Isaiah 9
9
De haanau o dahi dama daane
1Gai e deai naa donu se gohu i daho dangada e hai ngadaa laa. I mua gai ia ne hagangadi mee de henua o Zebulun ma de henua o Naphtali, aagai muli mai naa huu gai ia e hagadubu Galilee o denga Gentile, go de mommee i gaogao tai, i de baasi laa o Jordan.#Mat 4.15
2Dangada e seesee i lo te gohu
e gidee naa dahi maalama laumalie;
gai gilaadeu e nnoho i de henua gohu boo dangodango,#9.2 de henua gohu boo dangodango, aabe go de henua o de malu o de magau.
de maalama e sula ange naa gi gilaadeu.#Mat 4.16; Luke 1.79
3Koe gu hai gi soa de huaahenua,
ma de hai gi kii ange delaadeu malangilangi;
gilaadeu e malangilangi i mada luoo mada
bei de malangilangi o dangada i de masavaa o de hagihagi,
ma de malangilangi o denga daane
i de masavaa e vaevae ai goloa e maua i de hebagi.
4Go hiidinga koe gu hadihadi de laagau e hagahai hegau aana e hagauda,
ma togo i honga dono eu,
go de laagau a de ia e vaivai haia gilaadeu,
bei de laangi aau ne hagadee kii ai de gau Midian.
5Denga mee vae o taane hebagi dau,
ma olaadeu malo laa daha alodahi gu baalau laa i dodo
e dudu naa i de ahi.
6Gai dahi dama gu haanau mai gi gidaadeu,
dahi dama daane e gaamai gi gidaadeu;
gai ssauaa e dagi ai e gaavange naa gi de ia.
Gai ia e hagaingoo ange naa
go de Ia Hagasaele Hagalele Mouli, de Maadua Mmahi,
Tamana dee Ngado Mai, aama Tagi o de Baba.
7Gai dono nohoanga hodooligi ma de nnoho paba e hagadagadaga,
e deai naa donu se odi.
Gai ia e dagi naa i de nohoanga o David,
ma dono nohoanga hodooligi,
gai ia e hai naa gi duu gi makaga ma tee ngalungalue
i de hagamodu e soe ma de heohi,
mai i de masavaa laa ga hano ai.
Go de lodo mmahi o Tagi o denga hagabuulinga hebagi
e hagassula ina de mee nei.#Luke 1.32-33
De hagaduasala o Israel
8De Ia Aamua gu tala dahi mee e hai baasi ange ai gi Jacob,
gai e hai ange naa hogi gi Israel.
9Dangada alodahi e iloo naa de mee nei,
Ephraim ma gilaadeu e nnoho i Samaria;
go dangada e hagataba i de hagamaolunga
ma de lodo maolunga:
10“Denga hadu gu maoha iho,
aagai gimaadeu e hagaduu age ange naa i denga hadu gu hagamalali;
denga sycamore gu lava i de sele iho,
aagai gimaadeu e doo ange naa denga cedar gi olaadeu duulanga.”
11Aagai Tagi Maolunga ne hai hagadaumee o Rezin gi hebagi ange gi gilaadeu,
ma de usuusu ange olaadeu hagadaumee.
12De gau Assyria mai i dua ma de gau Philistia mai i dai
e hhanga naa olaadeu ngudu ga holo Israel.
Gai mee nei alodahi tee maua donu i de hagahelui dono lili,
gai dono lima goi hagaabo donu huu.
13Aagai de huaadangada laa tee aahe mai donu gi de ia ne hagaduasala ina gilaadeu,
gilaadeu tee ssala hogi Tagi o denga hagabuulinga hebagi.
14Deelaa ai, Tagi Maolunga e tuu naa ngaadahi de biho ma ssugi o Israel,
ma denga laa o de palm ma denga aalege i dahi laangi donu huu;
15denga daane maatua ma de gau aamua go de biho,
gai denga pelaabisi e agoagona laa denga muna hhadu go ssugi.
16Go hiidinga dagi o de huaadangada gu dagi gee gilaadeu,
gai gilaadeu gu daahanga dangada alaadeu e dagi.
17Deelaa ai, de Ia Aamua e dee malangilangi i alaadeu dama daane,
be e lodo aloha ange gi alaadeu gauligi gu deai olaadeu damana,
aabe go haahine gu maakau olaadeu bodu.
Go hiidinga gilaadeu alodahi e dee hai hegau i mee heohi aama de baubau,
gai muna a dangada alodahi e tala gu hakino gee.
Gai mee nei alodahi tee maua i de hai gi helui dono lili,
dono lima goi hagaabo donu huu.
18De baubau e bei dagodo o de ahi e duungia laa mee,
gai e dudu denga manu duiduia ma manu daladala,
ma de haaula lodo mee muimui,
gai dono useahi e buu age laa gi lo te moana i lunga.
19De lili o Tagi o denga hagabuulinga hebagi gu dudu de henua,
gai dangada gu bei denga lahhie e haula ai de ahi;
gu deai donu se dangada e hagaola ina dono daina.
20Gilaadeu e kave naa denga kano manu i olaadeu lima madau ga gai,
aagai gilaadeu goi hiikai huu;
gilaadeu e gaimee naa i olaadeu lima masui,
aagai e dee maua gi boobosu.
Dahi ma dahi e gai naa kano o olaadeu dama.
21 Manasseh e gai naa Ephraim, gai Ephraim e gai Manasseh;
gai gilaau e hagabuni naa ga hai baasi ange ai gi Judah.
Gai mee nei alodahi tee maua donu i de hagahelui dono lili,
gai dono lima goi hagaabo donu huu.
© 2022, Wycliffe Bible Translators, Inc. All rights reserved.