मर्कुस 8
8
येशुइ हाजार सीः मीःक्याला साःच्युक्योक
(मत्ती १५:३२-३९)
1चीङ ङीःमा तीङ्ला फीर्च्याङ मीःइ छ्योम्बो पोर्चोम जोम्दी एःके। खुङक्या ङीमु साःगेन स्याःक्या चीङ म्याःके ओः सोङ्गारा, येशुइ योबाक्याला केक्याःप्ती लाःसी, 2“दी मीःक्याला ङाः नीङ च्योःगे, चीलेलाःना दीखुङक्या ङाः ङीमु तेःक्योक ङीःमा सुम काःल्सी ओःले खुङक्या ङीमु साःजेला चीङ म्याः। 3ओःले ङाःइ दीखुङक्याला तोःपा तोबारा ताङ्सी लाःना नी खुङक्या लाःमला लेम्बा ब्वागे ओःङेन एः चीलेलाःना मेःराङ काःजेदी माःङ्बुरा थारीःङ्बुले ओःङ्दी एः।” 4योबाक्याइ खुङला टीःसी, “दी उजाड ठाउँला एःजेइ मीःक्याला साःजे तेर्चेला साःप्च्या काःलाःम्ले ख्योङेन्दी?” 5येशुइ टीःसी, “ख्योक्या ङीमु काःजे थाल खुरा एःपा?” खुङक्याइ लाःसी, “ङीः ङीमु नी तीःनथाल खुरा एः।”
6ओःले येशुइ मीःक्याला थाङला तेःच्युसी। ओः तीङ्ला येशुइ ओः तीःनथाल खुरा लेःङ्दी कोन्ज्योला थुजीछे तेर्सी ओःले खुरा च्यादी मीःक्याला केःतेर लाःती योबाक्याला तेर्सी, ओःले खुङक्याइ मीःक्याला केःतेर्सी। 7खुङक्या ङीमु तीबी चीग ङ्याक्याङ एःके। येशुइ ङ्याःइ लागीङ कोन्ज्योला थुजीछे तेर्सी ओःले योबाक्याला केःच्युसी। 8थाम्जेरकीइ डाङेनथुप साःसी ओःले योबाक्याइ ल्हाक्योक पुःजुपक्या तुःगासुना पती तीःन काःल्सी। 9ओःला साःगेन मीःक्या हाजार सीःजे एःके। ओःले येशुइ ओः मीःक्याला ताङ्तेर्सी। 10ओःले खुङ ओः तेःकासुरा योबाक्या ङीमु टुःला जादी दलमनुथाइ क्षेत्रला काःल्सी।
फारीसीक्याइ चुःन्डुल लाङ्क्योक
(मत्ती १६:१-४)
11फारीसीक्या येशु साःला ओःङ्दी टाःटे पेःगाला स्युःसी। खुङक्याइ येशुला जाँच लेःङ्जेला नाःम्खालीङलाःम्ले ओःङेन चुःन्डुल चीग लाङ्सी। 12दीखो कोःदी येशुइ रीःङ्बु उ स्याङ्दी लाःसी, “दाङ तीःरीङगीइ दी मीःक्याइ चीले चुःन्डुल लाङ्गुबा? तेःन्दामरा ङाः ख्याक्याला लाःके, एःन्डुबा मीःक्याइ काःन्दीङ चुःन्डुल थोङ्जे मेःज्योर्केन एः।” 13ओःजे लाःती येशुइ खुङक्याला ओःलारा पोःर्ती टुःला जादी छोइ फार्केनछ्योले काःल्सी।
फारीसीक्या रा हेरोदकीइ खमीर
