တမန်တော် 24

ဘုရင်ခံဖေလဇ်မင်းရှေ့တော်၌ ပေါလုစစ်ဆေးခံခြင်း

1ငါးရက်ကြာသောအခါ ယဇ်ပုရောဟိတ်မင်းအာနနိသည် ရှေ့နေတေရတုလုအပါအဝင် အကြီးအကဲတချို့နှင့်အတူ ရောက်လာ၍ ဘုရင်ခံထံ ပေါလုကို တရားစွဲဆိုကြ၏။ 2ပေါလုကို ခေါ်ထုတ်လာပြီးနောက် တေရတုလုသည် ဘုရင်ခံအား လျှောက်ထားသည်မှာ “မြတ်သောဘုရင်ခံဖေလဇ်မင်း… အကျွန်ုပ်တို့သည် အရှင်မင်းမြတ်၏ဘုန်းတော်ကြောင့် အလွန်ငြိမ်းချမ်းစွာ နေထိုင်ရပါ၏။ ထို့ပြင် အရှင်၏အမြော်အမြင်ကြီးမှုကြောင့် ဤတိုင်းပြည်တွင် ပြုပြင်ပြောင်းလဲမှုများလည်း ပေါ်ထွက်လာခဲ့ပါပြီ။ 3ဤသို့သောဆောင်ရွက်ချက်များကြောင့် အကျွန်ုပ်တို့သည် အရှင့်ကို အထူးကျေးဇူးတင်လျက် ကြိုဆိုကြပါ၏။ 4အကျွန်ုပ်သည် အရှင့်ကိုကြာမြင့်စွာ မနှောင့်ယှက်လိုသောကြောင့် အကျွန်ုပ်တို့၏အကျဉ်းချုပ်လျှောက်ထားချက်ကို သည်းခံ၍ နားထောင်ပေးပါရန် လျှောက်ထားပါ၏။ 5ဤလူသည် ပြဿနာကိုဖန်းတီးသောသူ၊ ဆူပူအုံကြွမူဖြစ်ရန် ကမ္ဘာအရပ်ရပ်ရှိဂျူးတို့ကို လှုံ့ဆော်နေသူဖြစ်သည့်အပြင် နာဇရက်ဂိုဏ်း၏ခေါင်းဆောင်တစ်ဦးလည်းဖြစ်သည်ကို တွေ့ရှိရပါ၏။ 6ထို့ပြင် ဗိမာန်တော်ကိုလည်း ညစ်ညမ်းစေရန် ကြိုးစားအားထုတ်သောကြောင့် အကျွန်ုပ်တို့သည် သူ့ကိုဖမ်းဆီးခဲ့ပါ၏။ (အကျွန်ုပ်တို့သည် သူ့အား ဂျူးပညတ်တရားအတိုင်း စီရင်လို၏။ 7သို့သော် တပ်မှူးကြီး#24:7 စစ်သားတစ်ထောင်ကို အုပ်ချုပ်ရသော တပ်မှူးကြီးဖြစ်သည်။လုသိသည်ဝင်လာ၍ သူ့အား အကျွန်ုပ်တို့လက်မှ အတင်းခေါ်ဆောင်သွားပါ၏။ 8ထို့နောက် သူ့ကို စွပ်စွဲသောသူတို့အား အရှင့်ထံသို့လာရန် အမိန့်ပေးခဲ့ပါ၏။)#24:8 အချို့လက်ရေးမူကျမ်းများတွင် ကွင်းထဲမှကျမ်းပိုဒ် မပါဝင်ပါ။ အရှင်ကိုယ်တိုင် သူ့အားစစ်ဆေးမေးမြန်းကြည့်လျှင် အကျွန်ုပ်တို့စွပ်စွဲထားသည့် အကြောင်းအရာအားလုံးကို သိမြင်လာပါလိမ့်မည်” ဟူ၍ ဖြစ်၏။ 9ထိုအခါ ထိုနေရာရှိ အခြားဂျူးတို့ကလည်း ရှေ့နေတေရတုလုပြောသမျှသည် မှန်ကန်ကြောင်းထောက်ခံကြ၏။

