२ तिमोथि 2
2
येसु खिरिस्टङाना नुना टिलिङ्गा
1आइछा गाड्डेना तिमोथि, खिरिस्ट येसुङा आपिना मायादायाङि बोल्लेउ लिसा॥ 2जोम् साँचि कापिबाचि माझै खान्ङा आङालाम्मा आखेम्सुगा रिङ्चि खान्ङा चा आरु हिसिक्मा काहिबा बिस्वासिलो याप्मिचि पिडुचि॥ 3खिरिस्ट येसुङाना नुना टिलिङ्गा गाड्डे डोक् खान्ङा चा आन्याँलोक् याङ्छामा फोगु॥ 4टिलिङ्गाङि भोरति लिसाना याप्मि आरु टोॽवाङि बान्निना, टरो सेनापति खुसि मेप्मा उन्ङा जिम्मा पिडुना टोॽवाङि उन् लाहाब् लियुक्॥ 5हिड्डे डोक् पाङ्ग्वामाङि पिन्नाँ पाङ्ग्वामाङाना नियाम गाड्डे पिन्नेट्नि भोने हिट्नाँ पुरास्कार टोगुन्ना॥ 6पाइले चासोङ्ङाना ओभागा दुखे चोगुङ् टोॽवालासि काचोक्बाङा डोक् टोक्मा कोन्युक्॥ 7आङा लोनाना रिङ् नुलोक् निङ्ग्वाङि युङ्सु, हिट्नुङ् नागा ख्वाप्पा रिङ्चि टिग्माना बोल् टाङ्बाङा खान् मापियुक्॥
8येसु खिरिस्ट मिट्टु, उन् सियाउङ् उहिङ्ग्वाट् लिसा कोबे, उन् दाउद पुङ्लाङिना, आङा पारचार चोगुङ्ना नुना खाबोर ना डोक् ए॥ 9हिट्ना नुना खाबोर पारचार चोगुङ्ना आङा याङ्छामा आङ्डुएट्टुङ् हिट्नुङ् आपाराधिचि गाड्डे डोक् साङ्लाङा ओरेक्टाउङ् खाम्बाङ्ङि ठाइसाङे॥ टरो माङ्हाङ् उरिङ्उम्बाक् साङा चा छाक्मा उहिडुन्ना आरुङा चा पारचार ओचोगुटु॥ 10हिट्डेउङ् माङ्हाङ्ङा सेगुचिगा ओयाप्मिचि लोङ्सा खिरिस्ट येसुलाम्मा टोगुम्ना मुक्टि हिट्नुङ् खोना बेला चा लाट्निना माहिमा ओटोगु नुङ् सोब्बे याङ्छामा आङा आङ्डुङ्टुङ्॥
11नाड्डे माप्बालाक् रिङ् छेम्बा डोक्,
आनि उन्लोक् सियिए भोने, आनि चा उन्लोक् डोक् हिङिटि॥
12आनि उन् लोङ्सा सोरोक् याङ्छामा आङ्डुम्टुम् भोने, उन्लोक् डोक् सासान् चा चोगुम्टुम्,
आनि उन् इन्कार चोगुम्मे भोने, उन्ङा चा आनि इन्कार आचोग्युक्॥#मात्ति १०:३३; लुका १२:९
13आनि बिस्वासिलो लिसिन्चा उन् उम्टे बिस्वासिलो डोक् वाहेट्,
पोङ्भोने उन्ङा आप्पेलोङ्सा इन्कार चोक्मा हिडुन्ना॥
इप्पोक् खाले हिसिक्मा
14नागा रिङ् बिस्वासिचिङा उमिट्टुवाक् नुङ् लोडुचि॥ रिङ्-रिङ्ङि खेमागोम्मा टोॽवा चोक्नेनिन् पिक्सा टाङ्बा उनिङ्ङि ओछेक्छेक् चोगुचि॥ नाड्डेगा रिङ्ङि खेमाबुङ्मा होप्मा बिथाँङि एरोक् लियुक्, टरो नाड्डेगा रिङ्ङा काखेम्बा याप्मिचिगा निङ्ग्वा एरोक् रोक्टुटु॥ 15मोम्मासिमा मिलिए हिट्नुङ् छेम्बाना रिङ् नुलोक् चालाँ काचोक् सेवाक गाड्डे डोक् माङ्हाङ् उनिङ्ग्वा टालोक् उन् सोरि आप्पेलोङ्सा नुलोक् लिमायाक्मा कोसिस चोगा॥ 16खान्ङाम्बाक् माङ्हाङ् मान् चोगुन्गा रिङ्पान् नाडु, पोङ्भोने नाड्डेगा रिङ्ङा याप्मिचि झान् झान् आधारमोति चोगुटु॥ 