1 Korintiye 8
8
Sɨzɨmte mya həm pɨle kaarən
1A nə la hwuna ɗiyə gə wule sɨzɨmte mya dɨ həm pɨle kaarən, hɨm leyəm kat atɨ mye nee ka leetə. Leetə mgban a dɨ ɗɨkdə ɓwaara nda gə ka ndukone, mwoha nə ɓəmbə dɨ nyerədə ɓwaara nda gə pepe. 2Anda ama nə də dɨ niyi ɓətɨ nda lee asə, mangɨn a leyə atɨ ndaa lee asə ɓətɨya kana nda leyə. 3Shezə nagi ndo ma dɨ mwo Həmɨnpwa, Həmɨnpwa lee mangɨn.
4Gə ləngɨn byelə zɨmshee mya həm pɨle kaarən, hɨm leyəm kat atɨ pɨla taa itɨ gəti kan a vor vɨratə, hɨm leyəm mgban atɨ Həmɨnpwa nə hiɗə ɓəmbə taayə ama də som. 5Gə nagi nda pɨle nə də, nagi a pwa naasə mgban a njiya, ɓətɨ imi a kana atɨ sə (diyalə sə gən, pɨle kaake ka i hwoɗye nə də hananang), 6kat ka angɨn hɨm ji-kottə hɨm leyəm atɨ Həmɨnpwa nə hiɗə kal-kal, sɨnə Baatə, sɨnə ɗa nagi ndo sə, gə lyentɨ dan mgban hɨm a nzam. Hɨm leyəm mgban atɨ Yesu Ma Həmɨnpwa a Yaɓwarən nə Həmɨmiye hiɗə kal-kal, dɨ hakan mya ɗa shinə a vɨratə kat. Gə le dan mya gəm ka myentə.
7Kat ka angɨn, aa ɓwaare nə kat lee ləngɨn. Baa ɓəgəng myee gi koɗə pɨle aa mwa atɨ wule shee təna dɨ zɨmə sɨzɨmte mya həm pɨle kaarən nə. Wule mingɨn səɗə-yedye darən nə pupuluk, gə ləngɨn təna dɨ niyə sɨzɨmte təna zɨmə səhasə təna dɨ ɗa. 8Shezə sɨzɨmtə ka nənəngrən aa dɨ ɗɨkə hɨm a shi gbyel ka Həmɨnpwa. Nagi mya zɨm shingɨn, angɨn aa dɨ kɨɗa asə, zɨm shingɨn mgban aa dɨ gwadəm a humwa Həmɨnpwa.
9Kat ka angɨn bəmdə myensəwnə gə ɓe humwate hwuna gə kaarə gə hwuna zɨm nagi ndo wule sɨzɨmti hwuna dɨ mwo aa ɗɨkdə wule myee lele darən pupuluk təna pawo. 10Gə ama kana nəw nza vɨnə pɨla, a ɗashi pɨle dɨ zɨmshe mya həm pɨle kaarən, wule ma lele dan pupuluk ɓa ngguro ɓətɨ zɨmshe da pɨle nee pepe. Aa sa? 11Hye niyə ɓə, wule leetɨ dəw ɗɨkdə ama a wule ma lele dan pupuluk, fukə gə le dəw. Hye ɗyanga atɨ gə le da mangɨn Ma Həmɨnpwa a Yaɓwarən a mbɨrə. 12Wule leetɨ dəw kana ɗɨkda hye ɗa ji-nuwogu səhase a kpala sɨsərən gə səɗə-yedi pupuluke darən, hye ɗa Ma Həmɨnpwa a Yaɓwarən səhase. 13Gə ləngɨn, anda sɨzɨmte na dɨ zɨmə nə ɓa ɗɨkdə nzə-nuwogi nda fukə, ndɨka ɓe naa yə zɨm hara gə ɓe naa ɗɨkdən nda fukə.
S'ha seleccionat:
1 Korintiye 8: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.