1 Corintios 8
8
Je̱'e̱ tzu'uch ju̶kxy je̱'e̱ mu̶dyiibu̶ je̱'e̱ tzaadzéch kepychech yajwindzu̶gu̶u̶ygyu̶xypyu̶ñ
1Jada'achám je̱' u̶u̶ch yam nimu̶dya'age̱e̱mby je̱'e̱ tzu'uch mu̶dyiibu̶ je̱'e̱ ja'ay tzaadzéch kepychech yajwindzu̶gu̶u̶ygyu̶xypyu̶ñ. Tu̶y'ajt neby yajmu̶na'añu̶ñ: Ko ku̶xyu̶ wa'adzu̶ je̱'e̱ tu̶y'ajt nnejwu̶u̶yu̶m ajku̶xy; peru̶ je̱' mu̶j ku̶xp xyajnayjyu̶wu̶u̶yu̶mb ajku̶xy ko je̱'e̱ tu̶y'ajt ku̶xyu̶ wa'adzu̶ nnejwu̶u̶yu̶m ajku̶xy, y je̱'e̱ tzojku̶ñ ju̶wu̶u̶yu̶ñ je̱' je̱'e̱ nmu̶bu̶jku̶ñ ni'igyu̶ xyjyak'yajmu̶j xyjyak'yajmayu̶u̶yu̶py ajtu̶m ajku̶xy. 2Pu̶nu̶ jii pu̶n myu̶na'añ ko oy tii jaty, ka'p je̱'e̱ tii jatyñu̶ neby it jya'apadyii jádu̶chu̶ñ. 3Peru̶ pu̶nu̶ jii je̱'e̱ Dios pu̶n tzoky ju̶wu̶'u̶y, ixy'ajtu̶p Dios je̱' pu̶n je̱'e̱ju̶ñ.
4Peru̶ pu̶nu̶ mu̶baad ndzu'tzu̶m o pu̶nu̶ ka'p, je̱'e̱ tzu'uch mu̶dyiibu̶ je̱'e̱ ja'ay tzaadzéch kepychech tu̶ yajwindzu̶gu̶u̶ygyu̶xyu̶ñ, oy wa'adz nnejwu̶u̶yu̶m ajku̶xy ko je̱'e̱ tzaadzéch kepychech jugy'ajt ka'p nidu'uñdyu̶ mu̶u̶du̶ch ya naaxwiiñ, y ko tu'ug je̱'e̱ Dios je'eyu̶. 5Oy je̱'e̱ ja'ay ja'adios'ajtku̶xy je̱'e̱ mu̶dyiibu̶ jiiby tzajpjooty y ya naaxwiiñ yajpaatku̶xpu̶ñ, (y may je̱'e̱ du'umbu̶ dios y je̱'e̱ du'umbu̶ windzú̶n), 6mu̶u̶d u̶u̶ch ajtu̶m ajku̶xy tu'ug je̱'e̱ Dios je'eyu̶ y ka'p myáyu̶ch, je̱'e̱ Dios Teedy, je̱'e̱ mu̶dyiibu̶ ku̶xyu̶ tii tu̶ yajtzonda'agyu̶ñ y je̱'e̱ mu̶dyiibu̶ xyajtzu̶naay xyajjugy'ajtu̶mbu̶ñ ajku̶xy. Y nan tu'ug je̱'e̱ Windzú̶n je'eyu̶, je̱'e̱ Jesucristo, je̱'e̱ mu̶dyiibu̶ ku̶xyu̶ tu̶ yajkojyu̶ñ je̱'e̱ mu̶dyiibu̶ jii'ajtpu̶ñ, y je̱'e̱ mu̶dyiibu̶ ku̶'u̶m tu̶ xyajkoju̶mu̶ñ ajku̶xy ko njii'ajtu̶mu̶ch ajku̶xy.
