याहुदा 1
1
1येसु खिरिस्टङाना सेवाक्, हिट्नुङ् याकुबङा उन्झा, आङा याहुदालाम्मा माङ्हाङ् पाबाङा माया माचोगिउङ् माछेम्डिगा हिट्नुङ् येसु खिरिस्टङि सुरेक्छे माचोगिगा लाउङ्सा ना चिट्ठि छेप्टुएट्टुङ्॥
2माङ्हाङ्ङा खानि औधि दाया, हाङ्हाङ् हिट्नुङ् माया मापिडियाक्॥
माङ्जोगा रिङ् काहिसिक्बाचि
3मायालु साइबाचि, आनि सोब्बेङा टोगुम्ना मुक्टिङाना बारेङि खानिलाउङ्सा छेप्मा औधि डोक् निङ्ग्वाङि मिट्टाङे, टरो माङ्हाङ्ङा ओयाप्मिचि सोरोक् लाउङ्सा पिडुचिगा बिस्वास नुलोक् कुप्टानुमुङ् युङ्सानुम् नुङ् ना रिङ् छेप्मा डोक् कोन्युक् नुङ् मिट्टाङे॥ 4आङा ना रिङ् माट्टुङ्टुङ् पोङ्भोने कोइ-कोइ याप्मिचि खानि माझाङि सोगोप् उलिगाइसे, हिट्नागाँ माङ्हाङ् डोक् मान् ओचोगुन्ना॥ हाट्ले माङ्हाङ्ङा आनि लुक्मा आटुक्टानाँ सोब्बे ओभेन्गा टोॽवा चोक्मा आनि आपिडाइसे नुङ् हिट्नागा उपिग्गा, हिट्नुङ् आनिना ठिबाङ् एना डाङ्बा हिट्नुङ् टाङ्बा येसु खिरिस्ट इन्कार ओचोगुना॥ याप्मा बारखा पाइले नागा याप्मिचि फाट्टुर ओलाबुचिगा रिङ् धारमाछाप्लाङि छेप्टेसे॥
5खानिङा नागा सोब्बे रिङ् पाइले डोक् ठाहा आटोगुम्चा, हाट्ले टाङ्बाङा ओयाप्मिचि मिस्रा देसलाम्मा होट्टुचिउङ् आप्टुचिगा रिङ् मिट्टानुम् नुङ् खानि लोनाँनि, टरो बिस्वास ओचोग्वाट्टुन्गा लाउङ्सा हान्डेङ् उन्ङा जाखाम् चोगुचे॥ 6हिट्नुङ् आङा ना रिङ् मिट्टानुम् नुङ् खानि लोनाँनि, आप्पे उन्चि युङ्माना ठोङ्ङि हिट्नुङ् माङ्हाङ्ङा पिडुचिगा आधिकारङि चा उयुङ्निगा माङ्हाङ् रिङ् काउग्बाचिउम् ठेना न्याएङाना लेम्बा सोम्मा खोना बेला चा होम्मा उहिनिलोक् रेक्टुचिउङ् पातालङि डुम्बारिक् डुम्ना डेन्ङि छाक्टुएसुचे॥ 7हिड्नाडेडोक् सादोम लोक् गामोरा खालाङ्गाचि हिट्नुङ् हिट्ना याम्बा-नायाम्बागा आरु खालाङ्गाचि मिट्टानुम्॥ हिट्नि उलिसागा याप्मिचिङा ओचाफेम्मा इम्मेप्माजामा टोॽवा ओचोगुङ् हिट्नागा रिङ्ङि डोक् उन्चि निङ्ग्वा उपिडुए॥ हिट्नागाँ खोना बेला चा सिनिना मिङि साजाए ओटोगुङ् आरुङाना पुमाजामाना उलिसाइसे॥#१:७ सादोम लोक् गामोरा: आब्राहामङाना ओबेलाङि ना खालाङ्गाङिगा याप्मिचि आड्डिक् ओभेन्गा उलिसाउङ् टाङ्बाङा ना इप्पोक् खालाङ्गाचि जाखाम् चोगुचे॥
