रोमियों 4
4
अब्राहम बुशाहे संघे धर्मी होऊ
1तेबा हामे कैह बोले, कि हमारे शरीरा रे बापू अब्राहमा कैह भेटा। 2किबेकि अगर काम का अब्राहम धर्मी होलअ, तेबा तेऊ घमड करना, पर परमेश्वरा नेड़ नांई। 3पवित्र शास्त्र कैह बोलदा? एडा कि अब्राहमे परमेश्वरा पेन्दे बुशाह करू, होर यह तेऊवै धार्मिकता रा काम गिणू। 4कामा करने आले री मजदूरी दिणी दान नांई आंदा, सह तेऊरा हक हुंदा। 5पर जोह काम नांई करदअ पर बिना भक्ति करी करे धर्मी हुणे का बुशाह करदा तेऊरा बुशाह तेऊ धर्मी ठहराऊंदा। 6जासू मणशा परमेश्वर बिना कर्मे संघा धर्मी ठहराऊंदा तेऊवै दाऊद भी धन्य बोलदा।
7धन्य साहा सह जासका अधर्म माफ होऊ, होर जासके पाप ढोपी।
8धन्य साहा सह मणश जासके पापा रा लेखा जोखा प्रभु नांही डाहे।
9तेबा कैह या धन्य बचन, खतना आले वै साहा या खतना रहित आले वै भी आसा? हामे यह बोल्दा, अब्राहमा वै तेऊरा बुशाह धार्मिकता गिणू। 10तेबा सह केहडे फेरे होऊ? खतना री दशा में या बिना खतना री दशा में, खतना री दशा में नांई पर विना खतना री दशा में। 11तेऊ खतना रअ चिन्ह पाऊ कि तेऊ बुशाह री धार्मिकता पेन्दे छाप हो, जोह तेऊरे विना खतना री दशा में डाहूदअ थी, जासू का सह त्याह सभी रअ पिता रहू, जोह बिना खतना री दशा में बुशाह करे कि त्याह धर्मी होई। 12होर त्याह खतना करने आले रअ पिता हो, जोह नाह खतना करी दे साहा, पर मेरे पिता अब्राहमे तेऊरे बुशाह पेन्दे चलदा, जोह तेऊरे बिना खतना री दशा में करूदा साहा।
बुशाह रे जरिये प्रतिज्ञा रा मिलना
13किबेकि यह प्रतिज्ञा करी कि सह संसारा रअ मालक हुणअ, ना अब्राहमा वै नाह तेऊरे बंशा वै व्यवस्था संघे दिनी दी थी, पर बुशाह री धार्मिकता संघे भेटीदी थी। 14किबेकि अगर व्यवस्था रे अधीन रहण आले मालक होई, तेबा बुशाह होर प्रतिज्ञा थोगे होई। 15रोषा वै जन्म दिंदा होर जखे व्यवस्था नांई साहा तखे तेत्का झगडा भी नांई हुंदा।
16सभे साहा बुशाह पेन्दे, होर तेबा अनुग्रहा पेन्दे रहंदा। सह ना कसम त्या लोका पेन्दे, जो व्यवस्था मना, जोह सभी बंशा पेन्दे लागू हुंदा त्या सभी पेन्दे, जोह अब्राहमा साही बुशाह करा। अब्राहम हामा सभी रअ बापू साहा। 17जेड़ा लिखूदा साहा मांई तुह खासी जाति रअ पिता बणाऊ तेऊ परमेश्वरा रे सामने जासू पेन्दे तेऊ बुशाह करू होर जोह मुयदे भिआक जिऊंदे करदा होर जोह गला नांई साहा त्याह एड़ा बोला कि त्याहे साहा।
18तेऊ निराशा में भी आशा डाही करे भी बुशाह करू एउ साबे कि तेऊ बचना रे साबे कि तेरा बंश एडा हुणा कि सह बहू जाति रअ पिता हुणअ। 19जोह सह एकी शअ साला रअ थी, आपणे मरीदे शरीरा होर सारा रे गर्भा री मरी दी दशा जाणी करे भी बुशाह में कामज़ोर नांई होऊ। 20होर नाही अबिश्बास होई करे परमेश्वरा री प्रतिज्ञा वै शक नांई करू पर बुशाहा में पाके होई करे परमेश्वरा री महिमा करी। 21होर पाका बुशाह करू की जोह परमेश्वरा का मागू तेऊ री प्रतिज्ञा पुरी करने री समार्थ साहा। 22एऊ साबे यह तेऊवै यह धार्मिकता गिणी।
23होर यह वचन बुशाह तेऊवै धार्मिकता गिणू नांही तेऊवै होर तेऊवै लिखूद साहा। 24पर हामा वै भी जासका बुशाह धर्म गिणू दा साहा मतलब हामें जोह तेऊ पेन्दे बुशाह करे जासुये हामारे परमेश्वर यीशु मुयदे मे जिऊंदअ करू। 25सह हमारे पापा री तणी ढाकु होर धर्मी हुणे री तणी जिऊंदअ करू।
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.