(मत्ती १६:५-१२)
14योबाक्याइ खुङक्या ङीमु खुरा खुर्चे टेःम्बा चेःतु, ओःले टुःला खुङक्या ङीमु चीग्रा चीग खुरा एःके। 15ओःले येशुइ खुङक्याला चेताउनी तेर्तेरा लाःसी, “ख्याक्या फारीसीक्या ओःले क्याःल्बु हेरोदकीइ खुरा फोर्च्युगेन खमीरलाःम्ले च्यागाताःक्पु पेःदी तेः।” 16उः ङीमु खुरा म्याःकारा एःन्डु लाःक्योक इःम्बा की लाःती योबाक्याइ चीगकीइ राःङ्सा ङीमु ताम लाःकाला स्युःसी। 17येशुइ दी ताम छोर्कारा खुङक्याला लाःसी, “ख्योक्या ङीमु खुरा म्याः लाःती चीले ख्योक्या ताम लाःकुबा? ची ख्योक्याइ ताःरुङ मेःथोङ्बा ओःले मेसेबा? ख्योक्याइ सेम चीले ताःरुङ ताःम्बु पेःक्योक? 18ख्योक्याइ मी एःतीङ मेःथोङ्बा? ओःले नाम्ज्यो एःतीङ मेःकोबा? ची ख्योक्याला टेःम्बा म्याःपा, 19ङाःइ ङाथाल खुरा च्यादी हाजार ङा मीःक्याला साःच्युगासुना ख्योक्याइ ल्हाक्योक खुराइ पुःजुपक्या पती काःजे तुःबा?” खुङक्याइ लाःसी, “पती चीङ्ङी” 20येशुइ फीर्च्या टीःसी, “ओःले ङाःइ तीःनथाल खुरा च्यादी हाजार सीः मीःक्याला साःच्युगासुना ख्योक्याइ ल्हाक्योक खुराइ पुःजुप पती काःजे तुःबा?” खुङक्याइ लाःसी, “पती तीःन।” 21येशुइ खुङक्याला टीःसी, “ओःले ख्योक्याइ ताःरुङ सेदी म्याःपा?”
येशुइ मी मेःथेङेन मीःला टाःच्युक्योक
22येशु योबाक्या ङीमु बेथसेदाला ओःङ्सी, ओःले ओःला मीःक्याइ मेःराङ चीग मी मेःथोङेन मीःला येशु साःला ख्योङ्सी ओःले ओःखोला देतेर लाःती वासी पेःसी। 23येशुइ ओः मी मेःथोङेन मीःइ लाःक्पा जुम्दी युःललाःम्ले पाङ्ला ख्योङ्सी। येशुइ ओःखोइ मीला छेमाक क्युर्सी ओःले खुङखाला लाःक्पा ज्यादी टीःसी, “ख्योइ चीङ थोङ्खुबा?” 24ओः मीःइ याःरला तादी लाःसी, “ङाःइ मीःक्याला थोङ्सी इःनाङ खुङक्या नी डोदेरा पेःक्योक तोःङ्बोक्या च्योःङ्रा थोङ्गुए।” 25येशुइ फीर्च्या ओःखोइ मीला राःङगीइ लाःक्पाइ देसी। ओःले ओः मीःइ याःबु पेःदी तासी ओःले खुङगीइ मी थोङ्सी, ओःले खुङगीइ थाम्जेर साङ्बुले थोङ्सी। 26ओः तीङ्ला येशुइ खुङला एःन्डु लाःती ताङ्सी, “दी युःलला स्युःरा माःस्युःबा सरासर खीमला सुङ।”
येशु सु इःम्बा?