8नाड्डेडोक् नागा याप्मिचिङा ओचाफेन्लोक् चोक्सा उन्चि येम् आसुद्दो ओचोगुटु, पोङ्भोने हिट्नागाँ सेम्माङ्ङि नाड्डेडोक् चोक्मा माक्टुम्मे नुङ् उपिग्गा॥ हिट्नुङ् टाङ्बाङाना आधिकार चा इन्कार ओचोगुगा हिट्नुङ् टोनालोग्ङिना पारानिचि खिजेक्पा ओचाट्टुचिगा॥ 9मुलि माङ्हाङ् रिङ् काउग्बा मिखाएलङा चा मोसाङाना ओलास बारेङि सैतानलोक् बादबिबाद चोगानाँ हिट्ना फाट्टुर लाब्मा हिडुवाट्टुन्॥ हिट्नुङ् नाड्डे एडोक् लोडुए, “खान् टाङ्बाङा साजाए मापियुक्॥” 10टरो नागा याप्मिचिङाम्टे आप्पे चा बुजा ओचोग्वाट्टुन्ना रिङ् खिसि ओचोगुगा॥ हिट्नागा पाक्चा मिमिट्ङे ओचाफेन्ना रिङ् काचोक् ठोनाबा जिवाट्चि गाड्डेगा डोक् ए, हिट्नुङ् हिट्नागाँ आप्पेलाउङ्सा नागा रिङ्लाम्मा डोक् जाखाम् ओचोगुटु॥ 11इनामा, नागा याप्मिचिलोङ्सा! हिट्नागाँ कायिनङाना लाम्बो ओलाबुए, जुन्ङा उन्झा सेडुए॥ ओफाबा टोग्मालोङ्सा बालामङा चोगुना ओचाफेम्मा टोॽवा डोक् चोक्माना निङ्ग्वा ओचोगुए॥ हिट्नुङ् कोरहङा बिरोध चोगु गाड्डे डोक् नागाँ चा ओचोगुए, हिट्नुङ् हिट्नागा चा कोरह गाड्डे डोक् जाखाम् उलियुक्॥#१:११ कायिन बारे: कायिनङा उन्झा हाबिल सेडुए॥ बालामङा ओफाबा लाउङ्सा इस्राएलङिगा याप्मिचि साराप याङ्मा निङ्ग्वा चोगुए॥ कोरह मोसा लोक् हारुन बिरुद्दाङि कोबे॥ उत्पति ४:३-८; गान्ति २२:१-३५; १६:१-३५ 12खानि भातेर आचोगिनाँ चासिङा ओटागा नागा आड्डिक् किट्टुम्चिगा लोक् ओभेन्गा याप्मिचि ए॥ नागा खानिलोक् चासिङा उयुङ्नाँ हिट्नागाँ आरु खेम्गेन्डोक् ओलाप्टुन्चिन्गा, हिट्नुङ् उन्चि माभोक् एरोक् उइप्टुगा॥ हिट्नागा हिॽवाङा मुट्टुना चुवा मालेना खिमेमा गाड्डेगा ए॥ हिट्नागा टुल्फुल केङ्मा बेला टुल्फुल केङुन्ना ओजारालाम्मा डोक् आङ्साउङ् खेरेङ् चोबाना सिङ् उभुङ्मा गाड्डेगा॥ 13हिट्नागा याप्मिचि सामुन्दराङिना किट्टुम्ना चुवा ओभेट्लेॽवा गाड्डेगा ए, हिट्नुङ् सामुन्दराङि किट्टुम्ना चुवा ओभेट्लेॽवा कोबा गाड्डे डोक् नागाँगा टोॽवा चा चिम्मा फुट्टुम्ना ए॥ हिट्नागा लाम्बो ओबान्डुगा चोक्चिङ्गेट्चि गाड्डेगा डोक्, हिट्नुङ् हिट्नागा लाउङ्सा माङ्हाङ्ङा सोरोक् लाउङ्सा पातालङि माकुन्धेरेक्ना डेन् युङ्सुएसुए॥ 14हिट्नुङ् आदामलाम्मा ङेडुम्नाँ ङा पुङ्लाङिना हानोक याप्मिङा चा नागा याप्मिचि बारेङि नाड्डेना रिङ् माट्टुएसुना, “खेम्सानुम्, याप्मा-याप्मा उन्ङाना सेङ्सेङ्गा खाबोर कालोचिलोक् टाङ्बा उङ्युगेट्॥#उत्पति ५:१८,२१-२४ 15उन्ङा हिट्नागा ख्वाप्पा याप्मिचि न्याए चोगुचिचि, हिट्नुङ् हिट्नागाँ ओचोगुना ओभेन्गा टोॽवाचि लोक् उन् बिरुद्दाङि आधारमोति कायाङ्छाबा याप्मिचिङा ओमाट्टुना ओचाफेन्ना रिङ्ङाना साजाए पिडुचिचि॥”
