Ecclesiastes 7
7
De heiangi ma de lodo senga
1De ingoo hagadeledele danuaa
e danuaa ange i mee hagamanongi danuaa,
gai de laangi o tangada e magau ai
e danuaa ange i dono laangi ne haanau ai.#Pro 22.1
2E danuaa ange doo hano gi de hale o de hinangalosaa
i doo hano gi de hale e hai ai taonga,
go hiidinga de magau go de hagaodi o dangada alodahi;
gai dangada e mouli gi daohia de mee nei i de lodo.
3De hinangalosaa e danuaa ange i de gadagada,
go hiidinga doo lodo baubau e hai ga heiangi oo lodo.
4De gau heiangi e maanadu de mommee o de magau,
aagai de gau llodo ssenga e maanadu de mommee hagamalangilangi.
5E danuaa ange dau hagallongo de hagasee a tangada heiangi goe,
i dau hagallongo taahili a de gau llodo ssenga.
6De kada o de gau llodo ssenga
e bei de babaa o denga laagau iai mee duiduia i lo te ahi.
De mee nei e deai hogi ono haigamaiana.
7De gaiaa o tangada heiangi e hai ia ga se dangada lodo senga,
gai de ngadi gaavange hagasenga e hai ga hakino gee maanadu a tangada.
8De hagaodi o dahi mee e danuaa ange i dono daamada,
de golomagi lodo e danuaa ange i de lodo maolunga.
9Koe gi dee moolau doo lili;
go hiidinga de lili e dagodo i lodo o tangada lodo senga.#Jms 1.19
10Koe gi dee hagadaba, “Gu aha gu danuaa ange ai laa denga laangi i mua i laangi nei?”
Go hiidinga e dee ni muna ssili mai i de iloo mee.
11De heiangi se mee danuaa, e bei ai hogi de boolonga o tangada,
gai se mee haigamaiana ange gi dangada goi gidee de laa.
12De heiangi se buibui niio tangada,
gai e bei ai hogi denga sseene,
aagai deenei de haigamaiana o de iloo mee:
de heiangi e hagaola de mouli o tangada e heiangi laa.
13Hagasaelea age muhuu dagodo hegau a de Maadua gu hai:
goai e maua i de hagasoe de mee aana gu hai gi bigo?
14Malangilangi i de masavaa oou e duadonu ai,
aagai koe gi donu iho i de masavaa o de hai ngadaa:
go de Maadua ne haia luu mee nei ngaadahi.
Deelaa ai, tangada e dee maua gi iloo dagodo o dono mouli i de masavaa e humai.
15Dogu noho i de mouli deai nei ono haigamaiana,
gai au gu gidee luu mee nei ngaadahi:
tangada heohi e magau gai ia e hai hegau i de heohi,
gai tangada baubau e daulooloa dono mouli gai ia e hai de baubau.
16Koe gi dee gona odi doo heohi, aabe gi haia gi gona odi doo iloo mee —
gu aha goe gu daa ai donu huu goe gi magau?
17Koe gi dee gona odi doo baubau, gai gi dee se dangada lodo senga —
gu aha gu magau ai goe i mua doo masavaa?
18E danuaa dau daohi dahi mee nei, aagai e dee tili de mee ange laa;
go hiidinga tangada e madagu i de Maadua e maua i de hai mee nei alodahi.
19De heiangi e hai tangada heiangi gi mmahi ange
i e dinoangahulu dagi o dahi aduhale.
20Ni muna abodonu, e deai donu se dangada heohi i henua i lalo
e haia de mee heohi e dee haisala.
21Koe gi dee anga ange gi muna alodahi a dangada e tala,
kana langona e goe muna a doo dangada hai hegau e basa hagamalaia i de goe;
22gai koe e iloo bolo gu lagolago hanonga
aau ne basa hagamalaia ai i de gau ange laa.
23Mee nei alodahi gu lava i dagu hagatale ange i dogu heiangi; gai au ne hagadaba,
“Au ne hagaduu ngae e hai gi heiangi au,” —
aagai au tee maua.
24De heiangi e mmao gee donu,
e gelo ma de gelo mmao;
gai goai e maua i de ssala gi gidee?
25Au ne hagammahi gi donu ange au,
ma de ssala gi maua de heiangi ma ono dagodo,
ma de hai gi donu ange au gi de baubau o de lodo senga
ma de lodo senga e haia laa ga senga tangada.
26Gai au gu gidee de mee e kii ange de mmala i de magau:
go de hine e bei laa dagodo o ssele ma galauna,
gai luoono lima e bei denga seeini.
Gai tangada e madagu i de Maadua e ola mai naa i ono daha,
aagai tangada haisala e noodia naa i ssele laa.
27E hagadaba Tangada Agoago, “Tilo, deenei dagu mee gu gide.
Au ne hagabunibuni agu mee ne gidee
gi donu ange ai au gi dagodo o mee nei —
28de masavaa aagu ne ssala ai,
gai au tigi gidee donu —
gai au ne gidee dahi daane heohi i magavaa o e mano daane,
aagai teai donu se hine heohi i olaadeu magavaa alodahi.
29Tilo, deenei dagu mee ne gidee:
de Maadua ne hai dangada gi heohi,
aagai dangada e ssala denga hagadaagangaa hagatau.”
© 2022, Wycliffe Bible Translators, Inc. All rights reserved.