एफिसि 1
1
1आङा पावाल माङ्हाङ्ङाना उनिङ्ग्वालाम्मा याङ्सेगाना येसु खिरिस्टङाना मुलिचेलालाम्मा, एफिसास खालाङ्गाङिगा खिरिस्ट येसुङि बिस्वास काचोक् माङ्हाङ् ओयाप्मिचि लाउङ्सा ना चिट्ठि छेप्टुङ्गेट्टुङ्॥#मुलिचेला टोॽवा १८:१९-२१; १९:१ 2आनि माङ्हाङ् पाबा हिट्नुङ् टाङ्बा येसु खिरिस्टङा मायादाया हिट्नुङ् हाङ्हाङ् खानि मापिडियाक्॥
खिरिस्टङि टोगुम्ना आसिक्
3आनि टाङ्बा येसु खिरिस्टङाना माङ्हाङ् पाबालाउङ्सा पोए-पोए उलियाक्॥ उन्ङा येसु खिरिस्टलाम्मा आनिलाउङ्सा टोनालोक्ङिना ख्वाप्पा आत्मिक् आसिक् आपिडेसे॥ 4माङ्हाङ्ङा नारा सिरिस्टि चोक्मा नुङ्ना पाइले डोक् खिरिस्टलोक् आनिना साम्बान्धा उलियाक् नुङ् उन्ङाना ओटोकानाङि आनि सेङ्सेङ् हिट्नुङ् फाट्टुर मालेना उलिसियाक् नुङ् आसेगे॥ 5हिट्नुङ् याप्मा बारखा पाइले माङ्हाङ्ङा आनिलाउङ्सा येसु खिरिस्टलाम्मा ओछालेट्चि चोक्मा निङ्ग्वा चोगुए॥ नाड्डे चोक्मा उनिङ्ग्वा डाना, पोङ्भोने उन्ङा आनि माया आचोक्युक्॥ 6नाड्डेउङ् माङ्हाङ्ङा उन्ङाना मायालु छालाम्मा उन्ङाना माहिमालोक्ना मायादाया आनि आपिडानाँ उन् लोङ्सा पोए-पोए ठाङ्सुम्॥
7-8माङ्हाङ्ङा आनि आड्डिक् लुक्मा आटुक्टाना रिङ् आनिमेट्टाउङ् खिरिस्टङाना ओहेलिक्लाम्मा आनि छुट्कारा आचोगेसे हिट्नुङ् आनि पाप छेमा आपिडेसे॥ 9माङ्हाङ्ङा उन्ङाना माङ्ठेना बुद्दि हिट्नुङ् ठोनालाम्मा खिरिस्टङि पुरो चोगुङ्टुङ् नुङ् माट्टुना उन्ङाना ठोबाना रिङ् चा आनि आनिमेट्टे॥ 10हिट्नुङ् जब ठिक्का बेला लियुक्, उन्ङा टोनालोग् हिट्नुङ् नाराङिगा सोब्बे थोक्चि खिरिस्टङाना उमुक्ठुङ्ङि एक्कै ठोङ् टाडुचिचि॥
11माङ्हाङ्ङा सोब्बे रिङ् लिमा उन्ङा निङ्ग्वा चोगु गाड्डे चोक्मा हिडुटु॥ उन्ङाना योजाना गाड्डे डोक् ओयाप्मिचि लिमा आनि आसेगे, पोङ्भोने खिरिस्टलोक् आनिना साम्बान्धा युङ्ग्वा॥ माङ्हाङ्ङा ना रिङ्उम्बाक् उन्ङाना योजाना डाना नुङ् पाइले डोक् उन्ङा निङ्ग्वा चोगुएसुना डाना॥ 12हिट्नाड्डेउङ् आनि याहुदिचिम्बाक् खिरिस्टङा आनि बाचाँ आचोक्युक् नुङ् आसा काचोक्बाचि माड्डे पाइलेगा याप्मिचि ए॥ उन्ङाना निङ्ग्वाम्बाक् आनिलाम्मा उन्ङा मान् टोक्मा कोन्युक्॥ 13हिट्नुङ् खानि पानिछोङ्बाचिङा चा ना नुना खाबोर हिट्ना मुक्टि आपिना छेम्बाना रिङ् आखेम्सुमुङ् खिरिस्टङि बिस्वास आचोगुम्मे॥ हिट्नुङ् जब खानिङा बिस्वास आचोगुम्मे, माङ्हाङ्ङा माङ्हुप् चोगुना सेङ्सेङ्ना हाङ्सा पाङ्सुङ् खानि उन्ङाना ओयाप्मिचि माचोगिना पारमान् मापिडिए॥ 14माङ्हाङ्ङा उन्ङाना सेङ्सेङ्ना हाङ्सा बैना युङ्बालाक् ओफाबा गाड्डे आनि भिट्रा आठेन्डाबिडेसे॥ हिट्नुङ् ना रिङ्ङा उन्ङा सेगुचिगा याप्मिचि छेम्बा डोक् हिङुचिचि नुङ् निमेट्माना निङ्ग्वा चोगुए॥ ना रिङ्ङाम्बाक् माङ्हाङ्ङाना उनिङ् चोम्माना लोक् माहिमा चोक्माना रिङ् टाडुटु॥
पावालङाना बिन्टि
15खानिङा टाङ्बा येसुङि आचोगुम्ना बिस्वास हिट्नुङ् माङ्हाङ् सोब्बे ओयाप्मिचि खानिङा माया आचोगुम्चिगा रिङ् खेम्सुङ्नाँ, 16आङा खानि लाउङ्सा माङ्हाङ् सोरोक् पोए-पोए ठाङ्सुङ्टुङ्॥ हिट्नुङ् आङा जाइले बिन्टि चोगुङ्टुङ्, खानि लाउङ्सा चा बिन्टि चोगुङ्टुङ्॥ 17आनि टाङ्बा येसु खिरिस्टङाना माहिमित माङ्हाङ् पाबाङा खानि उन्ङाना हाङ्सालाम्मा ठोना लिना माचोगिटि, हिट्नुङ् उन् आप्पे खानिङि पारकाट् चोगुटु, हिट्डेउङ् खानिङा उन् आझा नुलोक् मिसेन् आनिसुम्टुम्॥ 18आनि खिरिस्टङि युङ्सुम्ना आसा खानिङा बुजा चोक्मा माङ्हाङ्ङा घुवार माफाडियाक् नुङ् आङा बिन्टि चोगुङ्टुङ्, हिट्नुङ्ना माङ्हाङ्ङा सेगुचिगा ओयाप्मिचि चामारसिङा चोगुना ओचेट्नुना रिङ्ङाना उटुप् खानिङा बुजा आचोगुम्टुम्, हिट्नुङ् उन्ङा सेगुचिगा याप्मिचिङा ओचोगुनाँ माङ्हाङ्ङा ठेना मान् टोगुटु॥ 19-20हिट्नुङ् उन्ङि बिस्वास काचोक् आनि लोङ्सा उन्ङाना आड्डिक् ठेना साक्तिङाना बारेङि खानिङा बुजा चोगानुम् नुङ् चा बिन्टि चोगुङ्टुङ्॥ ना बोल्लाम्मा डोक् माङ्हाङ्ङा खिरिस्ट सियानालाम्मा उहिङ्ग्वाट् चोगुए, हिट्नुङ् टोनालोक्ङि आड्डिक् मान् चोगुम्ना डेन्ङि युङ्सुए॥ हिट्डेडोक् आनिङि चा उन्ङा टोॽवा चोगुटु॥ 21हिट्नि सोब्बे सासाक्चि, आधिकारलोग्गा, उन्चि बोल्लोग्गा हिट्नुङ् सोब्बे ओठेडोङ्चि उठुङ्ङि खिरिस्टङा सासान् चोगुटु॥ उन्ङा ना नाराङि उलिसागा सोब्बे थोक्ङि सासान् चोगुटु हिट्नुङ् हान्डेङ् लिना नाराङि चा सासान् चोगुटु॥ 22हिट्नुङ् माङ्हाङ्ङा सोब्बे थोक् खिरिस्टङाना आधिकारङि युङ्सुबिडुए, हिट्नुङ् माङ्पाङ् लाउङ्सा खिरिस्ट डोक् सोब्बे रिङ्ङाना ओखेन् चोगुए॥#छाम्लोमा छाप्ला ८:६ 23हिट्नुङ् माङ्पाङ्म्बाक् खिरिस्टङाना ओयेम् ए॥ उन्ङा हिट्नागा ओचाट्लाङा इप्टुचिउङ् उन्ङा सोब्बे थोक् भोरिपुरना चोगुटु॥#कालास्सि १:१८
© 2023, Wycliffe Bible Translators, Inc. and Nepal Bible Society