२ पाटरुस 1
1
1येसु खिरिस्टङाना मुलिचेला हिट्नुङ् उन्ङाना सेवा काचोक् आङा सिमोन पाटरुसङा ना चिट्ठि छेप्टुङ्ना ए॥ आङा ना चिट्ठि आनि माङ्हाङ् हिट्नुङ् काहिङ्मेप्बा डाङ्बा येसु खिरिस्टङाना धारमिक्तालाम्मा आन्याँना गाड्डे डोक् बाहुमुल्ले बिस्वास आटोगुम्गा खानि ख्वाप्पालोङ्सा छेप्टुङ्गेट्टुङ्॥ 2माङ्हाङ्ङा खानि जोम् जोम् मायादाया हिट्नुङ् हाङ्हाङ् मापिड्याक्, पोङ्भोने खानिङा माङ्हाङ् हिट्नुङ् आनि टाङ्बा येसु चा मिसेन् आनिसुम्ना॥
बिस्वासङि पोसा खाप्माना बारे
3माङ्हाङ्ङाना ओबोल्लाम्मा सेङ्सेङ्ना चोलाङि हिट्नुङ् धारमोति चोलाङि हिङ्मा आनिलाउङ्सा चाहाबा लिना सोब्बे थोक् उन्ङा आपिडाइसे॥ पोङ्भोने उन्ङाना माहिमा लोक् भोलाइलाम्मा काछेम्बा माङ्हाङ् आनि मिसेन् निसुएसुम्मे॥ 4हिट्नुङ् उन्ङाना माहिमा लोक् भोलाइलाम्मा उन्ङा चामारसिङा चोगुना ठेना हिट्नुङ् बाहुमुल्ले थोक् आनि आपिडाइसे॥ खानि ना नाराङि लिसागा जाखाम् काचोक् ओचाफेन्ना निङ्ग्वालाम्मा आहोन्डिउङ् माङ्हाङ्ङाना ओचाट्लाङि साहाभागि लिसानि नुङ् उन्ङा नागा चामारसिङा चोगुए॥ 5हिट्नाड्डेउङ् आहिडुम्लोक् खानि बिस्वासङि नुना रिङ् थापाँ चोक्माना कोसिस चोगानुम्॥ हिट्नुङ् पाक् नुना हिट्ना चोगानुमुङ् खानि ठोना चा पोयानुम्॥ 6हिट्नुङ् ठोनाङि आप्पे लोङ्सा काबुङि युङ्माना रिङ् थापाँ चोगानुम्, आप्पे लोङ्सा काबुङि युङ्मा धैइरे चोगानि, धैइरे चोक्सा भाक्ति चोगानि॥ 7हिट्नुङ् भाक्टि चोक्सा भुम्बु-झान्झाचि दाया चोगानुम्चिम्, भुम्बु-झान्झाचि दाया चोक्सा मायाङि पोसा खाडानि॥ 8खानि लाउङ्सा चाहाब् लिना रिङ् नागा डोक् ए॥ हिट्नुङ् नागा रिङ् खानि चोलाङि पोसा आखाट्टुमे भोने, खानिङा टाङ्बा येसु खिरिस्ट मिसेन् आनिसुम्नाँ नुगा टोॽवालाम्मा खानि चोला काम लाहाब् लिना लियुक्॥ 9टरो नाड्डेना चाट्ला लिनिना याप्मिचिम्बाक् नुलोक् याङ्निनिना याप्मि गाड्डेना उलियुक्॥ हिट्नुङ् हिट्नाङा पाइले चोगुना पाप माङ्हाङ्ङा माफ पिडुना रिङ् डोक् मुन्डुडिसुटु॥
10हिड्नाड्डेउङ् भुम्बु-झान्झाचि हिट्नुङ् आनो-आन्झाचि, माङ्हाङ्ङा खानि माछेम्डिगा हिट्नुङ् मासेगिगा रिङ् छेम्बाना ए नुङ् निमेट्मा लाउङ्सा टुक्लोक् टोॽवा चोगानि, पोङ्भोने नाड्डेगा रिङ् खानिङा आचोगुम्टुम् भोने, खानि खोना बेला चा माङ्हाङ्लाम्मा लाप्माङ् आलिसिन्गा॥ 11नाड्डेउङ् माङ्हाङ्ङा खानि आनि टाङ्बा लोक् काहिङ्मेप्बा डाङ्बा येसु खिरिस्टङाना खोना बेला चा लाट्निना उमुलुक्ङि लिग्मा खानि आड्डिक् निङ्ग्वालाम्मा डोक् आनुमोति मापिडिटि॥
