एफिसि 5
5
व्हाङ्ङि लाम्टिमा
1खानि माङ्हाङ्ङा माया माचोगिगा छालेट्चि आलिसिनाँ खानि चा उन् गाड्डे डोक् लिमा कोलानि॥ 2खिरिस्टङा आनि माया आचोगे हिट्नुङ् उन्ङा आप्पे ओचोला भोक् चोगुङ् आनि लाउङ्सा आपिडे हिट्नुङ् बुङ्बुङ् नाम्ना ढुपा गाड्डे डोक् माङ्हाङ्ङि ठाङ्सुए॥ हिट्डेडोक् खानिङा सोरोक् आरु याप्मिचि माया चोगानुम्चिम्॥#पारस्थान २९:१८; छाम्लोमा छाप्ला ४०:६
3खानिङा खोना खाले चा इम्मेप्माजामा टोॽवा चोक्नेनिन्, सोब्बे आसुद्दो रिङ् हिट्नुङ् खानि चाहाब् आलिसागा नुङ्ना याप्मा टोक्मा निङ्ग्वा चोक्नेनिन्, पोङ्भोने माङ्हाङ्ङाना ओयाप्मिचि लाउङ्सा नाड्डेगा रिङ् चोक्मा ओचेट्नु लिनिना॥ 4हिट्टेप्मा एडोक् माखाक्, खानिङा मोन्डिसिइगा रिङ् चेक्नेनिन्, खेडोक्गा माङ्जोगा रिङ् चोक्नेनिन्, हिट्नुङ् खोङ्माना रिङ् चेक्नेनिन्, नाड्डेगा रिङ् चेक्मा बिस्वासिचि लाउङ्सा खान्डुन्ना॥ हिट्नागा ओसाट्टोङि, खानिङा सोरोक् माङ्हाङ् पोए-पोए ठाङ्माना रिङ् माट्टानुम्॥ 5पोङ्भोने इम्मेप्माजामा टोॽवा काचोक्, आसुद्दो थोक्ङि निङ्ग्वा काचोक् आथाबा लोभ काचोक् याप्मि माङ्हाङ् हिट्नुङ् खिरिस्टङाना उमुलुक्ङि लिग्माना हाक् टोगुन्ना नुङ् खानिङा ठाहा टोगानुम्॥ लोभि लिमाम्बाक् मुर्ति साम्माङ् चोक्मा गाड्डे डोक् ए॥
6ना रिङ् छेम्बा डोक्, टरो खानि माड्डे कोइङा ना रिङ् ओलाडुन्गा हिट्नुङ् हिट्नागाँ नागा पाप चोक्मालाम्मा खानि माछाक्टिन्गा॥ खोना याप्मिङा चा नाड्डेगा खेडोक्गा रिङ् ओमाट्टुङ् खानि छाम्मा ओटोगुन्चा॥ पोङ्भोने हिट्डेगा पाप चोगुम्नाँ डोक् माङ्हाङ्ङाना ओरेक् काडे॥ हिट्डेउङ् उन्ङा उरिङ् ओखेम्सुन्गालाउङ्सा साजाए पिडुचिचि॥ 7हिट्नाड्डेउङ् नाड्डेगा याप्मिचिलोक् वामावानेनिन्॥ 8पोङ्भोने पाइले खानि निङ्ग्वा ओमाक्पा डाना, टरो हाट्ले खानि टाङ्बा ओयाप्मिचि आलिसिनाँ माङ्हाङ् ओव्हाङ् खानिलोक् युङ्ग्वा॥ हिट्डेउङ् हिट्ना व्हाङ्ङिगा पिच्छाचि गाड्डे डोक् वासानि॥ 9-10हिट्ना पारा खानि आवासिटि भोने, खोना रिङ्ङा टाङ्बा खुसि चोगुटुना हिट्ना रिङ् खानिङा ठाहा आटोगुम्टुम्, हिट्नुङ् हिट्ना पारा डोक् वासानि॥ हिट्नुङ् हिट्ना व्हाङ्ङाना फलङा ओचेट्नुना रिङ् चोक्मा, धारमोति लिमा हिट्नुङ् माहामाना टोॽवा चोक्मा खानि मामेट्टिटि॥