(मत्ती १६:१३-२०; लुका ९:१८-२१)
27ओः तीङ्ला येशु योबाक्या ङीमु कैसरीया फीलीप्पी क्याःसाइ छुरफारला एःक्योक युःलक्याला काःल्सी। लाःमला खुङगीइ योबाक्याला टीःसी, “मीःक्याइ ङाःला सु इःङे लाःकुदुबा?” 28खुङक्याइ लाःसी, “लाःलेइ बप्तीस्मा तेर्केन युहन्ना लाःकुदु, लाःलेइ एलीया लाःकुदु ओःले राःङ्साक्याइदी कोन्ज्योइ लेःङ्गो तेर्केन मीःक्यालाःम्ले मेःन्दा चीग इःङे लाःकुदु।” 29येशुइ खुङक्याला टीःसी, “इःनाङ ख्योक्याइदी ङाःला सु इःङे लाःकुबा ले?” पत्रुसकीइ लेःन लोदी लाःसी, “ख्या थार्च्युगेन ख्रीष्ट इःङे।” 30ओःले येशुइ खुङक्याला खुङगीइ बारेला सुलाङ माःलाःप लाःती चोक्पो आज्ञा तेर्सी।
येशुइ फीर्च्या राःङ सीगेन ङीःमाइ बारेला लाःक्योक
(मत्ती १६:२१-२३; लुका ९:२२)
31ओः तीङ्ला येशुइ योबाक्याला राःङगीइ बारेला एःन्डु लाःकाला स्युःसी, “ङाः मीःइ पुःइ माःङ्बुरा तुःक्पु ज्योर्कोःउए। ओःले ङाःला छेस्यो मीःक्याइ, छेस्यो पुजाहारीक्याइ ओःले छ्येइ ठीमगीइ लोबेनक्याइ इन्कार पेःगेन एः, ओःले सेकेन एः, इःनाङ ङीःमा सुम तीङ्ला ङाः फीर्च्या सोम्बो काःल्दी लाःङेन एः।” 32एःन्डुले खुङगीइ योबाक्याला दी ताम साङ्बुले लाःतेर्सी। ओः सोङ्गारा, पत्रुसकीइ खुङला छ्यो चीगला खेर्सी ओःले के तेङ्सी। 33इःनाङ येशु लोःदी राःङगीइ योबाक्याला तादी, पत्रुसला हाप्साल तेङ्दी लाःसी, “ए शैतान, ङाःलाःम्ले थारीःङ्बु सुङ! चीलेलाःना ख्योइ ठीवा कोन्ज्योलाःम्ले ओःङ्क्योक मीःङे, इःनाङ मीःलाःम्ले ओःङ्क्योक इःङे।”
योबाइ पेःकोःन लेःगा
(मत्ती १६:२४-२८; लुका ९:२३-२७)
34ओः तीङ्ला येशुइ राःङगीइ योबाक्या ओःले ओःला एःक्योक मीःक्याला केक्याःप्सी ओःले लाःसी, “तदो, सुङ ङाःइ योबा ओःङेन सेम पेःउए लाःना खुङगीइ राःङगीइ सेःम्बाक्या इन्कार पेःज्युक ओःले तेन्दुरा खुङगीइ क्रुस खुर्ती#८:३४क्रुस खुर्ती क्रुस खुर्चे लाःक्योकदी येशुइ लागी तुःक्पु खुर्चे ओःले सीकोःनाङ सीजे तयार डोगेन्दी इःङे। ङाःला ब्य्राङ्ज्युक। 35चीलेलाःना राःङगीइ मीःली सेन्च्युजे छोल्गेन्दीइ ओःखो सीच्युगेन एः, इःनाङ राःङगीइ मीःली ङाःइ लागी ओःले याःबु लेःङ्गोइ लागी सीच्युगेन्दीइदी ओःखो सेन्च्युगेन एः। 36मीःइ थाम्जेर जाम्बुलीङरा राःङगीइ लाःक्पाला लेःङ्नाङ राःङगीइ मीःलीदी#८:३६ मीःलीदी दीला मीःली लाःती नाःमाङ मीसीगेन मीःजीला लाःक्योक इःङे। सीच्युसी लाःना खुङला ची क्युःक्सो काःल्बा ले? 37ची मीःइ राःङगीइ नाःमाङ मीसीगेन मीःजी ज्योर्चेला खुङगीइ कोन्ज्योला तेर्केन्दी चीङ ताम एःपा ले? 38दी माःताक्पा ओःले व्यभीचारी पुस्ताला काःखोइ ङाः ओःले ङाःइ लोप्क्योकला ङोःछा पेःउबा, खुङला ङाः मीःइ पुःइयाङ राःङगीइ आबाइ महीमा ख्योङ्दी चाङ्मा स्वर्गदुतक्या ङीमु ओःङ्गासुना राःङगीइदी लाःचे ङोःछा पेःगे।”
S'ha seleccionat:
मर्कुस 8: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2025 by Nepal Bible Society and Wycliffe Bible Translators, Inc.