रोमियों 1
1
अभिवादन
1पौलुसा री तरफा का जोह यीशु मसीहा रे दास साहा, होर प्रेरित बणाउणे री तणी शादूदअ साहा, होर परमेश्वर रे तेऊरे सुसमाचारा री तणी जुदअ करूदअ साहा। 2जासू री तेऊ पहिले ही का आपणी भविष्यद्वक्ता सगा पवित्र शास्त्रा में शुभ समाचारा री प्रतिज्ञा करी थी, 3आपणे शोहरू परमेश्वर यीशु मसीहा रे बारे में प्रतिज्ञा करी थी; सह शरीरा रे भावा में दाऊदा रे बंशा में का पैदा होऊ। 4होर पवित्र आत्मा रे भावा मे मरने मे का पुनरुत्थान हूँणे री बजा का सामर्थ्य संधे परमेश्वरा रअ शोहरू (यीशु मसीहा) होऊदअ साहा। 5तेऊका हामा अनुग्रह होर प्रेरिताई भेटी कि तेऊरे ना री बजाह का सभी जाति रे लोका बुशाह करी करे तेऊरी मने, 6जासू में तमे भीं यीशु मसीहा रे हुणे री तणी शादी दे साहा। 7त्याह सभी रे ना जोह रोमा में परमेश्वरा रे प्यारे साहा होर पवित्र हुणे री तणी शादी दे साहा म्हारे बापू परमेश्वर होर परमेश्वर यीशु मसीहा री तरफा का तमा बे अनुग्रह होर शांति भेटती रहे।#इफि 1.2
धन्यवादा री प्रार्थना
8पहिले तमा सभी वै यीशु मसीहा री तरफा का आपणे परमेश्वरा वै धन्यवाद करदा, किबेकि थारे बुशाह री चरचा सारे संसारे हुन्दी लगीदी साहा। 9पर परमेश्वरे जासकी सेवा में आपणी आत्मा का तेऊरे शोहरू रे सुसमाचार रे बारे में करदा सह मेरी गुआही साहा कि हाऊं तहा कैहडे सावै लागातार याद करदअ रहू। 10होर लागातार आपणी प्रार्थना में अरजा करदा, कि केहडे साबे एबा ताह सेटा वै इहणे री मेरी यात्रा परमेश्वरा री इच्छा रे साबे ठीक हो। 11किबेकि हाऊं ताहका मिलणे री इच्छा डांहदा कि हाऊं ताहवै कैह आत्मिक वरदान दे जासु का तमे पाके रहे; 12मतलव यह कि जेबरे तणी हाऊं तमे संघा साहा, तेबा हामें तेऊ बुशाह री तणी जोह महा में साहा होर तमामें साहा, एकी दूजे का हिम्मत पाये। 13हे भाईयो, हाऊं नांई चाहन्दा कि तमे एताका अंजान रहे कि माए भी तमा सेटा वै ईहणा चहाहु, कि जेहड़ा महा वै दूजी अन्यजाति में फल भेटा, तेड़ा तमा भी भेटे, पर हाऊ एबरे तणी रोकू दअ साहा। 14हाऊं यूनानी होर अन्य भाषा रे होर बुद्धिमाना रे होर निर-बुद्धियो रअ कर्जदार साहा। 15एतकि तणी हाऊं तमाबे जोह रोमा में रहंदा, सुसमाचारा शुणने बे त्यार साहा।
धर्मी बुशाह में जिउंणा
16किबेकि हाऊ सुसमाचारा में नांई शरमाऊदअ, किबेकि सह हर एकी बुशाह करने आले वै, पहिले यहूदी तेऊकी यूनानी वै उद्धारा रे साबे परमेश्वरा री सामर्थ्य यह साहा। 17किबेकि तताका परमेश्वरा री धार्मिकता बुशाह का होर बुशाह वै प्रकट हुंदा; जेहड़ा लिखुदा साहा, बुशाह का धर्मी मणश जिऊंदअ रहण।
अधार्मिकता पेन्दे परमेश्वरा रा रोष
18परमेश्वरा रा रोष त्याह लोका वै सभी अभक्ती होर अधर्मी पेन्दे स्वर्गा का प्रकट हुंदा, जोह सच्ची गल्ला होर अधर्मी दबाई डाहंदा। 19किबेकि परमेश्वरा रे बारे में ज्ञान त्याह रे पेन्दे प्रकट साहा, किबेकि परमेश्वरे त्याह पेन्दे प्रकट करूदा साहा। 20तेऊरे अनदेखे गुण, तेऊरी सनातन सामर्थ्य यह होर परमेश्वर, धरती री सृष्टि रे वक्ते तेऊरे कामा रे जरिये हेरदा साहा, अखे तणी कि त्या लागातार साहा। 21एसा बजा का परमेश्वरा जाणने मे भी त्याहे परमेश्वरा रे लायक बड़ाई होर धन्यवाद नांई करू, पर बेकारा में विचारा करदे लागे, अखे तणी की त्या रा निर्बुद्धी मन निहारा होऊ। 22त्याहे आपणे आपा वै बुद्धीमान बणी करे भी मुर्ख बणी। 23होर अविनाशी परमेश्वरा री महिमा वै नाशवान मणश, होर चेलू होर सारी पशु री मूर्ति री समानता में बदलू। 24एडे फेरे परमेश्वरे त्याह रे मना री इच्छा रे साबे अशुद्धता वै छाड़ी कि त्याह आपु में आपणे शरीरा रा अनादर करे। 25किबेकि त्याह परमेश्वरा री सच्ची गल्ला झूठी बणाई होर सृष्टि री पूजा करदे लागे, ना की तेऊरी जोह बणाउण आलअ जोह सदा धन्य साहा। 26तेबा परमेश्वरे त्याह बुरे कामा रे बशा मे छाड़ी; अखे तणी की कि त्याह री वेटड़ी भी आपणे मर्दा छाडी करे होरी संगे सम्बन्ध बणाई। 27तेहडे ही मर्द भी बेटड़ी संगे अपणा सम्बन्ध छाडी करे आपु में गलत काम करी करे आपणी मेहनता रा ठीक फल पाऊ। 28होर त्याहे परमेश्वरा पछैड़ने वै नांई करू तेबा परमेश्वरे भी त्या रे निकम्मे मना रे साबे छाड़ी दिने कि त्याह एडा काम करे। 29तेबा त्याहे सभी तरह रे अधर्मा रे कामा, होर दुष्टता होर लालच होर बैर-भाव संगा भरी होर डाह होर हत्या होर झगड़ होर छल होर इर्ष्या होर चुगलखोर होई, 30बदनाम करने आले, परमेश्वरा का रोषा डाहण आले, दूजे री बेचती करने आले, घमण्डी, डींग मारन आले, बुरी-बुरी गल्लां बणाउण आले, आपणे आम्मा बापू री आज्ञा नांई शुणन आले, 31निर्बुद्धि, बुशाहघाती, रोषा आले होर निर्दई होई। 32त्याहे परमेश्वरा री एसा बिधि जाणा, कि एडे काम करने आले मऊती रे दण्ड लायक साहा, तेबा तमे आपे तेहडे काम करा पर तेहडे कामा करने आले का भी खुश हुन्दा।
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.