१ पाटरुस 2
2
उहिङ्ग्वाट् लुङ्गेॽवा हिट्नुङ् सेङ्सेङ्ना छोङ्बा
1हिड्नाड्डेउङ् सोब्बे ओभेन्गा रिङ्, सोब्बे छाल चोक्माना टोॽवा, काप्टि लिमा, रेक् काप्मा हिट्नुङ् सोब्बे पारिग्गा लोमाजामा रिङ्चि नाडानुम्॥ 2लोप्मो पोङ्साना ओओ नुनु ठुङ्मा लाउङ्सा ओसाॽवासा गाड्डे डोक् खानि चा माङ्हाङ्ङाना छेम्बाना रिङ् ठुङ्मा निङ्ग्वा पिडानुम्, हिट्नुङ् खानि हिट्नालाम्मा मुक्टिङि पोसा आखाडिटि॥ 3हाट्ले खानिङा टाङ्बा आम्टेप्मा दाया काचोक्बा नुङ् आठोट्टुएसुम्मे॥#छाम्लोमा छाप्ला ३४:८
4टाङ्बा सोरि टायानि, उन् उहिङ्ग्वाट् लुङ्गेॽवा ए॥ उन् याप्मिचिङा काम लाहाब् लिनिना नुङ् ओलेप्टुना, टरो माङ्हाङ्ङा सेगुना आड्डिक् माहाङ्गो लुङ्गेॽवा ए॥ 5खानि चा उहिङ्ग्वाट् लुङ्गेॽवा लिसानिउङ् आबानि हिट्नुङ् आत्मिक् माङ्ठाना चोक्मा आप्पेलोङ्सा पिडानुम्॥ हिट्नि खानि येसु खिरिस्टङाना नाताङा चोगुनाँ माङ्हाङ्ङाना उनिङ्ग्वा टासुना आत्मिक् भोक् काठाङ्बा सेङ्सेङ्ना पुजारिङाना टोॽवा आचोगुम्टुम्॥ 6धारमाछाप्लाङि नाड्डे छेप्टेसे–
“पुयानुम्, आङा सेगुङ्ना याप्मा माहाङ्गो लुङ्गेॽवा यरुसलेमङि#२:६ गिरिक्ङि यरुसलेम सियोन चा ओलोडुए आथाबा सियोनङाना उनिङ् यरुसलेम चा ए॥ युङ्सुएसुङे॥
हिट्नुङ् उन्ङि बिस्वास काचोक्बा खोना बेला चा मोम्मासिमा कोन्निना॥”#यासैया २८:१६
7नाड्डेउङ् खानि बिस्वास काचोक्बाचिलोङ्सा ना लुङ्गेॽवा आड्डिक् बाहुमुल्ले लियुक्॥ टरो बिस्वास काचोक्निबाचि लाउङ्साम्टे,
“लुङ् काछेट्बाचिङा ओलेप्टुना लुङ्गेॽवा डोक् पाङ् ओजाग्ङि छेट्माना उसुरङिना मुलि लिङ्गेॽवा लिसे॥”#छाम्लोमा छाप्ला ११८:२२
8हिट्नुङ्,
“ना डोक् याप्मिचि टोक्टिना लिङ्गेॽवा ए, हिट्नुङ् ना लिङ्गेॽवाङि डोक् याप्मा याप्मिचि ओठायुक्॥”#यासैया ८:१४-१५
हिट्नागा ओटोक्युक् पोङ्भोने हिट्नागाँ माङ्हाङ्ङाना रिङ् पालान् ओचोगुन्गा, नाउम्बाक् माङ्हाङ्ङा हिट्नागा लोङ्सा नाड्डे डोक् चोक्माना योजाना डाना॥
9टरो खानिम्टे माङ्हाङ्ङा मासेगिगा छोङ्बाचि, मुलुक्ङिना पुजारिचि, सेङ्सेङ्गा छोङ्बाचि, माङ्हाङ्ङाना आप्पे ओयाप्मिचि ए॥ खानिङा उन्ङाना ओबोल्ङाना टोॽवाचि पारचार चोगानुम् नुङ् उन्ङा खानि डुम्बारिक्लाम्मा उन्ङाना डोङ् ठोङ्डिना ओव्हाङ्ङि माआप्टिए॥
10“पाइले खानि माङ्हाङ् ओयाप्मिचि आवासेट्टिन्गा,
टरो हाट्ले खानि ओयाप्मिचि आलिसिएसे॥
ठिक् बेला खानिङा माङ्हाङ्ङाना ओदाया आटोक्निम्गेट्निम्ना डाना,
हाट्ले खानिङा ओदाया आटोगुएसुम्मे॥”#होसे २:२३
माङ्हाङ्ङाना ओसेवाक्