11डुम्बारिक् डुम्ङिगा खेडोक्गा टोॽवाङि खानि केङ्मा केङ्नेनिन्, टरो हिट्नागा टोॽवा ओचाफेन्गा नुङ् याप्मिचि निमेट्टानुम्चिम्॥ 12नागा याप्मिचिङा ओठोबाउङ् ओचोगुगा टोॽवा बारेङि माप्मा चा मोन्डिसिइना रिङ् ए॥ 13टरो जब ओभेन्गा याप्मिचिङा खानिगा ओचेट्नुना टोॽवा उनिसुटु, टब हिट्नागा ओभेन्गा याप्मिचिगा टोॽवा पारचिन्दा डोक् ठेट्युक्॥ जब हिट्नागाँ उन्चिगा ओचाफेन्ना टोॽवा ओनाडुगा रिङ् पारचिन्दा ठेट्युक्, हिट्नागा खानि गाड्डे डोक् व्हाङ्ङिगा याप्मिचि उलियुक्॥ 14हिट्डेउङ् याप्मिचिङा नाड्डे ओमाट्टुटु,
“हाउ आइम्सिगा याप्मिचि, कोबानि हिट्नुङ् सिमालाम्मा उहिङ्ग्वाट् लिसानि,
हिट्नुङ् खिरिस्टङाना व्हाङ् खानिङि ओम्युक्॥”
15हिट्नाड्डेउङ् खानि खोड्डे पारिक् आवासेट्टिगा, ओछेक्छेक् चोगानिउङ् वासानि, ठोनाबा याप्मि गाड्डे माखाक्, टरो ठोना लिसाना याप्मि गाड्डे लिसानिउङ् वासानि॥ 16हाट्लेसेन्ना बेला ओचाफेन्ना, हिट्डेउङ् खानिङा आटोगुम्ना ना बेला नुलोक् रिङ् चोक्माङि टिसानुम्॥#कालास्सि ४:५ 17हिट्नाड्डेउङ् खानि ठोनाबा लिनेनिन्, टरो टाङ्बाङाना खानि लाउङ्सा पाक् चोक्माना उनिङ्ग्वा युङ्ग्वाना हिट्ना ठाहा टोगानुम्॥ 18युमालिङ्ङा माटेडिन् चा, पोङ्भोने हिट्नाङा जाखाम् आचोक्युक्, टरो सेङ्सेङ्ना हाङ्साङा माइप्टियाक्॥ 19माङ्हाङ् रिङ् छाम्लोमा छाम्लोसानिउङ् ठिबाङ्ङा आरको आँट् पिडानुम्चिम्, छाम्लोसा माङ्हाङ् उनिङ् चोन्डानुम्, हिट्नुङ् सेङ्सेङ्ना हाङ्साङा मापिडिगा छाम्लोमा छाम्लोसानि॥ हिट्नुङ् खानि निङ्ग्वालाम् डोक् छोम्लोसानिउङ् टाङ्बा उनिङ् चोन्डानुम्॥ 20आनि टाङ्बा येसु खिरिस्टङाना उनिङ्ङि माङ्हाङ् पाबालाउङ्सा ख्वाप्पा रिङ्ङि सोरोक् पोए-पोए पिडानुम्॥#कालास्सि ३:१६-१७ 21खानि ठिबाङ् आरकोङाना आधिन्ङि युङानि, पोङ्भोने खानिङा खिरिस्ट मान् आचोगुम्ना॥
टालिबाङ् हिट्नुङ् टालिमाङ्ङाना रिङ्
