2 Tesalonigɨ 3
3
Pol ɨngɨr ɔlɛ
1Ay, karmɨnɨ ga ban̰aŋ dan̰ ga kandɨ, kɔl gɨ ni ba kɨya yɔ gɨ ni kagadi ba kɛ: Ulagɨŋ Kumu kol cayni ɗe kɔl gɨ da Ba-gulɔŋ na cɨɗa gɨyəŋ koyi bɨ, ɗe kalaŋ na dɨbɨn̰ gusoŋ-tɔgɛ hɨn̰ gɨ ba won̰ a tagɨŋ wo̰ bɨ. 2Ulagɨŋ Kumu ɗe ban dorni a kobɨ kalaŋ ga ka-kuduroy-ɨndɨwa bɨ, kobɨ kalaŋ ga ɨsɨndəŋ bɨ, kɨya wa na kalaŋ nɔm ba geyege bɔgɛ kuduroyge a cay Kɔl-gɨ-Ɗari gɨŋ naŋ.
3Ama Ba-gulɔŋ le, na ba ɨre a cay tɨbay dɨŋ. Ban kɨya lɔɔ gɨ kɨŋ kɨya orɨn̰ dan̰ tɔgɨ bɨ, kɨya amgɨŋ ɗe Haban̰ Ba-lɔɔ ɨsɨna ay banga caygɨŋ naŋ bɨ. 4Ba-gulɔŋ bɨni ɨrɨme gɨ woy ɗɛgɛgɛ kol caygɨŋ. Kɨya wa hɨnga ga ni ay noyni bɨgɨŋ gɨ kɨŋ na laa le, kɨŋ lee bɨ, kɨŋ woy te lɔɔ cɨndɨgɨŋ tumɔ tumɔ bɨ.
5Kuɗa gɨ Ba-gulɔŋ n̰ana kuduroygɨŋ ɨran̰ jɨn̰ geye gɨ da Kumu gɨŋ bɨ, jɨn̰ te haye-kudurɔ gɨ Kɨris ba-bee gɨŋ bɨ.
Kuɗa gɨ ungo laa gɨye
6Karmɨnɨ ga ban̰aŋ dan̰ ga kandɨ, ni ay noyni bɨgɨŋ dan̰ guson̰ Ba-gulɔŋ Jesu-Kɨris: Dɨragɨŋ gusɨgɨŋ sɛdɨ coŋ gusi kurɨndɨna gɨ ani ani gɨ woy kuŋ cay gusi gɨŋ bɨ, gɨye-lɔɔdi ɨra pɨna dan̰ hɨnga ga ni gɨle ga ni gɨlii naŋ bɨ. 7Kɨya wa kɨŋ sol gɨyəŋ gɨ ni ayɨn̰ cay tɨbay gɨye-lɔɔdini kuɗa: Kɨya wa ni wɨya kuŋ a cay gusɨni gɨŋ a duroygɨŋ naŋ. 8Hɨnga ga ni di le, na ungo mani ɨngɨrii ɗe bɨni naŋ. Ama ni lee gɨye gɨlalɨn̰ ƴomɨn̰ kɨjan̰e dan̰ son̰do dan̰ tɨwa di ɨni bɨ, ɗe ani na nɨn̰in̰ ungo pɨna duroygɨŋ naŋ. 9Leen̰ cɨndi na, ni orɨn̰ dan̰ gɨyəŋ gɨ ni ƴon̰ hɨnga kagɨŋ. Ama ni gey ɗɔɔ na gɨye lɔɔ gɨ gɨl, agɨŋ na ƴɔlɨn̰ gɨye-lɔɔdini. 10Leen̰ cɨndi, kɨɗɨn̰ ga ni ba ban̰ duroygɨŋ le, ni sogɨ sɨmaygɨŋ ye hɨn̰: «Hɨn̰ gɨ ungo na gey lɔɔ gɨye naŋ na, kuɗa gɨ ban dɔɔ dɔɔ naŋ bɨ.»
11Kɨya wa ni je hɨn̰ gɨ kalaŋ ga pɨna duroygɨŋ naa ka-wɔyɛ kuŋ cay gusɨge gɨŋ. Gɨye-lɔɔdɨge gɨ ɗaŋ unɔ, ama kan som na kɨya tɔbɛ kɨbɨge a boy kɔl gɨ dɨlage naŋ gɨŋ. 12Kalaŋ ga nee le na, ni olge bɨ, ni ay noyni bɨge bɨ, dan̰ guson̰ Ba-gulɔŋ Jesu-Kɨris gɨ kan na laa gɨye kɨbɨge munduŋ bɨ, kan na da hɨnga ga dan̰ gɨyəŋ gɨ da kɨjan̰e koge gɨŋ bɨ.
13Ama kɨŋ-gandi karmɨnɨ ga ban̰aŋ dan̰ ga kandɨ, kɨŋ ɗɔɔ ba gɨlale te lɔɔ hɨnga ga ɗari gaŋ naŋ. 14Hɨn̰ gɨ ungo na kan̰a bɔgɛ kɔl a cay kɔl gɨ ni ba ye a duroy magtubu di kɛ dɨŋ le na, kɨŋ laa gɨ ɗe kalaŋ solii bɨ, ayagɨŋ gusɨgɨŋ sɛdɨ gusii coŋ, ɗe dasi dii. 15Soliigɨŋ hɨn̰ ba-baadɨgɨŋ wo̰ naŋ, ama ɗalaygɨŋ hɨn̰ kurɨndɨgɨŋ wo̰.
Tɔrɛ-kɨbɨ bɨ lapɨya bɨ
16Kuɗa gɨ Ba-gulɔŋ gɨ ba gusi-dɔbɛ bɨgɨŋ gusi-dɔbɛ dan̰ tɨwa nɔm bɨ, boy hɨnga nɔm bɨ. Kuɗa gɨ Ba-gulɔŋ baa danagɨŋ nɔm.
17Na ɨŋ-bandi Pol ba wale kol lapɨya di kɛ le, dan̰ kɔbɔŋ hɨnge. Magtubu kange ga ani ani le, ɨŋ ɗe kɔbɔŋ toy nee na hɨn̰ wo̰ le kɔ. Na wale hɨnga kange.
18Kuɗa gɨ ɗarwa di da Ba-gulondɨna Jesu-Kɨris baa danagɨŋ nɔm.
S'ha seleccionat:
2 Tesalonigɨ 3: gab
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Association pour la Promotion de la Langue Gabri Darbé-Dormon (APLGD) en coopération avec
© 2023, Wycliffe Bible Translators, Inc.