१ पाटरुस 4
4
फेराँ लिसाना चोला
1नाड्डेउङ् खिरिस्टङा ओयेम्ङि याङ्छामा आङ्डुए, खानिङा चा उन्ङा गाड्डे डोक् निङ्ग्वा मिट्टानुमुङ् बोल्लेउ लिसानि, पोङ्भोने येम्ङि याङ्छामा आङ्मा काहिबाङा डोक् पाप चोक्मा नाडुटु॥ 2हाट्ले ना चोला लिलोक् याप्मिङाना ओचाफेन्ना निङ्गुवा गाड्डे माखाक्, टरो माङ्हाङ् उनिङ्गुवा गाड्डे चोगानिउङ् युङानि॥ 3पाइले खानिङा पानिछोङ्बाचिङा ओचोगुगा गाड्डे डोक् खानि छाडा, पापि निङ्ग्वा, इमालिङ्ङा टेडुबाचि, मोज्मोज्जा, इमालिङ् जोम् काठुङ्बा हिट्नुङ् चिम्मा फुट्टुम्गा मुरतिचि साम्माङ् चोक्मा डोक् खानि बेला जोम् खेरो आटिसुम्मे॥ 4हाट्ले खानि नाड्डे पाराना ओचाफेम्मा टोॽवा चोक्मा हिट्नागा आबिस्वासिचिलोक् आवासिन्गा रिङ् उनिसुङ् उन्चि छाक्का उलिसाइसे, हिट्नुङ् हिट्नागाँ खानि खिसि माचोगिटि॥ 5टरो उहिङ्ग्वाट् लोक् उसियागा याप्मिचिगा न्याए काचोक् माङ्हाङ्लाउङ्सा ना बारेङि हिट्नागाँ हिसाब पिमा कोन्युक्॥ 6हिट्नाड्डेउङ् नुना खाबोर उसियागालाउङ्सा चा पारचार चोक्बालाक् ए, पोङ्भोने हिट्नागाँगा चा आरु याप्मिचि गाड्डे न्याए लिसा चा हाङ्साङिम्बाक् माङ्हाङ् गाड्डे डोक् उहिङ्याक् नुङ् हिट्नागा नुना खाबोर ओखेम्मेट्टुचिगा ए॥
7हिट्नुङ् ख्वाप्पा रिङ्ङाना आन्ते लिसा डोक् लाबे॥ हिट्नाड्डेउङ् खानि निङ्ग्वा रेक्टानुमुङ् ओछेक्छेक् लिसानिउङ् बिन्टि चोगानि॥ 8सोब्बे नुङ्ना ठेना रिङ्उम्बाक् खानि खानिङि आड्डिक् गाइरो माया चोगानि, पोङ्भोने मायाङा डोक् जोम् पाप टेप्टुटु॥#हितोपोदेस १०:१२ 9हारका लिसानिउङ् ठिबाङ्ङा आरको खानि पाङ्ङि स्वागाट् चोगानुम्चिम्॥ 10माङ्हाङ्ङा खानि ख्वाप्पालाउङ्सा उन्ङाना पारिक् पारिक्ङाना आत्मिक् बारदानङाना ढुङ्गुरिलाम्मा बारदान मापिडिएसे॥ हिट्नागा बारदान ठिबाङ्ङा आरको सेवा चोक्मा नुलोक् चालाँ चोगानुम्॥ 11कोइलोक् चेक्माना बारदान युङ्ग्वा भोने माङ्हाङ् उन्लाम्मा चेक्टि गाड्डे डोक् हिट्ना ओचेक्याक्॥ कोइङा सेवा चोगुटु भोने माङ्हाङ्ङा पिडुना बोल्लाम्मा हिट्नाँ सेवा ओचोगुवाक्॥ हिड्डेउङ् नागा ख्वाप्पा रिङ्ङि येसु खिरिस्टलाम्मा माङ्हाङ्ङाना डोक् उनिङ् टो-टो उलियाक्॥ ख्वाप्पा माहिमा हिट्नुङ् बोल् उन्ङि डोक् सोरोक् उलियाक्॥ आमेन्॥
याङ्छामा आङ्माना बारे
12आमायालु आसाइबाचि, खानिङि याङ्छामाङाना निङ्ग्वा छिक्मा लिनाँ ना लिमा लिनिना रिङ् लिसे नुङ् डोङ् ठोङ्नेनिन्॥ 13टरो खिरिस्टङाना याङ्छामाङि खानि चा साहाभागि आलिसिना रिङ्ङि हारका लिसानि, हिट्डेउङ् उन्ङाना ठेना माहिमा पारकाट् लिनाँ खानि चा आड्डिक् आनान्दित आलिसिटि॥ 14खानिङा खिरिस्टङि बिस्वास आचोगुम्नाँ याप्मिचिङा मालोडिजाए भोने खानि हारका लिसानि, पोङ्भोने माङ्हाङ्ङाना माहिमित ओहाङ्सा खानिलोक् लियुक्॥ 15टरो खानि माड्डे खोनाङा चा याप्मि कासेट्, याङ्काखुट्, एकेलेङ् काचोक् वा आरु याप्मिचिगा टोॽवाङि टागारो काठेन्बा गाड्डे याङ्छामा आङ्नेनुम्॥ 16टरो कोइङा खिरिस्टियान लिसानाँ याङ्छामा आङ्डुटु भोने हिट्ना ओमोन्निसिन्याक्॥ टरो हिट्ना निङ्ङि माङ्हाङ् उनिङ् टो-टो ओचोन्डुवाक्॥
17न्याए चोक्माना बेला टाइसे, हिट्नुङ् माङ्हाङ्ङा उटुम्ङि आप्पे ओयाप्मिचिगा न्याए चोगुटु॥ न्याए आनिलाम्मा उटुम् लियुक् भोने, माङ्हाङ्ङाना नुना खाबोर बिस्वास ओचोगुन्गाङागा झान् खोड्डेना न्याए लियुक्ना होला? 18धारमाछाप्लाङि नाड्डे युङ्ग्वा,
“धारमोति याप्मिउम् हिङ्मा टुक्ना भोने, आधारमोति पापि याप्मिउम् झान् खोड्डे लियुक्ना होला?”#हितोपोदेस ११:३१
19नाड्डेउङ् माङ्हाङ् उनिङ्ग्वा गाड्डे याङ्छामा ओआङ्डुगाँ नुना टोॽवा ओचोगुवाक् हिट्नुङ् हिट्नागाँ सिरिस्टि काचोक्बा माङ्हाङ्ङि भारोसा उयुङ्सुवाक्॥ उन्ङा उन्ङाना माङ्हुप् सोरोक् पुरो चोगुटु॥
© 2023, Wycliffe Bible Translators, Inc. and Nepal Bible Society