Ecclesiastes 2
2
De hai oo mee e lodo ai e deai ono haigamaiana
1Au ne hagadaba i ogu lodo, “Humai, au ga hagatale nei goe i denga mee hagamalangilangi e tilo ai be se aha e danuaa.” Aagai tilo, de mee nei e deai hogi ono haigamaiana. 2Au ne hagadaba, “De gadagada o tangada se lodo senga donu, gai se aha naa donu e kii ange ai?” 3Au ne maanadu hogi de hai gi malangilangi au i de unu uvaini ma de hagatale de hai hegau i de lodo senga — gai agu hagasaele goi dagi donu huu au i de heiangi. Au ne lodo e tilo be se aha e haigamaiana de hai a dangada i henua i lalo, i laangi sogoisi olaadeu e mouli ai.
4Au ne hai denga hegau nnui: au ne hagatuu ogu hale, ma de doo agu veelengaa grape.#1 Ki 10.23-27; 2 Ch 9.22-27 5Au ne hai denga veelenga ma mommee hagadaahao ga doo ai denga hagadaagangaa manu ssomo iai hua. 6Au ne hai denga mommee hhao vai e hagamaluulu ai denga manu ssomo lagolago. 7Au ne hagao denga daane ma haahine hai hegau, gai ne soa dangada hai hegau ne haanau i dogu hale. Agu kaau ma agu ssiibi ma guudi e lagolago ange i manu a dangada nogo nnoho i Jerusalem i mua.#1 Ki 4.23 8Au ne hagabudu hogi denga selevaa ma goolo lagolago, ma goloa hagamogomogo o denga hodooligi ma denga vaaenga. E hanu hogi ogu daane ma haahine daahili, ma ogu bodu laa daha, go mee o taane e lodo ai.#1 Ki 10.10, 14-22 9Gai au ne hagadagadaga age ma de maolunga ange i gilaadeu nogo i Jerusalem i mua. Gai dogu heiangi goi dagodo donu huu.#1 Ch 29.25
10Au ne hai mee alodahi aagu ne gidee ma de lodo ai;
Teai donu se mee oogu ne lodo ai aagu tee hai.
Gai au ne malangilangi i hegau alodahi aagu ne hai,
deenei de hagaoanga o agu hegau alodahi ne hai.
11Gai ga noho huu au ga tilo mee alodahi aagu ne hai
ma mee alodahi aagu ne hai hegau ange aagena,
gai tilo, mee alodahi e deai donu olaadeu haigamaiana,
gai e bei de ngadi doolohi a tangada de madangi;
e deai donu haigamaiana o mee i lalo de laa.
De heiangi e deai ono haigamaiana
12Gai au ne maanadu dagodo o de heiangi
ma de senga aama de lodo senga.
Ni aha ange naa donu a tangada e gaavee tuulanga o de hodooligi
e maua i de hai gi kii ange i mee gu lava i de hai?
13Au gu gidee bolo de heiangi e danuaa ange i de lodo senga,
gai e bei ai hogi, de maalama e danuaa ange i de gohu.
14Tangada heiangi e hanu ono ganomada e tilo ai,
gai tangada lodo senga e seesee i lo te gohu;
aagai au gu donu ange bolo gilaau ngaadahi
e tuu ange naa gi de mee daudahi.
15Gai au ne maanadu i ogu lodo,
“De mee e duu ange gi tangada lodo senga
e duu mai naa hogi gi de au.
Gai ni aha ai naa aagu e mau i dogu heiangi?”
Au e hagadaba i ogu lodo,
“E deai hogi haigamaiana o de mee nei.”
16Tangada heiangi e bei naa hogi dagodo o tangada lodo senga,
e dee daulooloa naa donu de hagamanadua dangada ia;
dangada e ngalo naa gilaau ngaadahi i muli mai.
Tangada heiangi e magau naa hogi bei tangada lodo senga!
De hai hegau e deai ono haigamaiana
17Au ne kino i de mouli nei, go hiidinga hegau alodahi e hai i lalo de laa e hagadaemaha mai gi de au. Mee alodahi e deai donu olaadeu haigamaiana, gai e bei de ngadi doolohi a tangada de madangi. 18Au ne kino i mee alodahi oogu gu hai hegau aagena i lalo de laa, go hiidinga au e dugu ange naa mee alodahi gi dahi dangada i ogu dua. 19Gai goai e iloo be ia se dangada heiangi, aabe se dangada lodo senga? Aagai go ia naa e huahua i mee alodahi aagu ne hagaduu ngae ga hai hegau ange aagena i ogu mahi aama dogu labagau i lalo de laa. De mee nei e deai hogi ono haigamaiana. 20Au ne mmade ange hogi ogu aalanga i dagu maanadu agu hegau alodahi ne hagaduu ngae ga hai i lalo de laa. 21Tangada e hai hegau laa i de heiangi ma de iloo mee, aama dono labagau, gai ia e dugu ange naa ana mee alodahi gi tangada tee hagadalea ange laa aagena. De mee nei e deai hogi ono haigamaiana gai e dee se mee danuaa. 22Gai se aha a tangada e mau i dono hagaduu ngae ga hai hegau i lalo de laa? 23Taulooloa ono laangi e mouli, gai ia e mmae ma de daemaha ono lodo; ono lodo e dee maua hogi gi mabu i de boo. De mee nei e deai hogi ono haigamaiana.#Job 5.7; 14.1
24Gai e deai ange donu se mee e danuaa ange gi tangada, gai go de gaimee ga unu ma de malangilangi i ana hegau. Au ne gidee hogi bolo de mee nei se mee mai i daho de Maadua,#Ecc 3.13; 5.18; 9.7; Luke 12.19; 1 Co 15.32 25gai e deai donu se dangada e maua i de gaimee ga malangilangi noo e dee dugu mai i ono daha. 26Gai de Maadua e gaavange gi tangada e hagamalangilangi ina ia de heiangi, ma de iloo mee aama de malangilangi; aagai ia e hai tangada haisala gi hagabudulia ma de doange dono lava, e gaavange gi tangada e haia mee o de Maadua e lodo ai. De mee nei e deai hogi ono haigamaiana, gai e bei de ngadi doolohi a tangada de madangi.#Job 32.8; Pro 2.6
© 2022, Wycliffe Bible Translators, Inc. All rights reserved.