Lyenta 15
15
Kpe-lagbi ji-shalale a Urshelima
1Imi dɨ vor Yawude a dɨma dɨ vor njiya Yawudiya a shi Antiyok, a tiya kəntə kənə ji-kottə shee atɨ, “A myaa jengdəwnə a lakəwne ɓətɨ ɓashita Musa a kənə Yawude, hwunaa dɨ ɗɨm mbətə a pɨrə həmne da Həmɨnpwa.” 2Ləməgingɨn a shi ka ndəlsətə ka məntəmətə kɨr-kɨr a waka yə Bulus ka Barnabas ka ji-kotte shi dɨ Yawudiya. Ji-kottə ɓe niyəshe, təna lyen Bulus ka Barnabas ka i ji-kotti a Urshelima gə təna dɨ pa kpe-lagbe ka mbiɗitɨ mi kpan-kpani ji-kottə gə təna nidə ləməgingɨn. 3Tən ji-kotte mya lyentɨrən dɨ vɨnə hiwte a Antiyok a nggur tɨfe a koɗə dɨ vor njiya Finikiya ka Samariya, tən ta boyərən le a nə viriwate myee aa Yawude a viriwagə koɗə pɨle a mwadiyale ka Yesu. Ləməgingɨn a nɨngə ji-kottə kɨr-kɨr. 4Naya myee mya lyanatɨrən dɨ Antiyok ɓe tɨla a vor Urshelima, ji-kotte də kat ka mi kpan-kpani vɨnə hiwtə kat ka kpe-lagbe a wayadərən, a luutɨrən pepe. Yə Bulus ka Barnabas kat ka myee zə mgban a boyə ɓwaare wule shee Həmɨnpwa a ɗa dɨ tɨfərən.
5A hangɨn, tən ji-kotte dɨ gyenge da Farise a maɗə a kangə vor ɓwaare a sa atɨ, “Mbak-mbak, myee aa Yawude mya jengdərən a lakəwne, mya mɨna ɗɨkdərən tən ta koddə ɓashita Musa.”
6Kpe-lagbe kat ka mi kpan-kpani vɨnə hiwtə a peyə ɓa nidə ləməgingɨn. 7Ite təna nidə ləməgingɨn a pyeltɨrən kat, Bitrus a maɗə a kangə wakasərən a sarən atɨ, “Ji-nuwo, hwun leyə atɨ a vor bətɨrə pɨri, Həmɨnpwa a tarha dɨ vorsəwnə atɨ dɨ kwaama myee aa Yawude ɓa kɨl ləmə feme da Həmɨnpwa a mwadiyale kan. 8Həmɨnpwa hiɗə kal-kal ndi ma lee hubo nagi ndo ma, sɨnə bɨləm bwang atɨ ɓə luutɨrən tən myee aa Yawude 'ye mwadiyale kan, səngɨn nə ɗa nda vərən Pitɨ Ɗəmɗəmtə ngga janga a nəngrən, ɓətɨya nda vəm Pitɨngɨn. 9Həmɨnpwa aawa bɨldə som-somtə, ndaa taka wakasəm kaarən tən mingɨn 'ye aa Yawude 'ye mwadiyale kan, gəkɨlə Həmɨnpwa nə suɓwagə hubosərən dɨ ha mwadiyale. 10Ɓə mɨnə ɗa hwuna dɨ mwo atɨ hwuna kana Həmɨnpwa a kɨɗa yedingɨn ka nggurte hwuna nggur ɓashita Musa gə hwuna galingə ji-kottə a wurangrən, a wule sɨtɨrə dɨksɨka aa yə sɨnggəm nə mban ngguri, aa hɨm nə mgban mban ngguri? 11Ə'ə ɓe myaa ɗam sə! Hɨm kat mwamdiyale atɨ gə wuladəha da Həmɨmiye Yesu hɨm a ɗɨməm mbətə, ɓətɨya təna ɗɨmə.”
