2 Korintiye 7
7
1Ɓəgəng hwun ndeyi ji-kottə, hɨm nə ka ləməgyee Həmɨnpwa a boyo a nzadərən, gə ləngɨn hɨm a gəm shet-shet a təkəsə ka wule sa kat takɨm ka səhase a vor kada sɨtə ka pitə, hɨm a gəm shet-shet ɓətɨ Həmɨnpwa ka kalangɨn a hubosəm.
Hanɨngta Bulus
2Luwomrenə a hubosəwnə, hinaa ɗa ama səhase a vorsəwnə, hinaa ɗɨkdə ama nda ɗeyə, hinaa tɨmbɨr ama mgban. 3Aa kɨɗati na dɨ kɨɗəwnə, hɨn boyownə a kwamətə atɨ hwune a vor hubosenə, nagi a vor we ka myentə. 4Hɨn mwakəwnə kɨr-kɨr, hɨnə dɨ məndaranye kəwnə. Hwun nyerədi dwat, huboshi naa pas ka hanɨngtə a vor tənətɨdenə kat.
5Diyalə ite hina tɨla a vor Masɨdoniya, hina ɓwa kɨr-kɨr taa piyatidə, shezə hina tənə gələ ɓayasəte hina pɨrə vorsə kɨr-kɨr dɨ nagi ndo gyengə, a hubosenə mgban kala nə də kɨr-kɨr. 6Ndi Həmɨnpwa ma dɨ tal yedi myee taa ɗati kaarən, sɨnə tal yedingenə ka shita Titus. 7Aa shita Titus nə ɓəmbə tal yedingenə, shezə gə wule talte hwuna tal yedingɨn. Titus a boyenə wule hɨmate hwuna hɨmagi gə wule yedi-kɨtte hwuna ɗa a nə shirə pɨri ka wule hɨmna, a hwuna ɗa, angɨn vi hanɨngtə kɨr-kɨr.
8Anda hɨn kɨɗa yedi ama ka malɨmte na doro, le aa hashi ka ləngɨn. Le tɨnə hashi ka lə malɨmtɨngɨn gə hɨn leyə atɨ malɨmtɨngɨn kɨɗa yedingəwnə, shezə yedi-kɨttɨngɨn aa ɓongə. 9Ɓəgəng hɨnə ka hanɨngtə aa gəkɨlə yedi-kɨttɨngɨn dəwnə, shezə gə yedi-kɨttɨngɨn gwadəwnə hwun por-njiya ɓətɨ Həmɨnpwa a dɨ mwo, asə aa gəwnə gə le denə. 10Wule yedi-kɨtte hwuna ɗa ɓətɨ Həmɨnpwa a kana, wule yedi-kɨttɨngɨn nə dɨ gwadəha ma a por-njiya a ɗɨm mbəha da Həmɨnpwa, taa ndəng na hɨn leyiti də. Wule yedi-kɨttɨ vɨratɨnə, wo nda dɨ shikan. 11Zə namə səfema Həmɨnpwa a ɗa a vor yedi-kɨtte hwuna pɨrədə. Angɨn a gwadəwnə hwuna ɗa lyentə ka tikɨstə, a ɓərə a dɨmdə nəngəwnə gə səhase da imi. Angɨn a ɗɨkdəwnə mgban hwuna ɗa yedi-kɨttə ka səhase dəwnə a gə ka kala, hwuna gə ka hɨmne, ka pɨr-pɨrə ɗa diyale. Angɨn a gwadəwnə dɨ nagi ndo tɨfə hwuna dɨmdə nəngəwnə gə vor myee dɨ ɗashi hashingɨn. 12Gə-angɨn ite na dorownə malɨmtə, hɨn taa dori gəkɨlə ma ɗa səhasəngɨn, taa dori mgban gəkɨlə ma ɗan səhase, na dor malɨmtɨngɨn gə na bɨləwnə bwang hwuna leyə atɨ hwune bə nəngəwnə a hakenə a humwa Həmɨnpwa. 13Gəkɨlə ləngɨn, angɨn a gwadenə a tal yedingenə.
Aa ləngɨn nə ɓəmbə tal yedingenə, hina mɨna ɗa hanɨngtə kɨr-kɨr ite Titus a shi hakenə ka hanɨngtə, gəkɨlə hwuna bəndə hubosən. 14Hɨn məndaranye kəwnə a hakan, sopye aa gi ka angɨn, shezə naya hina boyownə ləməgingɨn kat ka diyale, sə mgban wule ndaranye hina mənə kəwnə a haka Titus diyalə. 15Mwote nda mworəwnə a dɨ pɨrə humwa kɨr-kɨr, ndi kana ɗyanga ka mwate hwuna mwa a kɨltən a koddən, hwuna lurən ka ndukoha ka hanɨngtə a hubosəwnə. 16Hɨn ɗa hanɨngtə gəkɨlə na mwakəwnə a nə nagi ndawulasə.
S'ha seleccionat:
2 Korintiye 7: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.