Habakkuk 3
3
Talodalo a Habakkuk
1Talodalo a de pelaabisi go Habakkuk, e hua bei de Shigionoth.#3.1 Shigionoth se muna ange gi denga daahili, gai e dee iloo danuaa dono hagadoonunga.
2 Tagi Maolunga, au gu langona oo longo,
Tagi Maolunga, gai au gu lele ogu mouli i au hegau.
Ahe ange haia au hegau i demaadeu masavaa,
haia gi iloo e gimaadeu dagodo o au hegau;
gai koe manadua de lodo aloha i doo bole.
3De Maadua ne humai i Teman,
de Ia Dabu laa ne humai i de mounga go Paran. Selah
Dono mahamaha e haoli de langi,
gai dono tuhi e hagahonu henua i lalo alodahi.
4Ia e masalaba bei dagodo o de maalama;
denga uila e dabadaba mai i lo tono lima,
go de mommee iai dono sauaa.
5De magi hagamaakau e hano i ono mada i mua,
gai mee hagamaakau e daudali ange i ono dua.
6Ia ne duu age, gai henua i lalo gu ngalungalue;
ia ne galo ange ga tilo, gai denga huaahenua gu bolebole.
Denga mounga mai i mua gu maoha ma gu malili iho,
gai denga duuduu gu daulooloa laa gu baakuu —
aagai ia e noho ga hano ai.
7Au ne gidee bolo dangada o Cushan gu hai ngadaa;
gai dangada o Midian gu maatagu.
8 Tagi Maolunga, koe ne lili laa i denga leevaa?
Koe ne lili laa i denga saalingaa vai?
Koe ne uluhia ange laa gi tai,
i de masavaa oou ne savini ai i honga au hoosa,
ma honga oo hada ne kii ai?
9Koe gu dada mai dau mee hholu,
koe ne hagahi mai denga dao lagolago o dau mee hholu.#3.9 Muna Hebrew i kinei e dee iloo danuaa dono hagadoonunga. Selah
Koe ne hangahanga henua i lalo i denga saalingaa vai;
10denga mounga ne bolebole i delaadeu gidee goe.
Denga vai gu ssali iho;
de moana gelo gu hagangolo
gai ono beau gu kona de nnui.
11De laa ma de maasina gu tuu donu huu i lo te langi
i de tili dao malamalama o dau mee hholu,
ma de maalama o dau dao malamalama.
12Koe ne seesee i henua i lalo alodahi i doo bole,
gai koe ne dagadagahi denga huaahenua i doo lili.
13Koe se humai e hagaola oo dangada,
ma de hagamouli de ia aau gu hagadabu i de lolo.
Koe ne hagabalaginagina tagi o de henua baubau,
gai ne aau malo mai i dono biho ga dae iho ai gi dono bido i lalo.#3.13 Koe ne hagabalaginagina … bido i lalo: muna Hebrew i kinei e dee iloo danuaa dono hagadoonunga. Selah
14Koe ne hai ono dao ga velo ai dono biho,
i de masavaa a ono daane hebagi ne loomai ai
e hagamavaevae saele gimaadeu bei dagodo o ssio;
gilaadeu ne malangilangi i de vaivai hai
de gau hagaau aloha gu mmuni laa.
15Koe ne hai au hoosa gi dagadagahia honga tai,
gi beabeau ai honga denga tai mmahi laa.
16Au ne langona mee nei, gai dogu angaanga gu bolebole,
luoogu malaungudu gu bolebole hogi i dagu longo mee nei;
ogu ivi gu daamada de pobo,
gai luoogu vae gu pole.
Aagai au e noho naa ga tali de masavaa o de hai ngadaa
e humai ai gi honga o dangada gu hebagi mai gi gimaadeu.
17Gai e dee galemu naa donu teai huaala o de fig,
gai gu deai hogi grape i denga grapevine,
gai e dee galemu naa donu teai hua o de olive,
ma teai gai e ssomo i honga denga veelenga,
gai e dee galemu naa donu teai ssiibi i lodo buibui manu,
ma teai kaau i lodo buibui e dugu ai manu,
18aagai au e malangilangi donu i hiidinga o Tagi Maolunga,
au e lodo danuaa naa donu i de Maadua, dogu Ia Hagaola.
19De Ia Aamua go Iahweh go ogu mahi;
ia e hai luoogu vae gi bei luu vae o dahi dia,
ia e hai gi maua e au i de seesee i honga mommee maolunga.
Ange gi tagi o taahili. Gai e hua madali mee hagadangidangi iai daula.#2 Sa 22.34; Psa 18.33
© 2022, Wycliffe Bible Translators, Inc. All rights reserved.