10ဘုရင်ခံသည် ပေါလုကို ပြောဆိုရန် အချက်ပြသောအခါ ပေါလုက “အရှင်သည် ဤနိုင်ငံအပေါ်၌ နှစ်ပေါင်းကြာမြင့်စွာ စီရင်ဆုံးဖြတ်ပေးသူ ဖြစ်ကြောင်းသိရ၍ အကျွန်ုပ်အမှုကို ဝမ်းမြောက်စွာချေပပြောဆိုပါမည်။ 11အကျွန်ုပ်သည် ဝတ်ပြုကိုးကွယ်ရန် ဂျေရုဆလင်မြို့သို့တက်သွားခဲ့သည်မှာ ဆယ့်နှစ်ရက်ပင် မရှိသေးကြောင်း အရှင်စုံစမ်းသိရှိနိုင်ပါ၏။ 12ဗိမာန်တော်၌ဖြစ်စေ၊ ဂျူးဝတ်ပြုဆောင်များ၌ဖြစ်စေ၊ မြို့တွင်း၌ဖြစ်စေ တစ်စုံတစ်ဦးနှင့်အငြင်းအခုံဖြစ်နေသည်ကိုလည်းကောင်း၊ လူထုကို ဆူပူအုံကြွမှုဖြစ်ပေါ်စေရန် လှုံ့ဆော်နေသည်ကိုလည်းကောင်း၊ သူတို့သည်မတွေ့ကြပါ။ 13အကျွန်ုပ်အပေါ် စွပ်စွဲထားသောအရာများကိုလည်း သူတို့သည် သက်သေမပြနိုင်ကြပါ။

14သို့ရာတွင် မှားယွင်းသော ဂိုဏ်းခွဲဟု သူတို့ခေါ်တတ်သော ခရစ်တော်#24:14 ဂရိဘာသာအားဖြင့် “ခရစ်တော်၊” ဟေဗြဲဘာသာအားဖြင့် “မေရှိယ” ဖြစ်ပြီး ထိုနှစ်ခုလုံး၏အဓိပ္ပာယ်မှာ “ဘိသိက်ခံရသူ၊” သို့မဟုတ် “ရွေးကောက်ခံရသူ” ဖြစ်သည်။၏တရားလမ်း#24:14 “ခရစ်တော်၏တရားလမ်း” မူရင်းဂရိကျမ်းတွင် “လမ်း” ဟု ပါရှိသည်။အတိုင်း အကျွန်ုပ်သည် ဘိုးဘေးတို့၏ဘုရားသခင်အား ကိုးကွယ်ကြောင်းကို အရှင့်ထံ၌ ဝန်ခံပါ၏။ အကျွန်ုပ်သည် ပညတ်တရား၌ ဖော်ပြထားသောအကြောင်းအရာများနှင့် ပရောဖက်ကျမ်းများ၌ ပါရှိသမျှတို့ကို ယုံကြည်ပါ၏။ 15ဖြောင့်မတ်သောသူ၊ မဖြောင့်မတ်သောသူ အပေါင်းတို့သည် သေရာမှပြန်ရှင်လိမ့်မည်ဟု သူတို့စောင့်မျှော်လျက်နေသကဲ့သို့ အကျွန်ုပ်သည်လည်း ဘုရားသခင်ကို အမှီပြု၍ စောင့်မျှော်လျက်နေပါ၏။ 16ထို့ကြောင့် အကျွန်ုပ်သည် ဘုရားသခင်နှင့် လူအများရှေ့တွင် အစဉ်အမြဲ လိပ်ပြာသန့်နိုင်ရန် ကြိုးစားပါ၏။