22हाउ टालिमाङ्चि, खानि टाङ्बाङाना आधिन्ङि आयुङि गाड्डे डोक् खानि टालिबाङ्चिगा आधिन्ङि युङानि॥#कालास्सि ३:१८; १ पाटरुस ३:१ 23पोङ्भोने माङ्पाङ् खिरिस्टङाना ओखेन् लिसा गाड्डे डोक् टालिमाङ्ङाना ओखेन् उटालिबाङ् ए॥ हिट्नुङ् माङ्पाङ्ङिगा याप्मिचि खिरिस्टङाना ओयेम्, हिट्नुङ् उन् डोक् हिट्ना माङ्पाङ्ङिगा याप्मिचि मुक्टि कापिबा ए॥ 24हिड्डेउङ् माङ्पाङ्ङिगा याप्मिचि खिरिस्टङाना आधिन्ङि लिसा गाड्डे डोक् टालिमाङ्चि चा सोब्बे थोक्ङि उन्चि टालिबाङ्चिगा आधिन्ङि युङ्मा कोन्युक्॥
25हाउ टालिबाङ्चि, खिरिस्टङा आप्पे ओचोला पिडुङ् माङ्पाङ्ङिगा माया चोगुचि गाड्डे डोक्, खानिङा चा खानि टालिमाङ्चि हिट्डेडोक् औधि याप्मा माया चोगानुम्चिम्॥#कालास्सि ३:१९; १ पाटरुस ३:७ 26उन्ङा हिड्डे चोगुङ् उन्ङागा याप्मिचि चोक्मा आनि आसाम्डे, हिट्नुङ् उन्ङा माङ्हाङ् उरिङ् लोक् चुवाङाना बाप्टिस्मालाम् आनि सुद्दो आचोगे॥ 27हिट्नुङ् उन्ङा माङ्पाङ्ङिगाम्बाक् उन्ङाना आप्पेना चोक्मा फाट्टुर मालेना हिट्नुङ् इछुट् लिसाना माखाक् आथाबा खोना पारिक्ङाना खोट् चा मालेना ओचेट्नुना हिट्नुङ् चोखो चोक्मा नाड्डे चोगुए॥
28हिट्नाडेडोक् टालिबाङ्चिङा उन्चि टालिमाङ्चिलाउङ्सा आप्पे उन्चि येम् माया ओचोगु गाड्डे डोक् चोक्मा कोन्युक्॥ ओटालिमाङ् माया काचोक्बाङा आप्पेलाउङ्सा माया चोगुटु॥ 29छेम्बा डोक्, आनि येम् आनि माया चोगुम्टुम्॥ खिरिस्टङा माङ्पाङ्ङिगा लालान्-पालान् चोगुचि गाड्डे डोक्, आनि चा आनि येम् चामा-ठुङ्मा चोगुमुङ् लालान्-पालान् चोगुम्टुम्॥ 30आनि सोब्बे खिरिस्टङाना ओयेम् ए, हिट्डेउङ् खिरिस्टङा आनि यान्दा आचोक्युक्॥ 31धारमाछाप्लाङि नाड्डे छेप्टेसे, “हिट्नाड्डेउङ् याप्मिङा उप्पा-उमा नाडुचिउङ् ओटालिमाङ्लोक् एक्केउ युङ्चिचि हिट्नुङ् हिट्नागाचि इप्पाङ् ठिक्ए येम् लिचिचि॥”#उत्पति २:२४ 32ना आड्डिक् ठेना ठोबाना रिङ् ए, टरो हाटले ना रिङ्म्बाक् खिरिस्ट हिट्नुङ् माङ्पाङ्ङिगा याप्मिचिगा साम्बान्धाङाना बारेङि माट्टुना नुङ् आङा माट्टुङ्टुङ्॥ 33फेरि आङा लोनाँनि, सोब्बे टालिबाङ्ङा आप्पेलाउङ्सा माया चोगु गाड्डे ओटालिमाङ्चि माया चोक्माचि कोन्युक्, हिट्नुङ् सोब्बे टालिमाङ्चिङा उन्चि टालिबाङ्चि मान् चोक्माचि कोन्युक्॥
© 2023, Wycliffe Bible Translators, Inc. and Nepal Bible Society