2 Korintiye 3
3
1Hina dɨ mɨna humwa nəngenə a hakəwnə ɓə ma? Hin ɓa mɨna ɨl imi təna dor malɨmye a humwenə a hakəwnə ɓə ma? Hin ɓa ɨl humwaha dɨ hakəwna? 2Di hwun ka nənəngəwnə hwunə malɨmi humwa hangɨn, a wule malɨmyee mya doro vor hubosenə, a wule malɨmyee ɓwaare kat a leyə a bələ. 3Hwun bɨldən bwang atɨ, hwunə malɨmta Ma Həmɨnpwa a Yaɓwarən ite mya doro gə lyentɨ denə. Hwunə malɨmte mya doro aa ka shi dorshe, shezə ka Pitɨ Ɗəmɗəmta Həmɨnpwa a ka myentə, aa a nə fara mya doro, a vor hubotə mya doro.
4Hina byelə yang gəkɨlə hinə ka mwadiyale dɨ haka Ma Həmɨnpwa a Yaɓwarən a humwa Həmɨnpwa. 5Hin tam ka itɨ mbarəti a nənəngenə, shezə Həmɨnpwa nə gəəsenə. 6Həmɨnpwa nə venə mbarətə gə hina ɗan lyentə a nə kɨləsətə hweltə aa dɨ ha shee mya doro ka tɨfe, shezə dɨ haka Pitə, gə ɓashita Musa ite mya doro ka tɨfe ɓashitɨ wo, shezə Pitə a dɨ vədə myentə.
Fukata ləmə hwela mya boyo a nzadən
7Anda ɓashita Musa ite mya doro ka tɨfe a nə fara a dɨ shi ka fukatə, ite ɗɨki mi Israila aa mba nidə humwa Musa kpəkəkə gə ɓɨratɨ fukatɨngɨn, a wule fukate dɨ pɨri ɓaa, 8ɓə ya fukatɨ lyenta Pitə aa dɨ pɨrgə hɨnggə ɓashita Musa? 9Anda ɓashita Musa ite dɨ shi ka ɓashitɨ we a shi ka fukatə kɨr-kɨr, ɓə ya lyenta Pitə ite dɨ shi ka pepetə aa dɨ pɨrgərə ka fukata? 10Gə fukatɨ lyente nggagə kaarə kɨnɨnɨng aa yə fukati ɓəgəng mye kana kanatɨrə ka fukate ɓəgəng gə itɨnə pɨrgərə ka fukatɨ gbaktə. 11Anda mgban wule sa shi dɨ pɨri ɓaa gə ka fukatə, ɓə ya wule sa aa dɨ pɨrə a dɨ gə ka fukatɨ gbaktə ite aa dɨ pɨra?
12Gə-angɨn, gə bə myente hina gə kaarə, hina gə ka gbənzɨmtə kɨr-kɨr. 13Hɨm tam ɓətɨ Musa a dɨ gbə humwasən ka sɨpatə gə ɓe mi Israila 'ye dɨ nidə humwasən aa naa gbaktɨ fukatɨ ɓɨrte a humwasən, a ite dɨ pɨri ɓaa. 14Shezə kwa-hubosərən a nyerə gə baa supo sɨpatɨngɨn nee təna gbə hubosərən kan, nagi ndo fərə mya dɨ bəl ɓashita Musa. Myaa nggurgə sɨpate gbə humwaasərən gə dɨ haka Ma Həmɨnpwa a Yaɓwarən nə ɓəmbə mya dɨ nggurgə sɨpatɨngɨn. 15Baa supo nagi goɗi təna dɨ bəl ɓashita Musa, sɨpatə a dɨ gbə kwa-hubosərən. 16Shezə nagi goɗi nagi ndo ma virwa mɨna a haka Həmɨmiye, mye ɓa nggurəngə sɨpatɨngɨn. 17Gəngnə Həmɨmiye nə Pitə, haa kat Pita Həmɨmiye a gə də, ɗɨmne nee də. 18Hɨm mgban a hɨm myee taa sɨpati a humwasəm, a myee dɨ bɨldə fukata Həmɨmiye. Hɨm nggəɗəm dɨ pasam Həmɨmiye ka wule fukate dɨ pɨrə humwa taa mbati kaarə, ite dɨ shi dɨ haka Həmɨmiye ndi ma sɨnə Pitə.
S'ha seleccionat:
2 Korintiye 3: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.