कालास्सि 3
3
1छेम्बा डोक्, खानि चा खिरिस्टलोक् उहिङ्ग्वाट् आलिसिगा ए, हिट्डेउङ् सोरोक् टोनालोग्ङिना रिङ् कोलानुम्, हिट्नि खिरिस्ट माङ्हाङ्ङाना छुप्टाङ् उमुक्लेङ् युङ्ग्वा॥#छाम्लोमा छाप्ला ११०:१ 2टोनालोग्ङि लिसागा रिङ्ङि खानि निङ्ग्वा पिडानुम्, नाराङिगा रिङ्ङि माखाक्॥ 3पोङ्भोने खानिगा पाइलेना पापलोक्ना निङ्ग्वा सिमाहिडे, हिट्नुङ् हाट्ले खानि माङ्हाङ् ओटोकानाङि खिरिस्टलोक् एक्केउ आवासेट्टि॥ ना खानिना ओछोङ्ग्वाट् चोला खिरिस्टङि ठोबाइसे॥ 4खिरिस्ट डोक् खानिगा ओछोङ्ग्वाट् चोलाङाना उपुन् ए, हिट्नुङ् उन् ठेट्ना बेला खानि चा उन्लोक् उन्ङाना माहिमाङि आठेट्टिटि॥
पुरानो चोला हिट्नुङ् ओछोङ्ग्वाट् चोला
5हिड्नाड्डेउङ् खानिगा पापलोक्ना निङ्ग्वालाम्मा ओहोन्गा ओभेन्गा रिङ्चि चोक्मा नाडानुम्॥ हिट्नागाम्बाक् इम्मेप्माजामा टोॽवा, आसुद्दो टोॽवा चोक्मा, निङ्ग्वाङि छोम्बोक् छोम्बोक् लिमा, भेन्ना निङ्ग्वा चोक्मा, हिट्नुङ् लोभि लिमा ए॥ याप्मा लोभि लिमाम्बाक् मुरति साम्माङ् चोक्मा गाड्डे डोक् ए॥ 6नाड्डेगा रिङ् लिसाउङ् डोक् माङ्हाङ्ङाना आड्डिक् ओयाक् उन्ङाना आग्याँ पालान् ओचोगुन्गा याप्मिचि उठुङ्ङि ठायुक्॥ 7ठिक् बेला खानि चा नाड्डेगा ओभेन्गा रिङ्ङि डोक् आवासिनाँ ना पारा डोक् आचोगुम्मे॥
8टरो हाट्ले खानिङा चा रेक् काप्मा, मिक् टुग्मा, चिम्माफुप्मा, लोमाजामा, यासिलाम्मा होन्गा फुवारि रिङ् नामा कोन्युक्॥ 9खानि खानिङि ढाँट् फोग्माना टोॽवा चोक्नेनिन्, पोङ्भोने खानिगा पुरानो पापलोक्ना निङ्ग्वा हिट्नुङ् हिट्ना पारा चोक्मागा सोब्बे ओभेन्गा टोॽवाचि चा नामा आहिडुएसुम्मे॥#एफिसि ४:२२ 10हिट्नुङ् हाट्ले खानि ओछोङ्ग्वाट् चाट्ला लिसाना याप्मि आलिसिएसिए॥ माङ्हाङ्ङा खानि ओछोङ्ग्वाट् याप्मि माचोगिए, हिट्नुङ् उन्ङा खानि उन् गाड्डे डोक् आझै झान् झान् माचोगेएट्टि, हिट्डेउङ् खानिङा छेम्बा डोक् उन् मिसेन् आनिसुम्टुम्॥#उत्पति १:२६; एफिसि ४:२४ 11हिड्नाड्डेउङ् नेहि पाक्ङाना गिरिक्, पाक्ङाना याहुदि, पाक्ङाना खाताना ओचोग्गा हिट्नुङ् खाताना ओचोक्निगा, पाक्ङाना पोढाँ लिनिगेट्निना, पाक्ङाना कोभेके, पाक्ङाना कामारा आथाबा सोतान्तर लिसाना याप्मि साक्चा ठेना खाट्टिउना वाइना, टरो खिरिस्ट एडोक् सोब्बे थोक् हिट्नुङ् उन् एरोक् आनि सोब्बेङि युङ्युक्॥
