Izai 7
7
1Lepok Akaz, garson Yotam, ti-garson Ozias ki ti lerwa Zida, Rezinn, lerwa Aram, e Peka, lerwa Izrael, garson Remalyaou, ti atak Zerizalem. Me zot pa finn reisi kaptir li. 2Akaz, desandan David, tann dir ki Aram finn zwenn ar Efraim. So leker tranble, e leker so pep tranble kouma lafore dan siklonn.
3Lerla, LESEGNER dir Izai: “Sorti pou to al zwenn Akaz, twa e Sear-Yasouv to garson, lao laba kot finision kanal ki sort dan rezervwar, lor larout dan landrwa kot abitie lav linz. 4E to pou dir li: “Pran kont, res trankil. Napa gagn per. Pa perdi kouraz divan sa de bout sarbon ki pe fer lafime-la e akoz lakoler Rezinn, Aram e garson Remalyaou. 5Parski Aram, Efraim e garson Remalyaou finn manigans kont twa kan zot finn dir: 6‘Anou atak Zida. Anou fer li gagn per. Anou kraze, rantre. Nou ava fer garson Tavel vinn so lerwa.’” 7Ala seki LESEGNER pe dir:
“Pena sime sa arive
8Parski latet Aram se Damas,
e latet Damas, se Rezinn;
ankor swasann-sink an, e Efraim pou nepli enn pep.
9Latet Efraim se Samari,
e latet Samari, se garson Remalyaou.
Si zot pa tini ferm,
zot pa pou kapav reziste.”
Izai donn Akaz enn sign
10LESEGNER ti kontign koz ar Akaz: 11“Dimann enn sign pou twa divan LESEGNER to Bondie, swa depi profonder later, ouswa depi oter lesiel.” 12Akaz dir: “Mo pa pou dimann nanye, e mo pa pou teste LESEGNER.” 13Lerla Izai reponn: “Tande, twa lakaz David! Li pa ase ki zot fatig bann zom? Zot bizin fatig mo Bondie osi parey? 14Ala kifer LESEGNER limem pou donn zot enn sign: Ala zennfi la pou ansint. Li pou gagn enn zanfan, enn garson, e li pou apel Emaniel, ki vedir Bondie avek nou. 15Li pou manz lakrem ek dimiel ziska seki li konn rezet lemal e swazir lebien. 16Parski, avan mem ki garson-la konn rezet lemal e swazir lebien, sa later kot sa de lerwa-la pe fer twa per, pou abandone. 17LESEGNER pou fer vinn lor twa, lor to pep e lor lakaz to papa, enn lepok ki zame pa ti ankor trouve depi separasion Efraim avek Zida, lerwa Asour.
18Sa zour la, kan li sifle, LESEGNER pou anvoy bann mous ki lot kote larivier Lezip, e li pou anvoy bann mous dimiel ki dan pei Asour. 19Zot pou vini, e zot tou pou poz dan bann larivier, dan bann ravin e dan fant bann ros, lor bann bwison partou kot ena dilo.
20Sa zour-la, LESEGNER pou raz avek enn razwar ki li finn lwe lot kote larivier avek lerwa Asour: seve, pwal lazam, mem labarb, li pou tire.
21Sa zour la, sakenn pou debat zis avek enn ti vas ek de kabri. 22Prodiksion dile pou telman boukou ki seki reskape dan milie pei pou manz dile kaye ek dimiel.
23Sa zour-la, tou bann landrwa kot ti ena mil pie rezin valer mil pies larzan, pou vinn pikan loulou. 24Pou rantre avek bann fles e avek bann ark parski pei-la antie pou ranpli ar pikan loulou. 25To pou nepli al lor bann montagn kot ti pe pas pios, akoz bann pikan loulou-la: li pou vinn enn landrwa kot bef manze ek mouton traverse.”
Kreol Morisien OT Portions © Bible Society of Mauritius, 2020.