I MARAKUSU 15
15
Ondae i Yesu i arono i Pilatu
15:1-15
(Mat. 27:1-2, 11-26; Luk. 23:1-5, 13-25; Yoh. 18:28–19:16)
1Mo'o-mo'oru ntu'u luwuno petewawado sando mpesomba saru mia memota'u ka anu mponto'ori Taura ka luwuno Puu Mpobitara Agama domempakosiomo. Domempongu Ira i Yesu ka do'amba mewawa Ira ka mpeweengako Ira ndi Pilatu. 2Mesikeno i Pilatu ndi Ondae, ”Omiuke mokoledo to Yahudi?” Sumangki Ira i Yesu, ”Omiu isa'a pauo.” 3Ka i'amba hadio domentuluriako Ira petewawado sando mpesomba. 4Mesikeno mbo'u i Pilatu ndi Ondae, ipotae, ”Nahi Komiu sumangkike? Kitaomo hadio ntu'u domentuluria-Komiu!” 5Sine poore ba Dosangki mbo'u i Yesu, onaemo ka ikohali-hali i Pilatu.
6Gagiomo gau a sompo-sompo oleo langkai atuu pinotola aasa mia hinuku montonda po'emado mia hadio. 7Ka i tempo atuu hinao aasa mia meneeako i Baraba kontongaano tinorungku saru ba opia mia anu umewa susuano. A laro mpe'ewado pompepate iramo. 8Onaemo ka domehawe mia hadio ka me'emao kanandio-andio ka itinonda mbo'u gau atuu. 9Isangki ira i Pilatu, ”Inehemiuke ka kupotolao mokoledo to Yahudi andio?” 10Lano ito'orio, nine luwuno petewawado sando mpesomba mpeweengako Ira i Yesu hangano kohili. 11Sine petewawado sando mpesomba mosingki ira mia hadio ka dome'emao ka i Barabamo anu domempinotolaako. 12Pohonapo mbo'u i Pilatu sumangki ka mesikeno ndi ondae, ”Tewala kanatuu, aku mbioo mia anu nineemiu mokoledo to Yahudi andio?” 13Onaemo ka dompebooli mbo'u, dompotae,”Paso Iramo a ngkeu pinotamba!” 14Ka i'amba motaeako ira i Pilatu, ”Sine mosa'oa hapake anu Doweweuomo?” Sine komero-merokuno dompebooli, ”Paso Iramo a ngkeu pinotamba!” 15Ka hangano i Pilatu ineheno tumondaako ira po'ehedo mia hadio atuu, ipotolaako ira i Baraba. Sine Ondae i Yesu ibobarasai Ira ka i'amba meweengako Ira ka Dopinaso a ngkeu pinotamba.
Ondae i Yesu pinasinggiri
15:16-20a
(Mat. 27:27-31; Yoh. 19:2-3)
16Ka i'amba sorodadu wawa Ira i Yesu a laro langkanae, onaemo raha pobitaraa, ka moboi ira luwu sorodadu mpepumpu. 17Dompopolembaako Ira lemba meloe wungo, po'ena aasa ramba-ramba ulu rui ka domenaao a wawo ulu-Do. 18Ka do'amba mpompu'u mpetabei Ira, dompotae, ”Tabe, hei mokoledo to Yahudi!” 19Domentunduhiako Ira tuko a ulu-Do, ka umonui Ira ka mpenggolontu mpesombai Ira. 20aUmarido mempasinggiri Ira domelohuo lemba meloe wungo atuu inso ndi Ondae ka dompokonaako Ira mbo'u sangka-Do.
Ondae i Yesu pinaso a ngkeu pinotamba
15:20b-32
(Mat. 27:32-44; Luk. 23:26, 33-43; Yoh. 19:17-24)
20bKa Do'amba i Yesu winawa meluarako ka Dopinaso a ngkeu pinotamba. 21#Rom. 16:13 I tempo atuu telalo asa mia anu meneeako i Simo, to Kirene, amano i Alesande ka i Rupusi, anu da iaopo i hawe inso a inia susua, ka mia atuu domedadaio ka ipo'ahao keu pinotamba-Do i Yesu.
22Dowawa Ira i Yesu a mpo'ianga anu meneeako Gologota, anu pengkonaano: Po'iangano Taku ulu. 23Ka do'amba mpoweeako Ira anggoro sinaloako mire, sine nahi Dobehe. 24#Pud. 22:19 Ka do'amba mempaso Ira, umarino atuu dompetia-tiao sangka-Do mpotendeakono undi ka iteto'ori tiano asa mia.
25Telaa oleo langku osio tempono Dopinaso. 26Ka pu'uno tembio ka Dohinuku pinau a binuri anu ninaa i tu'ai, ”Mokoledo to Yahudi.”