17हिट्नुङ् हिट्नागाँगा रिङ्उम् खोना बेला चा नुनिना क्यान्सार रोगा गाड्डे डोक् पोसा खाट्ना लियुक्॥ हिट्नागाङि हुमेनियस लोक् फिलेतासङाना हिसिक्मा चा हिट्नाडेना डोक्॥ 18हिट्नागाचिङा सियानालाम्मा उहिङ्ग्वाट् लिमाउङ् कोब्माना रिङ् पाइला डोक् लिमा हिडे पिक्सा छेम्बाना रिङ् नाडाइसाचुए॥ हिट्नुङ् नाड्डे माट्टाचुङ् आम्टेप्मा याप्मिचिगा बिस्वास डोक् जाखाम् चोगाइसाचुए॥ 19टरो माङ्हाङ्ङाना ओजाग्उम्बाक् बोल्लेउना हिट्नुङ् जाखाम् लिनिना, हिट्नुङ् नाहि नाड्डे छेप्टेसे: “टाङ्बाङा ओयाप्मिचि मिसेन् निसुचिचि,”#गान्ति १६:५ हिट्नुङ् “टाङ्बाङाना उनिङ् कालाप्बा सोब्बे ओचाफेन्ना टोॽवा चोक्मालाम्मा या युङ्मा कोन्युक्॥” 20वागाठागा लिसागा पाङ्ठाङ्ङि भाँडा बारतान साम्याङ् हिट्नुङ् रुपाकङागा एरोक् उलिनिगा, हिट्नि सिङ्ङागा हिट्नुङ् खाम्मागा चा उलियुक्॥ खोना खोना भाँडा बारतानम्बाक् मान् पिमा लोङ्सा चालाँ चोगुम्टुम् भोने, खोना खोनाम्बाक् लेप्टुम्गा थोक्चि युङ्मा लोङ्सा चालाँ चोगुम्टुम्॥ 21हिट्नुङ् याप्मिङा आप्पेलोङ्सा ओचाफेन्ना टोॽवालाम्मा सुद्दो चोगुटु भोने हिट्नाम्बाक् नुगा थोक्चि युङ्मा लोङ्सा चालाँ चोक्बालाक् भाँडा बारतान गाड्डेना डोक् लियुक्॥ हिट्नुङ् हिट्नाँ आप्पेलोङ्सा चोखो युङ्सुङ् पाङ्डाङ्बा लोङ्सा सोब्बे पारिक्ङाना नुना टोॽवाङि टेयार लियुक्॥ 22हिट्डेउङ् ठाङ्बेन् बेला निङ्ग्वालाम्मा टाना ओचाफेन्गा रिङ्चिलाम्मा पिन्डा, हिट्नुङ् सेङ्सेङ्ना निङ्ग्वाङि टाङ्बा माङ्ध्यान् काचोक् याप्मिचिलोक् पाक् नुना हिट्ना रिङ्ङि, बिस्वासङि, मायाङि हिट्नुङ् हारका लिसिना रिङ्ङि लाहाब् लिसा॥ 23टरो मुरखा हिट्नुङ् बिथाँङिगा बादबिबादचि नाडु॥ नाड्डेगा रिङ्पान्ङा खेमाबुङ्मा एरोक् होट्टुगा नुङ् खान्ङा ठाहा आटोगुएसुए॥ 24टाङ्बाङाना सेवा काचोक्बा खेमाबुङ्मा चोक्ना लिमा लिनिना, टरो सोब्बे लुक्मा काटुक्बा, हिसिक्मा काहिबा हिट्नुङ् रिङ् आङ्मा काहिबा लिमा कोन्युक्॥ 25हिट्नुङ् बिरोध काचोक्बाचि मेयोक् लिमाउङ् सुधार काचोक् लिमा कोन्युक्॥ टैचा नाड्डे लिसे भोने माङ्हाङ्ङा हिट्नागा काएल्-काबु लिमाना निङ्ग्वा हिट्नुङ् छेम्बाना रिङ् टिग्माना निङ्ग्वा पिमा हिडुचिचि॥ 26हिट्डेउङ् हिट्नागाँगा उन्चि ठोना नोक्युङ् सैतानङाना वारिक्लाम्मा होम्मा उहियुक्॥ पोङ्भोने सैतानङा उनिङ्ग्वा गाड्डे चोक्मा हिट्नागा ओकाब्जाङि युङ्सुएसुचे॥
© 2023, Wycliffe Bible Translators, Inc. and Nepal Bible Society