Lyenta 9
9
Shawulu banga a tɨfe da Həmɨnpwa
1Ndi Shawulu mgban, sɨne dɨ pɨrə humwa ka ɗashi hashe dan a nə ji-kottə a itɨngɨn. Sɨne dɨ ɨli gə nda kər ji-kottə a ɓələ. Gə ləngɨn nda wudə haka Kɨsahəmə kpane 2a nyisən gə mya vən malɨmyee ɓa vən humwatə nda pɨrə vor vəni kəndəshe da Yawude a Damaska. Gə anda ɓə pa myee dɨ koɗə Tɨfe, morye ka mandye, nda kasa a pukərən gbərəwe a zə kaarən a vor Urshelima. 3Ite sɨne a nə tɨfe dɨ muɗi, ɓə zə gbyel ka Damaska, ɓɨrtə a nza wuɗila dɨ pwa a nəngɨn, a takadən kat. 4Nda fukə njiya, nda kɨla korme dɨ san atɨ, “Shawulu, Shawulu, mɨnə ɗa hye ɓə dɨ tənəə di?”
5Shawulu a ɗiyə atɨ, “Makpane, hyenə wonə yə?”
Yesu a luwa a san atɨ, “Hɨnə Yesu a hye dɨ tənəə dən. 6Zə maɗi pɨrə vor vɨra Damaska, mya boyu sa hye ɓa ɗa mbak-mbak.”
7Myee təna dɨ omo ka yə Shawulu a nə tɨfe a kangə kiw, tən ɓə kɨla korme, tənaa ɓə naa ama. 8Shawulu a maggə njiya, ite nda wana diingɨn, ndaa yə naa haa. Təna kɨsən kada a pɨrə kan a vor Damaska. 9Nda welə bətə mwaakɨn, ndaawa zɨmshe, ndaawa saɓwa haɓye.
10A vor Damaska, a nzə-kotti nee də mya wa atɨ Hananiya. Nda kɨla Həmɨmiye nee dɨ san a vor diya atɨ, “Hananiya.”
Nda mwa atɨ, “Hɨnə kwe Həmɨmiye.”
11Həmɨmiye a san atɨ, “Wudə hwoda Yawuda a haa mya wa atɨ Tɨfa Shant, hye ɗilə ama dɨ vor vɨra Tarsus, kwakɨngɨn nə Shawulu. Sɨndə dɨ ɗa hiwtə. 12Gəkɨlə mye wunən diya ɓə naa haa, ɓə naa ama mya wa atɨ Hananiya, mangɨn a shi a pukən tyefingɨn a nəngɨn ndi Shawulu gəkɨlə diingɨn a wonə, nda mɨna naa haa pepe.”
13Hananiya a luwa a sa atɨ, “Həmɨmiye, ɓwaare hananang boyi le a nə ma, ka wule shi hashe nda ɗa myee dəw a vor Urshelima. 14Ɓəgəng, sa shikan a vor Damaska nə atɨ, Kɨsahəmə kpane vən humwatə gə nda shi vor Damaska a kər ji-kotte kat dɨ ɗa hiwtə a vor kwakɨnga, a ɗɨkə gbərəwe.”
15Həmɨmiye a sa Hananiya atɨ, “Wudə! Ma hye nan nate, sɨnə na nggɨlə ɓa ɗa lyentə kan, gə nda bɨldə kwaka a haka mbiɗitɨ ɓwaare, a myee aa Yawude, ka həmye darən, kat ka mi Israila. 16Hɨn ɓa bɨlən wule tənəte ndi ɓa tənə gə kwaka.”
17Də Hananiya a maɗə a wudə hwoɗingɨn, a pukdə tyefingɨn a nə Shawulu a san atɨ, “Nzə-nuwo Shawulu, Həmɨmiye Yesu nə lyanari a hakəw a ma dɨma kəw a nə tɨfe ite hye dɨ shi ganə. Na shi gə hye ɗɨm naa haa, hye naa ka Pitɨ Ɗəmɗəmtə.” 18Tee gbyel a hangɨn, i shi ɓətɨ poyi a kajiya dɨ dii Shawulu, nda tiya naa haa. Nda maɗə a kangə, mya ɗan batisɨmatə ka haɓye. 19Beetɨ angɨn, nda zɨmshe a nyerə a gə dwat. Nda nza vor Damaska a ɗɨm bətə də a haka ji-kottə.
Shawulu a Damaska ka Urshelima
20Aa ɓongə, Shawulu a tiya hiwatə a vor vəni kəndəshe da Yawude, ndi ta boyərən atɨ, Yesu nə Nze da Həmɨnpwa. 21Myee kɨltən kat a ɗa ndəle, tən ta ɗiyəsə ləməgye atɨ, “Aa ma maddə tənətə a vor Urshelima kər ji-kotte dɨ ɗa hiwtə a vor kwakɨ Yesu nə a ma? Aa sɨnə shi ganə a vor Damaska gə nda kər ji-kottə a pukərən gbərəwe a zə kaarən a Urshelima a haka Kɨsahəmə kpane?” 22Kat ka angɨn Shawulu mgban a maɗə ta pɨrə humwa a nyerə a vor kottə dwat. Ndi ta və Yawudee nza vor Damaska ndəle təna kangə kiw gə wule bɨlte nda dɨ bɨlərən bwang atɨ, Yesu nə Ma Həmɨnpwa a Yaɓwarən.
