प्रेरित 26
26
अग्रिपा जेह पोलुसा रा सच खोजणा
1अग्रिप्पा पौलुसा बे बोलू, ताह आपणे बारे में बोलणे री आज्ञा साहा। तेबा पौलुस हाथ बढाई करे उतर दींदअ लागअ। 2हे राजा अग्रिप्पा, जेतरी गला रा यहूदी माह पैंदे दोष लाऊंदा, आज तेरे सामने त्यावे उतर दींणे बे आपणे आपा का धन्य समझदा। 3खासकर तेबा कि तूह यहूदी रे व्यबहारा होर बडी रांबडी तरह जांणदा। अतः हाँउ बिनती करदा, कि ध्याना संघे मेरी गला शूणा।
4मेरा चाल चलन पहिले आपणी जाति में बीचे होर यरूशलेमा में जेह्डा थी, यह सभे यहूदी जाणदा। 5जेबा त्याह गुआही दींणा चाहंदा, तो पहिले का माह पछेणदा कि हाँऊ फरीसी होई करे आपणे धर्मा में सभी का खरे पंथा में जिंदगी बिताई दी आसा। 6होर एबा माहा पैंदे न्याय चलदा लागा दा साहा, किबेकी माहा तेसा प्रतिज्ञा री आशा आसा, जोह परमेश्वरे माहरे बजुर्गे संघे करी थी। 7तेसा प्रतिज्ञा रे पुरे हूंणे री आशा लाई दी, माहरे बारह गोत्र आपणे पुरे मना संघे राच धयाड परमेश्वरा री नमस्ते करदे आऊदअ साहा। हे राजा, एसी आशा री बजा यहूदी माह पैंदे दोष लांऊंदा। 8जेबा कि परमेश्वर मुंएदे जिऊंदअ करदा, तेबा थारे या बिचार किबे बिश्वासा लायक नांई आंदे। 9हाँउ भी समझदा, कि यीशु नासरी ना रे बिरोधा में माह बहू कुछ करणा। 10होर मांई यरूशलेमा में एह्ड़ा ही करू, प्रधान याजका का अधिकार पाई करे बहू पवित्र मणश मांई जेला में डाही, होर जेभरे त्याहा मारदा, तेबा त्याहर बिरोधा में आपणी सहमति दिंदा। 11हर एक प्रार्थना घरा में नांही करे हाँऊ ताड़ना दिलाई करे यीशु री निंदा करदा थी, अखे तणी गुस्से में पागल होऊ कि नगरा बागे भी हाँऊ त्याह सताऊँदा थी,
आपणा मन परिबर्तन
12एडे सावे हाँउ प्रधान याजका कअ अधिकार होर आज्ञा लईकरे दमिश्क नगरा बे नांहदअ लागअदअ। 13तेबा हे राजा रास्ते में दोपहरा रे वक्ता मांई सरगा का सुरजा का तेज बडी करे एक परीयाषा आपणे होर जोह मेरे होर मेरे साथी रे चहु फेरे चमकदी लागी थी। 14जेबा हामे सभे धरती नेहटे पड़ी, तेबा मांई इब्रानी भाषा में बोलदअ एक शब्द शुंणू, हे शाऊल, तूह माह किबे सताऊँदा? तेऊ पैंदे लात बाहणी मुश्किल हूंदा।
15मांई बोलू, हे परमेश्वर तूह कूण साहा? परमेश्वरे बोलू, हाँऊ यीशु सा जासू तूह सताऊँदा। 16पर तूह उठ, आपणी टांगा पैंदे खडअ हो किबेकी मांई ताह बे एतकी तणी दर्शन दिन कि ताह त्याह गलां रे भी सेबक होर गुआही ठहराऊ, जोह तांई हेरी होर त्याह रे भी जासू की तणी माह ताह बे दर्शन दींणे। 17होर हाँउ ताह तेरे लोका का होर अन्यजाति छुड़ाऊदअ रहलअ, जासू सेटा मांह तूह एबा भेजणअ लाऊ। 18कि तूह त्याहरी आछी खोले कि त्या न्यारे का प्रयाषे फेरा बे, होर शैताना रा अधिकारा का परमेश्वरा फेरा बे फिरे कि पापा री क्षमा होर त्याह लोके संघे जोह माह पैंदे बुशाह करणणे री बजा का पवित्र होई दे साहा। आपणे कामा का परिबर्तन पाए। 19अतः हे राजा अग्रिप्पा मांई तेऊ स्वर्गीय दर्शना री गअल नांई टाली। 20पर पहिले दमिश्का रे तेहुकी यरूशलेमा रे होर तेबा यहूदी रे सारे देशा में रहण आले होर अन्यजाति भी समझाऊँदअ रहू, कि मन फरेऊण होर परमेश्वरा फेरा बे मन फिराउणे रा काम करा। 21याह गला री बजा यहूदी माह मंदिरा में डाहकी करे मारणे रा यत्न करदे लागे।
22पर परमेश्वर री सहायता संघे हाँऊ आज तणी ठीक सा, होर ओछे बडे सभी रे सामने गुआही दिंदा, होर त्याह गला छाडी होर कुछ नांई बोलदअ जोह मूसा री व्यवस्था होर भविष्यद्वक्ता भी बोलूदा। 23कि मसीहां दुःख आऊअ चकणा होर सह सभी का पहिले पुनरुत्थान मेंज़ा का जींऊंदअ हूंणअ माह लोका में होर अन्यजाति में ज्योति रा प्रचार करणा। 24जेबा सह एहडी तरह उतरा दींदअ लागअ, लागअदअ तेबा फेस्तुस ज़ोरे बोलू, हे पौलुसा तूह पागल साहा। बहू ज्ञाने तूह पागल करू। 25पौलुसे बोलू, महामहिम फेस्तुस हाँऊ पागल नांई आंहदअ, पर सच्चाई होर बुद्धि री गला करदा। 26राजा भी जासके सामने होऊ निडर होई करे समझाऊदअ लागअ, या गल्ला तुह जांणदा; होर माह बुशाह साहा कि याह गला तेऊ का कोई भी गअल छिपी दी नांई आंहदी किबेकी यह घटना कासु होरी संघे घटी दी नांई आंहदी। 27हे राजा अग्रिप्पा कैह तूह भविष्यद्वक्ता पैंदे बुशाह करदा? हां हाँऊ जांणदा कि तूह बुशाह करदा। 28तेबा अग्रिप्पा पौलुसा बे बोलू, तूह थोड़े ही समझाउणे कअ माह मसीही बणाऊंणअ चांहदा? 29पौलुसे बोलू, परमेश्वरा कअ मेरी प्रार्थना साहा कि कैह थोड़े में कैह बहू में केबल तूह ही नांई पर जेतरे लोका आज मेरी शुंणदा, याह बंधन छाडी त्याह माह जेडे होये। 30तेबा राजा होर राज्यपाल होर बिरनीक होर तेऊ संघे बेशणे आले खडे उठी। 31होर अलग नांही करे आपु में बोलदे लागे, यह मणश एह्ड़ा ताह कीछे नांई करदअ जोह मृत्यु दण्ड या जेहला रे बंधना में डाहणे लायक साहा। 32अग्रिप्पा फेस्तुसा कअ बोलू, ज़ेबा यह मणश कैसरा री दोहाई नांई दींदअ तेबा छुटी सकदा,।
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.