17ယခုနှစ်ပေါင်းများစွာကြာပြီးနောက် အကျွန်ုပ်သည် မိမိလူမျိုးထဲမှ ဆင်းရဲနွမ်းပါးသောသူတို့အား ပေးကမ်းစွန့်ကြဲရန်နှင့် ဘုရားသခင်အား ပူဇော်စရာများလှူဒါန်းရန် ဂျေရုဆလင်မြို့သို့ ပြန်လာပါ၏။ 18သန့်ရှင်းစင်ကြယ်ခြင်းဝတ်ကိုပြုပြီးနောက် ဗိမာန်တော်၌ ပူဇော်စရာများလှူဒါန်းနေစဉ် သူတို့သည် အကျွန်ုပ်ကိုတွေ့မြင်ခဲ့ပါ၏။ ထိုအချိန်တွင်အကျွန်ုပ်နှင့်အတူ လူစုလူဝေးလည်းမရှိပါ။ ရုန်းရင်းဆန်ခတ်ဖြစ်ခြင်းလည်းမရှိပါ။ 19သို့ရာတွင် အာရှပြည်မှ ဂျူးလူမျိုးတချို့ရှိကြပါ၏။ သူတို့သည် အကျွန်ုပ်အပေါ်၌ စွပ်စွဲပြောဆိုစရာရှိပါက ဤနေရာ၌လာရောက်၍ အရှင့်ရှေ့၌ စွပ်စွဲသင့်ပါ၏။ 20သို့မဟုတ် အကျွန်ုပ်သည် ယခုတရားလွှတ်တော်ရှေ့၌ရပ်နေစဉ် အကျွန်ုပ်၌ မည်သည့်ပြစ်မှုတွေ့ရှိသည်ကို ဤနေရာ၌ ရှိသောသူများကိုယ်တိုင် ဖော်ထုတ်လော့။ 21အကျွန်ုပ်သည် သူတို့ရှေ့၌ရပ်လျက် ‘သေလွန်သောသူတို့ရှင်ပြန်ထမြောက်ကြသည့်အကြောင်းအရာနှင့်ပတ်သက်၍ အကျွန်ုပ်စစ်ဆေးမေးမြန်းခံနေရပါသည်’ ဟူသော စကားကိုသာ အော်ဟစ်ပြောဆိုခဲ့ပါသည်” ဟု ဆိုလေ၏။

22သို့သော် ခရစ်တော်၏တရားလမ်းကို ကောင်းစွာသိရှိထားသောကြောင့် ဖေလဇ်မင်းက “သင်တို့အမှုကို တပ်မှူးကြီးလုသိရောက်လာသောအခါ ငါစစ်ဆေးဆုံးဖြတ်မည်” ဟု ဆိုကာ ထိုအမှုကို ရွှေ့ဆိုင်းလေ၏။ 23ထို့နောက် သူသည် တပ်မှူး#24:23 စစ်သားတစ်ရာကို အုပ်ချုပ်ရသော တပ်မှူးဖြစ်သည်။အား ပေါလုကိုစောင့်ကြပ်ထားရန်နှင့် အနည်းငယ်လွတ်လပ်ခွင့်ပေး၍ သူ၏မိတ်ဆွေများမှ သူ့အားလာရောက်ပြုစုသည်ကို တားမြစ်ခြင်းမပြုရန် အမိန့်ပေးလေ၏။

24ရက်အနည်းငယ်ကြာသော် ဖေလဇ်မင်းသည် သူ၏ဇနီးဖြစ်သူ ဂျူးအမျိုးသမီးဒြုသိလေနှင့်အတူ ရောက်လာ၏။ ထို့နောက် ပေါလုကိုဆင့်ခေါ်၍ ပေါလုဟောသော ယေရှုခရစ်တော်အား ယုံကြည်ခြင်းအကြောင်းကို နားထောင်လေ၏။ 25သို့သော် ပေါလုသည် ဖြောင့်မတ်ခြင်းတရားအကြောင်း၊ မိမိကိုယ်ကိုယ်ချုပ်တည်းခြင်းအကြောင်းနှင့် ရောက်လာမည့်တရားစီရင်ခြင်းအကြောင်းစသည်တို့ကို ပြောဆိုသောအခါ ဖေလဇ်မင်းသည် ကြောက်လန့်၍ “ယခု သင်ပြန်လော့။ နောက်မှ အချိန်အလျဉ်းသင့်သည့်အခါ သင့်ကို ငါခေါ်မည်” ဟု ဆို၏။ 26တစ်ချိန်တည်းမှာပင် မိမိအား ပေါလုလာဘ်ထိုးမည်ဟု မျှော်လင့်သောကြောင့် သူ့ကို မကြာခဏခေါ်၍ စကားပြောဆိုလေ၏။

27နှစ်နှစ်ကြာသော် ပေါကိဖေတ္တုမင်းသည် ဖေလဇ်မင်းနေရာကို ဆက်ခံလေ၏။ ဖေလဇ်မင်းသည် ဂျူးတို့အား ကျေးဇူးပြုလိုသဖြင့် ပေါလုကို အကျဉ်းချထားရစ်လေ၏။

S'ha seleccionat:

တမန်တော် 24: BCB

Subratllat

Copia

Compara

Comparteix