16नाड्डेगा याप्मिचि सोरोक् गिन्गिन् काचोक्, आरु फाट्टुर कालाब्चि, ओचाफेम्मा निङ्ग्वा ओचोगुङ् हिट्ना गाड्डे डोक् काचोक्, हिट्नुङ् घामान्डि रिङ् काचेक्, हिट्नुङ् उन्चि निङ्ग्वाङा उमिट्टुगा रिङ् टोक्मा याप्मिचि फुरक्याँ काचोक् उलिगा ए॥
हिसिक्मा लोक् ओछेक्छेक् लिमाना
17टरो मायालु आसाइबाचि, खानिङाम्बाक् आनि टाङ्बा येसु खिरिस्टङाना मुलिचेलाचिङा पाइले डोक् ओमाट्टुगा रिङ् मिट्टानुम्॥ 18हिट्नागाँ खानि नाड्डे मालोडेसिगा, “आखेरि बेलाङि खिजेक्पा याङ्काचाट् याप्मिचि उलियुक्, हिट्नुङ् हिट्नागाँ उन्चि निङ्ग्वा गाड्डे ओचोगुङ् ओभेन्गा टोॽवाचि ओचोगुटु॥”#२ पाटरुस ३:३ 19खानिङि बाजो काटाब्बा याप्मिचि नागा डोक्॥ नागा उन्चि सारिरिक निङ्ग्वा गाड्डे ओचोग्गा, हिट्नुङ् नागालोक् उन्चि निङ्ग्वाङि सेङ्सेङ्ना हाङ्सा लिनिना॥
20टरो मायालु आसाइबाचि, खानिम्बाक् सेङ्सेङ्ना बिस्वासङि बोल्लेउ लिसानिउङ् पोसा खाडानि, हिट्नुङ् सेङ्सेङ्ना हाङ्साङाना बोल्ङि बिन्टि चोगानि॥ 21लाट्निना चोला आपिना आनि टाङ्बा येसु खिरिस्टङाना दाया हाङ्सानुम्॥ नाड्डेउङ् खानिङा माङ्हाङ्ङाना मायाङि आप्पेलाउङ्सा सुरेक्छे आचोगुम्टुम्॥ 22साङ्का काचोक् याप्मिचि लुक्मा टुक्टानुम्चिम्॥ 23आरु याप्मिचि योनालोग्ङिना मिङि ठामालाम्मा साडानुम्चिमुङ् होट्टानुम्चिम् हिट्नुङ् हिङानुम्चिम्॥ आरु लुक्मा टुक्टानुम्चिम् टरो हिट्नागाँगा पाप खानिङि लाहाब् उलिनि चा नुङ् ओछेक्छेक् चोगानि॥
24माङ्हाङ्ङा पापङि ठामालाम्मा खानि जोगाँ चोक्मा माहिडिटि हिट्नुङ् उन्ङा खानि फाट्टुर माले हिट्नुङ् हारकालोक् उन्ङाना डोक् माहिमा सोरि खाप्मा माहिडिटिटि॥ 25उन् ठिक् एना माङ्हाङ्, आनि काहिङ्मेप्बा डाङ्बा येसु खिरिस्ट आनि टाङ्बा ए॥ उन्लाउङ्सा माहिमा, मान्, बोल् हिट्नुङ् आधिकार उटुम्लाम्मा हाट्ले हिट्नुङ् सोरोक् बेला सोम्मा उलियाक्॥ आमेन्॥
© 2023, Wycliffe Bible Translators, Inc. and Nepal Bible Society