Aba Vatowo 9
9
Yaubada Nowa ikanasiuko tetelina
1E Yaubada Nowa ma natunao ikaipakuyedi idigo kana,
‘Komi kosusāila gagaina bei tubumiyao taiyao poyapoya kovakayaodei.#Aba Vatowo 1:28. 2Kaga liliuna maa yawoidi poyapoya ame goi, mánuwo liliudi, kaga liliuna sidaladala poyapoya goi be iyaíyana liliudi négwasa goi bei simatoitemi gagaina go, nimami goi ayatoidi komi imi kaba lovina. 3Kaga liliuna maa yawoidi avinimi avami. Nakae boi pai avinimi avami, e nakae ame tuta kaga liliuna avinimi avami. 4Go íwaya ma ikaikaidi taabu kookanīdi! Ikaikayana moe yáwana unana.#Vininabeso 7:26-27, 17:10-14, 19:26; Atukeda 12:16,23, 15:23; Guinuwa 15:20,29. 5Avatau neta tomota tayamo yawoina ikupo, Yau moitamo bei akatumapu. Yoguyogu nakae, neta tomota yawoina ikupo, bei akatumapu. Tokaumata tamo tamo bei akatumapudi.
6Tomota aodugudi Yau Yaubada guna tapata,#Tateta 20:13.
tauna avatau neta tomota yawoina ikupo,
e itoboine bei tokaumatayana nakae yawoina sikupo.#Aba Vatowo 1:26.
7E komi sem kosusāila gagaina bei tubumiyao taiyao poyapoya ana madabokina kovakayaodei.’#Aba Vatowo 1:28.
8Tuwaina Yaubada kana,
9‘Konōve. Yau komi be tubumiyao be nakae kaga liliuna maa yawoidi akanasiukoimi. 10Moe mánuwo liliudi, yoguyogu liliudi poyapoya goi sikaaiyaka be nakae dedeoga goi komi taiyao kosou. 11Akanasiukoimi ame nakae: Mluwa goi kaga liliuna maa yawoidi geya asamatemneidita. Nakae mluwa goi poyapoya geya abugoyaimneiyeta.’
12Tuwaina Yaubada kana,
‘Guna kanasiunayana bei ikaiyako vata komi be tubumiyao be nakae kaga liliuna maa yawoidi yaimi go, ana kaba kinana avinimi. 13Aba kinanayana ame nakae: Guna kíyala gaota goi bogina ayato. Moe aba kinana komi be kaga liliuna maa yawoidi poyapoya goi bogina akanasiukoimi. 14Tuta tamo tamo gaota yábana goi akaiwoduwedi go, kiyalayana nakae gaota goi isowóduwo, 15e guna kanasíuna komi be nakae kaga liliuna maa yawoidi yaimi goi bei anuwokavate. Tauna geya tayaamo tuta tuwaina bei mluwa gagaina idau be nakae mluwa goi kaga liliuna maa yawoidi asamatedi. 16Tauna tutayana kíyala gaota goi isowóduwo, bei agite, e ida kanasíuna vaatayaina anuwokavate Yau Yaubada, komi be kaga liliuna maa yawoidi yaida.’
Tuwaina Yaubada kana,
17‘Ame aba kinanayana goi tayagoi komi be kaga liliuna maa yawoidi poyapoya ana madabokina goi Yau taiyao bogina takanasíuna.’
Nowa ma paawakuna tetelina
18E Nowa natunao koroto dedeoga goi sisou moe Semi, Em, Diyepeta. Em natuna koroto yoina Kenani. 19Ame tauyadi adi taito moe Nowa natunaoyadi go, tauyadi yaidi nava tomota liliudi bei sisowóduwo, e poyapoya ana madabokina goi sisapa.
20E Nowa tobágula tayamo go, oine buyalina igimibaguli. Niga oine keuwoina sisina ikabi, oine bwaena iwodugu. 21E tuta tayamo oineyana inim ginagina, iyaluwo. Go ina yaluwoyana goi ana kwama ivalilivi, e ma paawakuna ina yoyou parai goi imasisi. 22Niga Kenani tamana Em ima yoyouyana goi isiu tamana igite#9:22 Tamana igite: Neta gómana tamana ma paawakuna igite, e tamana ona imayamaya gagaina. Tauna Em ina guinuwayana iguinuwe moe goyogoyoina toina. Ana kaigigita gomanayana tamana geya itaimamineyeta. ma paawakuna go, geya ivatanigoeta, go sem isowóduwo ina moetala goi senao ilatuwokoidi. 23Ago kidi Semi be Diyepeta tanigo sikabi, sina yoyouyana goi sisiu go, sidumasiyasiya, unana tamadi ma pawakuna. Geya vavagidi tamadiyana sigite. E tanigoyana valavadi goi siyoisi, e mlidi goi sivamnamnae tamadi sivatum.
24Tutayana Nowa itáoya natuna Em ina guinuwa inove, tuwo gamona igoyo. 25Tauna Em natuna Kenani ikatubolate, e Yaubada yaina ikawanoi idigo kana,
‘Kenani kuvayōko kina senao idi pákwana go,
paakonidi liliudi yaidi goi tauyana bei sobuyekoidi.’
26Aiyuwoina kana,
‘Yauwe, kom Semi ina Yaubada yaim isakululu,
e kayapaliyem.
Kenani kuvayōko kina Semi ina pákwana.
27Diyepeta ina poyapoya kom Yaubada kukidedēde
bei ana dedevina ibabane.
Diyepetayana be Semi kutagonēdi
madi tuboina taiyao sikaaiyaka.
Go Kenani kuvayōko kina Diyepeta ina pákwana.’
28E mluwa mlina goi Nowa tala ana badabada 350 tuwaina ikaaiyaka. 29Tauna tauyana yawoina ana madabokina moe tala ana badabada 950, e ikámasa.
S'ha seleccionat:
Aba Vatowo 9: GVS
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.