2 Thessalonians 1
1
De hagaboo
1Mai i daho Paul, ma Silvanus, aama Timothy.
Ange gi de nohoanga dabu o de gau Thessalonica, i lodo o de Maadua taadeu Damana aama Tagi Maolunga go Iesu Klisdo.#Acts 17.1
2De abodonu ma de baba mai i daho de Maadua Tamana aama Tagi Maolunga go Iesu Klisdo gi dagodo i oodou daha.
De hagamodu muna i de humai o Iesu Klisdo
3Denga daina, e heohi donu demaadeu hagaahe ange de abodonu gi de Maadua i oodou hiidinga i masavaa alodahi, go hiidinga oodou kai gu kona mmao de hagadagadaga age, gai doodou hagadau aaloha gu kii ange hogi de laumalie. 4Deenei ai, gimaadeu e tala tuhi oodou dagodo i denga nohoanga dabu o de Maadua ange laa, i hiidinga doodou llodo mmahi ma doodou kai i de masavaa oodou ne vaivai haia ai, aama de hagauda denga hagaduasala alodahi i de golomagi lodo.
5Gai mee nei e hagaago danuaa mai de hagamodu heohi a de Maadua, gai e hai gi heohi ange goodou gi de ulu i de nohoanga hodooligi o de Maadua, gai de mee nei ne hai ga vaivai haia goodou. 6Gai de Maadua e heohi donu, i dana sui ange hegau a dangada e vaivai haia goodou, 7ma de hagamaamaane oodou lodo i doodou vaivai haia aama gimaadeu hogi, i de laangi o Tagi Maolunga go Iesu e hagasula mai ai i de langi, madali ono dangada de langi mmahi, 8ma de ahi ula, ga hagaduasala gilaadeu e dee iloo de Maadua, ma dangada e dee daudali i de longo danuaa o taadeu Dagi Maolunga go Iesu. 9Gai gilaadeu e hagaduasala donu i de hagaduasala e dee ngado mai, ma de tili gee mai i mada luu mada o Tagi Maolunga ma de mahamaha o dono sauaa mmahi,#Isa 2.10 10i dono masavaa e humai ai i de laangi laa, e hagamahamaha i daho ono dangada dabu, gai gilaadeu alodahi gu hagadonusia e llele naa olaadeu mouli i de ia. Goodou e dau hogi madali gilaadeu, i hiidinga goodou ne hagadonusia amaadeu muna gu tala hagadonu adu gi goodou.
11Deenei ai, gimaadeu e dalodalo i goodou i masavaa alodahi, gai de Maadua ga hai ai gi heohi ange goodou gi de kave dana hagahi, ma de hagammahi goodou gi haia tanuaa aama hegau alodahi o de gai i dono sauaa, 12gai gi hagamahamaha ai de ingoo o taadeu Dagi Maolunga go Iesu i oodou mouli, gai goodou gu hagamahamaha i ono daha, i de abodonu o taadeu Maadua ma Tagi Maolunga go Iesu Klisdo.
© 2022, Wycliffe Bible Translators, Inc. All rights reserved.