१ थेसालोनिकि 5
5
1टरो भुम्भु-झान्झाचि हिट्नुङ् आनो-आन्झाचि, हाट्ले ना रिङ् खोना बेला लियुक्ना नुङ् हिट्ना बेला हिट्नुङ् लेम्बाङाना बारेङि खानिलोङ्सा पाक्चा छेप्मायाक्मा कोन्निना॥ 2पोङ्भोने युसा याङ्काखुट् टाया गाड्डे डोक् टाङ्बा उङ्ना लेम्बा ठाहा डोक् मिटोक्ङे टायुक् नुङ् खानिङा नुलोक् ठाहा आटोगुएसुम्मे॥#मात्ति २४:४३; लुका १२:३९; २ पाटरुस ३:१० 3हिट्ना बेला याप्मिचिङा सोब्बेलेङ् “हाङ्हाङ् युङ्ग्वा हिट्नुङ् पाक्चा ओचाफेन्ना वाइना” पिक्सा ओमाट्टुगेट्टुना बेला मेच्छेमा छाडाङ्मा बेथा लाहाब् लिसि गाड्डे डोक् ठाहा डोक् मिटोक्ङे हिट्नागा उठुङ्ङि नास ठायुक्, हिट्नुङ् खोना चा ना जाखाम्लाम्मा होम्मा उहिनिगा॥ 4टरो भुम्भु-झान्झाचि हिट्नुङ् आनो-आन्झाचि, खानिउम् टे डुम्बारिक् डुम्ङिगा याप्मिचि माखाक्, हिड्नाड्डेउङ् टाङ्बा टाना लेम्बा खानि लोङ्सा याङ्काखुट्चि गाड्डे ठाहा डोक् मिटोक्ङे टानिना॥ 5पोङ्भोने खानि ख्वाप्पा याप्मिचि व्हाङ् हिट्नुङ् लेम्बाङिगा छालेट्चि ए॥ आनि युसा हिट्नुङ् डुम्बारिक् डुम्ङिगा याप्मिचि माखाक्॥ 6हिड्डेउङ् आनि आरु याप्मिचि गाड्डे इम्सिन्चा, टरो ओछेक्छेक् चोगि हिट्नुङ् आनि ठोना मानिम्चा॥ 7पोङ्भोने उइम्गा याप्मिचिउम् टे युसा उइम्युक् हिट्नुङ् युमालिङ् काठुङ्बाचिङा चा युसा उठुङुटु हिट्नुङ् ओटेडुचिचि॥ 8टरो आनिम्टे लेम्बाङिगा याप्मिचि लिसिनाँ ओछेक्छेक् युङि, हिट्नुङ् सुरेक्छा आपिना छातिपाता गाड्डे डोक् बिस्वास लोक् मायाङाना छातिपाता वाडुम्, हिट्नुङ् मुक्टिङाना आसाङाना सुरेक्छा आपिना टोपि वाडुम्॥#यासैया ५९:१७; एफिसि ६:१३-१७ 9पोङ्भोने माङ्हाङ्ङा ओयाक् आनि उठुङ्ङि ठेम्मा लोङ्सा आनि आसेगाना माखाक्, टरो आनि टाङ्बा येसु खिरिस्टलाम्मा मुक्टि टोक्माउङ्सा आसेगाना॥ 10उन् उङ्नाँ आनि हिङि चा सियि चा, आनि सोब्बे उन्लोक् एक्केउ युङि नुङ् उन् आनिलाउङ्सा सिए॥ 11नाड्डेउङ् ठिबाङ्ङा आरको आँट् पिडानुम्चिम् हिट्नुङ् बिस्वासङि बोल्लेउ लिमा घुवार फागाफा चायानि॥ छेम्बा डोक् खानि हिड्डे डोक् आचोगेएट्टि चा॥
आखेरि साल्लाह
