James 4
4
Gi dee hai soa ange gi henua i lalo
1Gai aahee hiidinga e ssula age ai laa denga hebagi, ma de hagadaumee i oodou magavaa? E dee go hiidinga o denga lodo e hagadau hebagi i oodou lodo naa? 2Goodou e llodo i hanu mee, gai e deai donu oodou mee; deenei ai, goodou e daa dangada gi maakau. Goodou e nnoo gai e dee maua i de kave mee nei, gai goodou e hagadaumee ma de hebagi. Goodou e deai donu oodou mee, go hiidinga goodou e dee dangidangi ai. 3Goodou e dangidangi gai e dee gaavadu gi goodou, go hiidinga e dee heohi doodou mee e dangidangi ai, gai goodou ga hai ai donu huu oodou mee e llodo ai.
4Goodou dangada e dee hai hegau i de mee abodonu! Goodou e dee iloo laa bolo tangada e hai soa ange gi henua i lalo e hai baasi ange donu gi de Maadua? Deenei ai, be goai e lodo e hai soa ange gi henua i lalo, gai ia e hai donu ia gi se hagadaumee niio de Maadua. 5Goodou e maanadu bolo ni ngadi muna e sisi laa i de Beebaa Dabu, e hai ange, “De Maadua e lodo gaiaa ange mmao i de hagasaalunga aana gu hai laa gi noho i odaadeu lodo”?#4.5 De Maadua e lodo gaiaa … i odaadeu lodo, aabe De Hagasaalunga a de Maadua gu hai laa gi noho i odaadeu lodo, e lodo gaiaa mai gi odaadeu aaloha, aabe De Hagasaalunga a de Maadua gu hai laa gi noho i odaadeu lodo, e lodo gaiaa mmao. 6Aagai ia e abodonu mmao; deelaa ai, gu sisi e hai ange,
“De Maadua e hai baasi ange gi gilaadeu e llodo maolunga,
aagai e abodonu ange gi gilaadeu e llodo maolalo.” #Pro 3.34
7Deenei ai, goodou hagallongo ange gi de Maadua. Hai baasi ange gi de ia hagabaubau, gai ia e savini naa donu ga hano gee mai i goodou. 8Goodou hagapaa ange gi de Maadua, gai ia ga hagabaa adu gi goodou. Goodou de gau haisala, hagagilimalali ina oodou lima! Goodou de gau llodo lagolago, hagagilimalali ina oodou lodo! 9Goodou llodo baubau ma de tangi aama de tangi see. Goodou gi dee kada aagai gi llodo baubau, gai haia gi dee malangilangi goodou gai gi daemaha. 10Goodou hagamaolalo i mada luu mada o Tagi Maolunga, gai ia ga hagaamua ai goodou.
11Denga daina, goodou aude hagadau hagabaubau ina goodou. Tangada e hagabaubau ina dono daina aabe e hagamodu ina muna o dono daina, e hai baasi ange donu gi de hainga aama de hagamodu muna o de hainga. Aagai noo koe e hagamodu muna o de hainga, gai koe e dee daudali i de hainga, aagai se dangada e hagamodu ina muna o de hainga. 12Gai e dahi donu huu ia hai hainga ma de ia hagamodu muna; go ia e maua i de hagaola aabe go de daa gi magau. Aagai go koe goai, gai koe ga hagamodu ai muna o tangada e baa adu gi de goe?
Gidaadeu e dee iloo dagodo o daiao
13Nnoho mai hagalaangona agu muna, goodou e hagataba laa, “Ailaa nei aabe go daiao gai gimaadeu e hulo naa gi dahi aduhale ga nnoho ai i e dahi ngadau, ga hagao mee ai gi maua ai mee lagolago.” #Pro 27.1 14Gai goodou e dee iloo donu be ni aha e hai daiao. Aahee dagodo o oodou mouli? Oodou mouli e bei dagodo o de mama o vai e hanage laa i dahi masavaa bodobodo gai e moolau donu de lilo. 15Aagai goodou hagataba, “Noo e heohi mai i daho Tagi Maolunga, gai gimaadeu e mouli naa ga hai dahi mee ma dahi mee.” 16Aagai goodou e pasa hagassoenga i doodou hagamaolunga. Denga pasa hagassoenga bee nei alodahi e baubau. 17Deenei ai, tangada e iloo e ia de mee heohi dana hai, aagai ia e dee hai, gai ia gu haisala ai donu.
© 2022, Wycliffe Bible Translators, Inc. All rights reserved.