फिलेमोन 1
1
1ना चिट्ठिम्बाक् खिरिस्ट येसुङाना लाउङ्सा कैदि आङा पावाल लोक् तिमोथि झान्झालाम्मा आनिना मायालु एक्केउ टोॽवा काचोक् फिलेमोन, 2आनि झान्झा आप्फिया, टाङ्बाङाना टोॽवा काचोक् टिलिङ्गा आनि टाक् आरखिप्पास हिट्नुङ् कापाङ्ङि माङ्हाङ्ङाना माङ्ध्यान् काचोक् माङ्पाङ् लोङ्सा ए॥#कालास्सि ४:१७ 3माङ्हाङ् आनि पाबा हिट्नुङ् टाङ्बा येसु खिरिस्टङा खानि मायादाया लोक् हाङ्हाङ् मापिडियाक्॥
पावालङाना पोए-पोए लोक् बिन्टि
4आन्झा फिलेमोन आङा खान् लोङ्सा बिन्टि चोगुङ्नाँ माङ्हाङ् सोरोक् पोए-पोए ठाङ्सुङ्टुङ्॥ 5पोङ्भोने टाङ्बा येसुङि काबिस्वास हिट्नुङ् खान्ङा सोब्बे बिस्वासि याप्मिचि माया आचोगुचिगा रिङ् आङा खेम्सुएट्टुङ्॥ 6हिट्नुङ् खान् बिस्वासिचिलोक्ना साङ्गातिङि याप्मा पोसा खाडा हिट्नुङ् खिरिस्टङा आपिडाना ख्वाप्पा नुगा रिङ् बुजा चोक्मा हिडु नुङ् बिन्टि चोगुङ्टुङ्॥ 7मायालु आन्झा, खान्ङा आरु माया आचोगुचिगा रिङ्ङा आङा आड्डिक् हारका हिट्नुङ् आँटि लिसाइसाङे॥ पोङ्भोने खान्ङा माङ्हाङ् ओयाम्मिचिगा निङ्ग्वा आनान्दित आचोगुबिडुएसुचे॥
ओनेसिमासङाना रिङ्
8नाड्डेउङ् खान्ङा पाक् चोक्मा कोन्युक्ना हिट्ना चोगु नुङ् लोनाँ॥ हिट्नुङ् खिरिस्टङि आँटि लिङाउङ् खान्ङा नाड्डे चोगु लोमा बे हिनें॥ 9हिट्ना ओसाट्टोङि खान्ङा आङा हिट्नुङ् आरु माया आचोगुचिनाँ नाड्डे लोडुचि नुङ् बिन्टि चोक्नाँ, आङा पासिङ् याप्मि पावाल, हाट्ले आङा चा खिरिस्ट येसुङाना लाउङ्सा ठिबाङ् कैदि, 10आइछा गाड्डेना ओनेसिमास लोङ्सा खान् बिन्टि चोक्नाँ॥ आङा नेहि खाम्बाङ्ङि लिसाङ्ना बेला ओनेसिमासङाना बिस्वासङि उप्पा लिसाइसाङे॥#कालास्सि ४:९ 11हिट्ना पाइले खान् लोङ्सा काम लाहाब् लिनिना याप्मि डाना, टरो हाट्ले हिट्ना आन्चि इप्पाङ्लोङ्सा डोक् काम लाहाब् लिना याप्मि लिसाइसे॥ 12आङा हिट्ना खान् सोरि पाङ्सुङ्गेट्टुङ्, हिट्ना आनिङ्ग्वाङिना याप्मि ए॥ 13नुना खाबोर लोङ्सा खाम्बाङ्ङि लिसाङ्ना बेला उन् आङालोक् नेहि युङ्मा निङ्ग्वा चोगुङे, हिट्डेउङ् उन्ङा खान्ङाना साट्टोङि आङा घुवार फामा याङ्हिडे बे॥ 14टरो खान्ङाना कानिङ्ग्वा माले नाड्डे चोक्मा ओचेट्नु लिनिना नुङ् मिट्टुङ्ङे॥ खान्ङा जाबारजास्ति माखाक्, टरो कानिङ्ग्वालाम्मा आङा घुवार याङ्फाडा नुङ् मिट्टुङ्टुङ्॥ 15ओनेसिमास फेरि खान्लोक् सोरोक् उयुङ्याक् नुङ् डोक् खान्लाम्मा छोप्मोङ् बेला सोम्मा साम्डाउङ् खाडाना होला॥ 16हाट्ले नुङ् उन् खान्ङाना कामारा माखाक्, टरो कामारा नुङ्ना याप्मा मायालु बिस्वासि झान्झा ए॥ उन् आङा आड्डिक् माया चोगुङ्ना, टरो खान्ङा ना नुङ्ना चा याप्मा माया चोक्मा कोन्युक्॥ खान्नाम्टे उन् काचाकार लिसानाँ एडोक् माखाक्, टरो उन् टाङ्बाङि बिस्वासि लिसानाँ आड्डिक् माया चोक्मा कोन्युक्॥
17हिट्डेउङ् खान्ङा आङा खान्लोक् एक्केउ टोॽवा काचोक्बा याङ्आमिट्युक् भोने, आङा स्वागाट् याङ्आचोगा गाड्डे डोक् हिट्ना चा चोगु॥ 18हिट्नाङा काबिरुद्दाङि ओचाफेम्मा माचोगाइसे आथाबा जे रिङ् हुङ्माना केङ्ग्वा भोने चा आनिङ्ङि हिसाब छेप्टुङ् युङ्सु॥ 19आङा पावाल, आप्पे आमुक्ङा छेप्टुएट्टुङ्, हिट्ना नाॽवा आङा डोक् हुङुङ्टुङ्॥ खान् आप्पेङा चा ना चोला आङालाम्मा डोक् ओटोगुना नुङ् माप्मा याक्मा कोन्निना होला॥ 20नाड्डेउङ् आन्झा, टाङ्बाङि ना रिङ् आङा लाउङ्सा चा याङ्चोगाबिडा॥ हिट्नुङ् आङा खान्ङाना खिरिस्टङि बिस्वासि टाक् लिसाङ्नाँ ना रिङ् चोगुङ् आनिङ्ग्वा हाङ्हाङ् याङ्चोगाबिडा॥
21आङा बिस्वास चोगुङ्टुङ्, खान्ङा आङा लोनाना रिङ् आचोगुटु हिट्नुङ् आझै ना नुङ्ना चा याप्मा आचोगुटु नुङ् आङा खान्लोङ्सा छेप्टुएट्टुङ्॥ 22हिट्नुङ् आरको रिङ् चा युङ्ग्वा, आङा लाउङ्सा चा बास हेम्माना ठोङ् याङ्टोङ्साबिडा, पोङ्भोने खानिङा आचोगुम्ना बिन्टिङा आङा चा खानि सोरि आप्मा उहिङा नुङ् आसा चोगुएसुङे॥
आखेरि बाबा
23खिरिस्ट येसु लाउङ्सा आङालोक् खाम्बाङ्ङि लिसाना इपाफारसङा खान्लाउङ्सा बाबा माहाक्टेसे॥#कालास्सि १:७; ४:१२ 24हिट्नुङ् आङालोक् एक्केउ टोॽवा काचोक् मारकुस, आरिस्ताखारस, डेमास लोक् लुकाङाना चा बाबा बो ए॥#मुलिचेला टोॽवा १२:१२,२५; १३:१३; १५:३७-३९; १९:२९; २७:२; कालास्सि ४:१०,१४; २ तिमोथि ४:१०-११ 25हिट्नुङ् टाङ्बा येसु खिरिस्टङाना मायादाया खानि सोब्बेलोक् उलियाक्॥
© 2023, Wycliffe Bible Translators, Inc. and Nepal Bible Society