27Meronga saru Ondae pinaso a ngkeu pinotamba orua mia puu mporontu, asa mia i koana-Do ka asa mia i manggali-Do.
[28Kanandio inihiiomo pau a Wunta Mempori anu unino, ”Ira tewinso i olodo mia mpe'ewa.”] 29#Pud. 22:8; 109:25; Mrk. 14:58; Yoh. 2:19 Mia anu ntelalo i ra'ai mpepaukiako Ira, ka mpebitu-bitu ulu dompotae, ”Hei Omiu anu komiu betao Raha Mempori ka wali wanguo i larono otolu oleo, 30Ipetiimo inso a ngkeu pinotamba atuu ka Ikaduduiomo koroi-Miu!” 31Kanatuu koa mbo'u petewawado sando mpesomba saru anu monto'ori Taura mempasinggiri Ira i olodo ka dompotae, ”Mia susua Dokadudui ira, sine koroi-Do Ondae-Do nahi Dopokokaduduio! 32Moikoomo i Mesia, Mokoledo to Isaraeli atuu, Dopetii inso a ngkeu pinotamba atuu, ka tomengkitao ka mpompe'ala-ala.” Maupo orua mia anu pinaso a ngkeu pinotamba meronga saru Ondae dotata Ira koa mbo'u.
Ondae i Yesu mate
15:33-41
(Mat. 27:45-56; Luk. 23:44-49; Yoh. 19:28-30)
33A langku hopulu ka orua, wongi-wongi tumutuwio wita atuu ka hawe langku otolu. 34#Pud. 22:2 Ka a langku otolu mebooli Iramo meroku i Yesu, ”Eloi, Eloi, lama sabaktani?”, anu pengkonaano: Ala-Ku, Ala-Ku, tembio ka Ibinta Aku? 35Rumongeo atuu, ba opia mia anu mpentade i tu'ai mpotae, ”Kitao, Dopoboio i Elia.” 36#Pud. 69:22 Onaemo ka i'aiwa asa mia saru beri nsawu, ka i'emoo a anggoro mo'olo ka i'amba sumonsoakono tuko ka ipopo'inuako Ira i Yesu saru motae, ”Tomensikoriomo ka tomengkitao ba hawe i Elia motii Ira.” 37Ka Do'amba i Yesu mebooli meroku ka meweengakono penaa-Do. 38#Pel. 26:31-33 Tempo atuu pelingo a Raha Mempori tesempa tepe'orua inso i wawono hawe i totono. 39Tempono ikitao petewawado sorodadu anu mentade tepo'aro saru Ondae mate-Do kanatuu, motaeomo, ”Mentee ntu'u, mia andio Ana-Do Ue Ala!”
40 #
Luk. 8:2-3
Hinao koa mbo'u ba opia ira beine anu mengkita inso olai, i olodo i Maria Madalena, i Maria inedo i Yakobu anu mongura ka i Yose, saru i Salome. 41Luwudo mpentonda Iramo ndi Ondae i Yesu ka mekakaako Ira tempono Ondae i Galilea. Ka mekongko ira mbo'u i tu'ai hadio beine susua anu me'aiwa iramo i Yerusale mperonga saru Ondae i Yesu.
Ondae i Yesu kinaburu
15:42-47
(Mat. 27:57-61; Luk. 23:50-56; Yoh. 19:38-42)
42Kontongaano atuu mompu'uomo wongi, ka oleo atuu oleo pepatindaa, onaemo oleo tamo haweako Saba. 43Onaemo pu'uno i Yusupu, to Arimatea, asa mia anu tewinso a Majelisi Langkai anu pinerorohi, anu monsisikori koa mbo'u Poparentaa-Do Ue Ala, memosiaako me'aro ndi Pilatu ka umemao wata ngkoroi-Do i Yesu. 44I Pilatu kohali-hali tempono irongeo nine Ondae i Yesu mate Iramo. Onaemo ka ipoboio petewawa petea ka ipesikeno mentee ke Ondae i Yesu mate Iramo. 45Umarino rumongeo pinauno petewawado sorodadu, i'induomo meweengakono wata ngkoroi atuu ndi Yusupu. 46I Yusupu mo'oliomo sawu lena, ka i'amba motiio wata ngkoroi-Do i Yesu inso a ngkeu pinotamba ka itongoako Ira sawu lena atuu. Ka i'amba mombole Ira a ngkaburu anu kineke a laro pongku watu. Ka i'amba lumundiakono aasa watu a mpewowano kaburu atuu. 47I Maria Madalena ka i Maria ineno i Yose kumitao ba isua Dopinombole i Yesu.
S'ha seleccionat:
I MARAKUSU 15: XMZ
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió