်လာကြ၏။ 14ထိုမြို့တွင် သူတို့သည် ရက်အတန်ကြာနေကြသောကြောင့် ဖေတ္တုမင်းသည် ပေါလု၏ကိစ္စကို အဂြိပ္ပမင်းကြီးထံ၌တင်ပြလေ၏။ ဖေတ္တုမင်းက “ဖေလဇ်မင်း ချန်ထားခဲ့သောအကျဉ်းသားတစ်ဦး ရှိပါ၏။ 15အကျွန်ုပ်သည် ဂျေရုဆလင်မြို့တွင်ရှိနေစဉ်က ယဇ်ပုရောဟိတ်ခေါင်းဆောင်များနှင့် ဂျူးလူမျိုးအကြီးအကဲများသည် သူ့ကိုစွဲချက်တင်၍ ပြစ်ဒဏ်ပေးရန် တောင်းဆိုကြ၏။ 16ရောမဥပဒေတွင် စွပ်စွဲခံရသောလူတစ်ဦးအနေဖြင့် စွပ်စွဲသူနှင့် မျက်နှာချင်းဆိုင်၍ ထိုစွပ်စွဲချက်ကို ခုခံပြောဆိုခွင့်မရမီ သူ့အားပြစ်ဒဏ်ပေး၍ မရပါဟု အကျွန်ုပ်ဖြေကြားခဲ့ပါ၏။

17ထို့ကြောင့် သူတို့သည် ဤမြို့သို့ ရောက်လာသောအခါ အကျွန်ုပ်သည်ချက်ချင်းပင် နောက်တစ်နေ့တွင် တရားခွင်၌ထိုင်၍ ပေါလုကိုခေါ်ဆောင်လာရန် အမိန့်ပေးခဲ့ပါ၏။ 18ရုံးတော်၌ သူ့အားစွပ်စွဲသူများတင်သောစွဲချက်များမှာ အကျွန်ုပ်ထင်မှတ်ထားသည့် ပြစ်မှုမျိုးမဟုတ်ပါ။ 19သူတို့အငြင်းပွားကြသောအကြောင်းအရာမှာ သူတို့၏ဘာသာရေးကိစ္စနှင့် ယေရှုဆိုသူအကြောင်း ဖြစ်၏။ ထိုယေရှုသည် သေလွန်သော်လည်း အသက်ရှင်သည်ဟု ပေါလုက ဆို၏။ 20အကျွန်ုပ်သည် ဤအငြင်းပွားမှုများနှင့်ပတ်သက်၍ မည်သို့စုံစမ်းရမည်ကို မစဉ်းစားနိုင်အောင်ဖြစ်သဖြင့် ပေါလုအား ‘ဂျေရုဆလင်မြို့သို့သွား၍ ဤစွပ်စွဲချက်များအတွက် စစ်ဆေးခံလိုသလော’ ဟု မေးပါ၏။ 21သို့ရာတွင် ပေါလုက ဆီဇာဘုရင်၏အဆုံးအဖြတ်ကို ခံယူလို၍ မိမိအားအချုပ်ခန်းတွင်သာထိန်းသိမ်းထားရန် တောင်းဆိုသောကြောင့် သူ့ကိုဆီဇာဘုရင်ထံပို့မည့်အချိန်အထိ ထိန်းသိမ်းထားရန် အမိန့်ပေးထားပါသည်” ဟု ဆိုလေ၏။

22ထိုအခါ အဂြိပ္ပမင်းကြီးက ဖေတ္တုမင်းအား “ကျွန်ုပ်ကိုယ်တိုင် ထိုသူ ပြောသောစကားကို နားထောင်လိုသည်” ဟု ဆိုလေ၏။

ဖေတ္တုမင်းကလည်း “မနက်ဖြန် အရှင်သည် သူ၏စကားကို ကြားရပါလိမ့်မည်” ဟု ပြန်ဖြေလေ၏။

အဂြိပ္ပမင်းကြီးထံ၌ ပေါလုလျှောက်တင်ခြင်း

23ထို့ကြောင့် နောက်တစ်နေ့တွင် အဂြိပ္ပမင်းကြီးနှင့် ဗေရနိတ်တို့သည် ခမ်းနားကြီးကျယ်သောအဆောင်အယောင်ဖြင့် တပ်မှူးကြီးများ#25:23 စစ်သားတစ်ထောင်ကို အုပ်ချုပ်ရသော တပ်မှူးကြီး။၊ မြို့၌ထင်ရှားကျော်ကြားသောဂုဏ်အသရေရှိလူကြီးများနှင့်အတူ ညီလာခံခန်းမသို့ ကြွရောက်လာကြ၏။ ထိုအခါ ဖေတ္တုမင်းသည်လည်း ပေါလုကိုခေါ်ဆောင်လာစေရန် အမိန့်ပေးလေ၏။ 24ဖေတ္တုမင်းက “အဂြိပ္ပမင်းကြီးနှင့်တကွ ကြွရောက်လာသောပရိသတ်အပေါင်းတို့… ဤလူကို ကြည့်ပါလော့။ ဂျူးလူမျိုးအားလုံးက သူသည် ဆက်၍ အသက်မရှင်သင့်ကြောင်း ဂျေရုဆလင်မြို့၌သော်လည်းကောင်း၊ ဤမြို့၌သော်လည်းကောင်း အော်ဟစ်လျက် တောင်းဆိုခဲ့ကြ၏။ 25သို့သော်လည်း သူသည် သေဒဏ်ထိုက်သောပြစ်မှု တစ်စုံတစ်ခုမျှ မကျူးလွန်ခဲ့သည်ကို ကျွန်ုပ်သိရပါ၏။ သူကိုယ်တိုင် ဆီဇာဘုရင်ထံ အယူခံဝင်ရန်တောင်းဆိုသဖြင့် သူ့ကို ရောမမြို့သို့ ပို့ပေးရန် အကျွန်ုပ်ဆုံးဖြတ်ထားပါ၏။

26သို့သော်လည်း သူနှင့်ပတ်သက်သောအစီရင်ခံစာကို ဆီဇာဘုရင်ထံ ရေးရန် အကျွန်ုပ်၌ တိကျသောအကြောင်းအရာတစ်ခုမျှမရှိပါ။ ထို့ကြောင့် ဤစစ်ဆေးမှုပြီးဆုံးသောအခါ အကျွန်ုပ်သည် အစီရင်ခံစရာ အကြောင်းတစ်စုံတစ်ခု ရေးနိုင်ရန် သူ့ကို သင်တို့အားလုံးရှေ့၊ အထူးသဖြင့် အဂြိပ္ပမင်းကြီးရှေ့သို့ အကျွန်ုပ်ခေါ်ထုတ်ပါ၏။ 27အဘယ်ကြောင့်ဆိုသော် အကျဉ်းသားတစ်ဦးအား စွပ်စွဲရသည့်အကြောင်းရင်းတစ်စုံတစ်ရာကို မဖော်ပြဘဲ ပို့ပေးလိုက်ခြင်းသည် မသင့်လျော်ပါဟု ကျွန်ုပ်ယူဆပါသည်” ဟူ၍ ဆိုလေ၏။

S'ha seleccionat:

တမန်တော် 25: BCB

Subratllat

Copia

Compara

Comparteix