Lyenta 8
8
1Shawulu mwo atɨ a mya ɓɨl Istifanus.
Tənətə a gbara ji-kottə
A fərəngɨn mya tiya tənətə a dɨ tənədə ji-kottə kɨr-kɨr a vor Urshelima. Mbiɗitɨ ji-kottə kat a gyeɓə a gbərə a təkəsə a vor njiya Yawudiya ka njiya Samariya, kpe-lagbe nə ɓəmbə mbiɗi kanyi. 2A vor ji-kottɨngɨn, imi 'ye ka kala Həmɨnpwa a hubosərən, a nggur wo Istifanus a ɗɨkə, təna tuurən kɨr-kɨr. 3Ndi Shawulu mgban a tiya tənədə ji-kottə. Nda woyə ta pɨrə hwoɗye-hwoɗye ta kasa ji-kottə ta dɨmaadərən gə hwoɗye, ndi ta ɗɨkdərən a vəni gbərəwe, morye kat ka mandye.
Filibus a vɨra Samariya
4Myee gyeɓi muɗə hee som-som a pɨrə humwa ta hiwa ka ləmə feme da Həmɨnpwa a hee təna gbərə a muɗə də. 5Də Filibus a jengə a muɗə itɨ vɨrati a vor njiya Samariya ta hiwa ka Ma Həmɨnpwa a Yaɓwarən də. 6Ite ɓwaare hananang a kɨl ləməgye da Həmɨnpwa 'ye Filibus a dɨ boyo, təna mɨna naa zərgi shikoshopye nda dɨ ɗa, təna sardə kwakingrən pepe ka ləməgyee nda dɨ boyo. 7Ka kawahəme ka təwtə, pɨle ji-dwatə a dɨmgə sɨtɨ ɓwaare hananang, myee mgban ka ootɨ ndongtə kat ka gbəgərye hananang, mya gwadərən təna piyagə ootɨ darən. 8Ɓwaaree a vor vɨratɨngɨn a ɗa hanɨngtə kɨr-kɨr.
Siman nzə-kushe
9Ama nə də a vor vɨratɨngɨn mya wa atɨ Siman. Ɓə ɓongə vor vɨratɨngɨn dɨ ɗa nggomye. Ɓwaare kat a vor njiya Samariya ta ɗa ndəle ka wule shee nda dɨ ɗa. Ndi Simantɨngɨn mgban nda maɗə ta nggorkonye atɨ ndi asə. 10Ɓwaare kat ka mi kpan-kpanye ka je a virwo a koɗən ta humwan, tən ta ndukodən ta sa atɨ, “Manə, sɨnə ka gəta Həmɨnpwa a sɨsən kɨr-kɨr, ite mya dɨ watɨrə atɨ Gbaktɨ Gətə.” 11Ɓwaare ta koɗə beesən gəkɨlə təna dɨ ɗa ndəle ka wule nggomyee nda dɨ ɗa, ɓə ɓongə sɨne dɨ ɗa shingɨn. 12Beetɨ ite ɓwaare a mwadiyale ka Filibus gə ləmə fema nda dɨ boyo a nə həmne da Həmɨnpwa, ka kwakɨ Yesu Ma Həmɨnpwa a Yaɓwarən, mya ɗarən batisɨmatə, morye kat ka mandye. 13Ndi Siman ka nənəngɨn, nda mwadiyale mya ɗan batisɨmatə, ndi ta koɗə beetɨ Filibus a haa kat Filibus a pɨrədə, ndi ta ɗa ndəle ka wule shikoshopye ka shindəla nda naarən.
14Ite kpe-lagbe da Yesu 'ye a vor Urshelima a kɨlə atɨ mi Samariya luu le da Həmɨnpwa, təna lyen Bitrus ka Yohana a hakarən. 15Ite təna tɨlə, təna ɗa myee mwadiyale a vor Samariya hiwtə gə Pitɨ Ɗəmɗəmtə a janga a nəngrən, 16gəkɨlə itɨngɨn Pitɨ Ɗəmɗəmtə aa nda janga a nəngrən, batisɨmati mya ɗarən ɓəmbə a vor kwakɨ Həmɨmiye Yesu. 17Də Bitrus ka Yohana a pukərən tyefingrən, Pitɨ Ɗəmɗəmtə a janga a nə mingɨn 'ye mwadiyale.
18Ite Siman a niyə kpe-lagbe da Yesu pukdə tyefingrən a nə ɓwaare Pitɨ Ɗəmɗəmtə janga a nəngrən. Nda zə ɓa vərən taa 19a sarən atɨ, “Vimi wule gətɨngɨn, gəkɨlə ma kat na pukən tyefi a nəngɨn, ndi mgban nda ɗɨm Pitɨ Ɗəmɗəmtə.”
20Bitrus a luwa a san atɨ, “Hye ka taa dəw, hwun ɓa peyə a yerə ɓaa, gəkɨlə hye dɨ kana atɨ hye ɓa ɗər Pita Həmɨnpwa ka taa. 21Hye asə aa peda ka lyentɨnə, gəkɨlə hubosa tamdə pepe a humwa Həmɨnpwa. 22Por-njiya gə wule səhasa, hye ɗa Həmɨmiye hiwtə, ndəng ndi ɓa nggurugə səhase dəw, ka wule səɗə-yedyee hye gə kaarən. 23Na dɨ niyə hyenə ka jiwnə hase a yedinga, səhase luu vor hubosa.”
