1 Korintiye 11
11
1Hwuna koɗə mbwayi a ɗa sa na dɨ ɗa, ɓətɨ na dɨ koɗə mbwayi Ma Həmɨnpwa a Yaɓwarən.
Shee kana mya ɗa a vor kala-gbəətə
2Hɨnə dɨ humownə gə hwune dɨ ɗyanga ke fərə-fərə, sə mgban hwuna kɨr kwaləngɨn a dɨ koddən kat ɓətɨya na kənəwnə.
3Gəngnə hɨne dɨ mwi atɨ hwuna leyə atɨ Ma Həmɨnpwa a Yaɓwarən nə ne a nə nagi ndo murə, mure mgban sɨnə ne a nə metə, Həmɨnpwa nə ne a nə Ma Nda Yaɓwarən. 4Nagi ndo murə dɨ ɗa hiwtə naasə mgban dɨ kpali ka le da Həmɨnpwa ka mbule a nəngɨn, Həmɨmiye nə nda dɨ hyatan.#11.4 Gə Ma Həmɨnpwa a Yaɓwarən nə a nə mure. 5Sə mgban nagi ndo meti ite dɨ ɗa hiwtə naasə mgban dɨ kpali ka le da Həmɨnpwa nggaa pir nəngrə, nggi hyata ma a nəngrə. Gə-angɨn nə ɓətɨ kwa wule mete sawgə nəngrə kulyeng-kulyeng nə. 6Anda metə aa dɨ pir nəngrə, ndɨka ngga sawgə shewo nəngrə. Na sawtɨngɨn ɓa gərə sɨ sopi, mbak-mbak ngga pir nəngrə. 7Hɨnggə mure ndi, aa kana nda gbə nəngɨn, gəkɨlə sɨnə a pasangə Həmɨnpwa ka fukatɨ dan. Nggi metə mgban kwa-fukata mure nə.#11.7 Naasə: Tiyatə 1.26-27. 8Hwuna leyə atɨ, aa mure nə dɨma dɨ sɨtɨ metə, metə nə dɨma dɨ sɨtɨ mure. 9Sə mgban, Həmɨnpwa aa ɗa mure gə le da metə, metə nə Həmɨnpwa a ɗa gə le da mure. 10Gə-angɨn, ɗɨkənə le da malyenye da Həmɨnpwa, ɓə kana nggagə ka sə-pirne a nəngrə, gə ngga bɨldə sate atɨ ama nee a nəngrə.
11Kat ka angɨn, a humwa Həmɨmiye Yesu, metə aa dɨ gə dɨsərə, mure mgban aa dɨ gə dɨsərən. 12Naya metə dɨ sɨtɨ mure ngga dɨma, sə mgban mure meti mwasarən. Shezə nagi ndo sə kat dɨ haka Həmɨnpwa nda dɨma. 13Mɨni ɗam səɗə-yedye pepe a nə ləməginə a wakasəwnə, hwun niyə ɓə kana metə a ɗa hiwtə taa sə-pirnə a nəngra? 14Nagi nza vɨratɨnə aa bɨləwnə atɨ sɨ sopi mure a ɗaka shewo nəngɨn nda jiyə a puka? 15Hɨnggə metə, nggi kana ɗaka shewo nəngrə nda jiyə a puka, angɨn mgban fukati a hakarə ma? Gə mya və metə showone gə gbə nəngrə. 16Ma kat dɨ mwi atɨ nda məntəmətə a nə ləməginə, mangɨn a leyə atɨ, hin tam ka a kwalə som, sə mgban ka mbiɗitɨ ji-kottə.