12Haa talə shetətət, myee peyi kat a nza ɗəng-ɗəng, a sardə kwakingrən ta kɨl ləməgyee Barnabas ka Bulus a dɨ boyo a nə wule shikoshopye ka sɨndəla Həmɨnpwa ɗa a waka myee aa Yawude dɨ hakarən. 13Ite yə Bulus ka Barnabas a byelə a mbəə kat, Yakubu makpanə vɨnə hiwtə a luwa le a sa atɨ, “Ji-nuwo, samdə kwakingəwnə kɨləm lanə hɨn ɓa boyo. 14Ɓəgəng Siman bɨləm lə nggɨlte Həmɨnpwa a nggɨl myee aa Yawude kɨnɨnɨng gə təna gəə myee dan nə. 15Wule ləməgingɨn nə bɨldə la kpalye a boyə kaaɗəng atɨ,
16“Həmɨnpwa a sa atɨ,
‘Dɨ beetɨ angɨn hɨn ɓa mɨna,
gə na maddə hwoda Dawuda 'ye fəli fokə njiya,
gəkɨlə na mɨna nwotɨrən,
na ɗadərən təna kangə.
17Səngɨn ɗa mbiɗitɨ ɓwaare nə a vɨratə kat
a mɨna asɨ ɨl Həmɨmiye,
kat myee aa Yawude mgban
a 'ye mya dɨ wagatɨrən ka kwaka,
təna gəə tənə hɨnggi.
Hɨnə Həmɨnpwate ɗa shingɨn kat.#15.17 Naasə: Amos 9.11-12.
18Ɓwaare lee ləməginə kɨnɨnɨng.’ ”
19Nda pɨrə humwa ka byele a sarən atɨ, “Hɨnggi sa na nan a vor la, sɨnə atɨ, ɓe myaa yə nggur sɨtɨre kaɓa dɨksɨk a bə nə mingɨn 'ye aa Yawude mwadiyale virwa a haka Həmɨnpwa. 20Ndɨka mya dororən malɨmtə a boyərən atɨ, ɓe tənaa yə zɨm wule shi tukutye mya həm pɨle kaarən, təna təkəsə ka nzaa sharawne, təna ɗaka zɨm hara wule sɨgɨrte mya tyeɓəl wurangrən, təna ɗaka zɨm zaambə sɨgɨrtə. 21Gə mye hiwa ka ləməgye da Musa kɨnɨnɨng a vɨre som-som, myene dɨ bələ vor vəni kəndəshe nagi a ndo fərə piyati da Yawude.”
Malɨmte mya doro ji-kotte aa Yawude
22Beetɨ ləməgingɨn kat, kpe-lagbe ka mi kpan-kpanye da ji-kottə kat ka mbiɗitɨ ji-kottə a nggɨl imi dɨ vorsərən a lyentɨrən a Antiyok ɓwaa ka Bulus ka Barnabas. Myee təna nggɨlə kpe a pedərən ka Bulus ka Barnabas, tənə yə Yawuda (a mya wa atɨ Barsabas) ka Silas, təne dɨ vor mi kpan-kpani ji-kotte a Urshelima. 23Təna dor malɨmtə a lyentɨrən kaarə a Antiyok, malɨmtɨngɨn a sa atɨ,
Hinə kpe-lagbe kat ka mi kpan-kpanye da ji-kottə.
Hwun Yawude ji-kottə a vor Antiyok ka Siriya ka Silisiya.
Hinə dɨ wunakəwnə kat.