7Peru̶ ka'p je̱'e̱ mu̶bu̶jkpu̶du̶jk adayaaba tu̶y'ajt nigu̶xyu̶ nejwu̶u̶ygyu̶xy, du'un je̱'e̱ myu̶naangu̶xy ko je̱'e̱ tzaadzéch kepychech jyuugyu̶ch. Nije̱'e̱játy je̱'e̱ mu̶dyiibu̶ najty je̱'e̱ tzaadzéch kepychech je'emy o'owu̶dajtku̶xpu̶ñ, chamnu̶baad chu'tzku̶xypy jyú̶kxku̶xypyñu̶ je̱'e̱ ju̶kxy pu̶ky je̱'e̱ mu̶dyiibu̶ je̱'e̱ tzaadzéch kepychech tu̶ yajwindzu̶gu̶u̶ygyu̶xyu̶ñ, myu̶naangu̶xy ko jyuugyu̶ch je̱'e̱ mu̶dyiibu̶ dyios'ajtku̶xypyu̶ñ; y ko je̱'e̱ du'umbu̶ tzu'uch oktzu'tz okjú̶kxku̶xy chi ñi'idzu̶gu̶u̶ygyóttu̶gu̶xy myu̶naangu̶xy ko du'un tu̶ tyuundu̶gooygyu̶xy, je̱' ko ka'p je̱'e̱ y'aa jyoot myú̶ku̶ch ajku̶xy. 8Tu̶y'ajt, ko ka'p je̱'e̱ Dios mu̶'it xykyu'ubu̶jku̶mu̶ch ajku̶xy ko tii ndzu'tz njú̶kxu̶mu̶ch o ko tii nga'atzu'tz nga'ajú̶kxu̶mu̶ch ajku̶xy; je̱' ko ka'p mu̶'it ni'igyu̶ n'oybyu̶dzu̶u̶mu̶mu̶ch ajku̶xy ko tii ndzu'tz njú̶kxu̶mu̶ch ajku̶xy, y ni ka'p mu̶'it nga'a'oybyu̶dzu̶u̶mu̶mu̶ch ajku̶xy ko tii nga'atzu'tz nga'ajú̶kxu̶mu̶ch ajku̶xy. 9Oy je̱'e̱ du'un kya'anejpyu̶ch ko tii mdzu'tzku̶x mjú̶kxku̶xu̶ch, peru̶ ni'igu̶ oy ko ka'p tii mdzu'tzku̶x mjú̶kxku̶xu̶ch ka'pu̶ je̱'e̱ mmu̶gu'ug myajtuundu̶gooygyu̶xu̶ch je̱'e̱ mu̶dyiibu̶ je̱'e̱ myu̶bu̶jku̶ñ we̱e̱nu̶ ajku̶xyu̶ñ. 10Tzu̶k okmu̶naanu̶m, pu̶nu̶ mnejwu̶u̶by miich adaa du'umbu̶ ko du'un ka'p ñejpyu̶ch ko je̱'e̱ du'umbu̶ tzu'uch mdzu'udzu̶ch mjú̶kxu̶ch y mnaaxwe̱e̱dzu̶ch kaaybyu̶ ma je̱'e̱ tzaadzéch kepychech jiiby y'ijtku̶xyu̶ñ, y xy'íxu̶ch je̱'e̱ mmu̶gu'ug jiiby tu'ug je̱'e̱ mu̶dyiibu̶ je̱'e̱ myu̶bu̶jku̶ñ we̱e̱nu̶ju̶ñ, je̱' tzojku̶ je̱'e̱ nandu'un kaaybyu̶ ñaxwé̱tzpu̶ch y tzu'udzu̶ch jú̶kxu̶ch je̱'e̱ yojxu̶ñ je̱'e̱ mu̶dyiibu̶ je̱'e̱ ja'ay tzaadzéch kepychech tu̶ yajwindzu̶gu̶u̶ygyu̶xyu̶ñ. 11Y miich je̱' ko mnejwu̶u̶by je̱'e̱ tu̶y'ajt y mwingay mwin'uugu̶'u̶yu̶tz je̱'e̱ mmu̶gu'ug je̱'e̱ mu̶dyiibu̶ je̱'e̱ myu̶bu̶jku̶ñ we̱e̱nu̶ju̶ñ, miich naty je̱'e̱ mmu̶gu'ug du'un myajtuundu̶gooby, je̱'e̱ mu̶dyiibu̶ je̱'e̱ Cristo nandu'un kyu'u'o'ogu̶u̶yu̶ñ. 12Ko je̱'e̱ mmu̶gu'ugtu̶jk du'un myajjoottu̶gooy myajwinma'añdyu̶gooygyu̶xy je̱'e̱ mu̶dyiibu̶ je̱'e̱ myu̶bu̶jku̶ñ we̱e̱nu̶ju̶ñ ajku̶xy, je̱'e̱ Cristo miich naty du'un ku̶'u̶m mmu̶duundu̶gooygyu̶xypy. 13Paady, pu̶nu̶ nyajtuundu̶gooybyu̶ch je̱'e̱ nmu̶gu'ug du'un mu̶u̶d je̱'e̱ mu̶dyiibu̶ u̶u̶ch ndzu'chpy nju̶kxypyu̶ñ je̱'e̱ mu̶dyiibu̶ je̱'e̱ ja'ay tzaadzéch kepychech yajwindzu̶gu̶u̶ygyu̶xypyu̶ñ, ni'igu̶ oy ko u̶u̶ch je̱'e̱ du'umbu̶ tzu'uch ka'p nimu̶naa ndzu'udzu̶ch njú̶kxu̶ch, ka'pu̶ u̶u̶ch je̱'e̱ nmu̶gu'ug du'un nyajtuundu̶góyu̶ch.
S'ha seleccionat:
1 Corintios 8: MIXE
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005