12पोङ्भोने खानिम्टे माङ्हाङ्ङा ओयाप्मिचि लिमा मासेगिगा हिट्नुङ् उन् लाउङ्सा खानि आसाम्डेसिए, हिट्नुङ् उन्ङा खानि माया माचोगिटि॥ हिड्नाड्डेउङ् खानिङा याङ्छामा ओटोगुगा याप्मिचि घुवार फाडानुम्चिम्, दाया चोगानुम्चिम्, मेयोक् लिसानि, सोजो लिसानि, आङ्मा कोन्ना रिङ्ङि निङ्ग्वा पिडानुम्॥ 13ठिबाङ्ङा आरको लाडानुम्, कोइ याप्मिलोक् खानि निङ्ग्वा टुगाइसे भोने माफ पिडानुम्चिम्॥ टाङ्बाङा खानि माफ माचोगि गाड्डे डोक् खानिङा चा आरु माफि पिमाचि कोन्युक्॥#एफिसि ४:३२ 14नागा टोगा सोब्बे रिङ् नुङ्ना याप्मा मुलि रिङ्उम्बाक् खानिङा ठिबाङ्ङा आरको माया चोक्मा कोन्युक्, पोङ्भोने मायाङा डोक् आनि ख्वाप्पा आटोङ्युङ् ठिक्ए आचोक्युक्॥ 15खिरिस्टङि लिसाना हाङ्हाङ्ङा खानि निङ्ग्वाङि राज्य ओचोगुवाक्॥ खानि ठिक्ए येम्ङि हाङ्हाङ् लिसानिउङ् युङानि नुङ् डोक् माङ्हाङ्ङा माछेम्डिगा ए, हिट्नाम्बाक् खिरिस्टङाना ओयेम् ए॥ खानिङा पोए-पोए ठाङ्सानुम्॥ 16खिरिस्टङाना उहिसिक्मा खानि निङ्ग्वाङि जोम् उइप्टुवाक्॥ ख्वाप्पा चालाँ चोक्माना ठोनालाम्मा ठिबाङ्ङा आरको हिसिक्टानुम्चिम् हिट्नुङ् साल्लाह कापिबा लिसानि॥ खानि निङ्ग्वालाम्मा माङ्हाङ् पोए-पोए पिसा छाम्लोसानि, निङ् चोन्डानुम् हिट्नुङ् माङ्हाङ्ङाना छाम्लोमा लोसानि॥ 17हिट्नुङ् खानिङा पाक् आमाट्टुम् चा, आचोगुम्चा, ख्वाप्पा रिङ् टाङ्बा येसु उनिङ्ङि चोगानुम् हिट्नुङ् उन्लाम्मा डोक् माङ्हाङ् पाबालाउङ्सा पोए-पोए ठाङ्सानुम्॥
बिस्वासि जाहान्चि लोङ्सा हिसिक्मा
18हाउ टालिमाङ्चि, टाङ्बाङाना उनिङ्ग्वा टालोक् खानि पाङ्ढाङ्बाचिगा खाटान्ङि युङानि॥#एफिसि ५:२२; १ पाटरुस ३:१
19हाउ टालिबाङ् याप्मिचि, खानि पाङ्ढाङ्माचि माया चोगानुम्चिम् हिट्नुङ् काइले चा याङ्छामा चाट्नेनुम्चिम्॥#एफिसि ५:२५; १ पाटरुस ३:७
20हाउ पिच्छाचि, खानिङा चा सोरोक् खानि पाबा-मामाङा मालोडिगा रिङ् टेन्डानि, पोङ्भोने नाड्डे आचोगिउङ् डोक् टाङ्बाङाना ओचाप् टायुक्॥#एफिसि ६:१
21हाउ पाबाचि, खानिङा खानि पिच्छाचिगा याग्लेप्मा पिनेनुम्चिम्॥ हिट्डे आचोगिए भोने उन्चि निङ्ग्वा एक्युक्॥#एफिसि ६:४
22हाउ कामाराचि, खानिङा नाराङिगा खानि डाङ्बाचिङा मालोडिगा सोब्बे रिङ्चि चोगानुम्॥ डाङ्बाचि खुसि चोक्माना निङ्ग्वाङा एडोक् उन्चि टोकानाङि नुलोक् चोक्नेनिन्, टरो सिधा निङ्ग्वाङा टोॽवा चोगानुम्, पोङ्भोने खानिङा टाङ्बा मान् आचोगुम्टुम्॥#एफिसि ६:५-८ 23खानिङा जे आचोगुएट्टुम्, खानि निङ्ग्वालाम्मा डोक् चोगानुम्, याप्मि लोङ्सा चोगि गाड्डे माखाक्, टरो टाङ्बाङाना सेवा चोगि गाड्डे डोक् चोगानि॥ 24पोङ्भोने खानिलोङ्सा टाङ्बाङा इनाम मापिडिटि नुङ् ठाहा युङ्ग्वा॥ ना इनामम्बाक् उन्ङा चोगुना चामारसिङाना आसिक् ए॥ हिट्नुङ् खानिङा सेवा आचोगुम्ना खिरिस्ट डोक् टाङ्बा ए॥ 25ओचाफेम्मा टोॽवा काचोक्बा खोना चा उलियाक्, हिट्नाङा ओचाफेन्ना डोक् साजाए आङ्डुटु॥ माङ्हाङ्ङा खोना चा टो यो चोगुन्चिन्गा॥#धारमाबिधि १०:१७; एफिसि ६:९
© 2023, Wycliffe Bible Translators, Inc. and Nepal Bible Society