Kpaa da Həmɨmiye
17A nə ləməginə hɨn ɓa pɨrə humwa a boyownə ɓəgəng taa dɨ humownə, gə a vor petɨ kala-gbəətə dəwnə, shi hashe nə dɨ dɨma pɨrgə shi-pepeye. 18Ləmə kwaməte na kɨlə nə atɨ, hwun ji-kottə, hwun kana peyə, taa kɨləsəti a wakasəwnə, hwuna təkə som-som. Na nidə ləməgingɨn ɓətɨ diyalə. 19Diyalə mya ɗɨm təkəsətə a wakasəwnə, ɗongə kɨləsətɨngɨn nə bɨldə ji-kottɨ diyale a wakasəwnə. 20Hwun kana peyə, aa kpaa da Həmɨmiye nə hwuna dɨ zɨmə, 21gə hwun kana peyə, hwun aawa kulasə, hwuna pɨrə humwa ɗəng ta zɨmshe dəwnə, imi a nza ka myatə, imi mgban a shea hyaɓa ta kpashi. 22Hwun tam ka hwoɗyee hwun ɓa zɨmə a soɓwo də ma? Naasə, hwuna dɨ ɗaasə gə hwuna hyata ji-kottə a ɗɨkdə myee taa asə kaarən a vor sopye? Ɓə a shiya na sakəwna, na humownə gə lana? Ə'ə nagi kəng-kəng.
23Wule ləməgyee na luwo dɨ haka Həmɨmiye, tənə 'ye na pɨrdərən a vəwnə, atɨ ndi Həmɨmiye Yesu, a tukote mya vədən də gə mya ɓɨltən, nda nggur buroditə, 24a ɗa hiwtə ka usəkətə a haka Həmɨnpwa. Nda takarə a sa atɨ, “Sɨshi nə ingnə gə le dəwnə, hwuna pɨrə humwa ta ɗaasə gə hwun ta ɗyanga ke.” 25Sə mgban nda mɨna nggur kpaa a beetɨ zɨmshe. Nda sa atɨ, “Kpaa nə kɨləsətɨ hwelti mya ɗa ka zaamba, hwuna pɨrə humwa ta ɗaasə nagi goɗi hwuna dɨ soɓwo gə hwun ta ɗyanga ke.” 26Gə nagi goɗi hwuna dɨ zɨm buroditɨnə a dɨ soɓwo dɨ vor kpaa nə, hiwati hwuna dɨ hiwa ka we da Həmɨmiye baa a dɨmə fəra ndi ɓa mɨna də.
27Gə-angɨn, ma kat zɨm buroditɨnə, nda soɓwo dɨ vor kpaanə da Həmɨmiye a tɨfa aa kana, wule mangɨn səhasə nda dɨ ɗa ka sɨtə ka zaambə Həmɨmiye. 28Ɓə kana ɓwaara a səɗə ka yedingɨn a mbəə, nda ɓə nggur buroditɨngɨn a zɨmə, nda mɨna soɓwo dɨ vor kpaangɨn. 29Gə ma kat dɨ zɨmi, nda soɓwo, ndaawa ɗa səɗə-yedye atɨ sɨtɨ Həmɨmiye nə, mangɨn a leyə atɨ ɓashiti nda dɨ zɨmə, a dɨ mɨna soɓwo nəngɨn. 30Səngɨn nə ɗa imi hananang a vorsəwnə sɨsərən a kpala, imi a puk ootə, imi mgban a mbərə. 31Hye kana niyə mya bəmdə myensəm a bələm hubosəm pepe, taayə itɨ ɓashiti a nəngəm. 32Shezə Həmɨmiye kana ɗam sɨgbəɗye gələ nda kənəm tɨfe nə, gə ɓe Həmɨnpwa aa pedəm kat ka mi vɨratə a ɗam ɓashitɨ wo ɗiye kaaru-kaaru.
33Gə ləngɨn, ji-kottə, na hwun peyə ɓa zɨm shingɨn, hwuna kulasə. 34Ma myatə a dɨ gən, ndɨka nda zɨmshe a hwodan a mbəə gə ɓe petɨ dəwnə aa mɨna gəə ɓashiti a nəngəwnə.
Hɨn kana shi, na kənəwnə i ləməgi.
S'ha seleccionat:
1 Korintiye 11: bcy
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.