Nahum 3
3
E vakaa naa Nineveh
1E vakaa naa de aduhale gu honu laa i todo,
ma denga muna hadu,
ma goloa gu hagadabena ange e hai gi de mahi,
gai iai dangada e daa gi maakau!
2De leo o de hagailiili o denga hoosa
ma de hagalongaa o denga hagasii,
ma de saavini o denga hoosa
aama de nannadu o denga hada hebagi!
3Denga daane e saavini i honga hoosa,
gai alaadeu gadilaasa e dabadaba
gai olaadeu dao e malamalama!
Gu soa dangada ne maakau,
de gau maakau gu hagabudu saele,
gu dee maua gi iloo taelodo,
dangada gu baakuu saele laa honga o de gau maakau —
4i hiidinga dono dagodo haisala bei de hine hai be se manu.
Nineveh e mahamaha, ia se hine hai huuhuaa mee,
gai se aduhale ne agoagona ange denga huaahenua i ana dahulinga dagodo haisala,
ma de hai denga huaadangada gi haia ana huuhuaa mee.
5E hagadaba Tagi o denga hagabuulinga hebagi,
“Au e hai baasi adu gi de goe,
au e langa age naa oo malo gi dogaa ai goe.
Au e hai naa denga huaahenua gi gidee lodo oo malo
ma de hagaago ange gi denga nohoanga hodooligi doo hagadogaa ina.
6Au e maga adu naa denga mee hakino gee gi de goe,
ma de vaivai hai goe,
aama de hai goe gi se mee e kada ai dangada.
7Dangada alodahi e gidee goe, e kino naa i oo dagodo ma de hagataba,
‘Nineveh gu maoha — goai naa e dangi i ono hiidinga?’
Go hee naa aagu e gide ai dahi dangada gi hagaaneane ina goe?”
8E aha, koe e danuaa ange i Thebes,
e duu laa i gaogao ssaalingaa vai go Nile,
gai de vai e duuli luoono baasi?
Ssaalingaa vai e buibui de aduhale laa,
gai de vai go dono buibui.
9Ethiopia ma Egypt e kona de bale ange ia,
gai e dee maua i de tala dagodo o ono mahi;
Put ma Libya e bale ange hogi ia.
10Aagai ono dangada gu gaavee gee i de henua,
ma de gaavee gi dahi henua gee.
Ana gaagaa ne dagadagahia naa gi lo te gelegele
i dege o denga haiava.
Dangada e dada naa denga laagau i ono dangada aamua,
gai ono dangada maolunga ne noonoodia i daula baalanga.
11Nineveh, koe e unu naa hogi ga senga,
koe e hano naa ga mmuni
ma de ssala doo mommee e buibui ai i de hagadaumee.
12Oo hale buibui makaga alodahi e bei naa denga fig
gu lleu laa ono hua i taamada:
de masavaa naa huu e luuluu ai,
gai ono hua gu malili ange gi lo te ngudu o tangada e gaina.
13Galo ange diiloo doo hagabuulinga hebagi —
gilaadeu alodahi ni haahine!
Denga haitoga o doo henua
gu maahuge ange gi oo hagadaumee;
gai de ahi gu dudu oo laagau hagamakaga.
14Asua mai vai e hagadabena ange gi de masavaa
e duuli ina ai luu baasi o de aduhale,
hagamakaga ina oo buibui!
Gaamai denga bela pigi,
ma de hilo denga mortar,
gai hagadabena ina de mee e hagannoho ai denga cement!
15De ahi e dudu naa goe i kilaa;
de gadilaasa e daa naa goe ga magau,
ma de gai goe ga odi bei hegau a de itebuubuu.
Goodou hagadili gi soa bei de lagolago o denga manu e gaina helii,
gai hagadili gi soa bei denga itebuubuu!
16Oo dangada hagao mee gu kii ange de soa;
gilaadeu gu soa gai gu lagolago ange i denga heduu i lo te langi.
Aagai denga itebuubuu e gai naa ga odi mee i honga de henua
gai muli mai gu llele ga hulo.
17Oo dangada hagaloosi gu bei denga itebuubuu,
oo dagi gu bei de hagabuulingaa itebuubuu,
e toga laa i honga denga buibui i de laangi hagamagalili —
gai ga sobo age huu de laa, gai gilaadeu gu llele ga hulo,
gai e deai e iloo be go hee olaadeu ne hulo aagena.
18De hodooligi o Assyria, oo dangada hagaloosi gu sseni;
oo dangada aamua gu daakodo i lo te gelegele.
Oo dangada gu mavaevae saele i honga mounga,
gai gu deai se dangada e hagabuni ina mai gilaadeu.
19Gai gu deai donu mee e hagaieiangi ina goe;
doo maanuga gu se mee hagamaakau.
Dangada alodahi e langona oo longo
e baabaa naa olaadeu lima.
Go hiidinga goai tee langona iho
tuasala i au hegau alasala ne hai?
© 2022, Wycliffe Bible Translators, Inc. All rights reserved.