12हाट्ले भुम्भु-झान्झाचि हिट्नुङ् आनो-आन्झाचि, टाङ्बा लाउङ्सा टोॽवा काचोक् खानि ओठेडोङ्चि मान् चोगानुम्चिम् नुङ् खानि बिन्टि चोक्नाँनि॥ खानि माझै हिट्नागाँ उन्चि निङ्ग्वालाम्मा टोॽवा ओचोगुटु हिट्नुङ् खानि ओछेक्छेक् माचोगिटि॥ 13हिट्नुङ् हिट्नागाँ ओचोगुना टोॽवा लोङ्सा हिट्नागा मायालोक् आड्डिक् मान् चोगानुम्चिम्॥ हिट्नुङ् खानि खानि टोङानिउङ् युङानि॥ 14भुम्भु-झान्झाचि हिट्नुङ् आनो-आन्झाचि, स्वाकायु याप्मिचि ओछेक्छेक् चोगानुम्चिम्, उकिट्टागा लाउङ्सा आँट् पिडानुम्चिम्, निम्छारोचि घुवार फाडानुम्चिम्, हिट्नुङ् सोब्बे याप्मिचि आङ्डानुम्चिम् पिक्सा आरति पिनाँनि॥ 15ना रिङ् मिट्टानुम्, साङा चा ओचाफेम्मा चोक्माना ओसाट्टोङि ओचाफेम्मा ओचोगुन्चा, टरो ठिबाङ्ङा आरको हिट्नुङ् सोब्बे याप्मिचिलोक् सोरोक् ओचेट्नुलोक् चोक्माना निङ्ग्वा चोगानुम्॥
16सोरोक् हारका लिसानि॥ 17सोरोक् बिन्टि चोगायाक्टानि॥ 18जे सुके लिचा माङ्हाङ् पोए-पोए ठाङ्सानुम्, पोङ्भोने खिरिस्ट येसुङि खानिङा नागा रिङ्चि डोक् चोगानुम् नुङ् माङ्हाङ्ङाना उनिङ्ग्वा ए॥ 19खानिङि सेङ्सेङ्ना हाङ्सालाउङ्सा टोॽवा चोक्मा छाक्नेनुम्॥
20माङ्हाङ्लाम्मा माप्बालाक् रिङ् चिम्मा फुट्नेनुम्॥ 21टरो सोब्बे रिङ्चि जाँच चोगानुम् हिट्नुङ् खोनाम्बाक् रिङ् ओचेट्नुना हिट्ना युङ्सानुम्॥ 22सोब्बे पारिग्गा ओचाफेन्गा रिङ्चि नाडानुम्॥ 23सान्ति कापिबा माङ्हाङ् आप्पेङा खानि सोब्बे पारिक्ङि चोखो माचोग्याक्, हिट्नुङ् आनि टाङ्बा येसु खिरिस्ट मिउङ्ङे सोम्मा खानि हाङ्सा, सोक्मा हिट्नुङ् येम् फाट्टुर मालेना उलियाक्॥ 24खानि काछेम्बा बिस्वासिलो वाहेट्, हिट्नुङ् उन्ङा जे माट्टुना हिट्नागा रिङ्चि उन्ङा चोगुटु डोक्॥
25भुम्भु-झान्झाचि हिट्नुङ् आनो-आन्झाचि, आन्याँ लोङ्सा चा बिन्टि याप्मिचोगाबिडा॥ 26सोब्बे भुम्भु-झान्झाचि हिट्नुङ् आनो-आन्झाचिलाउङ्सा माया चोक्सा बाबा चोग्गा चोक् चोगानि॥ 27सोब्बे भुम्भु-झान्झाचि हिट्नुङ् आनो-आन्झाचिलाउङ्सा ना चिट्ठि पोढाँ चोगानुम्मुङ् खेम्मेट्टानुम्चिम् नुङ् टाङ्बा उनिङ्ङि खानि आनुरोध चोक्नाँनि॥ 28आनि टाङ्बा येसु खिरिस्टङाना मायादाया खानिलोक् उलियाक्॥
© 2023, Wycliffe Bible Translators, Inc. and Nepal Bible Society