12खानिङा नागा रिङ् पाइले डोक् ठाहा आटोगुएसुम्मे हिट्नुङ् खानि माहिसिक्टिना छेम्बाना रिङ्ङि बोल्लेउ आलिसिएसिए, टरो चा खानिङा नागा रिङ् सोरोक् मिट्टानुम् नुङ् आङा लोनाँनि॥ 13आङा हिङ्ङालोक् सोम्मा खानिलोङ्सा नागा रिङ् सोरोक् यान्दा चोक्मा मेट्मा ओचेट्नुयुक् नुङ् आङा मिट्टुङे॥ 14पोङ्भोने आनि टाङ्बा येसु खिरिस्टङा आङा एला डोक् सिङा नुङ् पारचिन्दा याङ्लोडाना रिङ् आङा ठाहा टोगुङ्टुङ्॥ 15आङा सिङा चा नागा रिङ् खोना बेलाङि चा मुन्नेनुम् नुङ् आङा हिडुङ्लोक् सोम्मा खानि सोरोक् लोना याक्नाँनि॥
खिरिस्टङाना माहिमाङाना साँचि बारे
16आनि टाङ्बा येसु खिरिस्ट ठेना माहिमा लोक् साक्तिङि उङ्ना रिङ् ओचाप्पाङ् पारा चोक्बालाक् उछिॽवाक् मुन्डुम् गाड्डे खानि लोनेयाट्निन्॥ आन्याँ उन्ङाना ठेना माहिमा आन्याँ मिक्ङा डोक् निसुम्मे॥ 17माङ्हाङ् पाबाङा उन् मान् चोगुए हिट्नुङ् उन् आम्टेप्मा माङ्ठेना नुङ् निमेट्टुए, हिट्नुङ् सोब्बे नुङ्ना ठेना माङ्हाङ्ङा उन् नाड्डे लोडुए, “ना आङाना आमायालु छा, उन्लोक् आङा आड्डिक् हारका लिसाइसाङे॥” 18उन्लोक् आन्याँ सेङ्सेङ्ना झोन्झोबाङि वासेट्टिङाना बेला टोनालोग्लाम्मा मुक्टाना हिट्ना सोरा आन्याँ आप्पेङा खेम्सुम्मे॥#मात्ति १७:१-५; मारकुस ९:२-७; लुका ९:२८-३५
19माङ्काटाचिङा ओछेप्टुना रिङ् आझै छेम्बाना डोक् नुङ् आन्याँ चा भोरोसा युङ्सुम्टुम्मा, हिट्नुङ् खानिङा नागा रिङ् निङ्ग्वा पिमाउङ् खेम्मा ओचेट्नु लियुक्, पोङ्भोने ना कुरिक्वारिक्ङाना व्हाङ् मिलिए सोम्मा हिट्नुङ् खानि निङ्ग्वाङि भ्यानिक्ङाना चोक्चिङ्गेङाना व्हाङ् मिओम्मे सोम्मा डुम्बारिक् डुम्ङि हाट्ना कुपि गाड्डे डोक् लियुक्॥ 20सोब्बे नुङ्ना पाइलेम्बाक् माङ्काटाचिङा धारमाछाप्लाङि ओछेप्टुना रिङ् आप्पे उन्चि निङ्ग्वाङा ओछेप्टुना माखाक् नुङ् खानिङा ठाहा टोक्मा कोन्युक्॥ 21पोङ्भोने माङ्काटाचिङा ओमाट्टुगा रिङ् याप्मिङाना उनिङ्ग्वालाम्मा ओमाट्टुगा माखाक्, टरो माङ्हाङ्लाम्मा टायाना रिङ् ओमाट्टुनाँ हिट्नागाँ सेङ्सेङ्ना हाङ्साङाना बोल् ओटोगुङ् ओमाट्टुगा ए॥
© 2023, Wycliffe Bible Translators, Inc. and Nepal Bible Society