11आसाइबाचि, ना नाराङि खानि होप्मो बेला सोम्मा आयुङिगा हिट्नुङ् भारा देसङि आयुङिगा गाड्डेगा डोक् ए॥ हिट्नुङ् खानि येम्ङा कोलुगा ओचाफेन्गा रिङ् चोक्मालाम्मा लाप्माङ् युङानि नुङ् खानि बिन्टि चोक्नाँनि॥ नाड्डेगा रिङ् हाङ्साङाना बिरुद्दाङि सोरोक् कोब्युयाक्युक्॥ 12आबिस्वासि याप्मिचिगा माझाइ खानि चाट्ला नुना उलियाक्॥ हिट्नुङ् खानिङा आचोगुम्ना गाल्ति रिङ्ङाना हिट्नागाँ फाट्टुर मालाबिए भोने चा हिट्नागाँ खानिगा ओचेट्नुना टोॽवा उनिसुवाक् हिट्नुङ् माङ्हाङ्ङा नाराङिगा याप्मिचिगा न्याए चोगुनाँ हिट्नागाँ उन्ङाना माहिमा ओचोगुवाक्॥#मात्ति ५:१६ 13टाङ्बाङाना मान् लोङ्सा सोब्बे सासान् काचोक्बा याप्मिचिगा आधिन्ङि युङानि, हिट्ना सोब्बे नुङ्ना ठेना हाङ्बा उलियाक्, 14आथाबा हाकिमचि उलियाक्, हिट्नुङ् हिट्नागा ओचाफेम्मा टोॽवा काचोक्बाचि साजाए पिमा हिट्नुङ् नुना टोॽवा काचोक्बाचिगा निङ् चोन्मा माङ्हाङ्लाम्मा डोक् ओपाङ्सुचिगा ए॥ 15मुरखा याप्मिचिङा बुजा डोक् मिचोक्ङे ओमाट्टुगा रिङ् खानिगा नुना टोॽवाङा स्वाक् चोगुम् नुङ् माङ्हाङ्ङाना उनिङ्ग्वा युङ्ग्वा॥
16सोतान्तर लिसाना याप्मिचि गाड्डे डोक् युङानि, टरो सोतान्तर लिसाङे नुङ् ओभेन्गा टोॽवा चोक्माना बाहाना चोग्नेनुम्॥ बोरु माङ्हाङ्ङाना चाकार गाड्डे डोक् चोगानिउङ् युङानि॥ 17सोब्बे याप्मिचि मान् चोगानुम्चिम्॥ हिट्नुङ् बिस्वासि भुम्भु-झान्झाचि माया चोगानुम्चिम्॥ माङ्हाङ्लोक् किट्टानि हिट्नुङ् हाङ्बाङाना मान् चोगानुम्॥
याङ्छामा आङ्मा लाउङ्सा खिरिस्टङाना नामुना
18कामाराचि, खानि डाङ्बाचिगा रिङ् खेम्सानुम् हिट्नुङ् हिट्नागा मान् चोगानुम्चिम्॥ ओचेट्नु काचोक्बा डाङ्बाचि एडोक् माखाक्, टरो ओचाफेन्मा कामेट् डाङ्बाचि चा मान् चोगानुम्चिम्॥ 19खान्ङा आचोगुन्गेट्टुन्ना खोना चा याङ्छामा पाक् माहामाना नुङ् ठाहा आटोगुगेट्टुलोक् माङ्हाङ्ङाना उनिङ्ग्वा डोक् ए नुङ् आङ्डुटु भोने माङ्हाङ्ङा आसिक् मापियुक्॥ 20खानिङा ओचाफेन्ना टोॽवा आचोगुमुङ् साजाए आटोगुमुङ् धैइरेलोक् आङ्डुमे भोने ना खोना ठेना रिङ् चा माखाक्, टरो खानिङा नुलोक् आचोगुमुङ् चा याङ्छामा आआङ्डुमे भोनेम्बाक् माङ्हाङ्ङा आसिक् मापिडिटि॥ 21पोङ्भोने ना रिङ् लाउङ्सा डोक् माङ्हाङ्ङा खानि माछेम्डिगा ए॥ खिरिस्टङा चा खानिलोङ्सा याङ्छामा आङ्डुए, हिट्नुङ् उन् डोक् खानिना नामुना ए॥ हिड्नाड्डेउङ् खानि चा उन्ङा मानिमेट्टिगा लाम्बोङि लाम्टिमा कोन्युक्॥
22“उन्ङा खोना बेला चा पाप चोग्वाट्टुन्,
हिट्नुङ् उन् खोना बेला चा माङ्जोना रिङ् चेक्नेट्नि॥”#यासैया ५३:९
23खोनाङा चा उन् ओलोडुजोनाँ उन्ङा पाक्चा ओचाफेम्मा लोडुवाट्टुन्चिन्॥
याङ्छामा आङ्डुनाँ उन्ङा खेमा लाप्टुव्टुन्चिन्,
टरो उन्ङा माहामा न्याए काचोक्बा माङ्हाङ् उमुक्ङि डोक् भोरोसा युङ्सुए॥#यासैया ५३:७
24आनि पाप लाउङ्सा सिइउङ् धारमिक्ता लाउङ्सा हिङि नुङ्
खिरिस्ट आप्पेङा ओयेम्ङि आनि पाप खाप्चेङि खुयुए॥
हिड्नाड्डेउङ् उन्ङाना खेसिक्लाम्मा खानि आनुइए॥#यासैया ५३:५
25पोङ्भोने खानि खेडोक् ओवायुजागा ठुँबाचि गाड्डे आलिसिएसिगा,
टरो हाट्लेम्टे खानि कापुबा हिट्नुङ् खानि हाङ्सा सुरेक्छा काचोक्बाङि नोक्टि आटाइसिए॥#यासैया ५३:६
© 2023, Wycliffe Bible Translators, Inc. and Nepal Bible Society