23Beetɨ bətə hananang Yawude a peyə a shalasə le ɓa ɓɨl Shawulu. 24Shezə ndi Shawulu mgban ɓə lee sa təna dɨ mwo atɨ təna ɗa. Yawude mgban tən ta nidə kwatɨfa ndi ɓa koɗəsə gə nda dɨmgə vor Damaska tukotə ka fəre, gə təna kɨttən a ɓɨlə. 25Ka tukotə, lagbe da Shawulu a ɗɨkdən a vor kuune, a jengdən dɨ bahawa a sɨtɨ mgbəngte takadə vɨra Damaska.
26Ite Shawulu a muɗə a tɨlə vor Urshelima, nda ɓərə ɓa pedə nəngɨn ka mbiɗitɨ ji-kotte a vor Urshelima, kala a gərən, tənaa mwakan, tənaa mwa atɨ Shawulu mwadiyale ka Yesu gəə nzə-kotti. 27Barnabas a luu Shawulu a zəkan a haka kpe-lagbe da Yesu. Nda boyərən le a nə naate Shawulu a naa Yesu a nə tɨfe ite sɨne dɨ muɗə Damaska, ka byela Yesu a byelə kan, ka ite Shawulu a virwo ta hiwa ɓwaare ka kwakɨ Yesu a vor Damaska bwang ka gbənzɨmtə taa kala də. 28Sə mgban Shawulu a nza ka ji-kottə a vor Urshelima ta woyi pɨraɗaw ka gbənzɨmtə, ta hiwa ka le da Həmɨnpwa bwang a vor kwakɨ Yesu. 29Ite nda dɨ byelə ka Yawudee dɨ bwe kwa-Heline, tənaa mba məntəmətə kan, gəkɨlə angɨn təna ɨl kwatɨfe gə təna ɓɨltən. 30Ite mbiɗitɨ ji-kottə a lee ləngɨn, təna nggur Shawulu a muɗə kan a vɨra Kesariya, dɨ hangɨn təna ɗɨkdən nda muɗə vor vɨra Tarsus.
31A vor bətɨngɨn, ji-kotte kat a vor njiya Yawudiya ka Galili ka Samariya a piyagə tənəte mya dɨ tənəə dərən. Pitɨ Ɗəmɗəmtə a pɨrə humwa ta gwadə ji-kottə ta nyerədərən. Təna furo ta pɨrə humwa ka nduko kwakɨ Həmɨnpwa a hubosərən.
Ainiyas ka Tabita
32Ite Bitrus nee dɨ woyi dɨ pərəsə ka lyentə a waka ji-kottə, nda wudə haka myee da Həmɨnpwa 'ye a vɨra Lidda. 33Də a hangɨn nda pa ama mya dɨ wa atɨ Ainiyas ka ootɨ ndongtə, ɓə ɗa kyawatə fwa-fwat ka ootɨngɨn ndaawa maɗə. 34Bitrus a san, “Ainiyas, Yesu Ma Həmɨnpwa a Yaɓwarən piyada gə oote. Maɗi, tɨfɨt kɨzətɨ dəw.” Tee a hangɨn Ainiyas a maɗə. 35Ɓwaaree kat nza vor vɨre Lidda ka Sharon ɓe naa ləngɨn, təna mwadiyale a virwo haka Yesu Həmɨmiye!
36A vor vɨra Jopa, itɨ nji-kotti nə də mya wa atɨ Tabita, kwakɨngɨn ka kwa-Heline nə Dokas, naarə kwakɨngɨn nə liye. Nggi metɨ pepeti, ngga dɨ gwadə ji-poritə. 37Də a itɨngɨn ootə a gərə, ngga mbɨrə. Mya yaɓwa wongrə a nggɨrə kan a bədən a vɨnə pwatə. 38Vɨra Lidda mgban aa ɓongə ka Jopa. Ite ji-kottə a kɨlə atɨ Bitrus nee a vor Jopa, təna lyen ɓwaare kpe a hakan atɨ a mya san atɨ, “Hin poru-njiya, zə lara kpakə.”
39Bitrus a maɗə a koɗərən, ite nda tɨlə, təna nggɨrə kan a vɨnə pwatə a haa we a bə də. Nggamse mandye kat a kangə a takadə Bitrus ta təwi, tən ta bɨlən sɨɓwete Dokas a ɗarən ite kote ka myentə.
40Bitrus a dɨmdərən kat gə vor vɨnəngɨn, nda gyerə nə ɗyegingɨn a ɗa hiwtə. Nda virwa dɨ haka wo metɨngɨn a sarə atɨ, “Tabita, maɗi nza.” Ngga wana diingrə, ite ngga naa Bitrus, ngga maɗə a nza. 41Bitrus a gwadə a kɨr tɨfəngrə, ngga maɗə a kangə. Nda waga ji-kottɨngɨn ka nggamse mandingɨn kat a ɗifərən tɨrə ka myentə. 42Ləngɨn a ngguro a mbəgə Jopa kat, ɓwaare hananang a mwadiyale ka Həmɨmiye. 43Bitrus a nza vor Jopa a ɗa bətə də a haka nzə-ɗa lyentɨ sɨlara mya wa atɨ Siman.
S'ha seleccionat:
Lyenta 9: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.