24Hina kɨlə atɨ imi dɨ wakasenə a dɨmə a zə hakəwnə, a wule myee hinaa lyentɨrən mgban. Təna zə gə ngama wakasəwnə a tənəə dəwnə ɓaa ka wule ləməgye darən. 25Səngɨn nə ɗa hina nza a shalasə le, a kɨləsə a nggɨl imi dɨ wakasenə a lyentɨrən a hakəwnə. Tənə kpapi ka yə ndewogenə, 'ye hina mwakarən, tən yə Barnabas ka Bulus. 26Tənə myee mwa vədə myensərən pɨrə tənətə gəkɨlə kwakɨ Həmɨmiye Yesu Ma Həmɨnpwa a Yaɓwarən. 27Gə-angɨn hinə dɨ lyen yə Yawuda ka Silas, gə təna nəwnə dye ka dye, a byelə kəwnə kwaame ka kwaame a nə shee hina doro vor malɨmtɨnə. 28Pitɨ Ɗəmɗəmtə a bɨlenə, hina mwaka ləngɨn atɨ aa dɨ wula hina mɨna nggur a sɨtɨrə diksɨkə a bə nəngəwnə, pɨrgə shee kana hwuna ɗatɨrən ɓətɨ inə yang: 29Hwuna təkəsə ka wule sɨzɨmte mya həmə pɨle kaarən a kangaa dərən a kɨritə. Ɓe hwunaa zɨmə. Hwuna ɗaka zɨm zaambə sɨgɨrtə. Ɓe hwunaa zɨm hara wule sɨgɨrte mya tyeɓəl wurangrən. Hwuna təkəsə ka nzaa sharawne mgban. Ɓə wula hwuna ɗaka shee kat mya boyownə atɨ hwuna ɗakarən.
Hwuna kwasa.
30Də myee mya lyentɨrən a dɨmə a muɗə a tɨlə vor vɨra Antiyok. Təna pedə ji-kottɨngɨn kat, a vərən malɨmte təna zə kaarə. 31Ite ji-kotte a vor Antiyok a bəl malɨmtɨngɨn, hanɨngərən ka kormi nyerəhaa a vor malɨmtɨngɨn. 32Yə Yawuda ka Silas, giɓə tən kpali, təna byelə a nyerədə ji-kotte a vor Antiyok kat. 33Tən ɓe nza ɗɨm bətə a hangɨn, ji-kotte a Antiyok a gərən kwasatə a vor ɗoltə. Təna mɨna mɨnə Urshelima a haka myee lyanatɨrən.#15.33 I dorshi kada 34 a sa atɨ, “Ndi Silas a nza vor Antiyok.” 35Yə Bulus ka Barnabas a mbiɗi a vor Antiyok, təna peyə ka i ji-kotti hananang ta kənə ɓwaare shee ka bwe le a nə Həmɨmiye.
Bulus ka Barnabas a ɓayasə
36Beetɨ bətə hananang, Bulus a sa Barnabas atɨ, “Ndɨka mya maɗə a koɗə mbwayingəm a hee mya woyo a bwe le da Həmɨmiye də a vor bətɨrə pɨri, mya wanaka ji-kottɨngɨn, mya naa nzaasərən a tən ɓə dɨ pɨrə humwa.” 37Barnabas mwo atɨ a təna nda kɨsə ka Yohana a mya wa atɨ Markus, 38shezə ndi Bulus aa mwo atɨ təna kɨsə kan, gəkɨlə a zətɨ kwaməte təna zə, ndi Yohanatɨngɨn a giɓagərən a vor njiya Pamfiliya a mɨnə hwoɗye a ɗaka lyentə. 39Anə ləngɨn yə Bulus ka Barnabas a byelə a ɓayasə kɨr-kɨr. Gə ləngɨn təna taka omotə. Barnabas a nggur Markus təna pɨrə koombotə a koɗə nə gbɨnuwe a muɗə vor luutɨ Sepɨrus. 40Bulus mgban a nggɨl Silas a nggutən təna muɗə dɨ a haa som. Mbiɗitɨ ji-kottə a ɗarən hiwtə gə humwa-shengta Həmɨnpwa a koɗə kaarən, təna gərən kwasatə. 41Bulus a dɨmə a koɗə dɨ njiya Siriya ka Silisiya ndi ta nyerədə ji-kottə.
S'ha seleccionat:
Lyenta 15: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.