24Siman a sa, “Gwamdi ɗamə Həmɨnpwa hiwtə gə le de, gə ɓe wule ləməgyee hwuna boyo aa kɨtti.”
25Ite yə Bitrus ka Yohana ɓe takale bwang, mɨnə hiwa ka ləme da Həmɨnpwa a haka ɓwaare, təna mɨnə vor Urshelima. Təne a nə tɨfe dɨ mɨni, təna pɨrə humwa ta hiwa ka ləmə feme da Həmɨnpwa a vor ji-vɨre Samariya hananang 'ye təna dɨ pɨrgərən.
Filibus a peyə ka a bɨdɨrə dɨ Itopiya
26Malyene da Həmɨnpwa a sa Filibus atɨ, “Muɗi dɨ basa ɓayang, a nə tɨfa a vor pɨɗe, a dɨmi dɨ vor Urshelima zə vor vɨra Gaza.” 27Filibus a dɨmə ɓa zə hangɨn, sɨne a nə tɨfe dɨ muɗi, nda peyə ka a bɨdɨrə dɨ njiya Itopiya sɨne dɨ mɨnə hwoɗye. Mangɨn ma kɨr-kɨrə ka kwake kan, sɨnə dɨ nidə gɨnəta Kandis həmtɨ Itopiya. Mangɨn a wudə vor Urshelima gə nda ɗa hiwtə a kala Həmɨnpwa gbəətə. 28Ite nda dɨ mɨnə hwoɗye a Itopiya, sɨne nza nə koombo dəwye. Nda nza mgban ta bəlshe dɨ vor Malɨmte kpala mya wa atɨ Ishaya a doro.
29Pitɨ Ɗəmɗəmtə a sa Filibus atɨ, “Wudə haka koombo dəwyirə, hye dɨ kangə gyengərə.”
30Filibus a giɓə a wudə hangɨn, nda kɨla mangɨn nee dɨ bəlshe dɨ vor Malɨmta kpale Ishaya. Filibus a ɗiyən, “Hye lee naarə shee hye dɨ bələ ma?”
31Mangɨn a luwa a sa atɨ, “Ɓə ya na ɗa na lee naarə ləngɨn, anda ama aa bɨli.” Nda sa Filibus atɨ a nda nggɨra a nza gyengəngɨn.
32Haa mangɨn a dɨ bələ vor Malɨmtɨ Ɗəmɗəmtə nə atɨ,
“Mya kɨsə a nggələ
a muɗə kan,
ɓətɨ mbaga a mya zəkan
ɓa por kwakasən,
ɓətɨ nzə-mbagaa kanyi shetətət,
mya dɨ sawgə showongɨn,
sə mgban ndaa wuna kwaamɨngɨn.
33Mya hyatan, myaa ɓashiyən ka diyale.
Taa ndəng ma lee kwirəngɨn,
gəkɨlə mye nggurgə myensən gə vɨratə.”#8.33 Naasə: Ishaya 53.7-8.
34Bɨdɨrəngɨn a ɗiyə Filibus le atɨ, “Boyi pee. Wonə kpaləngɨn a dɨ bwe le a nəngɨn ya? A nəngɨn nda dɨ bwe le ma, naasə mgban a nə ama som?” 35Filibus a tiya byele dɨ haa mangɨn a dɨ bələ, nda bɨlən a boyən ləmə feme a nə Yesu.
36Ite təne a nə tɨfe dɨ muɗi, təna tɨlə haa haɓye a gə də, bɨdɨrəngɨn a sa Filibus atɨ, “Niyi, haɓye nə ganə. Ɓə mɨnə ɓa ɗa myaa dɨ ɗe batisɨmata?”#8.36 I dorshi bɨldən atɨ, 37 “Filibus a sa atɨ, ‘A hye mwaka hubosa kat, mya ɗəw batisɨmatə.’ Də bɨdɨrəngɨn a sa atɨ, ‘Hɨn mwadiyale atɨ Yesu Ma Həmɨnpwa a Yaɓwarən nə Nze da Həmɨnpwa.’ ” 38Nda gɨra ma dɨ lyembəri ka koombo dəwyingɨn nda kangə. Ndi ka Filibus təna janga a pɨrə vor haɓye, Filibus a ɗan batisɨmatə ka haɓye. 39Ite təna nggɨragə vor haɓye, Pitɨ Ɗəmɗəmtə a nggur Filibus tan-tan a muɗə kan, bɨdɨrəngɨn aa yə nan. Nda pɨrə a muɗə sɨnggən ta ɗa hanɨngtə. 40Də Filibus a dɨma a vor vɨra Azotus, nda woyo ta hiwa ka ləmə feme da Həmɨnpwa a vor vɨree a bətɨ hangɨn kat, baa nda tɨlə vor vɨra Kesariya.
S'ha seleccionat:
Lyenta 8: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.